২৩
১ ꠙꠣꠃꠟꠥꠍꠦ ꠚꠔꠥꠀ ꠇꠝꠤꠐꠤꠞ ꠝꠣꠘꠡꠞ ꠛꠣꠄ ꠗꠤꠀꠘ ꠗꠞꠤ ꠌꠣꠁꠀ ꠇꠁꠟꠣ,
“ꠅ ꠜꠣꠁꠍꠣꠛ ꠅꠇꠟ,
ꠀꠝꠤ ꠔ ꠅꠈꠘ ꠙꠞ꠆ꠎꠘ꠆ꠔ ꠀꠝꠣꠞ ꠛꠤꠛꠦꠇ ꠙꠞꠤꠡ꠆ꠇꠣꠞ ꠞꠣꠈꠤꠀ,
ꠀꠟ꠆ꠟꠣꠞ ꠛꠘ꠆ꠖꠣ ꠢꠤꠡꠣꠛꠦ ꠖꠣꠄꠁꠔ꠆ꠔ ꠀꠖꠣꠄ ꠇꠞꠞꠣꠝ।”
২ ꠁꠈꠣꠘ ꠢꠥꠘꠤꠀ ꠙꠞꠗꠣꠘ ꠁꠝꠣꠝ ꠅꠘꠘꠤꠅꠄ,
ꠙꠣꠃꠟꠥꠍꠞ ꠉꠣꠟꠣꠔ ꠎꠦꠞꠣ ꠃꠛꠣꠔ ꠀꠍꠤꠟ,
ꠔꠣꠞꠣꠞꠦ ꠇꠁꠟꠣ,
“ꠅꠉꠥꠞ ꠝꠥꠈꠅ ꠌꠠ ꠝꠣꠞꠅ।”
৩ ꠔꠦꠃ ꠙꠣꠃꠟꠥꠍꠦ ꠔꠣꠘꠞꠦ ꠇꠁꠟꠣ,
“ꠅ ꠜꠘ꠆ꠒ,
ꠀꠟ꠆ꠟꠣꠄ ꠔꠥꠝꠣꠞꠦꠅ ꠌꠠ ꠝꠣꠞꠛꠣ।
ꠔꠥꠝꠤ ꠡꠞꠤꠅꠔꠞ ꠀꠁꠘꠦ ꠀꠝꠣꠞ ꠛꠤꠌꠣꠞ ꠇꠞꠣꠔ ꠛꠁꠀ,
ꠡꠞꠤꠅꠔꠞ ꠛꠞꠈꠦꠟꠣꠚ ꠇꠞꠤꠀ ꠀꠝꠣꠞꠦ ꠌꠠ ꠝꠣꠞꠣꠞ ꠢꠥꠇꠥꠝ ꠖꠤꠞꠣꠄ?”
৪ ꠎꠦꠞꠣ ꠙꠣꠃꠟꠥꠍꠞ ꠇꠣꠘ꠆ꠖꠣꠔ ꠃꠛꠣꠁꠍꠤꠟ,
ꠔꠣꠞꠣ ꠔꠣꠘꠞꠦ ꠇꠂꠟ,
“ꠔꠥꠝꠤ ꠀꠟ꠆ꠟꠣꠞ ꠊꠞꠞ ꠙꠞꠗꠣꠘ ꠁꠝꠣꠝ ꠍꠣꠛꠞꠦ ꠛꠦꠁꠎ꠆ꠎꠔ ꠇꠞꠞꠣꠄ ꠘꠤ?”
৫ ꠙꠣꠃꠟꠥꠍꠦ ꠇꠁꠟꠣ,
“ꠜꠣꠁ ꠅꠇꠟ,
ꠀꠝꠤ ꠔ ꠎꠣꠘꠤ ꠘꠣ ꠄꠁꠘ ꠙꠞꠗꠣꠘ ꠁꠝꠣꠝ ꠇꠞꠤ।
ꠀꠞꠘꠣꠄ ꠁꠟꠣ ꠇꠁꠟꠣꠝ ꠘꠣ ꠅꠘꠦ,
ꠀꠟ꠆ꠟꠣꠞ ꠇꠣꠟꠣꠝꠅ ꠔ ꠟꠦꠈꠣ ꠀꠍꠦ,
ꠔꠥꠝꠣꠞ ꠘꠤꠎꠞ ꠎꠣꠔꠤꠞ ꠝꠥꠞꠛ꠆ꠛꠤꠞꠦ ꠇꠥꠘꠥ ꠉꠣꠟꠤ ꠖꠤꠅ ꠘꠣ।”
৬ ꠙꠣꠃꠟꠥꠍꠦ ꠎꠦꠛꠟꠣ ꠛꠥꠎꠟꠣ ꠢꠤ ꠝꠎꠟꠤꠍꠞ ꠇꠤꠍꠥ ꠝꠣꠘꠥꠡ ꠍꠤꠖ꠆ꠖꠦꠇꠤꠀ ꠝꠎꠛꠞ ꠀꠞ ꠇꠤꠍꠥ ꠅꠁꠟꠣ ꠚꠞꠤꠡꠤ ꠝꠎꠛꠞ,
ꠅꠃ ꠔꠣꠁꠘ ꠝꠎꠟꠤꠍꠞ ꠝꠣꠎꠦ ꠎꠥꠞꠦ ꠎꠥꠞꠦ ꠇꠁꠟꠣ,
“ꠅ ꠜꠣꠁ ꠅꠇꠟ,
ꠀꠝꠤ ꠄꠇꠎꠘ ꠚꠞꠤꠡꠤ ꠀꠞ ꠚꠞꠤꠡꠤꠞ ꠀꠅꠟꠣꠖ।
ꠝꠥꠞ꠆ꠖꠣ ꠅꠇꠟ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠛꠣ,
ꠅꠃ ꠝꠣꠔꠞ ꠟꠣꠉꠤ ꠅꠈꠘ ꠀꠝꠣꠞ ꠛꠤꠌꠣꠞ ꠇꠞꠣ ꠅꠞ।”
৭ ꠔꠣꠁꠘ ꠁꠈꠣꠘ ꠇꠅꠀꠞ ꠟꠉꠦ ꠟꠉꠦꠃ ꠚꠞꠤꠡꠤ ꠀꠞ ꠍꠤꠖ꠆ꠖꠦꠇꠤꠀ ꠅꠇꠟꠞ ꠝꠣꠎꠦ ꠇꠣꠁꠎ꠆ꠎꠣ ꠟꠣꠉꠤꠉꠦꠟ,
ꠝꠎꠟꠤꠍꠞ ꠝꠣꠎꠦ ꠖꠥꠁ ꠖꠟ ꠅꠁꠉꠦꠟꠣ।
৮ ꠇꠣꠞꠘ ꠍꠤꠖ꠆ꠖꠦꠇꠤꠀ ꠅꠇꠟꠞ ꠄꠇꠤꠘ ꠅꠁꠟ,
ꠝꠥꠞ꠆ꠖꠣ ꠅꠇꠟ ꠀꠞ ꠎꠤꠘ꠆ꠖꠣ ꠅꠁꠔꠣ ꠘꠣꠄ,
ꠚꠤꠞꠤꠡ꠆ꠔꠣ ꠛꠣ ꠞꠥꠢꠥ ꠁꠔꠣ ꠇꠥꠘꠥꠔꠣ ꠘꠣꠁ।
ꠅꠁꠟꠦ ꠚꠞꠤꠡꠤ ꠅꠇꠟꠦ ꠄꠇꠤꠘ ꠇꠞꠂꠘ ꠁꠔꠣ ꠢꠇꠟꠔꠣꠃ ꠀꠍꠂꠘ।
৯ ꠁ ꠉꠘ꠆ꠒꠉꠥꠟ ꠛꠃꠔ ꠛꠠ ꠅꠁꠉꠦꠟ,
ꠔꠦꠃ ꠚꠞꠤꠡꠤ ꠖꠟꠞ ꠇꠄꠎꠘ ꠝꠃꠟꠣꠘꠣꠄ ꠃꠛꠣꠁꠀ ꠔꠞ꠆ꠇꠣ-ꠔꠞ꠆ꠇꠤ ꠇꠞꠤ ꠇꠁꠟꠣ,
“ꠀꠝꠞꠣ ꠔ ꠁ ꠝꠣꠘꠡꠞ ꠇꠥꠘꠥ ꠖꠥꠡ ꠖꠦꠈꠞꠣꠝ ꠘꠣ।
ꠇꠥꠘꠥ ꠞꠥꠢꠥ ꠛꠣ ꠚꠤꠞꠤꠡ꠆ꠔꠣꠄ ꠔ ꠔꠣꠞ ꠟꠉꠦ ꠁꠟꠣ ꠛꠣꠔꠌꠤꠔ ꠇꠞꠔꠣ ꠙꠣꠞꠂꠘ।”
১০ ꠅꠃ ꠟꠣꠈꠣꠘ ꠇꠞꠤ ꠛꠦꠕꠣꠄꠀ ꠉꠘ꠆ꠒꠉꠥꠟ ꠟꠣꠉꠟ,
ꠄꠞꠖꠣꠄ ꠙꠞꠗꠣꠘ ꠅꠚꠤꠡꠣꠞꠦ ꠒꠞꠣꠁꠉꠦꠟꠣ,
ꠝꠣꠘꠡꠦ ꠙꠣꠃꠟꠥꠍꠞꠦ ꠐꠥꠇꠞꠣ ꠐꠥꠇꠞꠣ ꠇꠞꠤ ꠍꠤꠠꠤꠟꠣꠁꠛꠣ,
ꠅꠃ ꠔꠣꠁꠘ ꠍꠤꠙꠣꠁ ꠅꠇꠟꠞꠦ ꠢꠥꠇꠥꠝ ꠖꠤꠟꠣ,
ꠔꠣꠞꠣ ꠟꠣꠝꠤꠀ ꠉꠤꠀ ꠙꠣꠃꠟꠥꠍꠞꠦ ꠝꠣꠘꠡꠞ ꠉꠦꠍ ꠕꠣꠇꠤ ꠢꠞꠣꠁꠀ ꠘꠤꠀ ꠇꠦꠘ꠆ꠐꠘꠝꠦꠘ꠆ꠐꠅ ꠢꠣꠞꠣꠁꠟꠣ।
১১ ꠛꠣꠖꠦ ꠞꠣꠁꠔꠞ ꠛꠣꠟꠣ ꠝꠣꠟꠤꠇ ꠁꠍꠣꠄ ꠙꠣꠃꠟꠥꠍꠞ ꠉꠦꠍꠦ ꠃꠛꠣꠁꠀ ꠇꠁꠟꠣ,
“ꠢꠤꠝ꠆ꠝꠔ ꠇꠞꠅ,
ꠀꠝꠣꠞ ꠘꠣꠝꠦ ꠎꠦꠞꠥꠎꠣꠟꠦꠝꠅ ꠎꠦꠟꠣ ꠡꠣꠇ꠆ꠇꠤ ꠖꠤꠍ,
ꠞꠥꠝ ꠐꠣꠃꠘꠅ-ꠅ ꠅꠃꠟꠣ ꠡꠣꠇ꠆ꠇꠤ ꠖꠤꠔꠦ ꠅꠁꠛ।”
ꠢꠎꠞꠔ ꠙꠣꠃꠟꠥꠍꠞꠦ ꠝꠣꠞꠣꠞ ꠡꠠꠎꠘꠔ꠆ꠞ
১২ ꠛꠣꠖꠞ ꠖꠤꠘ ꠚꠎꠞꠞ ꠅꠇ꠆ꠔꠅ ꠁꠢꠥꠖꠤ ꠅꠇꠟꠦ ꠄꠇ ꠖꠣꠉꠣꠛꠣꠎꠤ ꠇꠞꠟꠣ,
ꠔꠣꠞꠣ ꠇꠍꠝ ꠈꠣꠁꠀ ꠇꠁꠟꠣ,
ꠙꠣꠃꠟꠥꠍꠞꠦ ꠝꠣꠞꠣꠞ ꠀꠉ ꠙꠞ꠆ꠎꠘ꠆ꠔ ꠔꠣꠞꠣ ꠖꠣꠘꠣ-ꠙꠣꠘꠤ ꠇꠥꠘ꠆ꠔꠣ ꠝꠥꠈꠅ ꠖꠤꠔꠣ ꠘꠣꠄ।
১৩ ꠌꠣꠟ꠆ꠟꠤꠡ ꠎꠘꠞꠅ ꠛꠦꠡꠤ ꠝꠣꠘꠥꠡ ꠄꠇꠈꠣꠘꠅ ꠅꠁꠀ ꠁ ꠖꠣꠉꠣꠛꠣꠎꠤꠞ ꠇꠍꠝ ꠈꠣꠁꠟꠣ।
১৪ ꠔꠣꠞꠣ ꠛꠠ ꠁꠝꠣꠝ ꠀꠞ ꠝꠥꠞꠛ꠆ꠛꠤ ꠅꠇꠟꠞ ꠉꠦꠍꠦ ꠉꠤꠀ ꠇꠁꠟꠣ,
“ꠀꠝꠞꠣ ꠇꠠꠣꠇꠠꠤ ꠇꠍꠝ ꠈꠣꠁꠍꠤ,
ꠙꠣꠃꠟꠥꠍꠞꠦ ꠘꠣ ꠝꠣꠞꠣ ꠙꠞ꠆ꠎꠘ꠆ꠔ ꠖꠣꠘꠣ-ꠙꠣꠘꠤ ꠇꠥꠘ꠆ꠔꠣ ꠝꠥꠈꠅ ꠖꠤꠔꠣꠝ ꠘꠣꠄ।
১৫ ꠅꠈꠘ ꠀꠙꠘꠣꠞꠣ ꠀꠞ ꠚꠔꠥꠀ ꠇꠝꠤꠐꠤꠞ ꠢꠇꠟꠦ ꠙꠞꠗꠣꠘ ꠅꠚꠤꠡꠣꠞꠞ ꠉꠦꠍꠦ ꠅꠃ ꠀꠛꠖꠣꠞ ꠇꠞꠃꠇ꠆ꠇꠣ ꠎꠦꠘ,
ꠀꠙꠘꠣꠞꠣ ꠀꠞꠅ ꠜꠣꠟꠣꠐꠤꠇꠦ ꠁ ꠛꠤꠌꠣꠞꠞ ꠔꠖꠘ꠆ꠔ ꠇꠞꠔꠣ ꠌꠣꠁꠞꠣ,
ꠅꠃ ꠃꠍꠤꠟ꠆ꠟꠣꠄ ꠢꠦ ꠀꠙꠘꠣꠁꠘ꠆ꠔꠞ ꠉꠦꠍꠦ ꠀꠅꠀꠞ ꠀꠉꠦꠃ,
ꠙꠕꠞ ꠝꠣꠎꠦ ꠀꠝꠞꠣ ꠔꠣꠞꠦ ꠝꠣꠞꠤꠟꠤꠝꠥ।”
১৬ ꠅꠁꠟꠦ ꠙꠣꠃꠟꠥꠍꠞ ꠜꠣꠉ꠆ꠘꠣꠄ ꠔꠣꠞꠣꠞ ꠁ ꠖꠣꠉꠣꠛꠣꠎꠤꠞ ꠈꠛꠞ ꠢꠥꠘꠤꠀ,
ꠇꠦꠘ꠆ꠐꠘꠝꠦꠘ꠆ꠐꠅ ꠉꠤꠀ ꠙꠣꠃꠟꠥꠍꠞꠦ ꠁꠔꠣ ꠎꠣꠘꠣꠁꠟꠣ।
১৭ ꠔꠦꠃ ꠙꠣꠃꠟꠥꠍꠦ ꠡ-ꠍꠤꠙꠣꠁꠞ ꠄꠇꠎꠘ ꠍꠥꠛꠦꠖꠣꠞꠞꠦ ꠀꠘꠣꠁꠀ ꠇꠁꠟꠣ,
“ꠅꠃ ꠙꠥꠀꠉꠥꠞꠦ ꠙꠞꠗꠣꠘ ꠅꠚꠤꠡꠣꠞ ꠍꠣꠛꠞ ꠉꠦꠍꠦ ꠟꠁꠀ ꠎꠣꠃꠇ꠆ꠇꠣ,
ꠢꠦ ꠔꠣꠘꠞꠦ ꠇꠤꠔꠣ ꠇꠁꠔ ꠀꠁꠍꠦ।”
১৮ ꠅꠃ ꠢꠤ ꠍꠥꠛꠦꠖꠣꠞꠦ ꠔꠣꠞꠦ ꠟꠁꠀ ꠙꠞꠗꠣꠘ ꠅꠚꠤꠡꠣꠞꠞ ꠉꠦꠍꠦ ꠉꠤꠀ ꠇꠁꠟꠣ,
“ꠛꠘ꠆ꠖꠤ ꠙꠣꠃꠟꠥꠍꠦ ꠀꠝꠣꠞꠦ ꠀꠘꠣꠁꠀ ꠇꠁꠟꠣ,
ꠅꠃ ꠙꠥꠀꠉꠥꠞꠦ ꠀꠙꠘꠣꠞ ꠉꠦꠍꠦ ꠟꠁꠀ ꠀꠁꠔꠣꠝ,
ꠢꠦ ꠀꠙꠘꠣꠞ ꠉꠦꠍꠦ ꠇꠤꠔꠣ ꠇꠁꠔ ꠌꠣꠞ।”
১৯ ꠙꠞꠗꠣꠘ ꠅꠚꠤꠡꠣꠞꠦ ꠔꠣꠞ ꠀꠔꠅ ꠗꠞꠤꠀ ꠄꠇ ꠉꠣꠟꠣꠛꠣꠄ ꠟꠁꠀ ꠉꠤꠀ ꠇꠁꠟꠣ,
“ꠔꠥꠝꠤ ꠀꠝꠣꠞꠦ ꠇꠤꠔꠣ ꠇꠁꠔꠣꠄ ꠌꠣꠁꠞꠣꠄ?”
২০ ꠢꠦ ꠇꠂꠟ,
“ꠁꠢꠥꠖꠤ ꠅꠇꠟꠦ ꠘꠤꠅꠔ ꠇꠞꠍꠂꠘ,
ꠔꠣꠞꠣ ꠀꠙꠘꠣꠞ ꠉꠦꠍꠦ ꠅꠃ ꠀꠛꠖꠣꠞ ꠇꠞꠛꠣ,
ꠙꠣꠃꠟꠥꠍꠞ ꠛꠤꠌꠣꠞ ꠀꠞꠅ ꠜꠣꠟꠣꠐꠤꠇꠦ ꠔꠖꠘ꠆ꠔ ꠇꠞꠣꠞ ꠟꠣꠉꠤ ꠀꠙꠘꠦ ꠎꠣꠘꠥ ꠍꠣꠝꠘꠞ ꠇꠣꠁꠟ ꠔꠣꠘꠞꠦ ꠖꠦꠡꠞ ꠚꠔꠥꠀ ꠇꠝꠤꠐꠤꠞ ꠍꠣꠝꠘꠦ ꠀꠎꠤꠞ ꠇꠞꠣꠁꠘ।
২১ ꠀꠙꠘꠦ ꠔꠣꠞꠣꠞ ꠇꠕꠣꠄ ꠞꠣꠎꠤ ꠅꠁꠘ ꠘꠣ ꠎꠣꠘꠥ,
ꠄꠞꠣ ꠌꠣꠟ꠆ꠟꠤꠡ ꠎꠘꠞꠅ ꠛꠦꠡꠤ ꠝꠣꠘꠡꠦ ꠟꠥꠇꠣꠁꠀ ꠙꠣꠃꠟꠥꠍꠞ ꠟꠣꠉꠤ ꠛꠣꠞ ꠌꠣꠁꠞꠣ,
ꠔꠣꠞꠣ ꠇꠍꠝ ꠈꠣꠁꠍꠦ,
ꠔꠣꠘꠞꠦ ꠘꠣ ꠝꠣꠞꠣ ꠙꠞ꠆ꠎꠘ꠆ꠔ ꠖꠣꠘꠣ-ꠙꠣꠘꠤ ꠇꠥꠘ꠆ꠔꠣ ꠝꠥꠈꠅ ꠖꠤꠔ ꠘꠣꠄ।
ꠔꠣꠞꠣ ꠅꠈꠘ ꠔꠤꠀꠞ ꠅꠁꠀ ꠙꠕꠅ ꠛꠁꠍꠦ,
ꠈꠣꠟꠤ ꠀꠙꠘꠣꠞ ꠞꠣꠎꠤ ꠅꠀꠞ ꠛꠣꠞ ꠌꠣꠁꠞꠣ।”
২২ ꠙꠞꠗꠣꠘ ꠅꠚꠤꠡꠣꠞꠦ ꠔꠣꠞꠦ ꠅꠃ ꠢꠥꠇꠥꠝ ꠖꠤꠀ ꠛꠤꠖꠣꠄ ꠖꠤꠟꠣ,
“ꠔꠥꠝꠤ ꠀꠝꠣꠞ ꠉꠦꠍꠦ ꠁ ꠈꠛꠞ ꠇꠁꠍ ꠇꠞꠤ ꠇꠦꠃꠞꠞꠦ ꠢꠥꠘꠣꠁꠅ ꠘꠣ।”
ꠢꠎꠞꠔ ꠙꠣꠃꠟꠥꠍꠞꠦ ꠇꠂꠍꠞꠤꠀꠔ ꠙꠣꠑꠣꠘꠤ
২৩ ꠛꠣꠖꠦ ꠔꠣꠁꠘ ꠡ-ꠍꠤꠙꠣꠁꠞ ꠖꠥꠁꠎꠘ ꠍꠥꠛꠦꠖꠣꠞꠞꠦ ꠀꠘꠣꠁꠀ ꠇꠁꠟꠣ,
“ꠖꠥꠁꠡ ꠎꠘ ꠍꠤꠙꠣꠁ,
ꠡꠔ꠆ꠔꠁꠞ ꠎꠘ ꠊꠥꠠꠣꠀꠟꠣ ꠍꠤꠙꠣꠁ,
ꠀꠞ ꠖꠥꠁꠡ ꠎꠘ ꠍꠥꠟꠚꠤ ꠀꠟꠣ ꠍꠤꠙꠣꠁ ꠀꠁꠎ ꠞꠣꠁꠔ ꠘꠄꠐꠣꠔ ꠇꠂꠍꠞꠤꠀꠔ ꠎꠣꠅꠀꠞ ꠟꠣꠉꠤ ꠔꠤꠀꠞ ꠇꠞꠅ।
২৪ ꠀꠞ ꠙꠣꠃꠟꠥꠍꠞ ꠟꠣꠉꠤꠅ ꠊꠥꠠꠣꠞ ꠛꠘ꠆ꠖꠛꠡ꠆ꠔ ꠇꠞꠅ,
ꠔꠣꠞꠦ ꠎꠣꠘꠥ ꠘꠤꠞꠣꠙꠖꠦ ꠖꠦꠡꠞ ꠙꠞꠗꠣꠘ ꠢꠣꠇꠤꠝ ꠚꠤꠟꠤꠇ꠆ꠡꠞ ꠉꠦꠍꠦ ꠙꠃꠍꠣꠁꠟ ꠅꠄ।”
২৫ ꠇꠁꠀ,
ꠔꠣꠁꠘ ꠅꠃ ꠌꠤꠑꠤ ꠟꠦꠈꠟꠣ,
২৬ “ꠝꠣꠘꠘꠤꠅ ꠙꠞꠗꠣꠘ ꠢꠣꠇꠤꠝ ꠍꠣꠛ,
ꠀꠝꠤ ꠇꠦꠟꠣꠖꠥꠍ ꠟꠥꠍꠤꠀꠍ,
ꠀꠙꠘꠣꠞꠦ ꠍꠣꠟꠣꠝ ꠎꠣꠘꠣꠁꠞꠣꠝ।
২৭ ꠁꠢꠥꠖꠤ ꠅꠇꠟꠦ ꠅꠃ ꠝꠣꠘꠥꠡꠉꠥꠞꠦ ꠗꠞꠤꠀ ꠎꠣꠘꠦ ꠝꠣꠞꠤꠟꠤꠔꠣ ꠌꠣꠁꠍꠟꠣ,
ꠀꠝꠤ ꠢꠥꠘꠟꠣꠝ ꠢꠦ ꠄꠇꠎꠘ ꠞꠥꠝꠣꠘ ꠝꠣꠘꠥꠡ,
ꠢꠥꠘꠤꠀ ꠀꠝꠣꠞ ꠍꠤꠙꠣꠁ ꠅꠇꠟ ꠟꠁꠀ ꠉꠤꠀ ꠔꠣꠞꠦ ꠛꠣꠌꠣꠁꠟꠣꠝ।
২৮ ꠛꠣꠖꠦ ꠀꠝꠤ ꠢꠥꠘꠔꠣꠝ ꠌꠣꠁꠟꠣꠝ ꠝꠣꠘꠡꠦ ꠔꠣꠞ ꠇꠤꠔꠣ ꠖꠥꠡ ꠙꠣꠁꠍꠂꠘ,
ꠄꠞꠖꠣꠄ ꠔꠣꠞꠦ ꠘꠤꠀ ꠔꠣꠞꠣꠞ ꠝꠎꠟꠤꠍꠅ ꠀꠎꠤꠞ ꠇꠞꠟꠣꠝ।
২৯ ꠔꠦꠃ ꠀꠝꠤ ꠛꠥꠎꠟꠣꠝ,
ꠔꠣꠞꠣꠞ ꠡꠞꠤꠅꠔꠞ ꠇꠥꠘꠥ ꠚꠔꠥꠀꠞ ꠟꠣꠉꠤ ꠄꠞ ꠃꠙꠞꠦ ꠖꠥꠡ ꠖꠤꠞꠣ,
ꠅꠁꠟꠦ ꠎꠦꠟꠅ ꠢꠣꠞꠣꠘꠤ ꠛꠣ ꠎꠣꠘꠦ ꠝꠣꠞꠣꠞ ꠎꠥꠇꠣ ꠇꠥꠘꠥ ꠘꠣꠟꠤꠡ ꠙꠣꠁꠍꠤ ꠘꠣ।
৩০ ꠀꠞ ꠀꠝꠤ ꠢꠥꠘꠟꠣꠝ,
ꠔꠣꠞ ꠛꠤꠞꠥꠖ꠆ꠖꠦ ꠖꠣꠉꠣꠛꠣꠎꠤ ꠇꠞꠣ ꠅꠞ,
ꠔꠦꠃ ꠎꠟꠖꠤ ꠇꠞꠤ ꠔꠣꠞꠦ ꠀꠙꠘꠣꠞ ꠉꠦꠍꠦ ꠙꠣꠑꠣꠁ ꠖꠤꠟꠣꠝ।
ꠔꠣꠞ ꠛꠤꠞꠥꠖ꠆ꠖꠦ ꠎꠦꠞꠣ ꠘꠣꠟꠤꠡ ꠖꠤꠍꠦ,
ꠔꠣꠞꠣꠞꠦꠅ ꠇꠁꠍꠤ,
ꠔꠣꠞꠣꠞ ꠇꠥꠘꠥ ꠘꠣꠟꠤꠡ ꠕꠣꠇꠟꠦ ꠀꠙꠘꠣꠞ ꠉꠦꠍꠦ ꠉꠤꠀ ꠢꠥꠘꠣꠁꠔꠣ।”
৩১ ꠍꠤꠙꠣꠁ ꠅꠇꠟꠦ ꠙꠞꠗꠣꠘ ꠅꠚꠤꠡꠣꠞꠞ ꠢꠥꠇꠥꠝ ꠝꠣꠚꠤꠇ ꠙꠣꠃꠟꠥꠍꠞꠦ ꠟꠁꠀ ꠞꠣꠁꠔꠞ ꠛꠣꠟꠣ ꠀꠘ꠆ꠔꠤꠙꠣꠔ꠆ꠞꠤ ꠐꠣꠃꠘꠅ ꠉꠦꠟꠣ।
৩২ ꠛꠣꠖꠞ ꠖꠤꠘ ꠊꠥꠠꠣꠀꠟꠣ ꠍꠤꠙꠣꠁ ꠅꠇꠟꠞ ꠟꠉꠦ ꠙꠣꠃꠟꠥꠍꠞꠦ ꠛꠤꠖꠣꠄ ꠖꠤꠀ ꠛꠣꠇꠤ ꠍꠤꠙꠣꠁ ꠅꠇꠟ ꠇꠦꠘ꠆ꠐꠘꠝꠦꠘ꠆ꠐꠅ ꠊꠥꠞꠤꠀ ꠀꠁꠟꠣ।
৩৩ ꠊꠥꠠꠣꠀꠟꠣ ꠍꠤꠙꠣꠁ ꠅꠇꠟꠦ ꠌꠤꠑꠤ ꠀꠞ ꠙꠣꠃꠟꠥꠍꠞꠦ ꠟꠁꠀ ꠇꠂꠍꠞꠤꠀꠔ ꠙꠃꠍꠤꠀ ꠢꠣꠞꠟꠦ ꠖꠦꠡꠞ ꠙꠞꠗꠣꠘ ꠢꠣꠇꠤꠝꠞ ꠀꠔꠅ ꠡꠝꠎꠣꠁ ꠖꠤꠟꠣ।
৩৪ ꠔꠣꠁꠘ ꠁ ꠌꠤꠑꠤ ꠙꠠꠤꠀ ꠙꠣꠃꠟꠥꠍꠞꠦ ꠎꠤꠇꠣꠁꠟꠣ,
“ꠔꠥꠝꠤ ꠇꠥꠘ ꠖꠦꠡꠞ ꠝꠣꠘꠥꠡ?”
ꠙꠣꠃꠟꠥꠍ ꠇꠤꠟꠤꠇꠤꠀꠞ ꠝꠣꠘꠥꠡ ꠁꠈꠣꠘ ꠢꠥꠘꠤꠀ ꠔꠣꠁꠘ ꠇꠁꠟꠣ,
৩৫ “ꠔꠥꠝꠣꠞꠦ ꠎꠦꠞꠣ ꠖꠥꠡꠦꠞ ꠔꠣꠞꠣ ꠁꠈꠣꠘꠅ ꠀꠁꠀ ꠢꠣꠞꠟꠦ,
ꠀꠝꠤ ꠔꠥꠝꠣꠞ ꠎꠛꠣꠘꠛꠘ꠆ꠖꠤ ꠢꠥꠘꠝꠥ।”
ꠛꠣꠖꠦ ꠔꠣꠁꠘ ꠢꠥꠇꠥꠝ ꠖꠤꠟꠣ,
ꠙꠣꠃꠟꠥꠍꠞꠦ ꠘꠤꠀ ꠞꠣꠎꠣ ꠢꠦꠞꠥꠖꠞ ꠛꠣꠠꠤꠞ ꠎꠦꠟꠅ ꠢꠣꠞꠣꠘꠤꠞ ꠟꠣꠉꠤ।