২
১ ꠄꠞꠟꠣꠉꠤ ꠝꠘꠦ ꠝꠘꠦ ꠑꠤꠇ ꠇꠞꠟꠣꠝ,
ꠔꠥꠝꠞꠣꠞ ꠝꠘꠅ ꠖꠥꠈ ꠖꠦꠅꠀꠞ ꠟꠣꠉꠤ ꠀꠝꠤ ꠀꠞ ꠔꠥꠝꠞꠣꠞ ꠉꠦꠍꠦ ꠎꠣꠁꠔꠣꠝ ꠘꠣꠄ।
২ ꠇꠣꠞꠘ ꠀꠝꠤ ꠔꠥꠝꠞꠣꠞꠦ ꠖꠥꠈ ꠖꠤꠟꠦ ꠀꠝꠣꠞꠦ ꠈꠥꠡꠤ ꠇꠞꠛ ꠇꠦ?
ꠀꠞ ꠀꠝꠤ ꠎꠣꠞꠣꠞꠦ ꠖꠥꠈ ꠖꠤꠝꠥ,
ꠅꠃ ꠔꠥꠝꠞꠣ ꠍꠣꠠꠣ ꠀꠝꠣꠞꠦ ꠈꠥꠡꠤ ꠇꠞꠣꠞ ꠀꠞ ꠔ ꠇꠦꠃ ꠘꠣꠁ।
৩ ꠀꠝꠣꠞ ꠁꠟꠣ ꠟꠦꠈꠣꠞ ꠇꠣꠞꠘ ꠅꠁꠟ,
ꠀꠝꠤ ꠎꠦꠛꠟꠣ ꠎꠣꠁꠝꠥ,
ꠅꠃ ꠡꠝꠄ ꠎꠦꠞꠣ ꠀꠝꠣꠞꠦ ꠈꠥꠡꠤ ꠇꠞꠣꠞ ꠇꠕꠣ,
ꠔꠣꠞꠣꠞ ꠉꠦꠍ ꠕꠣꠇꠤ ꠎꠣꠘꠥ ꠇꠥꠘꠥ ꠖꠥꠈ ꠘꠣ ꠙꠣꠁ।
ꠔꠥꠝꠞꠣꠞ ꠃꠙꠞꠦ ꠀꠝꠣꠞ ꠁ ꠛꠤꠡ꠆ꠛꠣꠡ ꠀꠍꠦ,
ꠀꠝꠤ ꠎꠦꠔꠣꠔ ꠈꠥꠡꠤ ꠅꠁꠝꠥ,
ꠔꠥꠝꠞꠣꠅ ꠁꠔꠣꠔ ꠈꠥꠡꠤ ꠅꠁꠛꠣꠄ।
৪ ꠀꠝꠣꠞ ꠝꠘꠅ ꠛꠠ ꠖꠥꠈ ꠟꠁꠀ,
ꠌꠈꠥꠞ ꠙꠣꠘꠤ ꠚꠣꠟꠣꠁꠀ ꠀꠉꠦ ꠔꠥꠝꠞꠣꠞ ꠉꠦꠍꠦ ꠟꠦꠈꠍꠟꠣꠝ।
ꠀꠍꠟꠦ ꠀꠝꠤ ꠔꠥꠝꠞꠣꠞꠦ ꠖꠥꠈ ꠖꠦꠅꠀꠞ ꠟꠣꠉꠤ ꠟꠦꠈꠍꠤ ꠘꠣ,
ꠛꠞꠋ ꠔꠥꠝꠞꠣꠞ ꠟꠣꠉꠤ ꠀꠝꠣꠞ ꠎꠦ ꠇꠔ ꠝꠢꠛ꠆ꠛꠔ,
ꠅꠈꠣꠘ ꠎꠣꠘꠣꠘꠤꠞ ꠟꠣꠉꠤꠃ ꠟꠦꠈꠍꠤ।
ꠅꠙꠞꠣꠗꠤꠞꠦ ꠝꠣꠚ ꠇꠞꠣ
৫ ꠀꠝꠣꠞꠦ ꠎꠥꠖꠤ ꠇꠦꠃ ꠖꠥꠈ ꠖꠤꠀ ꠕꠣꠇꠦ,
ꠔꠦ ꠢꠦ ꠈꠣꠟꠤ ꠀꠝꠣꠞꠦ ꠘꠣꠄ,
ꠕꠥꠠꠣ ꠅꠁꠟꠦꠅ ꠔꠥꠝꠞꠣ ꠢꠇꠟꠞꠦꠃ ꠖꠥꠈ ꠖꠤꠍꠦ।
৬ ꠔꠥꠝꠞꠣ ꠛꠦꠡꠤꠞ ꠜꠣꠉ ꠎꠘꠦ ꠝꠤꠟꠤꠀ ꠔꠣꠞꠦ ꠎꠦ ꠡꠣꠎꠣ ꠖꠤꠍ,
ꠅꠔꠣꠞ ꠔꠣꠞ ꠟꠣꠉꠤ ꠎꠕꠦꠡ꠆ꠐ।
৭ ꠅꠈꠘ ꠔꠥꠝꠞꠣ ꠔꠣꠞꠦ ꠝꠣꠚ ꠇꠞꠤ ꠖꠤꠟꠣꠅ,
ꠔꠣꠞꠦ ꠛꠥꠎ ꠖꠦꠅ,
ꠎꠣꠔꠦ ꠛꠦꠡꠤ ꠖꠥꠈꠦ ꠢꠦ ꠇꠣꠔꠞ ꠘꠣ ꠅꠄ।
৮ ꠄꠞꠟꠣꠉꠤ ꠈꠣꠍ ꠇꠞꠤ ꠔꠥꠝꠞꠣꠞꠦ ꠇꠁꠞꠣꠝ,
ꠔꠥꠝꠞꠣ ꠎꠦꠘ ꠔꠣꠞꠦ ꠝꠣꠄꠀ ꠇꠞꠅ,
ꠁꠔꠣ ꠙꠞꠝꠣꠘ ꠇꠞꠤ ꠖꠦꠈꠣꠅ।
৯ ꠀꠝꠤ ꠙꠞꠤꠇ꠆ꠇꠣ ꠇꠞꠤ ꠖꠦꠈꠔꠣꠝ ꠌꠣꠁꠍꠟꠣꠝ,
ꠔꠥꠝꠞꠣ ꠢꠇꠟ ꠛꠦꠙꠣꠞꠦ ꠛꠣꠁꠖ꠆ꠖ ꠀꠍ ꠇꠤ ꠘꠣ,
ꠄꠞꠟꠣꠉꠤꠃ ꠀꠝꠤ ꠔꠥꠝꠞꠣꠞ ꠉꠦꠍꠦ ꠟꠦꠈꠍꠤ।
১০ ꠔꠥꠝꠞꠣ ꠎꠥꠖꠤ ꠇꠥꠘꠥ ꠛꠦꠙꠣꠞꠦ ꠇꠦꠃꠞꠞꠦ ꠝꠣꠚ ꠇꠞꠤ ꠖꠤꠟꠣꠅ,
ꠔꠦ ꠀꠝꠤꠅ ꠔꠣꠞꠦ ꠝꠣꠚ ꠇꠞꠤ ꠖꠦꠁ।
ꠀꠞ ꠢꠣꠍꠣꠃ ꠎꠥꠖꠤ ꠀꠝꠤ ꠇꠥꠘ꠆ꠔꠣ ꠝꠣꠚ ꠇꠞꠤꠀ ꠕꠣꠇꠤ,
ꠔꠦ ꠀꠟ-ꠝꠍꠤꠞ ꠍꠣꠝꠘꠦ ꠔꠥꠝꠞꠣꠞ ꠟꠣꠉꠤꠃ ꠇꠞꠤꠀꠞ,
১১ ꠎꠣꠔꠦ ꠡꠄꠔꠣꠘꠦ ꠀꠝꠞꠣꠞꠦ ꠗꠥꠇꠣ ꠖꠤꠔ ꠘꠣ ꠙꠣꠞꠦ।
ꠔꠣꠞ ꠇꠥ-ꠝꠔꠟꠛꠞ ꠇꠕꠣ ꠔ ꠀꠝꠞꠣꠞ ꠅꠎꠣꠘꠣ ꠘꠣꠄ।
ꠀꠟ-ꠝꠍꠤꠞꠦ ꠌꠤꠘꠣꠃ ꠔ ꠊꠦꠞꠣꠘꠞ ꠟꠣꠈꠣꠘ
১২ ꠀꠝꠤ ꠔꠞꠥꠀꠍ ꠐꠣꠃꠘꠅ ꠀꠟ-ꠝꠍꠤꠞ ꠛꠦꠙꠣꠞꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠔ ꠉꠤꠀ ꠖꠦꠈꠟꠣꠝ,
ꠢꠘꠅ ꠇꠣꠝ ꠇꠞꠣꠞ ꠟꠣꠉꠤ ꠝꠣꠟꠤꠇꠦ ꠀꠝꠣꠞꠦ ꠄꠇꠐꠣ ꠡꠥꠎꠥꠉ ꠇꠞꠤ ꠖꠤꠍꠂꠘ।
১৩ ꠅꠁꠟꠦ ꠀꠝꠣꠞ ꠁꠝꠣꠘꠖꠣꠞ ꠜꠣꠁ ꠔꠤꠔꠣꠍꠞꠦ ꠢꠘꠅ ꠘꠣ ꠙꠣꠅꠀꠄ ꠀꠝꠣꠞ ꠝꠘꠅ ꠈꠥꠛ ꠅꠡꠣꠘ꠆ꠔꠤ ꠀꠍꠤꠟ।
ꠄꠞꠟꠣꠉꠤ ꠔꠞꠥꠀꠍ ꠐꠣꠃꠘꠞ ꠝꠣꠘꠡꠞ ꠉꠦꠍ ꠕꠣꠇꠤ ꠛꠤꠖꠣꠄ ꠟꠁꠀ ꠝꠣꠇꠤꠖꠘꠤꠀꠔ ꠉꠦꠟꠣꠝꠉꠤ।
১৪ ꠅꠁꠟꠦ ꠀꠝꠞꠣ ꠀꠟ꠆ꠟꠣꠞ ꠡꠥꠇꠞꠤꠀ ꠎꠣꠘꠣꠁ,
ꠔꠣꠁꠘ ꠀꠝꠞꠣꠞꠦ ꠢꠣꠝꠦꠡꠣ ꠀꠟ-ꠝꠍꠤꠞ ꠛꠤꠎꠂꠅꠞ ꠝꠢꠣ ꠚꠥꠞ꠆ꠔꠤꠞ ꠝꠤꠍꠤꠟꠞ ꠟꠉꠦ ꠌꠣꠟꠣꠁꠞꠣ।
ꠀꠟ-ꠝꠍꠤꠞꠦ ꠌꠤꠘꠣ ꠔ ꠄꠇ ꠊꠦꠞꠣꠘꠞ ꠟꠣꠈꠣꠘ।
ꠀꠟ꠆ꠟꠣꠄ ꠔꠣꠘ ꠎꠂ-ꠎꠣꠔ꠆ꠞꠣꠄ ꠅꠃ ꠊꠦꠞꠣꠘ ꠀꠝꠞꠣꠞ ꠝꠣꠎꠖꠤ ꠢꠇꠟ ꠎꠣꠉꠣꠔ ꠍꠤꠔ꠆ꠞꠣꠁ ꠖꠦꠁꠘ।
১৫ ꠎꠦꠞꠣ ꠘꠣꠎꠣꠔ ꠢꠣꠍꠤꠟ ꠇꠞꠞꠣ ꠀꠞ ꠎꠦꠞꠣ ꠛꠤꠘꠣꠡ ꠅꠁꠞꠣ,
ꠅꠃ ꠖꠥꠁꠅ ꠖꠟꠞ ꠟꠣꠉꠤ ꠀꠝꠞꠣ ꠅꠁꠟꠣꠝ ꠀꠟ-ꠝꠍꠤꠞ ꠄꠇ ꠊꠦꠞꠣꠘ,
ꠅꠃ ꠊꠦꠞꠣꠘꠞꠦ ꠀꠟ-ꠝꠍꠤꠄ ꠀꠟ꠆ꠟꠣꠞ ꠖꠞꠛꠣꠞꠅ ꠇꠥꠞꠛꠣꠘꠤꠞ ꠟꠣꠈꠣꠘ ꠡꠙꠤꠀ ꠖꠤꠞꠣ।
১৬ ꠎꠦꠞꠣ ꠛꠤꠘꠣꠡ ꠅꠁꠎꠣꠞ,
ꠔꠣꠞꠣꠞ ꠉꠦꠍꠦ ꠀꠝꠞꠣꠞ ꠊꠦꠞꠣꠘ ꠅꠁꠟ ꠝꠞꠣꠞ ꠉꠘ꠆ꠖ,
ꠎꠣꠞ ꠚꠟ ꠅꠁꠟ ꠘꠤꠌ꠆ꠌꠤꠔ ꠝꠞꠘ।
ꠀꠞ ꠎꠦꠞꠣ ꠘꠣꠎꠣꠔ ꠢꠣꠍꠤꠟ ꠇꠞꠞꠣ,
ꠔꠣꠞꠣꠞ ꠉꠦꠍꠦ ꠀꠝꠞꠣ ꠅꠁꠟꠣꠝ ꠎꠤꠘ꠆ꠖꠦꠉꠤꠞ ꠊꠦꠞꠣꠘ,
ꠄꠞ ꠚꠟ ꠅꠁꠟ ꠀꠈꠦꠞꠣꠔꠞ ꠎꠤꠘ꠆ꠖꠦꠉꠤ।
ꠁ ꠅꠔ ꠛꠠ ꠘꠦꠇ ꠇꠣꠝ ꠇꠞꠣꠞ ꠟꠣꠈ ꠇꠥꠘ ꠎꠘ?
১৭ ꠘꠤꠎꠞ ꠟꠣꠜꠞ ꠟꠣꠉꠤ ꠎꠦꠟꠣ ꠛꠃꠔ ꠎꠘꠦ ꠀꠟ꠆ꠟꠣꠞ ꠇꠣꠟꠣꠝ ꠟꠁꠀ ꠛꠦꠛꠡꠣ ꠇꠞꠦ,
ꠀꠝꠞꠣ ꠔ ꠁꠔꠣꠞ ꠟꠣꠈꠣꠘ ꠘꠣꠄ।
ꠀꠝꠞꠣ ꠛꠞꠋ ꠀꠟ꠆ꠟꠣꠞ ꠙꠣꠑꠣꠁꠟ ꠎꠘ ꠢꠤꠡꠣꠛꠦ ꠡꠞꠟ ꠝꠘꠦ ꠀꠟ-ꠝꠍꠤꠞ ꠘꠣꠝꠦ ꠀꠟ꠆ꠟꠣꠞꠦ ꠀꠎꠤꠞ-ꠘꠣꠎꠤꠞ ꠞꠣꠈꠤꠀ ꠔꠛꠟꠤꠉ ꠇꠞꠤꠀꠞ।