ꠝꠣꠘꠡꠞ ꠜꠣꠟꠣꠁ ꠇꠞꠣꠞ ꠌꠦꠡ꠆ꠐꠣ ꠇꠞꠅ
১৫
১ ꠄꠞꠟꠣꠉꠤ ꠀꠝꠞꠣ ꠎꠦꠞꠣꠞ ꠁꠝꠣꠘ ꠝꠎꠛꠥꠔ ꠀꠍꠦ,
ꠀꠝꠞꠣ ꠈꠣꠟꠤ ꠘꠤꠎꠞ ꠈꠥꠡꠤꠞ ꠛꠣꠄ ꠘꠣ ꠌꠣꠁꠀ,
ꠀꠝꠞꠣꠞ ꠇꠝꠎꠥꠞ ꠝꠔꠡꠇ꠆ꠇꠤ ꠝꠘꠣ ꠁꠝꠣꠘꠖꠣꠞ ꠜꠣꠁꠀꠂꠘꠞꠦꠅ ꠎꠣꠘꠥ ꠡꠁꠎ꠆ꠎ ꠇꠞꠤ।
২ ꠅꠔꠣ ꠜꠣꠁꠀꠂꠘ꠆ꠔꠞꠦ ꠉꠠꠤꠀ ꠔꠥꠟꠣꠞ ꠘꠤꠅꠔꠦ,
ꠙꠞꠔꠦꠇꠦꠃ ꠔꠣꠞꠣꠞ ꠜꠣꠟꠣꠁꠞ ꠟꠣꠉꠤ ꠔꠣꠞꠣꠞ ꠝꠘꠞ ꠙꠍꠘ꠆ꠖꠞꠦ ꠎꠣꠘꠥ ꠈꠥꠡ ꠞꠣꠈꠤ।
৩ ꠀꠟ-ꠝꠍꠤꠄꠅ ꠔ ꠔꠣꠘ ꠘꠤꠎꠞꠦ ꠈꠥꠡꠤ ꠇꠞꠍꠂꠘ ꠘꠣ,
ꠛꠞꠋ ꠙꠛꠤꠔ꠆ꠞ ꠎꠛꠥꠞ ꠡꠞꠤꠚꠅ ꠀꠍꠦ,
“ꠅ ꠝꠣꠛꠥꠖ,
ꠔꠥꠝꠣꠞꠦ ꠎꠦꠞꠣ ꠛꠦꠁꠎ꠆ꠎꠔ ꠇꠞꠍꠦ,
ꠔꠣꠞꠣꠞ ꠅꠃ ꠢꠇꠟ ꠛꠦꠁꠎ꠆ꠎꠔꠤ ꠀꠝꠣꠞ ꠃꠙꠞꠦꠃ ꠀꠁꠍꠦ।”
৪ ꠔꠦ ꠀꠉꠞ ꠀꠍꠝꠣꠘꠤ ꠇꠤꠔꠣꠛꠅ ꠎꠔꠔꠣ ꠟꠦꠈꠣ ꠅꠁꠍꠦ,
ꠁꠔꠣ ꠔ ꠀꠝꠞꠣꠞꠦꠃ ꠔꠣꠟꠤꠝ ꠖꠤꠛꠣꠞ ꠟꠣꠉꠤ ꠟꠦꠈꠣ ꠅꠁꠍꠦ,
ꠎꠣꠔꠦ ꠅꠔꠣ ꠖꠦꠈꠤꠀ ꠀꠝꠞꠣꠞ ꠍꠛꠞ ꠀꠞ ꠡꠣꠘ꠆ꠔꠘꠣ ꠀꠄ,
ꠀꠞ ꠀꠡꠣ-ꠜꠞꠡꠣ ꠙꠣꠁ।
৫ ꠅꠈꠘ ꠍꠛꠞ ꠀꠞ ꠡꠣꠘ꠆ꠔꠘꠣ ꠖꠦꠅꠞꠣ ꠀꠟ꠆ꠟꠣꠄ ꠁꠍꠣ ꠀꠟ-ꠝꠍꠤꠞ ꠙꠕꠦ ꠌꠟꠣꠞ ꠟꠣꠉꠤ,
ꠔꠥꠝꠞꠣ ꠢꠇꠟꠞ ꠝꠘ ꠄꠇ ꠇꠞꠃꠇ꠆ꠇꠣ।
৬ ꠔꠦꠃ ꠔꠥꠝꠞꠣ ꠄꠇ ꠝꠘꠦ ꠀꠞ ꠄꠇ ꠝꠥꠈꠦ,
ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣꠞ ꠔꠣꠞꠤꠚ ꠇꠞꠔꠣꠄ ꠙꠣꠞꠛꠣꠄ।
ꠢꠇꠟꠞ ꠟꠣꠉꠤ ꠀꠟ-ꠝꠍꠤꠞ ꠔꠡꠞꠤꠚ
৭ ꠄꠞꠟꠣꠉꠤꠃ ꠅ ꠜꠣꠁ ꠅꠇꠟ,
ꠀꠟ-ꠝꠍꠤꠄ ꠎꠦꠟꠣ ꠔꠥꠝꠞꠣꠞꠦ ꠀꠙꠘ ꠇꠞꠍꠤꠟꠣ,
ꠔꠥꠝꠞꠣꠅ ꠅꠟꠣ ꠄꠇꠦ-ꠅꠁꠘ꠆ꠘꠞꠦ ꠀꠙꠘ ꠇꠞꠤꠟꠣꠅ,
ꠎꠣꠔꠦ ꠀꠟ꠆ꠟꠣꠞ ꠉꠃꠞꠛ ꠅꠄ।
৮ ꠝꠘꠅ ꠞꠣꠈꠤꠅ,
ꠀꠟ꠆ꠟꠣꠄ ꠛꠘꠤ ꠁꠍꠞꠣꠁꠟꠞ ꠝꠥꠟ ꠝꠥꠞꠛ꠆ꠛꠤ ꠅꠇꠟꠞ ꠟꠉꠦ ꠎꠔ ꠅꠀꠖꠣ ꠇꠞꠍꠟꠣ,
ꠅꠔꠣꠞ ꠢꠇꠤꠇꠔꠤ ꠙꠞꠝꠣꠘ ꠇꠞꠣꠞ ꠟꠣꠉꠤ ꠀꠟ-ꠝꠍꠤ ꠀꠁꠀ ꠛꠘꠤ ꠁꠍꠞꠣꠁꠟꠞ ꠈꠦꠎꠝꠔꠉꠣꠞ ꠅꠁꠟꠣ।
৯ ꠀꠞ ꠜꠤꠘ ꠎꠣꠔꠤꠞ ꠉꠦꠍꠦꠅ ꠀꠁꠟꠣ,
ꠎꠣꠔꠦ ꠄꠞꠣꠅ ꠀꠟ꠆ꠟꠣꠞ ꠞꠢꠝꠔ ꠖꠦꠈꠤꠀ ꠔꠣꠘ ꠔꠣꠞꠤꠚ ꠇꠞꠦ।
ꠁ ꠛꠦꠙꠣꠞꠦ ꠎꠛꠥꠞ ꠡꠞꠤꠚꠅ ꠀꠉꠦꠃ ꠇꠅꠀ ꠅꠁꠍꠦ,
ꠄꠞꠟꠣꠉꠤꠃ ꠀꠝꠤ ꠜꠤꠘ ꠎꠣꠔꠤ ꠅꠇꠟꠞ ꠝꠣꠎꠦ ꠔꠥꠝꠣꠞ ꠔꠣꠞꠤꠚ ꠇꠞꠝꠥ
ꠔꠣꠞꠣꠞ ꠝꠣꠎꠦ ꠔꠥꠝꠣꠞ ꠉꠥꠘꠉꠣꠘ ꠉꠣꠁꠝꠥ।
১০ ꠀꠞ ꠔꠃꠞꠣꠔ ꠡꠞꠤꠚꠅ ꠇꠅꠀ ꠅꠁꠍꠦ,
ꠅ ꠖꠥꠘꠤꠀꠞ ꠢꠇꠟ ꠎꠣꠔꠤꠞ ꠝꠣꠘꠥꠡ,
ꠀꠟ꠆ꠟꠣꠞ ꠀꠙꠘ ꠙ꠆ꠞꠎꠣ ꠛꠘꠤ ꠁꠍꠞꠣꠁꠟꠞ ꠟꠉꠦ ꠝꠤꠟꠤꠀ,
ꠔꠥꠝꠞꠣꠅ ꠔꠣꠘ ꠔꠣꠞꠤꠚ ꠇꠞꠅ।
১১ ꠢꠤꠞꠛꠣꠞ ꠎꠛꠥꠞ ꠡꠞꠤꠚꠅ ꠇꠅꠀ ꠅꠁꠍꠦ,
ꠖꠥꠘꠤꠀꠞ ꠢꠇꠟ ꠎꠣꠔꠤꠄ ꠝꠣꠛꠥꠖꠞ ꠔꠣꠞꠤꠚ ꠇꠞꠅ,
ꠢꠇꠟ ꠝꠣꠘꠡꠦ ꠔꠣꠘ ꠉꠥꠘꠉꠣꠘ ꠉꠣꠅ।
১২ ꠀꠞ ꠢꠎꠞꠔ ꠁꠡꠣꠄꠀ ꠘꠛꠤꠄ ꠟꠦꠈꠍꠂꠘ,
ꠎꠦꠁꠘ ꠛꠣꠖꠡꠣ ꠖꠣꠃꠖ ꠛꠤꠘ-ꠁꠀꠍꠞ ꠈꠣꠘ꠆ꠖꠣꠘꠞ ꠝꠥꠟ ꠈꠥꠐꠤ,
ꠢꠇꠟ ꠎꠣꠔꠤꠞ ꠃꠙꠞꠦ ꠛꠣꠖꠡꠣꠁ ꠇꠞꠣꠞ ꠟꠣꠉꠤ ꠄꠁꠘ ꠀꠁꠛꠣ,
ꠔꠣꠘ ꠃꠙꠞꠦꠃ ꠕꠣꠇꠛ ꠢꠇꠟ ꠝꠣꠘꠡꠞ ꠀꠡꠣ-ꠜꠞꠡꠣ।
১৩ ꠔꠦ ꠖꠤꠟꠞ ꠝꠣꠎꠦ ꠀꠡꠣ ꠖꠦꠅꠞꠣ ꠀꠟ꠆ꠟꠣꠄ ꠁꠝꠣꠘꠞ ꠛꠟꠦ,
ꠔꠥꠝꠞꠣꠞꠦ ꠢꠇꠟ ꠟꠣꠈꠣꠘ ꠈꠥꠡꠤ-ꠛꠣꠡꠤ ꠀꠞ ꠡꠣꠘ꠆ꠔꠤꠞ ꠝꠣꠎꠦ ꠢꠣꠛꠥ-ꠒꠥꠛꠥ ꠈꠣꠅꠀꠃꠇ꠆ꠇꠣ।
ꠔꠦꠃ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠇꠥꠖꠞꠔꠤꠄ ꠔꠥꠝꠞꠣꠞ ꠀꠡꠣ-ꠜꠞꠡꠣ ꠛꠣꠁꠀ ꠙꠠꠛ।
ꠢꠎꠞꠔ ꠙꠣꠃꠟꠥꠍꠞ ꠔꠛꠟꠤꠉ ꠇꠣꠝꠞ ꠘꠤꠅꠝ-ꠡꠥꠔ꠆ꠞ
১৪ ꠅ ꠜꠣꠁ ꠅꠇꠟ,
ꠔꠥꠝꠞꠣꠞ ꠛꠦꠙꠣꠞꠦ ꠀꠝꠤ ꠙꠥꠞꠣꠙꠥꠞ ꠛꠥꠎꠞꠣꠝ,
ꠔꠥꠝꠞꠣꠞ ꠖꠤꠟ ꠈꠣꠘ ꠘꠦꠇ ꠘꠤꠅꠔꠦ ꠜꠞꠣ ꠀꠞ ꠍꠢꠤ-ꠡꠥꠖ꠆ꠖ ꠁꠝꠣꠘꠤ ꠀꠈꠟ ꠀꠍꠦ,
ꠎꠣꠔꠦ ꠄꠇꠦ-ꠅꠁꠘ꠆ꠘꠞꠦ ꠙꠞꠣꠝꠤꠡ ꠖꠤꠔꠣꠄ ꠙꠣꠞ।
১৫ ꠔꠣ-ꠅ ꠇꠁꠄꠇꠐꠣ ꠛꠦꠙꠣꠞꠦ ꠀꠝꠤ ꠔꠥꠝꠞꠣꠞꠦ ꠝꠘꠅ ꠇꠞꠣꠁ ꠖꠤꠞꠣꠝ,
ꠀꠟ꠆ꠟꠣꠄ ꠀꠝꠣꠞꠦ ꠅꠃ ꠘꠤꠀꠝꠔ ꠖꠤꠍꠂꠘ ꠇꠞꠤ,
ꠀꠝꠤ ꠡꠣꠅꠡ ꠇꠞꠤ ꠔꠥꠝꠞꠣꠞ ꠉꠦꠍꠦ ꠟꠦꠈꠤꠀꠞ,
১৬ ꠁꠍꠣ ꠀꠟ-ꠝꠍꠤꠞ ꠈꠣꠖꠤꠝ ꠢꠤꠡꠣꠛꠦ ꠀꠟ꠆ꠟꠣꠄ ꠀꠝꠣꠞꠦ ꠔꠥꠝꠞꠣꠞ ꠟꠣꠈꠣꠘ ꠜꠤꠘ ꠎꠣꠔꠤ ꠅꠇꠟꠞ ꠉꠦꠍꠦ ꠙꠣꠑꠣꠁꠍꠂꠘ।
ꠄꠞꠟꠣꠉꠤꠃ ꠔꠣꠘ ꠖꠦꠅꠀ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠝꠣꠎꠖꠤ ꠀꠝꠤ ꠁꠝꠣꠝꠔꠤꠞ ꠇꠣꠝ ꠇꠞꠤꠀꠞ,
ꠎꠣꠔꠦ ꠅꠃ ꠜꠤꠘ ꠎꠣꠔꠤ ꠅꠇꠟ ꠀꠟ꠆ꠟꠣꠞ ꠙꠣꠇ ꠞꠥꠢꠦ ꠙꠛꠤꠔ꠆ꠞ ꠅꠁꠀ ꠔꠣꠘ ꠖꠞꠛꠣꠞꠅ ꠇꠛꠥꠟ ꠅꠀꠞ ꠎꠥꠇꠣ ꠇꠥꠞꠛꠣꠘꠤ ꠅꠁꠘ।
১৭ ꠀꠟ꠆ꠟꠣ ꠙꠣꠇꠞ ꠟꠣꠉꠤ ꠀꠝꠤ ꠎꠦ ꠈꠦꠎꠝꠔ ꠇꠞꠤꠀꠞ,
ꠅꠃ ꠇꠣꠝꠞ ꠇꠣꠞꠘꠦ ꠁꠍꠣ ꠀꠟ-ꠝꠍꠤꠞ ꠝꠣꠎꠖꠤ ꠀꠝꠣꠞ ꠛꠠꠣꠁ ꠖꠦꠈꠣꠘꠤꠞ ꠄꠈꠔꠤꠀꠞ ꠀꠍꠦ।
১৮ ꠀꠟ-ꠝꠍꠤꠄ ꠀꠝꠣꠞ ꠝꠣꠎꠖꠤ ꠎꠦ ꠇꠣꠝ ꠢꠣꠍꠤꠟ ꠇꠞꠞꠣ,
ꠄꠞ ꠛꠣꠁꠞꠦ ꠇꠥꠘ꠆ꠔꠣ ꠝꠣꠔꠤꠛꠣꠞ ꠡꠣꠅꠡ ꠀꠝꠣꠞ ꠘꠣꠁ।
ꠔꠣꠁꠘ ꠀꠝꠣꠞ ꠝꠥꠈꠞ ꠇꠕꠣ,
ꠀꠝꠣꠞ ꠇꠣꠝ-ꠇꠣꠎ,
১৯ ꠇꠦꠞꠣꠝꠔꠤ-ꠝꠥꠎꠦꠎꠣ ꠀꠞ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠇꠥꠖꠞꠔꠤ ꠛꠟꠦ ꠜꠤꠘ ꠎꠣꠔꠤ ꠅꠇꠟꠞꠦꠖꠤ ꠀꠟ꠆ꠟꠣꠞ ꠉꠥꠟꠣꠝꠤ ꠇꠞꠣꠁꠍꠂꠘ।
ꠄꠞꠟꠣꠉꠤꠃ ꠀꠝꠤ ꠀꠟ-ꠝꠍꠤꠞ ꠈꠥꠡ-ꠈꠛꠞꠤꠞꠦ ꠎꠦꠞꠥꠎꠣꠟꠦꠝ ꠕꠣꠇꠤ ꠁꠟꠥꠞꠤꠇꠣ ꠙꠞ꠆ꠎꠘ꠆ꠔ ꠢꠇꠟ ꠎꠣꠉꠣꠞ ꠝꠣꠎꠦ ꠙꠥꠞꠣꠙꠥꠞ ꠔꠛꠟꠤꠉ ꠇꠞꠍꠤ।
২০ ꠔꠦ ꠎꠦ ꠎꠣꠉꠣꠔ ꠇꠥꠘꠥꠖꠤꠘ ꠀꠟ-ꠝꠍꠤꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣ ꠅꠁꠍꠦ ꠘꠣ,
ꠢꠃ ꠎꠣꠉꠣꠔ ꠔꠛꠟꠤꠉ ꠇꠞꠣꠃ ꠀꠝꠣꠞ ꠎꠤꠘ꠆ꠖꠦꠉꠤꠞ ꠝꠥꠟ ꠇꠣꠝ ꠝꠘꠅ ꠇꠞꠤ।
ꠀꠝꠤ ꠌꠣꠁ ꠘꠣ ꠀꠞꠇ ꠎꠘꠞ ꠉꠣꠠꠣ ꠈꠥꠐꠤꠞ ꠃꠙꠞꠦ ꠜꠞ ꠇꠞꠤꠀ ꠊꠞ ꠛꠣꠘꠣꠁꠔꠣꠝ।
২১ ꠎꠦꠟꠣ ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ,
ꠔꠣꠘ ꠇꠕꠣ ꠎꠦꠞꠣꠞ ꠉꠦꠍꠦ ꠎꠣꠘꠣꠁꠟ ꠅꠁꠍꠦ ꠘꠣ
ꠅꠈꠘ ꠔꠣꠞꠣ ꠁꠔꠣ ꠖꠦꠈꠛꠣ,
ꠔꠣꠘ ꠛꠦꠙꠣꠞꠦ ꠀꠉꠦ ꠎꠦꠞꠣ ꠢꠥꠘꠍꠂꠘ ꠘꠣ
ꠔꠣꠞꠣ ꠅꠈꠘ ꠛꠥꠎꠛꠣ।
ꠢꠎꠞꠔ ꠙꠣꠃꠟꠥꠍ ꠞꠥꠝ ꠐꠣꠃꠘꠅ ꠎꠣꠅꠀꠞ ꠈꠤꠀꠟ
২২ ꠔꠦ ꠅꠃ ꠇꠣꠞꠘꠦ ꠀꠝꠤ ꠛꠃꠔ ꠛꠣꠞ ꠔꠥꠝꠞꠣꠞ ꠉꠦꠍꠦ ꠎꠣꠅꠀꠞ ꠙꠕꠦ ꠛꠣꠗꠣ ꠙꠣꠁꠍꠤ।
২৩ ꠅꠁꠘ꠆ꠘ ꠎꠣꠉꠣꠔ ꠀꠝꠣꠞ ꠇꠣꠝ ꠡꠦꠡ ꠘꠣ ꠅꠀꠄ ꠎꠣꠅꠀ ꠛꠘ꠆ꠖ ꠅꠁꠉꠦꠍꠦ,
ꠅꠁꠟꠦ ꠅꠈꠘ ꠔ ꠁꠔꠣ ꠎꠣꠉꠣꠔ ꠀꠝꠣꠞ ꠔꠛꠟꠤꠉ ꠇꠣꠝ ꠡꠦꠡ,
ꠇꠥꠘꠥ ꠎꠣꠉꠣꠞ ꠛꠣꠖ ꠞꠁꠍꠦ ꠘꠣ।
ꠀꠍꠟꠦ ꠛꠃꠔ ꠛꠍꠞ ꠗꠞꠤꠃ ꠀꠝꠣꠞ ꠈꠤꠀꠟ ꠀꠍꠤꠟ ꠔꠥꠝꠞꠣꠞ ꠉꠦꠍꠦ ꠎꠣꠁꠔꠣꠝ,
২৪ ꠄꠞꠟꠣꠉꠤ ꠅꠈꠘ ꠡ꠆ꠙꠦꠘ ꠖꠦꠡꠅ ꠎꠣꠅꠀꠞ ꠇꠣꠟꠅ ꠀꠝꠤ ꠔꠥꠝꠞꠣꠞ ꠉꠦꠍꠦ ꠎꠣꠁꠔꠣꠝ ꠌꠣꠁꠞꠣꠝ।
ꠀꠝꠤ ꠀꠡꠣ ꠇꠞꠞꠣꠝ,
ꠢꠘꠅ ꠎꠣꠅꠀꠞ ꠡꠝꠄ ꠔꠥꠝꠞꠣꠞ ꠟꠉꠦ ꠖꠦꠈꠣ ꠅꠁꠛ,
ꠀꠞ ꠈꠥꠡꠤ-ꠛꠣꠡꠤ ꠇꠞꠤꠀ ꠇꠄꠈꠣꠘ ꠖꠤꠘ ꠔꠥꠝꠞꠣꠞ ꠟꠉꠦ ꠇꠣꠐꠣꠁꠝꠥ।
ꠛꠣꠖꠦ ꠡ꠆ꠙꠦꠘꠅ ꠎꠣꠅꠀꠞ ꠟꠣꠉꠤ ꠔꠥꠝꠞꠣꠃ ꠀꠝꠣꠞ ꠛꠦꠛꠡ꠆ꠔꠣ ꠇꠞꠤꠀ ꠖꠤꠛꠣꠄ।
২৫ ꠅꠁꠟꠦ ꠅꠈꠘ ꠀꠝꠤ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠝꠣꠎꠦ ꠞꠤꠟꠤꠚ ꠛꠣꠐꠤꠛꠣꠞ ꠟꠣꠉꠤ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠎꠣꠁꠞꠣꠝ।
২৬ ꠢꠤꠘꠅ ꠅꠜꠣꠛ-ꠅꠘꠐꠘꠞ ꠝꠣꠎꠦ ꠀꠟ꠆ꠟꠣꠞ ꠎꠦ ꠛꠘ꠆ꠖꠣ ꠅꠇꠟ ꠀꠍꠂꠘ,
ꠔꠣꠞꠣꠞ ꠉꠦꠍꠦ ꠛꠣꠐꠤꠀ ꠖꠤꠛꠣꠞ ꠟꠣꠉꠤ ꠝꠣꠇꠤꠖꠘꠤꠀ ꠀꠞ ꠉ꠆ꠞꠤꠍ ꠖꠦꠡꠞ ꠎꠝꠣꠔ ꠅꠇꠟꠦ ꠇꠤꠍꠥ ꠡꠣꠁꠎ꠆ꠎ ꠔꠥꠟꠍꠂꠘ।
২৭ ꠔꠣꠞꠣ ꠈꠥꠛ ꠈꠥꠡꠤ ꠅꠁꠀ ꠁꠔꠣ ꠔꠥꠟꠍꠂꠘ।
ꠎꠣꠘꠅ ꠘꠤ,
ꠁ ꠎꠝꠣꠔꠞ ꠜꠣꠁ-ꠛꠁꠘ ꠅꠇꠟ ꠎꠦꠞꠥꠎꠣꠟꠦꠝ ꠐꠣꠃꠘꠞ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠉꠦꠍꠦ ꠞꠤꠘꠤ ꠀꠍꠂꠘ।
ꠇꠣꠞꠘ ꠀꠟ꠆ꠟꠣꠁ ꠛꠣꠔꠥꠘꠤ ꠘꠤꠀꠝꠔꠞ ꠛꠣꠐ ꠎꠦꠛꠟꠣ ꠛꠘꠤ ꠁꠍꠞꠣꠁꠟꠞ ꠝꠣꠎꠖꠤ ꠜꠤꠘ ꠎꠣꠔꠤꠄ ꠙꠣꠁꠍꠂꠘ,
ꠔꠦ ꠜꠤꠘ ꠎꠣꠔꠤꠞ ꠟꠣꠉꠤꠅ ꠎꠞꠥꠞ ꠅꠁꠟ,
ꠛꠘꠤ ꠁꠍꠞꠣꠁꠟꠞꠦ ꠖꠥꠘꠤꠀꠛꠤ ꠛꠦꠙꠣꠞꠦ ꠡꠣꠄ-ꠡꠣꠁꠎ꠆ꠎ ꠇꠞꠣ।
২৮ ꠀꠝꠣꠞ ꠅꠃ ꠞꠤꠟꠤꠚ ꠛꠣꠐꠣꠔ ꠉꠤꠀ ꠢꠣꠞꠤ ꠀꠝꠤ ꠎꠦꠛꠟꠣ ꠘꠤꠌ꠆ꠌꠤꠔ ꠅꠁꠝꠥ,
ꠁꠔꠣ ꠙꠥꠞꠣꠙꠥꠞ ꠔꠣꠞꠣꠞ ꠀꠔꠅ ꠙꠃꠍꠤ ꠉꠦꠍꠦ,
ꠅꠃ ꠡꠝꠄ ꠀꠝꠤ ꠔꠥꠝꠞꠣꠞ ꠉꠦꠍꠦ ꠀꠁꠀ ꠡ꠆ꠙꠦꠘ ꠖꠦꠡꠅ ꠎꠣꠁꠝꠥ।
২৯ ꠀꠝꠤ ꠛꠥꠎꠤꠀꠞ,
ꠀꠝꠤ ꠎꠦꠛꠟꠣ ꠔꠥꠝꠞꠣꠞ ꠉꠦꠍꠦ ꠀꠁꠝꠥ,
ꠅꠃ ꠡꠝꠄ ꠀꠟ-ꠝꠍꠤꠞ ꠡꠥꠟ꠆ꠟꠀꠘꠣ ꠞꠢꠝ-ꠘꠤꠀꠝꠔ ꠟꠁꠀ ꠀꠁꠝꠥ।
৩০ ꠅ ꠜꠣꠁ ꠅꠇꠟ,
ꠀꠟ꠆ꠟꠣꠞ ꠙꠣꠇ ꠞꠥꠢꠥꠞ ꠝꠢꠛ꠆ꠛꠔꠦ ꠀꠞ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠀꠝꠤ ꠔꠥꠝꠞꠣꠞꠦ ꠈꠣꠍ ꠝꠤꠘꠔꠤ ꠇꠞꠤꠀꠞ,
ꠀꠝꠣꠞ ꠟꠉꠦ ꠅꠁꠀ ꠔꠥꠝꠞꠣꠅ ꠀꠝꠣꠞ ꠟꠣꠉꠤ ꠀꠟ꠆ꠟꠣꠞ ꠖꠞꠛꠣꠞꠅ ꠖꠥꠀ-ꠝꠥꠘꠣꠎꠣꠔꠞ ꠎꠤꠢꠣꠖ ꠌꠣꠟꠣꠅ।
৩১ ꠖꠥꠀ ꠇꠞꠤꠅ,
ꠄꠢꠥꠖꠤꠀ ꠎꠤꠟꠣꠔ ꠁꠍꠣꠄꠁ ꠔꠞꠤꠇꠣꠞ ꠛꠤꠞꠥꠗꠤ ꠝꠣꠘꠡꠞ ꠀꠔ ꠕꠣꠇꠤ ꠀꠝꠤ ꠎꠣꠘꠥ ꠞꠦꠢꠣꠁ ꠙꠣꠁ,
ꠀꠞ ꠀꠝꠣꠞ ꠀꠘꠣ ꠁ ꠞꠤꠟꠤꠚ ꠈꠣꠘꠣꠂꠘ ꠎꠣꠘꠥ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠦ ꠡꠝꠎꠂꠘ।
৩২ ꠔꠦꠃ ꠀꠝꠤ ꠈꠥꠡꠤ ꠝꠘꠦ ꠔꠥꠝꠞꠣꠞ ꠉꠦꠍꠦ ꠎꠣꠁꠔꠣꠝ ꠙꠣꠞꠝꠥ,
ꠔꠥꠝꠞꠣꠞ ꠟꠉꠦ ꠀꠞꠣꠝ-ꠀꠄꠄꠡ ꠇꠞꠝꠥ,
ꠁꠘꠡꠣꠟ꠆ꠟꠣ।
৩৩ ꠡꠣꠘ꠆ꠔꠤ ꠖꠦꠅꠞꠣ ꠀꠟ꠆ꠟꠣ ꠙꠣꠇ ꠔꠥꠝꠞꠣꠞ ꠟꠉꠦ ꠟꠉꠦ ꠞꠃꠇ꠆ꠇꠣ।
ꠀꠝꠤꠘ।