৩
১ ꠛꠣꠖꠦ ꠀꠝꠞꠣ ꠎꠦꠛꠟꠣ ꠀꠞ ꠡꠁꠎ꠆ꠎ ꠇꠞꠔꠣꠝ ꠙꠣꠞꠟꠣꠝ ꠘꠣ,
ꠅꠃ ꠡꠝꠄ ꠀꠝꠞꠣ ꠘꠤꠅꠔ ꠇꠞꠟꠣꠝ,
ꠀꠝꠞꠣ ꠄꠇꠟꠣꠃ ꠀꠕꠤꠘꠤꠀ ꠐꠣꠃꠘꠅ ꠞꠁꠀ,
২ ꠀꠝꠞꠣꠞ ꠜꠣꠁ ꠔꠤꠝꠕꠤꠞꠦ ꠙꠣꠑꠣꠁꠝꠥ,
ꠎꠣꠔꠦ ꠔꠣꠁꠘ ꠉꠤꠀ ꠔꠥꠝꠞꠣꠞ ꠁꠝꠣꠘ ꠝꠎꠛꠥꠔ ꠇꠞꠂꠘ ꠀꠞ ꠝꠘꠞ ꠡꠣꠅꠡ ꠎꠥꠉꠣꠁꠘ।
ꠔꠣꠁꠘ ꠔ ꠀꠟ-ꠝꠍꠤꠞ ꠈꠥꠡ-ꠈꠛꠞꠤꠞ ꠔꠛꠟꠤꠉ ꠇꠣꠝꠅ ꠀꠟ꠆ꠟꠣꠞ ꠈꠣꠖꠤꠝ,
ꠀꠝꠞꠣꠞ ꠟꠉꠞ ꠜꠣꠁ,
ꠔꠣꠘꠞꠦ ꠙꠣꠑꠣꠁꠟꠣꠝ,
৩ ꠎꠣꠔꠦ ꠅꠃ ꠖꠥꠈ-ꠝꠍꠤꠛꠔꠞ ꠝꠣꠎꠦꠅ ꠔꠥꠝꠞꠣ ꠇꠦꠃ ꠈꠞꠦꠖꠤ ꠘꠣ ꠎꠣꠅ।
ꠔꠥꠝꠞꠣꠞ ꠎꠣꠘꠣ ꠀꠍꠦ,
ꠖꠥꠈ-ꠝꠍꠤꠛꠔ ꠀꠝꠞꠣꠞ ꠃꠙꠞꠦ ꠑꠤꠇꠃ ꠀꠁꠛ,
ꠀꠞ ꠁꠔꠣ ꠡꠁꠎ꠆ꠎ ꠇꠞꠣ ꠟꠣꠉꠛ।
৪ ꠀꠝꠤ ꠀꠉꠦ ꠎꠦꠛꠟꠣ ꠔꠥꠝꠞꠣꠞ ꠟꠉꠦ ꠀꠍꠟꠣꠝ,
ꠢꠃ ꠡꠝꠄ ꠔꠥꠝꠞꠣꠞꠦ ꠇꠁꠍꠤ,
ꠖꠥꠈ-ꠝꠍꠤꠛꠔ ꠀꠝꠞꠣꠞ ꠃꠙꠞꠦ ꠀꠁꠛꠃ,
ꠀꠞ ꠑꠤꠇꠃ ꠅꠟꠣꠈꠣꠘ ꠀꠁꠍꠦ।
৫ ꠔꠦ ꠀꠝꠤ ꠎꠦꠛꠟꠣ ꠀꠞ ꠡꠁꠎ꠆ꠎ ꠇꠞꠔꠣꠝ ꠙꠣꠞꠟꠣꠝ ꠘꠣ,
ꠅꠃ ꠡꠝꠄ ꠔꠥꠝꠞꠣꠞ ꠁꠝꠣꠘꠞ ꠢꠣꠟꠔ ꠖꠦꠈꠣꠞ ꠟꠣꠉꠤ ꠔꠤꠝꠕꠤ ꠜꠣꠁꠞꠦ ꠙꠣꠑꠣꠁꠟꠣꠝ।
ꠀꠝꠣꠞ ꠝꠘꠅ ꠒꠞ ꠀꠍꠤꠟ,
ꠇꠤꠎꠣꠘꠥ ꠡꠄꠔꠣꠘꠦ ꠔꠥꠝꠞꠣꠞꠦ ꠟꠣꠟꠌ ꠖꠦꠈꠣꠁꠍꠦ ꠀꠞ ꠀꠝꠞꠣꠞ ꠢꠇꠟ ꠝꠦꠘꠔ ꠛꠦꠇꠣꠝꠣ ꠉꠦꠍꠦꠉꠤ।
৬ ꠅꠁꠟꠦ ꠔꠤꠝꠕꠤ ꠜꠣꠁ ꠔꠥꠝꠞꠣꠞ ꠉꠦꠍ ꠕꠣꠇꠤ ꠚꠤꠞꠤꠀ ꠀꠁꠀ ꠀꠝꠞꠣꠞꠦ ꠎꠣꠘꠣꠁꠍꠂꠘ,
ꠔꠥꠝꠞꠣꠞ ꠁꠝꠣꠘ ꠀꠞ ꠝꠣꠄꠀ-ꠝꠢꠛ꠆ꠛꠔꠞ ꠢꠣꠟꠔ ꠛꠃꠔ ꠜꠣꠟꠣ।
ꠔꠣꠁꠘ ꠇꠁꠍꠂꠘ,
ꠔꠥꠝꠞꠣ ꠢꠣꠝꠦꠡꠣ ꠝꠣꠄꠀ-ꠝꠢꠛ꠆ꠛꠔꠦ ꠀꠝꠞꠣꠞꠦ ꠝꠘꠅ ꠇꠞꠅ,
ꠀꠞ ꠀꠝꠞꠣ ꠎꠦꠟꠣ ꠔꠥꠝꠞꠣꠞꠦ ꠖꠦꠈꠔꠣꠝ ꠌꠣꠁꠞꠣꠝ,
ꠔꠥꠝꠞꠣꠅ ꠅꠃꠟꠣ ꠀꠝꠞꠣꠞꠦ ꠖꠦꠈꠣꠞ ꠀꠡꠣ ꠇꠞꠞꠣꠄ।
৭ ꠅ ꠜꠣꠁ ꠅꠇꠟ,
ꠄꠞꠟꠣꠉꠤꠃ ꠔꠥꠝꠞꠣꠞ ꠁꠝꠣꠘꠞ ꠝꠎꠛꠥꠔꠤꠞ ꠇꠕꠣ ꠢꠥꠘꠤꠀ,
ꠀꠝꠞꠣꠞ ꠅꠔ ꠖꠥꠈ-ꠝꠍꠤꠛꠔꠞ ꠝꠣꠎꠦꠅ ꠖꠤꠟꠅ ꠡꠣꠘ꠆ꠔꠤ ꠙꠣꠁꠍꠤ।
৮ ꠔꠥꠝꠞꠣ ꠝꠣꠟꠤꠇꠞ ꠃꠙꠞꠦ ꠁꠝꠣꠘꠦ ꠝꠎꠛꠥꠔ ꠞꠁꠟꠦꠃ,
ꠀꠝꠞꠣꠞ ꠎꠤꠘ꠆ꠖꠦꠉꠤꠈꠣꠘ ꠗꠁꠘ꠆ꠘ।
৯ ꠔꠥꠝꠞꠣꠞꠦ ꠟꠁꠀ ꠀꠟ꠆ꠟꠣꠞ ꠖꠞꠛꠣꠞꠅ ꠀꠝꠞꠣ ꠎꠦ ꠈꠥꠡꠤ-ꠛꠣꠡꠤ ꠇꠞꠤꠀꠞ,
ꠁꠔꠣꠞ ꠟꠣꠉꠤ ꠀꠝꠞꠣ ꠇꠤꠟꠣ ꠀꠟ꠆ꠟꠣꠞ ꠡꠥꠇꠞꠤꠀ ꠎꠣꠘꠣꠁꠔꠣꠝ,
ꠎꠣꠘꠞꠣꠝ ꠘꠣ।
১০ ꠀꠝꠞꠣ ꠝꠘ ꠖꠤꠀ ꠖꠤꠘꠦ-ꠞꠣꠁꠔꠦ ꠢꠣꠝꠦꠡꠣ ꠖꠥꠀ ꠇꠞꠞꠣꠝ,
ꠎꠣꠔꠦ ꠔꠥꠝꠞꠣꠞ ꠝꠥꠈꠈꠣꠘ ꠢꠤꠞꠛꠣꠞ ꠖꠦꠈꠣꠞ ꠡꠥꠎꠥꠉ ꠙꠣꠁ,
ꠀꠞ ꠔꠥꠝꠞꠣꠞ ꠁꠝꠣꠘꠞ ꠛꠣꠖ-ꠛꠣꠇꠤ ꠢꠇꠟꠔꠣ ꠙꠥꠞꠣ ꠇꠞꠔꠣꠝ ꠙꠣꠞꠤ।
১১ ꠔꠦ ꠉꠣꠁꠛꠤ ꠛꠣꠚ ꠀꠟ꠆ꠟꠣꠄ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠄ ꠎꠣꠘꠥ ꠔꠥꠝꠞꠣꠞ ꠉꠦꠍꠦ ꠎꠣꠅꠀꠞ ꠟꠣꠉꠤ ꠀꠝꠞꠣꠞꠦ ꠡꠥꠎꠥꠉ ꠖꠦꠁꠘ।
১২ ꠀꠝꠞꠣ ꠎꠦꠟꠣ ꠔꠥꠝꠞꠣꠞ ꠛꠣꠄ ꠝꠣꠄꠀ-ꠝꠢꠛ꠆ꠛꠔꠞ ꠝꠣꠎꠦ ꠒꠥꠛꠤ ꠉꠦꠍꠤ,
ꠑꠤꠇ ꠅꠃꠟꠣ ꠝꠣꠟꠤꠇ ꠁꠍꠣꠄ ꠔꠥꠝꠞꠣꠞꠦꠅ ꠄꠇꠦ-ꠅꠁꠘ꠆ꠘꠦ,
ꠀꠞ ꠢꠇꠟꠞ ꠛꠣꠄ ꠝꠣꠄꠀ-ꠝꠢꠛ꠆ꠛꠔꠦ ꠢꠣꠛꠥ-ꠒꠥꠛꠥ ꠈꠣꠅꠀꠃꠇ꠆ꠇꠣ।
১৩ ꠅꠃ ꠟꠣꠈꠣꠘ ꠔꠣꠁꠘ ꠔꠥꠝꠞꠣꠞ ꠖꠤꠟ ꠙꠥꠞꠣꠙꠥꠞ ꠝꠎꠛꠥꠔ ꠇꠞꠃꠇ꠆ꠇꠣ,
ꠎꠣꠔꠦ ꠀꠝꠞꠣꠞ ꠢꠎꠞꠔ ꠁꠍꠣꠄ ꠎꠦꠛꠟꠣ ꠔꠣꠘ ꠘꠤꠎꠞ ꠙꠣꠇ ꠛꠘ꠆ꠖꠣ ꠅꠇꠟ ꠟꠁꠀ ꠔꠡꠞꠤꠚ ꠀꠘꠛꠣ,
ꠅꠃ ꠡꠝꠄ ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣꠞ ꠘꠎꠞꠅ ꠔꠥꠝꠞꠣ ꠙꠛꠤꠔ꠆ꠞ ꠀꠞ ꠘꠤꠈꠥꠔ ꠞꠅ।