ꠡꠞꠤꠟꠞꠦ ꠙꠛꠤꠔ꠆ꠞ ꠞꠣꠈꠤꠀ ꠢꠥꠡꠤꠀꠞ ꠞꠅ
৪
১ ꠅ ꠜꠣꠁꠀꠂꠘ ꠢꠥꠘꠅ,
ꠀꠟ꠆ꠟꠣꠞꠦ ꠈꠥꠡꠤ ꠇꠞꠣꠞ ꠟꠣꠉꠤ ꠇꠦꠝꠘꠦ ꠎꠤꠘ꠆ꠖꠦꠉꠤ ꠇꠣꠐꠣꠘꠤ ꠟꠣꠉꠦ,
ꠁ ꠔꠣꠟꠤꠝ ꠔ ꠔꠥꠝꠞꠣ ꠀꠝꠞꠣꠞ ꠉꠦꠍ ꠕꠣꠇꠤ ꠀꠉꠦꠃ ꠙꠣꠁꠍ ꠀꠞ ꠔꠥꠝꠞꠣ ꠅꠟꠣ ꠌꠟꠞꠣꠄꠅ।
ꠄꠞꠛꠣꠖꠦꠅ ꠢꠎꠞꠔ ꠁꠍꠣꠞ ꠅꠁꠀ ꠔꠥꠝꠞꠣꠞꠦ ꠝꠤꠘꠔ ꠇꠞꠤꠀꠞ ꠀꠞ ꠢꠥꠡꠤꠀꠞ ꠇꠞꠤꠀꠞ,
ꠔꠥꠝꠞꠣ ꠎꠦꠟꠣ ꠌꠟꠞꠣꠄ,
ꠅꠃꠟꠣ ꠀꠞꠅ ꠛꠦꠡ ꠇꠞꠤ ꠌꠟꠅ।
২ ꠢꠎꠞꠔ ꠁꠍꠣꠞ ꠖꠦꠅꠀ ꠄꠈꠔꠤꠀꠞꠦ ꠀꠝꠞꠣ ꠎꠦꠔꠣ ꠢꠥꠇꠥꠝ ꠖꠤꠍꠤ,
ꠁꠔꠣ ꠔ ꠔꠥꠝꠞꠣꠞ ꠎꠣꠘꠣ ꠀꠍꠦ।
৩ ꠀꠍꠟꠦ ꠀꠟ꠆ꠟꠣꠄ ꠌꠣꠁꠞꠣ,
ꠔꠥꠝꠞꠣ ꠎꠣꠘꠥ ꠙꠣꠇ-ꠙꠛꠤꠔ꠆ꠞ ꠅꠅ,
ꠝꠣꠘꠤ ꠢꠇꠟ ꠘꠝꠥꠘꠣꠞ ꠎꠤꠘꠣ ꠕꠣꠇꠤ ꠢꠞꠤꠀ ꠞꠅ।
৪-৫ ꠀꠞ ꠎꠦꠔꠣ ꠝꠣꠘꠡꠦ ꠀꠟ꠆ꠟꠣꠞꠦ ꠌꠤꠘꠂꠘ ꠘꠣ,
ꠢꠃ ꠛꠤꠘ-ꠗꠞ꠆ꠝꠤꠞ ꠟꠣꠈꠣꠘ ꠡꠞꠤꠟꠞ ꠈꠣꠁꠡꠞ ꠛꠡꠦ ꠘꠣ ꠌꠟꠤꠀ,
ꠔꠥꠝꠞꠣ ꠙꠞꠔꠦꠇ ꠎꠘꠦ ꠎꠣꠞꠎꠤꠞ ꠡꠞꠤꠟꠞꠦ ꠙꠣꠇ-ꠙꠛꠤꠔ꠆ꠞ ꠞꠣꠈꠤꠀ ꠝꠣꠘ-ꠡꠝ꠆ꠝꠣꠘꠦ ꠎꠤꠘꠣ ꠕꠣꠇꠤ ꠢꠥꠡꠤꠀꠞ ꠞꠅ।
৬ ꠁ ꠛꠦꠙꠣꠞꠦ ꠇꠦꠃ ꠎꠣꠘꠥ ꠘꠤꠎꠞ ꠜꠣꠁꠞ ꠟꠉꠦ ꠉꠣꠖ꠆ꠖꠣꠞꠤ ꠘꠣ ꠇꠞꠦ।
ꠝꠘꠅ ꠞꠣꠈꠤꠅ,
ꠀꠝꠞꠣ ꠀꠉꠦꠃ ꠔꠥꠝꠞꠣꠞꠦ ꠇꠁꠍꠤ ꠀꠞ ꠢꠥꠡꠤꠀꠞꠅ ꠇꠞꠍꠤ,
ꠁꠔꠣ ꠘꠣꠚꠞꠝꠣꠘꠤ ꠇꠞꠟꠦ ꠝꠣꠟꠤꠇ ꠁꠍꠣꠄ ꠡꠣꠎꠣ ꠖꠤꠛꠣ।
৭ ꠀꠟ꠆ꠟꠣꠄ ꠇꠥꠘꠥ ꠀꠝꠞꠣꠞꠦ ꠖꠣꠅꠔ ꠖꠤꠍꠂꠘ ꠘꠤ ꠘꠣꠚꠞꠝꠣꠘꠤꠞ ꠙꠕꠦ ꠌꠟꠣꠞ ꠟꠣꠉꠤ?
ꠔꠣꠁꠘ ꠔ ꠀꠝꠞꠣꠞꠦ ꠙꠣꠇ-ꠙꠛꠤꠔ꠆ꠞ ꠅꠁꠀ ꠌꠟꠣꠞ ꠟꠣꠉꠤ ꠇꠁꠍꠂꠘ।
৮ ꠄꠞꠟꠣꠉꠤ ꠎꠦꠉꠤꠄ ꠁ ꠔꠣꠟꠤꠝ ꠝꠣꠘꠦ ꠘꠣ,
ꠢꠦ ꠈꠣꠟꠤ ꠖꠥꠘꠤꠀꠞ ꠝꠣꠘꠡꠞꠦ ꠝꠣꠘꠦ ꠘꠣ ꠁꠈꠣꠘ ꠘꠣꠄ,
ꠢꠦ ꠀꠍꠟꠦ ꠢꠃ ꠀꠟ꠆ꠟꠣꠞꠦꠃ ꠝꠣꠘꠦꠞ ꠘꠣ,
ꠎꠦꠁꠘ ꠔꠥꠝꠞꠣꠞꠦ ꠙꠣꠇ ꠞꠥꠢꠥ ꠖꠣꠘ ꠇꠞꠍꠂꠘ।
৯ ꠔꠦ ꠜꠣꠁꠄ ꠜꠣꠁꠄ ꠇꠤꠟꠣ ꠝꠣꠄꠀ-ꠝꠢꠛ꠆ꠛꠔ ꠕꠣꠇꠣ ꠎꠞꠥꠞ,
ꠁ ꠛꠦꠙꠣꠞꠦ ꠔꠥꠝꠞꠣꠞꠦ ꠇꠥꠘ꠆ꠔꠣ ꠟꠦꠈꠣꠞ ꠉꠞꠎ ꠘꠣꠁ,
ꠇꠣꠞꠘ ꠀꠟ꠆ꠟꠣꠄ ꠔꠥꠝꠞꠣꠞꠦ ꠢꠤꠇꠣꠁꠍꠂꠘ,
ꠄꠇꠦ-ꠅꠁꠘ꠆ꠘꠦ ꠝꠣꠄꠀ-ꠝꠢꠛ꠆ꠛꠔ ꠇꠞꠔꠣꠄ।
১০ ꠀꠞ ꠢꠣꠍꠣꠃ ꠔꠥꠝꠞꠣ ꠀꠡ꠆ꠔꠣ ꠝꠣꠇꠤꠖꠘꠤꠀ ꠖꠦꠡꠞ ꠜꠣꠁ-ꠛꠁꠘꠞꠦ ꠅꠃꠟꠣ ꠝꠣꠄꠀ ꠇꠞꠞꠣꠄ।
ꠅꠁꠟꠦ ꠀꠝꠞꠣꠞ ꠈꠣꠍ ꠅꠘꠥꠞꠥꠗ ꠅꠁꠟ,
ꠔꠥꠝꠞꠣꠞ ꠁ ꠝꠢꠛ꠆ꠛꠔ ꠎꠣꠘꠥ ꠖꠤꠘꠦ ꠖꠤꠘꠦ ꠀꠞꠅ ꠛꠣꠠꠦ।
১১ ꠢꠥꠘꠅ,
ꠀꠝꠞꠣ ꠀꠉꠦ ꠎꠦꠟꠣ ꠇꠁꠍꠤ,
ꠅꠃ ꠇꠕꠣ ꠝꠣꠚꠤꠇ ꠡꠣꠘ꠆ꠔꠤꠄ ꠎꠤꠘ꠆ꠖꠦꠉꠤ ꠇꠣꠐꠣꠅ,
ꠙꠞꠞ ꠇꠣꠝꠅ ꠘꠣꠇ ꠘꠣ ꠉꠟꠣꠁꠀ ꠘꠤꠎꠦ ꠇꠣꠝ ꠇꠞꠤꠀ ꠈꠣꠅ।
১২ ꠔꠦꠃ ꠛꠣꠁꠞꠣ ꠝꠣꠘꠡꠞ ꠌꠈꠥꠔ ꠔꠥꠝꠞꠣꠞ ꠌꠣꠟ-ꠌꠟꠘ ꠜꠖ꠆ꠞ ꠅꠁꠛ,
ꠀꠞ ꠅꠁꠘ꠆ꠘ ꠎꠘꠞ ꠞꠥꠎꠤꠞ ꠃꠙꠞꠦ ꠔꠥꠝꠞꠣꠞ ꠜꠞꠡꠣ ꠇꠞꠣ ꠟꠣꠉꠔ ꠘꠣꠄ।
ꠀꠟ-ꠝꠍꠤ ꠖꠥꠍꠞꠣꠛꠣꠞ ꠀꠁꠛꠣꠞ ꠢꠣꠟ-ꠢꠇꠤꠇꠔ
১৩ ꠅ ꠜꠣꠁ ꠅꠇꠟ,
ꠢꠥꠘꠅ,
ꠝꠥꠞ꠆ꠖꠣ ꠅꠇꠟꠞ ꠇꠥꠘ ꠢꠣꠟꠔ ꠅꠁꠛ,
ꠀꠝꠞꠣ ꠌꠣꠁꠞꠣꠝ ꠁꠔꠣ ꠔꠥꠝꠞꠣ ꠎꠣꠘꠅ,
ꠎꠣꠔꠦ ꠝꠞꠘ ꠛꠣꠖꠦ ꠇꠤꠔꠣ ꠅꠁꠛ ꠁꠈꠣꠘ ꠘꠣ ꠎꠣꠘꠣꠄ ꠎꠦꠞꠣ ꠘꠤꠞꠣꠡ ꠅꠁꠎꠣꠄ,
ꠔꠥꠝꠞꠣꠞ ꠝꠘ ꠎꠣꠘꠥ ꠁꠟꠣꠈꠣꠘ ꠘꠣ ꠅꠄ।
১৪ ꠢꠥꠘꠅ,
ꠀꠝꠞꠣ ꠎꠦꠛꠟꠣ ꠄꠇꠤꠘ ꠇꠞꠤ,
ꠢꠎꠞꠔ ꠁꠍꠣꠞ ꠝꠃꠔ ꠅꠁꠍꠤꠟ ꠅꠁꠟꠦ ꠔꠣꠁꠘ ꠎꠤꠘ꠆ꠖꠣ ꠅꠁꠀ ꠃꠑꠍꠂꠘ,
ꠔꠦ ꠄꠅꠈꠣꠘꠅ ꠄꠇꠤꠘ ꠇꠞꠤ,
ꠢꠎꠞꠔ ꠁꠍꠣꠄ ꠖꠥꠍꠞꠣꠛꠣꠞ ꠔꠡꠞꠤꠚ ꠀꠘꠟꠦ ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠤꠀ ꠎꠦꠞꠣꠞ ꠝꠃꠔ ꠅꠁꠍꠦ,
ꠀꠟ꠆ꠟꠣꠄ ꠔꠣꠞꠣꠞꠦꠅ ꠁꠍꠣꠞ ꠟꠉꠦ ꠝꠤꠟꠘ ꠇꠞꠤꠀ ꠔꠣꠘ ꠟꠉꠦ ꠘꠤꠛꠣ।
১৫ ꠄꠞꠟꠣꠉꠤ ꠝꠣꠟꠤꠇꠞ ꠇꠣꠟꠣꠝ ꠝꠣꠚꠤꠇ ꠔꠥꠝꠞꠣꠞꠦ ꠇꠁꠞꠣꠝ,
ꠀꠝꠞꠣ ꠎꠦꠞꠣ ꠎꠤꠘ꠆ꠖꠣ ꠀꠍꠤ ꠀꠞ ꠝꠣꠟꠤꠇꠦ ꠔꠡꠞꠤꠚ ꠀꠘꠣꠞ ꠀꠉ ꠙꠞ꠆ꠎꠘ꠆ꠔ ꠎꠤꠘ꠆ꠖꠣ ꠞꠁꠝꠥ,
ꠀꠝꠞꠣ ꠇꠥꠘꠥꠝꠘ꠆ꠔꠦꠃ ꠢꠤ ꠝꠥꠞ꠆ꠖꠣ ꠅꠇꠟꠞ ꠀꠉꠦ ꠎꠣꠁꠔꠣꠝ ꠙꠣꠞꠔꠣꠝ ꠘꠣꠄ।
১৬ ꠇꠣꠞꠘ ꠀꠟ꠆ꠟꠣꠁ ꠡꠤꠋꠉꠣꠞ ꠀꠅꠀꠎꠞ ꠟꠉꠦ ꠟꠉꠦ,
ꠙꠞꠗꠣꠘ ꠚꠤꠞꠤꠡ꠆ꠔꠣꠞ ꠒꠣꠇꠞ ꠟꠉꠦ,
ꠝꠣꠟꠤꠇ ꠁꠍꠣꠄ ꠎꠥꠞꠦ ꠢꠣꠃꠇꠖꠤ ꠢꠥꠇꠥꠝ ꠖꠤꠛꠣ,
ꠔꠣꠁꠘ ꠘꠤꠎꠦꠃ ꠛꠦꠢꠦꠡ꠆ꠔ ꠕꠣꠇꠤ ꠟꠣꠝꠤꠀ ꠀꠁꠛꠣ।
ꠀꠞ ꠀꠟ-ꠝꠍꠤꠞ ꠃꠝ꠆ꠝꠔ ꠛꠘꠤꠀ ꠎꠦꠞꠣꠞ ꠝꠃꠔ ꠅꠁꠉꠦꠍꠦ,
ꠔꠣꠞꠣꠃ ꠙꠄꠟꠣ ꠎꠤꠘ꠆ꠖꠣ ꠅꠁꠀ ꠃꠑꠛꠣ।
১৭ ꠄꠞꠛꠣꠖꠦ ꠀꠝꠞꠣ ꠎꠦꠞꠣ ꠖꠥꠘꠤꠀꠔ ꠎꠤꠘ꠆ꠖꠣ ꠕꠣꠇꠝꠥ,
ꠀꠝꠞꠣꠞ ꠝꠣꠟꠤꠇꠞ ꠟꠉꠦ ꠝꠥꠟꠣꠇꠣꠔ ꠇꠞꠣꠞ ꠟꠣꠉꠤ ꠀꠝꠞꠣꠞꠦꠅ ꠝꠦꠊꠞ ꠌꠣꠇꠣꠔ ꠇꠞꠤ ꠀꠍꠝꠣꠘꠅ ꠔꠥꠟꠤꠀ ꠘꠦꠅꠀ ꠅꠁꠛ।
ꠅꠟꠣꠈꠣꠘ ꠀꠝꠞꠣ ꠌꠤꠞꠇꠣꠟ ꠝꠣꠟꠤꠇꠞ ꠟꠉꠦ ꠞꠁꠝꠥ।
১৮ ꠄꠞꠟꠣꠉꠤ ꠔꠥꠝꠞꠣ ꠅꠔꠣ ꠎꠣꠘꠣꠁꠀ ꠄꠇ ꠎꠘꠦ ꠀꠞꠇ ꠎꠘꠞꠦ ꠃꠔꠡꠣꠢ ꠖꠦꠅ।