৫
১ ꠜꠣꠁꠀꠂꠘꠞꠦ,
ꠇꠥꠘ ꠎꠝꠣꠘꠣꠔ ꠇꠥꠘ ꠡꠝꠄ ꠇꠤꠔꠣ ꠊꠐꠤꠛ,
ꠁꠔꠣ ꠔꠥꠝꠞꠣꠞ ꠉꠦꠍꠦ ꠟꠦꠈꠣꠞ ꠎꠞꠥꠞ ꠘꠣꠁ।
২ ꠔꠥꠝꠞꠣ ꠘꠤꠎꠦꠃ ꠔ ꠜꠣꠟꠣ ꠇꠞꠤ ꠎꠣꠘꠅ,
ꠞꠣꠁꠔꠇꠥꠞ ꠛꠣꠟꠣ ꠎꠦꠟꠣ ꠀꠈꠔꠣꠃ ꠌꠥꠞ ꠀꠄ,
ꠝꠣꠟꠤꠇ ꠁꠍꠣ ꠀꠁꠛꠣꠞ ꠖꠤꠘꠅ ꠑꠤꠇ ꠅꠟꠣꠃ ꠀꠁꠛ।
৩ ꠁ ꠎꠉꠔꠞ ꠝꠣꠘꠡꠦ ꠎꠦꠛꠟꠣ ꠇꠁꠛꠣ,
“ꠢꠇꠟꠔꠣ ꠡꠣꠘ꠆ꠔꠤ ꠅꠁꠉꠦꠍꠦ,
ꠇꠥꠘꠥ ꠒꠞ-ꠜꠄ ꠘꠣꠁ,”
ꠅꠃ ꠡꠝꠄ,
ꠛꠦꠐꠤꠘ꠆ꠔꠞ ꠢꠥꠞꠥꠔ꠆ꠔꠣ ꠅꠀꠞ ꠛꠦꠖꠘꠣ ꠎꠦꠟꠣ ꠀꠈꠔꠣꠃ ꠗꠞꠦ,
ꠅꠃꠟꠣ ꠅꠔꠣ ꠝꠣꠘꠡꠞ ꠡꠞꠛꠘꠣꠡ ꠀꠈꠔꠣꠃ ꠅꠁꠛ।
ꠔꠣꠞꠣ ꠇꠥꠘꠥꠝꠘ꠆ꠔꠦꠃ ꠞꠦꠢꠣꠁ ꠙꠣꠁꠔ ꠘꠣꠄ।
৪ ꠜꠣꠁ ꠅꠇꠟ,
ꠔꠥꠝꠞꠣ ꠇꠥꠘꠥ ꠀꠘ꠆ꠖꠣꠞꠤꠞ ꠝꠣꠎꠦ ꠛꠡꠔ ꠇꠞꠞꠣꠄ ꠘꠤ ꠎꠦꠘ,
ꠢꠃ ꠖꠤꠘ ꠀꠈꠔꠣꠃ ꠌꠥꠞꠞ ꠟꠣꠈꠣꠘ ꠔꠥꠝꠞꠣꠞ ꠃꠙꠞꠦ ꠀꠁꠔ?
৫ ꠔꠥꠝꠞꠣ ꠢꠇꠟꠃ ꠔ ꠀꠟ꠆ꠟꠣꠞ ꠘꠥꠞꠞ ꠀꠞ ꠖꠤꠘꠞ ꠚꠞꠞ ꠝꠣꠘꠥꠡ।
ꠀꠝꠞꠣ ꠔ ꠀꠘ꠆ꠖꠣꠞꠤꠞ ꠛꠣ ꠞꠣꠁꠔꠞ ꠛꠣꠟꠣꠞ ꠝꠣꠘꠥꠡ ꠘꠣꠄ।
৬ ꠄꠞꠟꠣꠉꠤ ꠀꠅ,
ꠅꠁꠘ꠆ꠘ ꠝꠣꠘꠡꠞ ꠟꠣꠈꠣꠘ ꠀꠝꠞꠣ ꠘꠣ ꠊꠥꠝꠣꠁꠀ ꠛꠞꠋ ꠢꠎꠣꠉ ꠞꠁ ꠀꠞ ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠤ।
৭ ꠎꠣꠘꠅ ꠔ,
ꠎꠦꠞꠣ ꠊꠥꠝꠣꠄ,
ꠔꠣꠞꠣ ꠞꠣꠁꠔꠞ ꠛꠣꠟꠣꠄꠃ ꠊꠥꠝꠣꠄ ꠀꠞ ꠎꠦꠞꠣ ꠝꠖꠈꠥꠞ,
ꠞꠣꠁꠔ ꠅꠁꠟꠦ ꠔꠣꠞꠣ ꠝꠖ ꠈꠣꠁꠀ ꠐꠣꠟ ꠅꠄ।
৮ ꠅꠁꠟꠦ ꠀꠝꠞꠣ ꠔ ꠖꠤꠘꠞ ꠚꠞꠞ ꠝꠣꠘꠥꠡ,
ꠄꠞꠟꠣꠉꠤ ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠤ।
ꠀꠝꠞꠣꠞ ꠛꠥꠇ ꠛꠣꠌꠣꠘꠤꠞ ꠟꠣꠉꠤ ꠁꠝꠣꠘ ꠀꠞ ꠝꠢꠛ꠆ꠛꠔ ꠖꠤꠀ ꠛꠥꠇ ꠉꠥꠞꠤ,
ꠀꠞ ꠝꠣꠕꠣꠞꠦ ꠛꠣꠌꠣꠘꠤꠞ ꠟꠣꠉꠤ ꠀꠟ꠆ꠟꠣꠁ ꠘꠣꠎꠣꠔꠞ ꠀꠡꠣꠞꠦ ꠍꠤꠙꠣꠁꠞ ꠇꠦꠙꠞ ꠟꠣꠈꠣꠘ ꠝꠣꠕꠣꠔ ꠟꠣꠉꠣꠁ।
৯ ꠝꠘꠅ ꠞꠣꠈꠤꠅ,
ꠀꠟ꠆ꠟꠣꠄ ꠀꠝꠞꠣꠞꠦ ꠡꠣꠎꠣ ꠖꠤꠛꠣꠞ ꠟꠣꠉꠤ ꠒꠣꠇꠤꠀ ꠀꠘꠍꠂꠘ ꠘꠣ,
ꠛꠞꠋ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠘꠣꠎꠣꠔ ꠙꠣꠅꠀꠞ ꠟꠣꠉꠤꠃ ꠒꠣꠇꠤꠍꠂꠘ।
১০ ꠀꠞ ꠀꠟ-ꠝꠍꠤꠞ ꠝꠃꠔ ꠅꠁꠍꠦ ꠔ ꠀꠝꠞꠣꠞ ꠟꠣꠉꠤꠃ,
ꠎꠣꠔꠦ ꠀꠝꠞꠣ ꠛꠣꠌꠤ ꠛꠣ ꠝꠞꠤ,
ꠔꠣꠘ ꠟꠉꠦꠃ ꠢꠣꠝꠦꠡꠣ ꠎꠤꠘ꠆ꠖꠣ ꠞꠁ।
১১ ꠄꠞꠟꠣꠉꠤꠃ ꠔꠥꠝꠞꠣ ꠅꠈꠘ ꠎꠦꠟꠣ ꠇꠞꠞꠣꠄ,
ꠢꠣꠝꠦꠡꠣ ꠅꠟꠣ ꠄꠇꠦ-ꠅꠁꠘ꠆ꠘꠞꠦ ꠡꠣꠅꠡ ꠖꠦꠅ ꠀꠞ ꠉꠠꠤꠀ ꠔꠥꠟꠅ।
ꠇꠥꠠꠤꠀꠝꠤ ꠛꠣꠖ ꠖꠤꠀ ꠘꠦꠇ ꠇꠣꠝ ꠇꠞꠅ
১২ ꠔꠦ ꠜꠣꠁꠀꠂꠘ,
ꠀꠝꠞꠣ ꠝꠤꠘꠔ ꠇꠞꠤꠀ ꠇꠁꠀꠞ,
ꠔꠥꠝꠞꠣꠞ ꠟꠣꠉꠤ ꠎꠦꠞꠣ ꠀꠐꠘꠤ-ꠈꠣꠐꠘꠤ ꠈꠣꠐꠂꠘ,
ꠝꠣꠟꠤꠇꠞ ꠅꠁꠀ ꠔꠥꠝꠞꠣꠞꠦ ꠌꠣꠟꠣꠁꠘ ꠀꠞ ꠘꠍꠤꠅꠔ ꠇꠞꠂꠘ,
ꠔꠥꠝꠞꠣ ꠄꠞꠣꠞꠦ ꠁꠎ꠆ꠎꠔ ꠇꠞꠤꠅ।
১৩ ꠔꠣꠞꠣ ꠎꠦꠞꠣ ꠈꠦꠎꠝꠔ ꠇꠞꠞꠣ,
ꠅꠔꠣꠞ ꠛꠣꠄ ꠌꠣꠁꠀ ꠖꠤꠟꠞ ꠝꠢꠛ꠆ꠛꠔꠦ ꠔꠣꠞꠣꠞꠦ ꠈꠣꠍ ꠁꠎ꠆ꠎꠔ ꠖꠤꠅ।
ꠀꠞ ꠔꠥꠝꠞꠣ ꠄꠇꠦ-ꠅꠁꠘ꠆ꠘꠦ ꠝꠤꠟꠤ-ꠝꠤꠡꠤ ꠞꠁꠅ।
১৪ ꠅ ꠜꠣꠁ ꠅꠇꠟ,
ꠔꠥꠝꠞꠣꠞꠦ ꠅꠃ ꠘꠍꠤꠅꠔꠈꠣꠘ ꠇꠞꠤꠀꠞ,
ꠎꠦꠔꠣ ꠝꠣꠘꠥꠡ ꠇꠥꠠꠤꠀ,
ꠔꠥꠝꠞꠣ ꠁꠔꠣꠞꠦ ꠢꠥꠡꠤꠀꠞ ꠇꠞꠤ ꠖꠦꠅ,
ꠒꠞꠣꠟꠥꠇ ꠎꠘꠞꠦ ꠡꠣꠅꠡ ꠖꠦꠅ,
ꠇꠝꠎꠥꠞ ꠅꠇꠟꠞꠦ ꠡꠣꠁꠎ꠆ꠎ ꠇꠞꠅ,
ꠀꠞ ꠗꠂꠎ꠆ꠎ ꠗꠞꠤꠀ ꠢꠇ꠆ꠇꠟꠞꠦ ꠡꠁꠎ꠆ꠎ ꠇꠞꠅ।
১৫ ꠈꠤꠀꠟ ꠞꠣꠈꠤꠅ,
ꠅꠁꠘ꠆ꠘꠣꠄꠞ ꠛꠖꠟꠣ ꠇꠦꠃ ꠎꠣꠘꠥ ꠅꠁꠘ꠆ꠘꠣꠄ ꠘꠣ ꠇꠞꠦ।
ꠔꠥꠝꠞꠣ ꠢꠣꠝꠦꠡꠣ ꠄꠇꠦ-ꠅꠁꠘ꠆ꠘꠞ,
ꠀꠞ ꠢꠇꠟꠞꠃ ꠜꠣꠟꠣꠁ ꠇꠞꠣꠞ ꠌꠦꠡ꠆ꠐꠣ ꠇꠞꠤꠅ।
১৬ ꠢꠇꠟ ꠡꠝꠄ ꠈꠥꠡꠤ-ꠛꠣꠡꠤ ꠇꠞꠣꠔ ꠞꠁꠅ,
১৭ ꠢꠣꠝꠦꠡꠣ ꠖꠥꠀ-ꠝꠥꠘꠣꠎꠣꠔ ꠇꠞꠤꠅ
১৮ ꠀꠞ ꠢꠇꠟ ꠢꠣꠟꠔꠅ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤꠅ।
ꠇꠣꠞꠘ ꠀꠟ꠆ꠟꠣ ꠙꠣꠇꠞ ꠈꠤꠀꠟ ꠅꠁꠟ,
ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠟꠉꠦ ꠁꠝꠣꠘꠦ ꠔꠥꠝꠞꠣ ꠅꠟꠣꠈꠣꠘ ꠌꠟꠅ।
১৯ ꠙꠣꠇ ꠞꠥꠢꠥꠞꠦ ꠖꠤꠟꠞ ꠜꠤꠔꠞ ꠕꠣꠇꠤ ꠘꠤꠜꠣꠁꠅ ꠘꠣ।
২০ ꠀꠞ ꠎꠦꠞꠣ ꠀꠟ꠆ꠟꠣꠞ ꠅꠟꠤ ꠢꠤꠡꠣꠛꠦ ꠛꠣꠔꠥꠘꠤ ꠇꠂꠘ,
ꠔꠣꠞꠣꠞ ꠇꠕꠣꠞꠦ ꠄꠟꠣꠝꠤ ꠇꠞꠤꠅ ꠘꠣ,
২১ ꠛꠞꠋ ꠢꠇꠟꠔꠣ ꠎꠣꠌꠣꠁ ꠇꠞꠤ ꠖꠦꠈꠤꠀ,
ꠜꠣꠟꠣꠈꠣꠘ ꠜꠤꠔꠞꠦ ꠢꠣꠞꠣꠁꠅ।
২২ ꠀꠞ ꠢꠇꠟ ꠘꠝꠥꠘꠣꠞ ꠘꠣꠚꠞꠝꠣꠘꠤ ꠕꠣꠇꠤ ꠢꠞꠤꠀ ꠞꠁꠅ।
২৩ ꠡꠣꠘ꠆ꠔꠤ ꠖꠦꠅꠞꠣ ꠀꠟ꠆ꠟꠣꠄ ꠘꠤꠎꠦ ꠔꠥꠝꠞꠣꠞꠦ ꠙꠥꠞꠣꠙꠥꠞ ꠙꠣꠇ-ꠙꠛꠤꠔ꠆ꠞ ꠇꠞꠃꠇ꠆ꠇꠣ,
ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠄ ꠔꠡꠞꠤꠚ ꠀꠘꠣꠞ ꠇꠣꠟꠅ ꠔꠥꠝꠞꠣꠞ ꠀꠡ꠆ꠔꠣ ꠡꠞꠤꠟ,
ꠞꠥꠢꠥ ꠀꠞ ꠖꠤꠟꠞꠦ ꠙꠥꠞꠣꠙꠥꠞ ꠘꠤꠈꠥꠔ ꠞꠣꠈꠃꠇ꠆ꠇꠣ।
২৪ ꠀꠞ ꠔꠣꠁꠘ ꠘꠤꠌ꠆ꠌꠤꠔ ꠅꠟꠣꠃ ꠇꠞꠛꠣ।
ꠎꠣꠘꠅ ꠔ,
ꠎꠦꠁꠘ ꠔꠥꠝꠞꠣꠞꠦ ꠖꠣꠅꠔ ꠇꠞꠤ ꠀꠘꠍꠂꠘ,
ꠔꠣꠘ ꠃꠙꠞꠦ ꠙꠥꠞꠣꠙꠥꠞ ꠜꠞꠡꠣ ꠇꠞꠣ ꠎꠣꠄ।
২৫ ꠅ ꠜꠣꠁꠀꠂꠘ,
ꠀꠝꠞꠣꠞ ꠟꠣꠉꠤ ꠖꠥꠀ ꠇꠞꠤꠅ।
২৬ ꠔꠥꠝꠞꠣ ꠄꠇꠦ-ꠅꠁꠘ꠆ꠘꠦ ꠙꠛꠤꠔ꠆ꠞ ꠉꠟꠣꠉꠟꠤ ꠇꠞꠤꠅ।
২৭ ꠀꠝꠞꠣꠞ ꠝꠣꠟꠤꠇꠞ ꠘꠣꠝꠦ ꠀꠝꠤ ꠔꠥꠝꠞꠣꠞꠦ ꠅꠃ ꠢꠥꠇꠥꠝ ꠖꠤꠀꠞ,
ꠅꠃ ꠌꠤꠑꠤꠈꠣꠘ ꠙꠠꠤꠀ ꠎꠣꠘꠥ ꠢꠇꠟ ꠜꠣꠁꠀꠂꠘ꠆ꠔꠞꠦ ꠢꠥꠘꠣꠁꠟ ꠅꠄ।
২৮ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠞꠢꠝꠔ ꠔꠥꠝꠞꠣꠞ ꠟꠉꠦ ꠞꠃꠇ।
ꠀꠝꠤꠘ॥