ꠛꠦ-ꠙꠕꠤ ꠛꠘꠤ ꠁꠍꠞꠣꠁꠟꠦꠅ ꠢꠦꠡ-ꠝꠦꠡ ꠘꠣꠎꠣꠔ ꠙꠣꠁꠛꠣ
১১
১ ꠄꠞꠟꠣꠉꠤ ꠀꠝꠤ ꠅꠈꠘ ꠎꠤꠇꠣꠁꠞꠣꠝ,
ꠀꠟ꠆ꠟꠣꠄ ꠇꠥꠘꠥ ꠔꠣꠘ ꠀꠙꠘ ꠛꠘ꠆ꠖꠣ ꠛꠘꠤ ꠁꠍꠞꠣꠁꠟꠞ ꠟꠉ ꠍꠣꠠꠤ ꠖꠤꠍꠂꠘ ꠘꠤ?
ꠘꠤꠌ꠆ꠌꠄ ꠘꠣ!
ꠇꠣꠞꠘ ꠀꠝꠤ ꠘꠤꠎꠦꠅ ꠔ ꠄꠇꠎꠘ ꠛꠘꠤ ꠁꠍꠞꠣꠁꠟ ꠀꠞ ꠢꠎꠞꠔ ꠁꠛ꠆ꠞꠣꠢꠤꠝꠞ ꠛꠋꠡꠗꠞ,
ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘꠞ ꠝꠣꠘꠥꠡ।
২ ꠀꠟ꠆ꠟꠣꠄ ꠙꠄꠟꠣ ꠕꠣꠇꠤ ꠔꠣꠘ ꠎꠦ ꠙ꠆ꠞꠎꠣꠞꠦ ꠙꠍꠘ꠆ꠖ ꠇꠞꠤꠀ ꠀꠟꠉ ꠇꠞꠍꠤꠟꠣ,
ꠔꠣꠁꠘ ꠔ ꠄꠞꠣꠞ ꠟꠉ ꠍꠣꠠꠍꠂꠘ ꠘꠣ।
ꠢꠎꠞꠔ ꠁꠟꠤꠀꠍ ꠘꠛꠤꠞ ꠛꠦꠙꠣꠞꠦ ꠀꠟ꠆ꠟꠣꠞ ꠇꠣꠟꠣꠝꠅ ꠇꠤꠔꠣ ꠀꠍꠦ,
ꠁꠔꠣ ꠔꠥꠝꠞꠣ ꠎꠣꠘꠅ ꠘꠣ ꠘꠤ?
ꠔꠣꠁꠘ ꠔ ꠛꠘꠤ ꠁꠍꠞꠣꠁꠟꠞ ꠛꠤꠞꠥꠖ꠆ꠖꠦ ꠀꠟ꠆ꠟꠣꠞ ꠖꠞꠛꠣꠞꠅ ꠅꠃ ꠘꠣꠟꠤꠡ ꠖꠤꠍꠟꠣ,
৩ “ꠅ ꠝꠣꠛꠥꠖ,
ꠁꠔꠣꠄ ꠔꠥꠝꠣꠞ ꠘꠛꠤ ꠅꠇꠟꠞꠦ ꠇꠣꠔꠟ ꠇꠞꠍꠦ,
ꠔꠥꠝꠣꠞ ꠇꠥꠞꠛꠣꠘꠤ ꠈꠣꠘꠣꠂꠘꠅ ꠜꠣꠋꠉꠤꠟꠤꠍꠦ।
ꠈꠣꠟꠤ ꠀꠝꠤꠃ ꠛꠣꠌꠤꠀ ꠞꠁꠍꠤ,
ꠅꠈꠘ ꠔꠣꠞꠣ ꠀꠝꠣꠞ ꠎꠣꠘꠈꠣꠘꠅ ꠘꠤꠔꠣꠉꠤ ꠌꠣꠁꠞꠣ।”
৪ ꠔꠦꠃ ꠀꠟ꠆ꠟꠣꠄ ꠔꠣꠘꠞꠦ ꠇꠤꠔꠣ ꠎꠥꠀꠙ ꠖꠤꠍꠟꠣ ꠝꠘꠅ ꠀꠍꠦ ꠘꠤ?
ꠔꠣꠁꠘ ꠇꠁꠍꠟꠣ,
“ꠅ ꠁꠟꠤꠀꠍ,
ꠀꠝꠤ ꠔ ꠡꠣꠔ ꠀꠎꠣꠞ ꠝꠣꠘꠡꠞꠦ ꠀꠝꠣꠞ ꠘꠤꠎꠞ ꠟꠣꠉꠤ ꠀꠟꠉ ꠇꠞꠤꠀ ꠞꠣꠈꠍꠤ,
ꠄꠞꠣ ꠔ ꠁ ꠛꠣꠀꠟ ꠖꠦꠛꠔꠣꠞꠦ ꠙꠞꠘꠣꠝ ꠇꠞꠍꠦ ꠘꠣ।”
৫ ꠑꠤꠇ ꠅꠟꠣꠈꠣꠘ,
ꠀꠟ꠆ꠟꠣꠄ ꠞꠢꠝ ꠇꠞꠤꠀ ꠛꠘꠤ ꠁꠍꠞꠣꠁꠟꠞ ꠄꠇꠐꠣ ꠅꠋꠡꠞꠦ ꠅꠈꠘꠅ ꠀꠟꠉ ꠇꠞꠤ ꠞꠣꠈꠍꠂꠘ।
৬ ꠀꠞ ꠀꠟ꠆ꠟꠣꠄ ꠎꠦꠛꠟꠣ ꠞꠢꠝ ꠇꠞꠤꠀ ꠄꠞꠣꠞꠦ ꠀꠟꠉ ꠇꠞꠍꠂꠘ,
ꠔꠦ ꠁꠔꠣ ꠇꠥꠘꠥ ꠘꠦꠇ ꠀꠝꠟꠞ ꠚꠟ ꠘꠣꠄ।
ꠀꠝꠟꠞ ꠚꠟ ꠅꠁꠟꠦ ꠔ ꠀꠞ ꠞꠢꠝꠔ ꠇꠅꠀ ꠅꠁꠟ ꠘꠣ ꠅꠘꠦ।
৭ ꠔꠦ ꠛꠥꠎꠣ ꠎꠣꠄ,
ꠛꠘꠤ ꠁꠍꠞꠣꠁꠟꠦ ꠡꠞꠤꠅꠔ ꠀꠝꠟ ꠇꠞꠤꠀ ꠎꠦꠔꠣ ꠙꠣꠁꠔꠣ ꠌꠣꠁꠍꠟꠣ,
ꠁꠔꠣ ꠔꠣꠞꠣ ꠙꠣꠁꠍꠂꠘ ꠘꠣ।
ꠈꠣꠟꠤ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠎꠘꠦ ꠙꠣꠁꠍꠂꠘ।
ꠅꠁꠟꠦ ꠛꠣꠇꠤ ꠢꠇꠟꠞ ꠖꠤꠟ ꠙꠣꠡꠣꠘ ꠛꠘꠤꠉꠦꠍꠦ।
৮ ꠎꠦꠟꠣ ꠀꠟ꠆ꠟꠣꠞ ꠇꠣꠟꠣꠝꠦ ꠇꠁꠍꠦ,
ꠀꠟ꠆ꠟꠣꠄ ꠔꠣꠞꠣꠞ ꠖꠤꠟꠞꠦ ꠛꠦꠃꠡꠤ ꠊꠥꠝꠅ ꠚꠣꠟꠣꠁꠍꠂꠘ,
ꠔꠣꠞꠣꠞ ꠌꠃꠈ ꠕꠣꠇꠔꠦꠅ ꠖꠦꠈꠦ ꠘꠣ,
ꠇꠣꠘ ꠕꠣꠇꠟꠦꠅ ꠢꠥꠘꠦ ꠘꠣ।
ꠀꠁꠎ ꠙꠞ꠆ꠎꠘ꠆ꠔ ꠅꠃ ꠢꠣꠟꠔꠅ ꠀꠍꠦ।
৯ ꠅꠟꠣ ꠢꠎꠞꠔ ꠖꠣꠃꠖ ꠘꠛꠤꠄꠅ ꠇꠁꠞꠣ,
ꠔꠣꠞꠣꠞ ꠗꠥꠝꠗꠣꠝ ꠇꠞꠤ ꠈꠣꠅꠀ-ꠖꠣꠅꠀꠃ
ꠡꠤꠇꠣꠞꠞ ꠎꠣꠟ ꠀꠞ ꠚꠣꠘ꠆ꠖ ꠛꠘꠤꠎꠣꠃꠇ।
ꠁꠔꠣ ꠔꠣꠞꠣꠞ ꠛꠤꠙꠖꠞ ꠇꠣꠞꠘ ꠅꠃꠇ,
ꠛꠖ ꠇꠣꠝꠞ ꠡꠣꠎꠣ ꠛꠘꠤꠎꠣꠃꠇ।
১০ ꠔꠣꠞꠣꠞ ꠌꠃꠈ ꠀꠘ꠆ꠖꠣ ꠅꠁꠎꠣꠃꠇ ꠎꠣꠔꠦ ꠘꠣ ꠖꠦꠈꠦ,
ꠔꠥꠝꠤ ꠔꠣꠞꠣꠞ ꠇꠝꠞꠞꠦ ꠢꠣꠝꠦꠡꠣ ꠉꠥꠎꠣ ꠇꠞꠤ ꠞꠣꠈꠤꠅ।
১১ ꠔꠦ ꠛꠘꠤ ꠁꠍꠞꠣꠁꠟ ꠌꠤꠞꠇꠣꠟꠞ ꠟꠣꠉꠤ ꠅꠃ ꠛꠤꠙꠖꠞ ꠚꠣꠘ꠆ꠖꠅ ꠞꠁꠛ ꠘꠤ?
ꠘꠤꠌ꠆ꠌꠄ ꠘꠣ।
ꠛꠞꠋ ꠔꠣꠞꠣꠞ ꠘꠣꠚꠞꠝꠣꠘꠤꠄ ꠜꠤꠘ ꠎꠣꠔꠤ ꠅꠇꠟꠞ ꠟꠣꠉꠤ ꠘꠣꠎꠣꠔꠞ ꠖꠥꠀꠞ ꠈꠥꠟꠤꠉꠦꠟ।
ꠀꠟ꠆ꠟꠣꠄ ꠌꠣꠁꠟꠣ,
ꠁꠔꠣ ꠖꠦꠈꠤꠀ ꠔꠣꠞꠣꠞ ꠖꠤꠟꠅ ꠎꠣꠘꠥ ꠎꠣꠟꠣ ꠙꠄꠖꠣ ꠅꠄ,
ꠇꠣꠞꠘ ꠜꠤꠘ ꠎꠣꠔꠤꠄ ꠘꠣꠎꠣꠔ ꠙꠣꠁꠟꠤꠞꠣ।
১২ ꠅꠈꠣꠘ ꠕꠣꠇꠤ ꠛꠥꠎꠣ ꠎꠣꠄ,
ꠔꠣꠞꠣꠞ ꠘꠣꠚꠞꠝꠣꠘꠤꠞ ꠟꠣꠉꠤ ꠎꠉꠔꠞ ꠝꠣꠘꠡꠞ ꠛꠃꠔ ꠚꠣꠄꠖꠣ ꠅꠁꠍꠦ,
ꠀꠞ ꠔꠣꠞꠣꠞ ꠈꠦꠔꠤꠄ ꠎꠦꠛꠟꠣ ꠜꠤꠘ ꠎꠣꠔꠤꠞ ꠟꠣꠜ ꠅꠁꠟ,
ꠔꠦ ꠔꠣꠞꠣ ꠎꠦꠛꠟꠣ ꠀꠟ꠆ꠟꠣꠞ ꠘꠣꠎꠣꠔꠞ ꠖꠣꠅꠔ ꠇꠛꠥꠟ ꠇꠞꠛꠣ,
ꠅꠃ ꠡꠝꠄ ꠜꠤꠘ ꠎꠣꠔꠤ ꠅꠇꠟꠦ ꠀꠞꠅ ꠇꠔ ꠛꠦꠡꠤ ꠞꠢꠝ ꠙꠣꠁꠛꠣ।
ꠜꠤꠘ ꠎꠣꠔꠤ ꠅꠇꠟꠞ ꠘꠣꠎꠣꠔ
১৩ ꠅ ꠜꠤꠘ ꠎꠣꠔꠤ ꠅꠇꠟ,
ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ,
ꠢꠥꠘꠅ,
ꠔꠥꠝꠞꠣꠞ ꠉꠦꠍꠦꠃ ꠀꠝꠣꠞꠦ ꠍꠣꠢꠣꠛꠤ ꠢꠤꠡꠣꠛꠦ ꠙꠣꠑꠣꠁꠟ ꠅꠁꠍꠦ ꠇꠞꠤ,
ꠀꠝꠤ ꠀꠝꠣꠞ ꠇꠣꠝꠞꠦ ꠈꠥꠛ ꠖꠣꠝ ꠖꠤꠞꠣꠝ।
১৪ ꠇꠣꠞꠘ,
ꠅꠃ ꠇꠣꠝ ꠖꠦꠈꠣꠁꠀ ꠀꠝꠣꠞ ꠘꠤꠎꠞ ꠎꠣꠔꠤ ꠛꠘꠤ ꠁꠍꠞꠣꠁꠟꠞ ꠖꠤꠟꠅ ꠇꠥꠘꠥ ꠎꠣꠟꠣ ꠙꠄꠖꠣ ꠇꠞꠔꠣꠝ ꠙꠣꠞꠤ,
ꠀꠞ ꠅꠃ ꠎꠣꠟꠣꠄ ꠔꠣꠞꠣꠞ ꠝꠣꠎꠞ ꠇꠤꠍꠥ ꠝꠣꠘꠡꠞ ꠎꠣꠘ ꠛꠣꠌꠣꠁꠔꠣꠝ ꠙꠣꠞꠤ।
১৫ ꠔꠣꠞꠣ ꠖꠥꠞꠁ ꠢꠞꠤ ꠎꠣꠅꠀꠄ ꠎꠦꠛꠟꠣ ꠎꠉꠔꠞ ꠝꠣꠘꠡꠞ ꠟꠉꠦ ꠀꠟ꠆ꠟꠣꠞ ꠝꠤꠟꠘ ꠅꠁꠟ,
ꠔꠦ ꠔꠣꠞꠣꠞꠦ ꠎꠦꠛꠟꠣ ꠢꠤꠞꠛꠣꠞ ꠑꠣꠁ ꠖꠤꠛꠣ ꠢꠃ ꠡꠝꠄ ꠇꠥꠘ ꠢꠣꠟꠔ ꠅꠁꠛ?
ꠁꠔꠣ ꠝꠞꠣ ꠝꠣꠘꠥꠡ ꠎꠤꠔꠣ ꠅꠀꠞ ꠟꠣꠈꠣꠘ ꠘꠣꠄ ꠘꠤ?
১৬ ꠗꠞꠅ,
ꠀꠟ꠆ꠟꠣꠞ ꠘꠣꠝꠦ ꠛꠤꠟꠣꠘꠤꠞ ꠞꠥꠐꠤꠞ ꠝꠥꠟ ꠈꠣꠁ ꠎꠥꠖꠤ ꠙꠛꠤꠔ꠆ꠞ ꠅꠄ,
ꠔꠦ ꠔ ꠛꠣꠘꠣꠁꠟ ꠞꠥꠐꠤꠅ ꠙꠛꠤꠔ꠆ꠞ।
ꠉꠣꠍꠞ ꠝꠥꠟ ꠎꠠ ꠙꠛꠤꠔ꠆ꠞ ꠅꠁꠟꠦ,
ꠄꠞ ꠒꠣꠟ-ꠙꠣꠟꠣꠅ ꠘꠤꠌ꠆ꠌꠄ ꠙꠛꠤꠔ꠆ꠞ।
ꠑꠤꠇ ꠅꠟꠣ,
ꠛꠘꠤ ꠁꠍꠞꠣꠁꠟꠞ ꠝꠥꠟ ꠛꠣꠚ ꠢꠎꠞꠔ ꠁꠛ꠆ꠞꠣꠢꠤꠝ ꠎꠦꠛꠟꠣ ꠙꠛꠤꠔ꠆ꠞ,
ꠔꠦ ꠛꠘꠤ ꠁꠍꠞꠣꠁꠟꠅ ꠙꠛꠤꠔ꠆ꠞ।
১৭ ꠀꠞ ꠝꠘꠦ ꠇꠞꠅ,
ꠉꠣꠍꠞ ꠇꠤꠍꠥ ꠒꠣꠟ-ꠙꠣꠟꠣ ꠇꠣꠐꠣ ꠅꠁꠟ,
ꠛꠣꠖꠦ ꠅꠃ ꠇꠣꠐꠣ ꠎꠣꠉꠣꠔ ꠔꠥꠝꠣꠞ ꠟꠣꠈꠣꠘ ꠎꠋꠟꠤ ꠎꠄꠔꠥꠘ ꠉꠣꠍꠞ ꠇꠤꠍꠥ ꠒꠣꠟ ꠇꠟꠝ ꠖꠤꠀ ꠎꠥꠠꠣ ꠖꠦꠅꠀ ꠅꠁꠟ,
ꠔꠦ ꠔꠥꠝꠤ ꠘꠤꠌ꠆ꠌꠄ ꠝꠥꠟ ꠉꠣꠍ ꠕꠣꠇꠤꠃ ꠞꠡ ꠙꠣꠁꠞꠣꠄ।
১৮ ꠅꠈꠘ ꠔꠥꠝꠤꠅ ꠘꠤꠎꠞꠦ ꠢꠃ ꠇꠣꠐꠤꠀ ꠚꠣꠟꠣꠁꠟ ꠒꠣꠟ ꠕꠣꠇꠤ ꠛꠠ ꠝꠘꠅ ꠇꠞꠤꠅ ꠘꠣ,
ꠁꠀꠖ ꠞꠣꠈꠤꠅ,
ꠔꠥꠝꠤ ꠝꠥꠟ ꠉꠣꠍꠞꠦ ꠐꠤꠇꠣꠁ ꠞꠣꠈꠍ ꠘꠣ,
ꠛꠞꠋ ꠝꠥꠟ ꠉꠣꠍꠦꠃ ꠔꠥꠝꠣꠞꠦ ꠐꠤꠇꠣꠁꠀ ꠞꠣꠈꠍꠦ।
১৯ ꠔꠥꠝꠤ ꠁꠈꠣꠘ ꠇꠁꠔꠣꠄ ꠙꠣꠞ,
“ꠀꠝꠣꠞꠦ ꠎꠥꠠꠣ ꠖꠤꠛꠣꠞ ꠟꠣꠉꠤꠃ ꠔ ꠀꠉꠞ ꠒꠣꠟ-ꠙꠣꠟꠣꠁꠘ ꠇꠣꠐꠣ ꠅꠁꠍꠤꠟ।”
২০ ꠁꠈꠣꠘ ꠑꠤꠇ ꠀꠍꠦ,
ꠅꠁꠟꠦ ꠁꠝꠣꠘ ꠘꠣ ꠀꠘꠣꠞ ꠇꠣꠞꠘꠦꠃ ꠔ ꠔꠣꠞꠣꠞꠦ ꠇꠣꠐꠤꠀ ꠚꠣꠟꠣꠁꠟ ꠅꠁꠍꠦ,
ꠀꠞ ꠁꠝꠣꠘ ꠀꠘꠣꠄ ꠔꠥꠝꠣꠞꠦ ꠢꠘꠅ ꠟꠣꠉꠣꠁꠟ ꠅꠁꠍꠦ।
ꠔꠦ ꠔꠥꠝꠤꠅ ꠛꠦꠐꠣꠉꠤꠞꠤ ꠘꠣ ꠖꠦꠈꠣꠁꠀ ꠀꠟ꠆ꠟꠣꠞꠦ ꠒꠞꠣꠅ।
২১ ꠝꠘꠅ ꠞꠣꠈꠤꠅ,
ꠀꠟ꠆ꠟꠣꠄ ꠎꠦꠛꠟꠣ ꠝꠥꠟ ꠒꠣꠟ-ꠙꠣꠟꠣꠞꠦꠃ ꠞꠦꠢꠣꠁ ꠖꠤꠍꠂꠘ ꠘꠣ,
ꠔꠦ ꠔꠥꠝꠤ ꠇꠟꠝꠞ ꠒꠣꠟꠞꠦ ꠇꠥꠘꠥ ꠞꠦꠢꠣꠁ ꠖꠤꠛꠣ ꠘꠤ?
২২ ꠄꠞꠟꠣꠉꠤꠃ ꠌꠤꠘ꠆ꠔꠣ ꠇꠞꠤꠀ ꠖꠦꠈꠅ,
ꠀꠟ꠆ꠟꠣ ꠙꠣꠇ ꠇꠔ ꠖꠄꠀꠟ ꠀꠞ ꠇꠔ ꠙꠣꠡꠣꠘ।
ꠎꠦꠞꠣ ꠛꠦ-ꠙꠕꠦ ꠚꠣꠐꠤ ꠉꠦꠍꠂꠘ ꠔꠣꠞꠣꠞ ꠟꠣꠉꠤ ꠔꠣꠁꠘ ꠙꠣꠡꠣꠘ,
ꠀꠞ ꠔꠥꠝꠣꠞ ꠛꠣꠄ ꠔꠣꠁꠘ ꠖꠄꠀꠟꠥ,
ꠎꠥꠖꠤ ꠔꠥꠝꠤ ꠔꠣꠘ ꠖꠄꠀꠞ ꠝꠣꠎꠦ ꠞꠅ,
ꠘꠣ ꠞꠁꠟꠦ ꠔꠥꠝꠣꠞꠦꠅ ꠅꠟꠣ ꠇꠣꠐꠤꠀ ꠚꠣꠟꠣꠁ ꠖꠤꠛꠣ।
২৩ ꠀꠞ ꠢꠃ ꠛꠘꠤ ꠁꠍꠞꠣꠁꠟꠦꠅ ꠎꠥꠖꠤ ꠢꠤꠞꠛꠣꠞ ꠁꠝꠣꠘ ꠀꠘꠂꠘ,
ꠔꠦ ꠔꠣꠞꠣꠞꠦꠅ ꠔꠣꠁꠘ ꠝꠥꠟ ꠉꠣꠍꠞ ꠟꠉꠦ ꠎꠥꠠꠣ ꠖꠤꠛꠣ,
ꠀꠟ꠆ꠟꠣꠄ ꠔ ꠁꠟꠣ ꠎꠥꠠꠣ ꠖꠤꠔꠣ ꠙꠣꠞꠂꠘ।
২৪ ꠀꠍꠟꠦ ꠔ ꠔꠥꠝꠤ ꠀꠍꠟꠣꠄ ꠎꠋꠟꠤ ꠎꠄꠔꠥꠘ ꠉꠣꠍꠞ ꠒꠣꠟ,
ꠔꠥꠝꠣꠞꠦ ꠎꠦꠛꠟꠣ ꠢꠘ ꠕꠣꠇꠤ ꠇꠣꠐꠤꠀ ꠀꠘꠤꠀ ꠝꠣꠟꠤꠇꠣꠘꠣ ꠛꠣꠉꠣꠘꠞ ꠎꠄꠔꠥꠘ ꠉꠣꠍꠞ ꠟꠉꠦ ꠀꠌꠣꠘꠇ ꠢꠣꠟꠔꠦ ꠎꠥꠠꠣ ꠟꠣꠉꠣꠁꠟ ꠅꠁꠍꠦ।
ꠔꠦ ꠌꠤꠘ꠆ꠔꠣ ꠇꠞꠅ,
ꠎꠦꠞꠣ ꠅꠃ ꠉꠣꠍꠞ ꠀꠍꠟ ꠒꠣꠟ,
ꠔꠣꠞꠣꠞꠦ ꠝꠥꠟ ꠉꠣꠍꠞ ꠟꠉꠦ ꠟꠣꠉꠣꠘꠤ ꠇꠔ ꠡꠥꠎꠣ।
ꠀꠟ꠆ꠟꠣꠞ ꠖꠄꠀ ꠢꠇꠟꠞ ꠃꠙꠞꠦ
২৫ ꠅ ꠜꠣꠁ ꠅꠇꠟ,
ꠔꠥꠝꠞꠣ ꠎꠣꠔꠦ ꠘꠤꠎꠦ ꠘꠤꠎꠦ ꠀꠈꠟꠖꠣꠞ ꠘꠣ ꠛꠘꠅ,
ꠄꠞꠟꠣꠉꠤ ꠄꠇꠐꠣ ꠛꠣꠔꠥꠘꠤ ꠛꠦꠙꠣꠞ ꠀꠝꠤ ꠔꠥꠝꠞꠣꠞꠦ ꠢꠤꠇꠣꠁ ꠖꠦꠁ।
ꠢꠥꠘꠅ,
ꠜꠤꠘ ꠎꠣꠔꠤ ꠅꠇꠟꠞ ꠘꠣꠎꠣꠔ ꠙꠣꠅꠀꠞ ꠡꠋꠈꠣ ꠙꠥꠞꠣ ꠘꠣ ꠅꠀ ꠙꠞ꠆ꠎꠘ꠆ꠔ ꠛꠃꠔ ꠛꠘꠤ ꠁꠍꠞꠣꠁꠟꠞ ꠖꠤꠟ ꠙꠣꠡꠣꠘ ꠢꠣꠟꠔꠦ ꠞꠁꠛ।
২৬ ꠢꠦꠡꠦ ꠅꠟꠣꠃ ꠢꠇꠟ ꠛꠘꠤ ꠁꠍꠞꠣꠁꠟꠦ ꠘꠣꠎꠣꠔ ꠢꠣꠍꠤꠟ ꠇꠞꠛꠣ,
ꠎꠦꠟꠣ ꠀꠍꠝꠣꠘꠤ ꠇꠤꠔꠣꠛꠅ ꠀꠍꠦ,
ꠔꠞꠣꠘꠦꠀꠟꠣꠄ ꠔꠡꠞꠤꠚ ꠀꠘꠛꠣ
ꠎꠦꠞꠥꠎꠣꠟꠦꠝꠞ ꠍꠤꠅꠘ ꠙꠣꠠ ꠕꠣꠇꠤ,
ꠔꠣꠁꠘ ꠁꠀꠇꠥꠛ ꠘꠛꠤꠞ ꠈꠣꠘ꠆ꠖꠣꠘ ꠕꠣꠇꠤ
ꠘꠣꠚꠞꠝꠣꠘꠤ ꠈꠦꠖꠣꠁ ꠖꠤꠛꠣ।
২৭ ꠀꠝꠤ ꠅꠟꠣꠃ ꠔꠣꠞꠣꠞ ꠉꠥꠘꠣꠞꠦ ꠢꠞꠣꠁꠟꠤꠝꠥ
ꠁꠐꠣ ꠔ ꠀꠝꠣꠞ ꠖꠦꠅꠀ ꠅꠀꠖꠣ।
২৮ ꠢꠥꠘꠅ,
ꠔꠥꠝꠞꠣꠞ ꠜꠣꠟꠣꠁꠞ ꠟꠣꠉꠤ ꠈꠥꠡ-ꠈꠛꠞꠤꠞ ꠛꠦꠙꠣꠞꠦ ꠔꠣꠞꠣ ꠔ ꠅꠈꠘ ꠀꠟ꠆ꠟꠣꠞ ꠖꠥꠡꠝꠘ,
ꠅꠁꠟꠦ ꠀꠟ꠆ꠟꠣꠁ ꠙꠍꠘ꠆ꠖꠞ ꠛꠦꠙꠣꠞꠦ ꠛꠣꠚ-ꠖꠣꠖꠣꠞ ꠍꠤꠟꠍꠤꠟꠣꠄ ꠔꠣꠞꠣ ꠅꠁꠟꠣ ꠀꠟ꠆ꠟꠣꠞ ꠝꠢꠛ꠆ꠛꠔꠞ ꠝꠣꠘꠥꠡ।
২৯ ꠇꠣꠞꠘ ꠀꠟ꠆ꠟꠣꠄ ꠔꠣꠘ ꠞꠢꠝꠔꠞ ꠖꠣꠘ-ꠖꠇ꠆ꠇꠤꠘꠣ ꠀꠞ ꠔꠣꠘ ꠖꠣꠅꠔꠞ ꠇꠕꠣ ꠇꠥꠘꠥꠝꠘ꠆ꠔꠦꠃ ꠝꠔ ꠛꠖꠟꠣꠁꠘ ꠘꠣ।
৩০ ꠎꠦꠟꠣ ꠔꠥꠝꠞꠣꠅ ꠄꠇ ꠡꠝꠄ ꠘꠣꠚꠞꠝꠣꠘ ꠀꠍꠟꠣꠄ,
ꠅꠁꠟꠦ ꠅꠈꠘ ꠛꠘꠤ ꠁꠍꠞꠣꠁꠟꠦ ꠘꠣꠚꠞꠝꠣꠘꠤ ꠇꠞꠣꠄ ꠔꠥꠝꠞꠣ ꠔꠣꠘ ꠝꠦꠢꠦꠞꠛꠣꠘꠤ ꠙꠣꠁꠍ,
৩১ ꠑꠤꠇ ꠅꠃ ꠟꠣꠈꠣꠘ,
ꠔꠥꠝꠞꠣ ꠝꠦꠢꠦꠞꠛꠣꠘꠤ ꠙꠣꠅꠀꠄ ꠔꠣꠞꠣ ꠅꠈꠘ ꠘꠣꠚꠞꠝꠣꠘꠤ ꠇꠞꠦꠞ,
ꠎꠣꠔꠦ ꠔꠣꠞꠣꠅ ꠅꠟꠣ ꠝꠦꠢꠦꠞꠛꠣꠘꠤ ꠙꠣꠁꠘ।
৩২ ꠀꠞ ꠀꠟ꠆ꠟꠣꠞ ꠝꠥꠘꠡꠣ ꠅꠁꠟ,
ꠔꠣꠁꠘ ꠎꠣꠔꠦ ꠢꠇꠟꠞ ꠛꠣꠄ ꠝꠦꠢꠦꠞꠛꠣꠘꠤ ꠖꠦꠈꠣꠁꠔꠣ ꠙꠣꠞꠂꠘ,
ꠅꠔꠣꠞ ꠟꠣꠉꠤ ꠢꠇꠟꠞꠦꠃ ꠘꠣꠚꠞꠝꠣꠘꠤꠞ ꠝꠣꠎꠦ ꠛꠘ꠆ꠖꠤ ꠇꠞꠍꠂꠘ।
৩৩ ꠛꠥꠎꠞꠣꠄ ꠘꠤ,
ꠀꠟ꠆ꠟꠣꠞ ꠜꠣꠘ꠆ꠒꠣꠞ ꠇꠔ ꠛꠠ!
ꠔꠣꠘ ꠀꠈꠟ-ꠢꠦꠇꠝꠔ ꠇꠔ ꠉꠁꠘ!
ꠔꠣꠘ ꠛꠤꠛꠦꠇ-ꠛꠤꠌꠣꠞ ꠛꠥꠎꠣꠞ ꠅꠡꠣꠁꠖ꠆ꠖ,
ꠔꠣꠘ ꠇꠣꠝ-ꠇꠣꠎ ꠅꠇꠟ ꠔꠣꠟ꠆ꠟꠣꠡ ꠇꠞꠤ ꠛꠥꠎꠣ ꠎꠣꠄ ꠘꠣ।
৩৪ ꠎꠦꠟꠣ ꠇꠤꠔꠣꠛꠅ ꠀꠍꠦ,
ꠇꠣꠞꠘ ꠝꠣꠛꠥꠖꠞ ꠝꠘ ꠌꠤꠘꠣꠞ ꠡꠣꠁꠖ꠆ꠖ ꠇꠣꠞ ꠀꠍꠦ?
ꠔꠣꠘꠞꠦ ꠙꠞꠣꠝꠤꠡ ꠖꠤꠛꠣꠞ ꠟꠣꠈ ꠇꠦ ꠀꠍꠦ?
৩৫ ꠇꠦ ꠀꠉꠦ ꠀꠟ꠆ꠟꠣꠞꠦ ꠇꠥꠘ꠆ꠔꠣ ꠖꠤꠟꠣꠁꠔ ꠙꠣꠞꠍꠦ,
ꠎꠦ ꠇꠣꠞꠘꠦ ꠔꠣꠁꠘ ꠔꠣꠞ ꠉꠦꠍꠦ ꠖꠦꠘꠣꠖꠣꠞ ꠀꠍꠂꠘ?
৩৬ ꠀꠍꠟꠦ ꠢꠇꠟꠔꠣꠃ ꠔ ꠔꠣꠘ ꠉꠦꠍ ꠕꠣꠇꠤ,
ꠔꠣꠘ ꠝꠣꠎꠖꠤꠃ ꠀꠄ,
ꠔꠣꠘ ꠘꠤꠎꠞ ꠟꠣꠉꠤ ꠙꠄꠖꠣ ꠇꠞꠍꠂꠘ।
ꠎꠥꠉꠦ ꠎꠥꠉꠦ ꠌꠤꠞꠇꠣꠟ ꠔꠣꠘ ꠔꠣꠞꠤꠚ ꠅꠃꠇ।
ꠀꠝꠤꠘ।