ꠎꠦꠞꠥꠎꠣꠟꠦꠝꠅ ꠀꠈꠦꠞꠤ ꠍꠚꠞ
২১
১ ꠁꠚꠤꠍꠞ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠞ ꠉꠦꠍ ꠕꠣꠇꠤ ꠛꠤꠖꠣꠄ ꠟꠁꠀ,
ꠎꠣꠎ ꠈꠥꠟꠤꠀ ꠢꠣꠞꠤ ꠀꠝꠞꠣ ꠡꠥꠎꠣ ꠙꠕꠦ ꠇꠥꠍ ꠘꠣꠝꠞ ꠖꠤꠙꠅ ꠀꠁꠟꠣꠝ,
ꠛꠣꠖꠞ ꠖꠤꠘ ꠀꠝꠞꠣ ꠞꠥꠖꠍ ꠖꠤꠙꠅ ꠀꠁꠟꠣꠝ,
ꠢꠘ ꠕꠣꠇꠤ ꠙꠣꠔꠣꠞꠣ ꠘꠣꠝꠞ ꠐꠣꠃꠘꠅ ꠉꠦꠟꠣꠝ।
২ ꠢꠘꠅ ꠉꠤꠀ ꠢꠣꠞꠟꠦ ꠚꠂꠘꠤꠇꠤꠀꠔ ꠎꠣꠅꠞꠣ ꠄꠇꠈꠣꠘ ꠎꠣꠎ ꠙꠣꠁꠟꠣꠝ,
ꠀꠝꠞꠣ ꠢꠃ ꠎꠣꠎꠦ ꠞꠅꠀꠘꠣ ꠖꠤꠟꠣꠝ।
৩ ꠀꠞ ꠎꠦꠛꠟꠣ ꠍꠣꠁꠙ꠆ꠞꠣꠍ ꠖꠤꠙ ꠖꠦꠈꠟꠣꠝ,
ꠅꠃ ꠡꠝꠄ ꠖꠤꠙꠞ ꠒꠣꠁꠘ ꠉꠣꠟꠣꠛꠣꠄ ꠉꠤꠀ ꠀꠝꠞꠣ ꠡꠤꠞꠤꠀ ꠖꠦꠡꠞ ꠡꠥꠞ ꠐꠣꠃꠘꠅ ꠀꠁꠀ ꠟꠣꠝꠟꠣꠝ।
ꠢꠤꠈꠣꠘꠅ ꠎꠣꠎꠞ ꠝꠣꠟ-ꠍꠣꠝꠣꠘꠣ ꠟꠣꠝꠣꠁ ꠖꠤꠟ।
৪ ꠢꠘꠞ ꠝꠥꠝꠤꠘ ꠅꠇꠟꠞꠦ ꠔꠥꠇꠣꠁꠀ ꠢꠣꠞꠤ ꠀꠝꠞꠣ ꠡꠣꠔ ꠖꠤꠘ ꠔꠣꠞꠣꠞ ꠉꠦꠍꠦ ꠞꠁꠟꠣꠝ;
ꠔꠣꠞꠣ ꠙꠣꠇ ꠞꠥꠢꠥꠞ ꠝꠣꠞꠚꠔꠦ ꠙꠣꠃꠟꠥꠍꠞꠦ ꠝꠤꠘꠔ ꠇꠞꠟꠣ,
ꠔꠣꠁꠘ ꠎꠣꠘꠥ ꠎꠦꠞꠥꠎꠣꠟꠦꠝꠅ ꠘꠣ ꠎꠣꠁꠘ।
৫ ꠁꠘꠅ ꠇꠄꠖꠤꠘ ꠇꠣꠐꠣꠘꠤꠞ ꠛꠣꠖꠦ ꠀꠝꠞꠣ ꠢꠤꠞꠛꠣꠞ ꠞꠅꠀꠘꠣ ꠅꠁꠟꠣꠝ,
ꠔꠦꠃ ꠔꠣꠞꠣ ꠢꠇ꠆ꠇꠟꠦ ꠛꠃ-ꠛꠣꠁꠌ꠆ꠌꠣ ꠟꠁꠀ ꠐꠣꠃꠘꠞ ꠛꠣꠞꠦ ꠀꠁꠀ ꠀꠝꠞꠣꠞꠦ ꠀꠉꠥꠀꠁ ꠖꠤꠟꠣ।
ꠛꠣꠖꠦ ꠖꠞꠤꠀꠞ ꠙꠣꠞꠅ ꠀꠝꠞꠣ ꠀꠐꠥ ꠉꠣꠠꠤꠀ ꠖꠥꠀ ꠇꠞꠟꠣꠝ।
৬ ꠖꠥꠀ ꠛꠣꠖꠦ ꠎꠣꠞꠎꠤꠞ ꠙꠕꠦ ꠛꠤꠖꠣꠄ ꠟꠁꠀ ꠀꠝꠞꠣ ꠎꠣꠎꠅ ꠃꠑꠟꠣꠝ,
ꠀꠞ ꠔꠣꠞꠣ ꠘꠤꠎꠞ ꠛꠣꠠꠤꠔ ꠉꠦꠟꠣꠉꠤ।
৭ ꠡꠥꠞ ꠕꠣꠇꠤ ꠞꠅꠀꠘꠣ ꠅꠁꠀ ꠀꠝꠞꠣ ꠎꠣꠎꠞ ꠍꠚꠞ ꠡꠦꠡ ꠇꠞꠤꠀ ꠔꠟꠤꠝꠣꠁꠔ ꠀꠎꠤꠟꠣꠝ,
ꠢꠘꠞ ꠝꠥꠝꠤꠘ ꠅꠇꠟꠞꠦ ꠜꠣꠟꠣ-ꠛꠥꠞꠣ ꠎꠤꠇꠣꠘꠤꠞ ꠛꠣꠖꠦ ꠀꠝꠞꠣ ꠔꠣꠞꠣꠞ ꠟꠉꠦ ꠄꠇꠖꠤꠘ ꠞꠁꠟꠣꠝ।
৮ ꠛꠣꠖꠞ ꠖꠤꠘ ꠀꠝꠞꠣ ꠛꠤꠖꠣꠄ ꠟꠁꠀ ꠇꠂꠍꠞꠤꠀꠔ ꠀꠁꠟꠣꠝ,
ꠀꠞ ꠔꠛꠟꠤꠉ ꠇꠣꠝꠞ ꠛꠥꠎꠥꠞ꠆ꠉ ꠚꠤꠟꠤꠚꠞ ꠛꠣꠠꠤꠔ ꠉꠦꠟꠣꠝ।
ꠄꠁꠘ ꠔ ꠎꠦꠞꠥꠎꠣꠟꠦꠝꠞ ꠢꠃ ꠡꠣꠔ ꠈꠣꠖꠤꠝꠖꠣꠞꠞ ꠄꠇꠎꠘ।
৯ ꠔꠣꠘ ꠌꠣꠁꠞꠎꠘ ꠀꠛꠤꠀꠔꠤ ꠙꠥꠠꠤꠘ ꠀꠍꠟꠣ,
ꠄꠞꠣ ꠘꠛꠤꠞ ꠟꠣꠈꠣꠘ ꠅꠢꠤ ꠇꠁꠔꠣ।
১০ ꠛꠣꠇ꠆ꠇꠣ ꠇꠄꠖꠤꠘ ꠢꠘꠅ ꠞꠅꠀꠞ ꠛꠣꠖꠦ ꠀꠉꠣꠛꠥꠍ ꠘꠣꠝꠞ ꠄꠇꠎꠘ ꠘꠛꠤꠄ ꠄꠢꠥꠖꠤꠀ ꠕꠣꠇꠤ ꠔꠡꠞꠤꠚ ꠀꠘꠟꠣ।
১১ ꠔꠣꠁꠘ ꠀꠁꠀ ꠢꠣꠞꠤ ꠙꠣꠃꠟꠥꠍꠞ ꠇꠝꠞꠞ ꠔꠣꠉꠣ ꠈꠥꠟꠤꠟꠤꠟꠣ,
ꠀꠞ ꠁꠐꠣꠖꠤ ꠘꠤꠎꠞ ꠀꠔ-ꠙꠣꠅ ꠛꠣꠘ꠆ꠖꠤꠀ ꠇꠁꠟꠣ,
“ꠙꠣꠇ ꠞꠥꠢꠦ ꠅꠃꠟꠣ ꠇꠁꠞꠣ,
ꠎꠦꠞꠥꠎꠣꠟꠦꠝꠞ ꠁꠢꠥꠖꠤ ꠅꠇꠟꠦ ꠅꠃ ꠇꠝꠞꠞ ꠔꠣꠉꠣ ꠀꠟꠣꠞꠦ ꠅꠃꠟꠣ ꠛꠣꠘꠛꠣ,
ꠀꠞ ꠅ-ꠁꠢꠥꠖꠤ ꠅꠇꠟꠞ ꠀꠔꠅ ꠡꠙꠤꠀ ꠖꠤꠛꠣ।”
১২ ꠁꠔꠣ ꠢꠥꠘꠤꠀ ꠢꠤꠘꠞ ꠝꠣꠘꠡꠦ ꠀꠞ ꠀꠝꠞꠣꠅ ꠙꠣꠃꠟꠥꠍꠞꠦ ꠛꠃꠔ ꠝꠤꠘꠔ ꠇꠞꠟꠣꠝ,
ꠔꠣꠁꠘ ꠎꠣꠘꠥ ꠎꠦꠞꠥꠎꠣꠟꠦꠝꠅ ꠎꠣꠅꠀ ꠛꠣꠖ ꠖꠤꠟꠣꠁꠘ।
১৩ ꠙꠣꠃꠟꠥꠍꠦ ꠇꠁꠟꠣ,
“ꠔꠥꠝꠞꠣ ꠁꠔꠣ ꠇꠤꠔꠣ ꠟꠣꠉꠣꠁꠟꠣꠄ?
ꠇꠣꠘ꠆ꠖꠤꠀ ꠀꠝꠣꠞ ꠝꠘ ꠜꠣꠋꠉꠤ ꠖꠤꠞꠣꠄ ꠇꠦꠘꠦ?
ꠢꠎꠞꠔ ꠁꠍꠣꠞ ꠟꠣꠉꠤ ꠀꠝꠤ ꠎꠦꠞꠥꠎꠣꠟꠦꠝꠅ ꠈꠣꠟꠤ ꠛꠘ꠆ꠖꠤ ꠅꠀꠃ ꠘꠣꠄ,
ꠝꠞꠔꠦꠅ ꠔꠤꠀꠞ ꠀꠍꠤ।”
১৪ ꠔꠣꠘꠞꠦ ꠇꠕꠣ ꠢꠥꠘꠣꠁꠔꠣꠝ ꠘꠣ ꠙꠣꠞꠤꠀ ꠀꠝꠞꠣ ꠘꠤꠞꠣꠁ ꠅꠁꠉꠦꠟꠣꠝ,
ꠀꠞ ꠇꠁꠟꠣꠝ,
“ꠝꠣꠛꠥꠖꠞ ꠝꠞ꠆ꠎꠤ ꠇꠣꠁꠝ ꠅꠃꠇ।”
ꠛꠘ꠆ꠖꠤ ꠢꠣꠟꠔꠦ ꠢꠎꠞꠔ ꠙꠣꠃꠟꠥꠍ (২১:১৫-২৮:৩১)
ꠢꠎꠞꠔ ꠙꠣꠃꠟꠥꠍ ꠎꠦꠞꠥꠎꠣꠟꠦꠝꠅ ꠀꠐꠇ
১৫ ꠛꠣꠖꠦ ꠀꠝꠞꠣ ꠝꠣꠟ-ꠍꠣꠝꠣꠘꠣ ꠉꠣꠁꠐ ꠛꠣꠘ꠆ꠖꠤꠀ ꠎꠦꠞꠥꠎꠣꠟꠦꠝꠅ ꠞꠅꠀꠘꠣ ꠖꠤꠟꠣꠝ।
১৬ ꠇꠂꠍꠞꠤꠀ ꠐꠣꠃꠘꠞ ꠇꠄꠎꠘ ꠝꠥꠝꠤꠘꠅ ꠀꠝꠞꠣꠞ ꠟꠉꠦ ꠀꠁꠟꠣ,
ꠀꠞ ꠍꠣꠁꠙ꠆ꠞꠣꠍ ꠖꠤꠙꠞ ꠝꠦꠘꠣꠍꠘ ꠘꠣꠝꠞ ꠄꠇꠎꠘ ꠙꠥꠞꠣꠘꠣ ꠁꠝꠣꠘꠖꠣꠞꠞ ꠛꠣꠠꠤꠔ ꠀꠝꠞꠣꠞꠦ ꠟꠁꠀ ꠉꠦꠟꠣ।
ꠄꠘ ꠛꠣꠠꠤꠔꠃ ꠀꠝꠞꠣ ꠞꠅꠀꠞ ꠇꠕꠣ ꠀꠍꠤꠟ।
১৭ ꠎꠦꠞꠥꠎꠣꠟꠦꠝꠅ ꠀꠅꠀꠞ ꠛꠣꠖꠦ ꠝꠥꠝꠤꠘ ꠅꠇꠟꠦ ꠈꠥꠡꠤ ꠅꠁꠀ ꠀꠝꠞꠣꠞꠦ ꠇꠛꠥꠟ ꠇꠞꠟꠣ।
১৮ ꠛꠣꠖꠞ ꠖꠤꠘ ꠙꠣꠃꠟꠥꠍꠦ ꠀꠝꠞꠣꠞꠦ ꠟꠁꠀ ꠢꠎꠞꠔ ꠁꠍꠣꠞ ꠜꠣꠁ ꠁꠀꠇꠥꠛꠞ ꠟꠉꠦ ꠝꠥꠟꠣꠇꠣꠔ ꠇꠞꠟꠣ।
ꠢꠤꠈꠣꠘꠅ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠅ ꠀꠁꠟꠣ।
১৯ ꠙꠣꠃꠟꠥꠍꠦ ꠄꠞꠣꠞꠦ ꠜꠣꠟꠣ-ꠛꠥꠞꠣ ꠎꠤꠇꠣꠁꠀ ꠢꠣꠞꠟꠦ,
ꠔꠣꠘ ꠔꠛꠟꠤꠉꠞ ꠝꠣꠎꠖꠤ ꠀꠟ꠆ꠟꠣꠄ ꠇꠤꠟꠣꠘ ꠅ-ꠁꠢꠥꠖꠤ ꠅꠇꠟꠞ ꠝꠣꠎꠦ ꠖꠤꠘꠤ ꠇꠣꠝ ꠢꠣꠍꠤꠟ ꠇꠞꠍꠂꠘ,
ꠁꠔꠣ ꠢꠇꠟꠔꠣ ꠄꠇ ꠄꠇ ꠇꠞꠤ ꠔꠣꠞꠣꠞ ꠉꠦꠍꠦ ꠛꠄꠀꠘ ꠇꠞꠟꠣ।
২০ ꠁꠔꠣ ꠢꠥꠘꠤꠀ ꠝꠥꠞꠛ꠆ꠛꠤ ꠅꠇꠟꠦ ꠀꠟ꠆ꠟꠣꠞ ꠔꠣꠞꠤꠚ ꠇꠞꠟꠣ ꠀꠞ ꠔꠣꠘꠞꠦ ꠇꠁꠟꠣ,
“ꠜꠣꠁ,
ꠔꠥꠝꠤ ꠔ ꠖꠦꠈꠞꠣꠄ,
ꠀꠎꠣꠞ ꠀꠎꠣꠞ ꠁꠢꠥꠖꠤꠄ ꠢꠎꠞꠔ ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠍꠂꠘ,
ꠀꠞ ꠔꠣꠞꠣ ꠢꠇꠟꠦꠃ ꠢꠎꠞꠔ ꠝꠥꠍꠣꠞ ꠡꠞꠤꠅꠔꠞꠦ ꠀꠝꠟ ꠇꠞꠣꠞ ꠈꠤꠀꠟ ꠀꠍꠦ।
২১ ꠅꠁꠟꠦ ꠔꠣꠞꠣ ꠅꠃ ꠈꠛꠞꠅ ꠙꠣꠁꠍꠂꠘ,
ꠅ-ꠁꠢꠥꠖꠤ ꠅꠇꠟꠞ ꠟꠉꠦ ꠎꠦꠔꠣ ꠁꠢꠥꠖꠤ ꠅꠇꠟ ꠕꠣꠇꠂꠘ,
ꠔꠣꠞꠣꠞꠦ ꠔꠥꠝꠤ ꠔꠣꠟꠤꠝ ꠖꠤꠍ ꠝꠥꠍꠣꠞ ꠡꠞꠤꠅꠔ ꠛꠣꠖ ꠖꠤꠟꠣꠁꠔꠣ ꠇꠞꠤ,
ꠔꠣꠞꠣ ꠎꠣꠘꠥ ꠢꠥꠞꠥꠔ꠆ꠔꠣꠂꠘ꠆ꠔꠞ ꠝꠍꠟꠝꠣꠘꠤ ꠇꠞꠣꠘꠤ ꠛꠣꠖ ꠖꠤꠟꠣꠁꠘ ꠀꠞ ꠁꠢꠥꠖꠤ ꠅꠇꠟꠞ ꠞꠦꠅꠀꠎꠅ ꠘꠣ ꠝꠣꠘꠂꠘ।
২২ ꠔꠦ ꠇꠤꠔꠣ ꠇꠞꠣ ꠎꠣꠄ?
ꠔꠣꠞꠣ ꠔ ꠘꠤꠌꠄ ꠢꠥꠘꠛꠣ ꠔꠥꠝꠤ ꠀꠁꠍ।
২৩ ꠅꠈꠘ ꠀꠝꠞꠣ ꠔꠥꠝꠣꠞꠦ ꠎꠦꠟꠣ ꠇꠁ,
ꠔꠥꠝꠤ ꠅꠃꠟꠣ ꠇꠞꠤꠟꠣꠅ।
ꠀꠝꠞꠣꠞ ꠝꠣꠎꠦ ꠌꠣꠁꠞꠎꠘ ꠛꠦꠐꠣꠁꠘ ꠀꠍꠂꠘ,
ꠔꠣꠞꠣ ꠄꠇꠈꠣꠘ ꠝꠣꠘ꠆ꠘꠔ ꠇꠞꠍꠂꠘ;
২৪ ꠔꠥꠝꠤ ꠔꠣꠞꠣꠞꠦ ꠟꠉꠦ ꠟꠁꠀ ꠎꠣꠅ,
ꠔꠣꠞꠣꠞ ꠟꠉꠦ ꠉꠤꠀ ꠔꠥꠝꠤ ꠀꠞ ꠔꠣꠞꠣꠞ ꠙꠣꠇ-ꠍꠣꠚ ꠅꠀꠞ ꠈꠞꠌ ꠀꠞ ꠝꠣꠕꠣꠞ ꠌꠥꠟ ꠇꠣꠝꠣꠘꠤꠞ ꠙꠄꠡꠣꠅ ꠖꠤꠟꠣꠅ।
ꠔꠦꠃ ꠢꠇꠟꠦ ꠎꠣꠘꠛꠣ,
ꠔꠥꠝꠣꠞ ꠘꠣꠝꠦ ꠔꠣꠞꠣ ꠎꠦꠔꠣ ꠈꠛꠞ ꠙꠣꠁꠍꠂꠘ,
ꠁꠔꠣ ꠇꠥꠘ꠆ꠔꠣꠃ ꠘꠣꠄ,
ꠀꠍꠟꠦ ꠔꠥꠝꠤ ꠘꠤꠎꠦꠅ ꠝꠥꠍꠣꠞ ꠡꠞꠤꠅꠔ ꠀꠞ ꠞꠦꠅꠀꠎ ꠝꠣꠘꠞꠣꠄ।
২৫ ꠅꠁꠟꠦ ꠎꠦꠔꠣ ꠅ-ꠁꠢꠥꠖꠤ ꠅꠇꠟꠦ ꠁꠝꠣꠘ ꠀꠘꠍꠂꠘ,
ꠔꠣꠞꠣꠞꠦ ꠀꠝꠞꠣꠞ ꠅꠃ ꠚꠄꠍꠣꠟꠣ ꠟꠦꠈꠤꠀ ꠎꠣꠘꠣꠁ ꠖꠤꠍꠤ,
ꠖꠦꠛꠔꠣꠞ ꠘꠣꠝꠦ ꠘꠤꠅꠔ ꠇꠞꠣ ꠈꠣꠘꠤ ꠈꠣꠁꠔꠣ ꠘꠣ,
ꠟꠃ ꠈꠣꠁꠔꠣ ꠘꠣ ꠀꠞ ꠉꠟꠣ ꠐꠤꠙꠤꠀ ꠝꠣꠞꠣ ꠇꠥꠘꠥ ꠎꠣꠘꠖꠣꠞꠞ ꠉꠥꠡ꠆ꠔ ꠈꠣꠁꠔꠣ ꠘꠣ,
ꠇꠥꠘꠥ ꠎꠣꠔꠞ ꠎꠤꠘꠣꠞ ꠇꠣꠝꠅ ꠎꠣꠁꠔꠣ ꠘꠣ।”
২৬ ꠔꠦꠃ ꠙꠣꠃꠟꠥꠍꠦ ꠢꠃ ꠝꠣꠘꠥꠡ ꠅꠇꠟꠞꠦ ꠟꠉꠦ ꠟꠁꠀ ꠉꠤꠀ,
ꠔꠣꠞꠣꠞ ꠟꠉꠦ ꠘꠤꠎꠞꠦꠅ ꠙꠣꠇ-ꠍꠣꠚ ꠇꠞꠟꠣ।
ꠛꠣꠖꠞ ꠖꠤꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠢꠣꠝꠣꠁꠟꠣ,
ꠀꠞ ꠔꠣꠞꠣꠞ ꠙꠣꠇ-ꠍꠣꠚ ꠅꠀꠞ ꠟꠣꠉꠤ ꠙꠡꠥ ꠇꠥꠞꠛꠣꠘꠤ ꠇꠥꠘꠖꠤꠘ ꠖꠦꠅꠀ ꠅꠁꠛ,
ꠄꠅ ꠔꠣꠞꠤꠈ ꠎꠣꠘꠣꠁ ꠖꠤꠟꠣ।
২৭ ꠙꠣꠇ-ꠍꠣꠚ ꠅꠀꠞ ꠘꠤꠅꠝꠞ ꠢꠤ ꠡꠣꠔ ꠖꠤꠘ ꠡꠦꠡ ꠘꠣ ꠅꠁꠔꠦꠃ,
ꠀꠍꠤꠀ ꠖꠦꠡꠞ ꠇꠄꠎꠘ ꠁꠢꠥꠖꠤꠄ ꠙꠣꠃꠟꠥꠍꠞꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠖꠦꠈꠤꠀ,
ꠝꠣꠘꠡꠞꠦ ꠃꠍꠇꠣꠁ ꠖꠤꠀ ꠔꠣꠘꠦ ꠗꠞꠟꠣ।
২৮ ꠔꠣꠞꠣ ꠌꠤꠟ꠆ꠟꠣꠁꠀ ꠇꠁꠟꠣ,
“ꠅ ꠛꠘꠤ ꠁꠍꠞꠣꠁꠟ ꠅꠇꠟ,
ꠀꠉꠥꠀꠅ!
ꠀꠡ꠆ꠔꠣ ꠖꠥꠘꠤꠀꠞ ꠝꠣꠘꠡꠞ ꠉꠦꠍꠦ ꠎꠦꠉꠥꠄ ꠀꠝꠞꠣꠞ ꠎꠣꠔꠤꠞ,
ꠀꠝꠞꠣꠞ ꠡꠞꠤꠅꠔꠞ ꠀꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠛꠤꠙꠇ꠆ꠇꠦ ꠔꠣꠟꠤꠝ ꠖꠤꠀ ꠊꠥꠞꠦ,
ꠅꠉꠥ ꠢꠃ ꠛꠦꠐꠣ!
ꠢꠦ ꠁꠃꠘꠣꠘꠤ ꠅꠇꠟꠞꠦ ꠅꠘꠅ ꠢꠣꠞꠣꠁꠀ ꠁ ꠙꠣꠇ ꠎꠣꠉꠣꠈꠣꠘꠞꠦꠅ ꠘꠣꠙꠣꠇ ꠛꠣꠘꠣꠁꠍꠦ।”
২৯ ꠄꠞ ꠀꠉꠦ ꠔ ꠁꠚꠤꠍꠞ ꠔꠚꠤꠝꠞꠦ ꠙꠣꠃꠟꠥꠍꠞ ꠟꠉꠦ ꠐꠣꠃꠘꠅ ꠌꠇ꠆ꠇꠞꠅ ꠖꠦꠈꠤꠀ ꠔꠣꠞꠣ ꠝꠘꠦ ꠝꠘꠦ ꠡꠘ꠆ꠖꠄ ꠇꠞꠍꠂꠘ,
ꠙꠣꠃꠟꠥꠍꠦ ꠔꠣꠘꠞꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ-ꠅ ꠢꠣꠞꠣꠁꠍꠂꠘ।
৩০ ꠔꠦꠃ ꠀꠡ꠆ꠔꠣ ꠐꠣꠃꠘꠞ ꠝꠣꠘꠥꠡ ꠉꠞꠝ ꠅꠁꠉꠦꠟꠣ,
ꠀꠞ ꠄꠇꠟꠉꠦ ꠖꠃꠠꠤꠀ ꠀꠁꠀ ꠙꠣꠃꠟꠥꠍꠞꠦ ꠗꠞꠤꠀ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠕꠣꠇꠤ ꠐꠣꠘꠤꠀ ꠛꠣꠞꠦ ꠀꠘꠟꠣ,
ꠀꠞ ꠟꠉꠦ ꠟꠉꠦꠃ ꠄꠞ ꠖꠥꠀꠞ ꠅꠇꠟ ꠛꠘ꠆ꠖ ꠇꠞꠤꠟ꠆ꠟꠣ।
৩১ ꠔꠣꠞꠣ ꠙꠣꠃꠟꠥꠍꠞꠦ ꠝꠣꠞꠤꠟꠤꠔꠣ ꠌꠣꠁꠟꠣ,
ꠅꠁꠟꠦ ꠅꠃ ꠡꠝꠄ ꠞꠥꠝꠣꠘ ꠍꠤꠙꠣꠁ ꠅꠇꠟꠞ ꠙꠞꠗꠣꠘꠞ ꠉꠦꠍꠦ ꠈꠛꠞ ꠉꠦꠟ,
ꠀꠡ꠆ꠔꠣ ꠎꠦꠞꠥꠎꠣꠟꠦꠝꠞ ꠝꠣꠎꠦ ꠃꠟꠁꠡ꠆ꠔꠟ ꠟꠣꠉꠤꠉꠦꠍꠦ।
৩২ ꠟꠉꠦ ꠟꠉꠦꠃ ꠔꠣꠁꠘ ꠍꠥꠛꠦꠖꠣꠞ ꠅꠇꠟ ꠀꠞ ꠍꠤꠙꠣꠁ ꠖꠟ ꠟꠁꠀ ꠖꠃꠠꠤꠀ ꠔꠣꠞꠣꠞ ꠉꠦꠍꠦ ꠀꠁꠟꠣ।
ꠝꠣꠘꠡꠦ ꠍꠤꠙꠣꠁ ꠀꠞ ꠍꠤꠙꠣꠁꠞ ꠙꠞꠗꠣꠘꠞꠦ ꠖꠦꠈꠤꠀ ꠙꠣꠃꠟꠥꠍꠞꠦ ꠝꠣꠁꠞ-ꠗꠁꠞ ꠇꠞꠣ ꠛꠘ꠆ꠖ ꠇꠞꠟꠣ।
৩৩ ꠔꠦꠃ ꠢꠤ ꠅꠚꠤꠡꠣꠞꠦ ꠀꠁꠀ ꠙꠣꠃꠟꠥꠍꠞꠦ ꠀꠐꠇ ꠇꠞꠤꠀ ꠖꠥꠁꠉꠦꠍꠣ ꠡꠤꠇꠟꠖꠤ ꠛꠣꠘ꠆ꠖꠣꠞ ꠢꠥꠇꠥꠝ ꠖꠤꠟꠣ,
ꠛꠣꠖꠦ ꠎꠤꠇꠣꠁꠟꠣ,
“ꠁ ꠝꠣꠘꠥꠡꠉꠥ ꠇꠦ,
ꠢꠦ ꠇꠤꠔꠣ ꠖꠥꠡ ꠇꠞꠍꠦ?”
৩৪ ꠉꠘ꠆ꠒꠉꠥꠟꠞ ꠝꠣꠎꠦ ꠌꠤꠟ꠆ꠟꠣꠁꠀ ꠇꠦꠃ ꠄꠇꠟꠣꠈꠣꠘ,
ꠇꠦꠃ ꠇꠦꠃ ꠀꠞꠇ ꠟꠣꠈꠣꠘ ꠇꠂꠟ।
ꠅꠁꠟꠦ ꠔꠣꠁꠘ ꠜꠣꠟꠣꠝꠘ꠆ꠔꠦ ꠇꠥꠘ꠆ꠔꠣ ꠡꠝꠎꠤꠔꠣ ꠘꠣ ꠙꠣꠞꠤꠀ ꠙꠣꠃꠟꠥꠍꠞꠦ ꠘꠤꠀ ꠇꠦꠘ꠆ꠐꠘꠝꠦꠘ꠆ꠐꠅ ꠢꠣꠞꠣꠁꠀ ꠕꠅꠀꠞ ꠢꠥꠇꠥꠝ ꠖꠤꠟꠣ।
৩৫ ꠙꠣꠃꠟꠥꠍ ꠍꠤꠠꠤꠞ ꠝꠥꠈꠅ ꠎꠣꠁꠔꠦꠃ ꠝꠣꠘꠡꠞ ꠀꠔ ꠕꠣꠇꠤ ꠛꠣꠌꠣꠘꠤꠞ ꠟꠣꠉꠤ,
ꠍꠤꠙꠣꠁ ꠅꠇꠟꠦ ꠔꠣꠘꠞꠦ ꠃꠌꠣ ꠇꠞꠤꠀ ꠛꠁꠀ ꠘꠤꠟꠣꠉꠤ।
৩৬ ꠝꠣꠘꠡꠦ ꠈꠞꠦ ꠅꠁꠀ ꠝꠤꠍꠤꠟ ꠖꠤꠔꠣ ꠟꠣꠉꠟꠣ,
“ꠅꠉꠥꠞꠦ ꠝꠣꠞꠤꠟꠣꠅ!”
৩৭ ꠍꠤꠙꠣꠁ ꠅꠇꠟꠦ ꠔꠣꠘꠞꠦ ꠇꠦꠘ꠆ꠐꠘꠝꠦꠘ꠆ꠐꠅ ꠢꠣꠞꠣꠁ ꠖꠤꠔꠣ ꠌꠣꠁꠞꠣ,
ꠅꠃ ꠡꠝꠄ ꠔꠣꠁꠘ ꠙꠞꠗꠣꠘ ꠅꠚꠤꠡꠣꠞꠞꠦ ꠁꠃꠘꠣꠘꠤ ꠜꠣꠡꠣꠄ ꠍꠅꠀꠟ ꠇꠞꠟꠣ,
“ꠀꠝꠤ ꠀꠙꠘꠣꠞ ꠉꠦꠍꠦ ꠇꠥꠘ꠆ꠔꠣ ꠝꠣꠔꠔꠣꠝ ꠙꠣꠞꠝꠥ ꠘꠤ?”
ꠅꠚꠤꠡꠣꠞꠦ ꠇꠁꠟꠣ,
“ꠔꠥꠝꠤ ꠇꠤꠔꠣ ꠁꠃꠘꠣꠘꠤ ꠜꠣꠡꠣ ꠎꠣꠘꠅ ꠘꠤ?
৩৮ ꠔꠦ ꠔꠥꠝꠤ ꠇꠤꠔꠣ ꠢꠃ ꠝꠤꠡꠞꠤ ꠛꠦꠐꠣ ꠘꠤ,
ꠎꠦꠉꠥꠄ ꠇꠄꠖꠤꠘ ꠀꠉꠦ ꠟꠣꠠꠣꠁ ꠇꠞꠤꠀ,
ꠌꠣꠁꠞ ꠀꠎꠣꠞ ꠡꠘꠔ꠆ꠞꠣꠡꠤꠞꠦ ꠟꠉꠦ ꠟꠁꠀ ꠝꠞꠥꠜꠥꠝꠤꠔ ꠉꠦꠍꠤꠟ?”
৩৯ ꠙꠣꠃꠟꠥꠍꠦ ꠎꠥꠀꠙ ꠖꠤꠟꠣ,
“ꠍꠣꠛ,
ꠀꠝꠤ ꠄꠇꠎꠘ ꠁꠢꠥꠖꠤ,
ꠇꠤꠟꠤꠇꠤꠀꠞ ꠔꠣꠞ꠆ꠡ ꠡꠢꠞꠞ ꠝꠣꠘꠥꠡ,
ꠀꠝꠤ ꠎꠦꠔꠣ ꠝꠘꠦ ꠇꠄ ꠁꠔꠣ ꠐꠣꠃꠘꠞ ꠝꠣꠘꠥꠡ ꠘꠣꠄ।
ꠀꠝꠤ ꠀꠙꠘꠣꠞꠦ ꠝꠤꠘꠔ ꠇꠞꠞꠣꠝ,
ꠖꠄꠀ ꠇꠞꠤ ꠝꠣꠘꠡꠞ ꠉꠦꠍꠦ ꠀꠝꠣꠞꠦ ꠝꠣꠔꠣꠞ ꠡꠥꠎꠥꠉ ꠈꠣꠘ ꠖꠦꠃꠇ꠆ꠇꠣ।”
৪০ ꠔꠣꠁꠘ ꠡꠥꠎꠥꠉ ꠖꠦꠅꠀꠞ ꠛꠣꠖꠦ ꠙꠣꠃꠟꠥꠍꠦ ꠍꠤꠠꠤꠞ ꠃꠙꠞꠦ ꠃꠛꠣꠁꠀ,
ꠝꠣꠘꠡꠞꠦ ꠘꠤꠞꠣꠁ ꠅꠀꠞ ꠟꠣꠉꠤ ꠀꠔꠖꠤ ꠁꠡꠣꠞꠣ ꠖꠤꠟꠣ,
ꠔꠣꠞꠣ ꠘꠤꠞꠣꠁ ꠅꠁꠀ ꠢꠣꠞꠟꠦ ꠔꠣꠁꠘ ꠁꠛꠞꠣꠘꠤ ꠜꠣꠡꠣꠄ ꠇꠅꠀꠔ ꠟꠣꠉꠟꠣ।