ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚ ১৬ ꠘꠝ꠆ꠛꠞ ꠍꠤꠙꠣꠞꠣ
ꠖꠥꠍꠞꠣ ꠔꠤꠝꠕꠤ
১
১ ꠀꠝꠤ ꠙꠣꠃꠟꠥꠍ ꠔ ꠀꠟ꠆ꠟꠣ ꠙꠣꠇꠞ ꠝꠞ꠆ꠎꠤꠄ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠍꠣꠢꠣꠛꠤ।
ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠀꠈꠦꠞꠤ ꠎꠤꠘ꠆ꠖꠦꠉꠤꠞ ꠇꠕꠣ ꠔꠛꠟꠤꠉꠞ ꠟꠣꠉꠤ ꠍꠣꠢꠣꠛꠤ ꠙꠖ ꠙꠣꠁꠍꠤ।
২ ꠀꠝꠤ ꠀꠝꠣꠞ ꠝꠣꠄꠀꠞ ꠀꠅꠟꠣꠖ ꠔꠤꠝꠕꠤꠞ ꠉꠦꠍꠦ ꠟꠦꠈꠞꠣꠝ।
ꠉꠣꠁꠛꠤ ꠛꠣꠚ ꠀꠟ꠆ꠟꠣꠄ ꠀꠞ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠄ ꠔꠥꠝꠣꠞꠦ ꠞꠢꠝꠔ,
ꠝꠦꠢꠦꠞꠛꠣꠘꠤ ꠀꠞ ꠡꠣꠘ꠆ꠔꠤ ꠖꠣꠘ ꠇꠞꠃꠇ꠆ꠇꠣ।
ꠞꠥꠢꠣꠘꠤ ꠀꠉꠥꠁꠘ ꠎꠣꠟꠣꠅ
৩ ꠅ ꠔꠤꠝꠕꠤ,
ꠢꠥꠘꠅ,
ꠀꠝꠣꠞ ꠝꠄ-ꠝꠥꠞꠛ꠆ꠛꠤꠄ ꠎꠦꠟꠣ ꠄꠇ ꠀꠟ꠆ꠟꠣꠞ ꠄꠛꠣꠖꠔ ꠇꠞꠔꠣ,
ꠀꠝꠤꠅ ꠅꠃꠟꠣ ꠙꠞꠤꠡ꠆ꠇꠣꠞ ꠛꠤꠛꠦꠇꠦ ꠀꠟ꠆ꠟꠣꠞ ꠄꠛꠣꠖꠔ ꠇꠞꠤ।
ꠀꠝꠤ ꠖꠥꠀ ꠇꠞꠣꠞ ꠛꠣꠟꠣ ꠖꠤꠘꠦ-ꠞꠣꠁꠔꠦ ꠢꠣꠝꠦꠡꠣ ꠔꠥꠝꠣꠞ ꠟꠣꠉꠤ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤ।
৪ ꠔꠥꠝꠣꠞ ꠢꠃ ꠇꠣꠘ꠆ꠖꠘꠞ ꠇꠕꠣ ꠝꠘꠅ ꠇꠞꠤꠀ ꠔꠥꠝꠣꠞꠦ ꠖꠦꠈꠣꠞ ꠟꠣꠉꠤ ꠝꠘꠦ ꠈꠥꠛ ꠐꠣꠘꠦꠞ,
ꠔꠥꠝꠣꠞꠦ ꠖꠦꠈꠟꠦ ꠀꠝꠣꠞ ꠜꠤꠔꠞ ꠈꠥꠡꠤꠄ ꠜꠞꠤꠎꠤꠛ।
৫ ꠀꠝꠣꠞ ꠝꠘꠅ ꠀꠍꠦ,
ꠔꠥꠝꠣꠞ ꠖꠤꠟꠈꠣꠘ ꠢꠇ ꠁꠝꠣꠘꠦ ꠜꠞꠣ,
ꠔꠥꠝꠣꠞ ꠘꠣꠘꠤ ꠟꠥꠁꠍ ꠀꠞ ꠔꠥꠝꠣꠞ ꠀꠝ꠆ꠝꠣ ꠃꠘꠤꠇꠤꠞ ꠜꠤꠔꠞꠦꠅ ꠅꠟꠣ ꠢꠇ ꠁꠝꠣꠘ ꠀꠍꠤꠟ।
ꠀꠝꠤ ꠘꠤꠌ꠆ꠌꠤꠔ ꠎꠣꠘꠤ,
ꠔꠥꠝꠣꠞ ꠜꠤꠔꠞꠦꠅ ꠅꠟꠣ ꠁꠝꠣꠘ ꠀꠍꠦ।
৬ ꠄꠞꠟꠣꠉꠤ ꠅꠈꠘ ꠔꠥꠝꠣꠞꠦ ꠝꠘꠅ ꠇꠞꠣꠁ ꠖꠤꠞꠣꠝ,
ꠀꠝꠤ ꠔꠥꠝꠣꠞ ꠡꠞꠤꠟꠅ ꠀꠔ ꠞꠣꠈꠤꠀ ꠈꠦꠟꠣꠚꠔꠤ ꠖꠦꠅꠀꠄ,
ꠀꠟ꠆ꠟꠣꠄ ꠔꠥꠝꠣꠞꠦ ꠎꠦ ꠈꠣꠍ ꠘꠤꠀꠝꠔ ꠖꠣꠘ ꠇꠞꠍꠂꠘ,
ꠁ ꠀꠉꠥꠁꠘ ꠎꠣꠟꠣꠁꠀ ꠔꠥꠟꠅ।
৭ ꠀꠟ꠆ꠟꠣꠄ ꠔ ꠀꠝꠞꠣꠞꠦ ꠜꠤꠔꠥ-ꠒꠞꠣꠟꠥꠇꠞ ꠝꠘꠜꠣꠛ ꠖꠤꠍꠂꠘ ꠘꠣ।
ꠛꠞꠋ ꠛꠟ-ꠡꠇ꠆ꠔꠤ,
ꠝꠣꠄꠀ-ꠝꠢꠛ꠆ꠛꠔ ꠀꠞ ꠘꠤꠎꠞꠦ ꠡꠣꠝꠟꠣꠘꠤꠞ ꠈꠦꠝꠔꠣ ꠖꠣꠘ ꠇꠞꠍꠂꠘ।
৮ ꠄꠞꠟꠣꠉꠤ ꠀꠝꠞꠣꠞ ꠝꠣꠟꠤꠇ ꠁꠍꠣꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠔꠦ ꠡꠞꠝꠣꠁꠅ ꠘꠣ,
ꠀꠞ ꠔꠣꠘ ꠘꠣꠝꠞ ꠟꠣꠉꠤ ꠀꠝꠤ ꠎꠦꠘ ꠎꠦꠟꠅ ꠛꠘ꠆ꠖꠤ ꠀꠍꠤ,
ꠀꠝꠣꠞꠦ ꠟꠁꠀꠅ ꠡꠞꠝꠣꠁꠅ ꠘꠣ।
ꠛꠞꠋ ꠀꠟ꠆ꠟꠣꠞ ꠖꠦꠅꠀ ꠛꠟꠦ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠇꠣꠝꠅ ꠀꠝꠣꠞ ꠟꠉꠦ ꠞꠁꠀ ꠖꠥꠈ-ꠇꠡ꠆ꠐ ꠡꠁꠎ꠆ꠎ ꠇꠞꠅ।
৯ ꠀꠟ꠆ꠟꠣꠄ ꠀꠝꠞꠣꠞ ꠎꠣꠘ ꠛꠣꠌꠣꠁꠍꠂꠘ,
ꠀꠞ ꠙꠣꠇ-ꠙꠛꠤꠔ꠆ꠞ ꠅꠁꠀ ꠎꠤꠘ꠆ꠖꠦꠉꠤ ꠇꠣꠐꠣꠘꠤꠞ ꠟꠣꠉꠤ ꠖꠣꠅꠔ ꠖꠤꠍꠂꠘ।
ꠁꠔꠣ ꠔ ꠀꠝꠞꠣꠞ ꠇꠥꠘꠥ ꠘꠦꠇ ꠇꠣꠝꠞ ꠉꠥꠘꠦ ꠘꠣꠄ,
ꠛꠞꠋ ꠔꠣꠘ ꠝꠞ꠆ꠎꠤ ꠀꠞ ꠞꠢꠝꠔꠞ ꠉꠥꠘꠦꠃ ꠇꠞꠍꠂꠘ।
ꠀꠝꠞꠣꠞꠦ ꠁ ꠞꠢꠝꠔ ꠖꠣꠘ ꠇꠞꠍꠂꠘ ꠔ,
ꠖꠥꠘꠤꠀ ꠙꠄꠖꠣ ꠇꠞꠣꠞ ꠀꠉꠦ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ।
১০ ꠀꠞ ꠀꠟ꠆ꠟꠣꠄ ꠅꠈꠘ ꠅꠃ ꠞꠢꠝꠔ ꠎꠣꠁꠞ ꠇꠞꠍꠂꠘ,
ꠀꠝꠞꠣꠞ ꠔꠞꠣꠘꠦꠀꠟꠣ ꠁꠍꠣ ꠀꠟ-ꠝꠍꠤꠄ ꠖꠥꠘꠤꠀꠔ ꠔꠡꠞꠤꠚ ꠀꠘꠣꠞ ꠝꠣꠎꠖꠤ।
ꠀꠟ-ꠝꠍꠤꠄ ꠔ ꠝꠃꠔꠞ ꠈꠦꠝꠔꠣꠞꠦ ꠌꠥꠞꠝꠣꠞ ꠇꠞꠍꠂꠘ,
ꠔꠣꠘ ꠈꠥꠡ-ꠈꠛꠞꠤꠞ ꠝꠣꠎꠖꠤ ꠌꠤꠞꠇꠣꠟꠤꠘ ꠘꠥꠞꠣꠘꠤ ꠎꠤꠘ꠆ꠖꠦꠉꠤꠞ ꠙꠕ ꠈꠥꠟꠣ-ꠝꠦꠟꠣ ꠇꠞꠍꠂꠘ।
১১ ꠅꠃ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠟꠣꠉꠤꠃ ꠔ ꠀꠝꠣꠞꠦ ꠔꠛꠟꠤꠉꠇꠣꠞꠤ,
ꠍꠣꠢꠣꠛꠤ ꠀꠞ ꠃꠡ꠆ꠔꠣꠖ ꠢꠤꠡꠣꠛꠦ ꠛꠅꠀꠁꠟ ꠇꠞꠣ ꠅꠁꠍꠦ।
১২ ꠄꠞꠟꠣꠉꠤꠃ ꠀꠝꠤ ꠅꠟꠣ ꠖꠥꠈ-ꠇꠡ꠆ꠐ ꠙꠣꠁꠀꠞ,
ꠔꠣ-ꠅ ꠀꠝꠤ ꠡꠞꠝꠤꠘ꠆ꠖꠣ ꠘꠣꠄ।
ꠇꠣꠞꠘ ꠀꠝꠤ ꠎꠣꠘꠤ,
ꠀꠝꠤ ꠇꠣꠞ ꠃꠙꠞꠦ ꠜꠞꠡꠣ ꠇꠞꠍꠤ।
ꠀꠝꠣꠞ ꠙꠥꠞꠣꠙꠥꠞ ꠄꠇꠤꠘ ꠀꠍꠦ,
ꠀꠝꠤ ꠔꠣꠘ ꠖꠞꠛꠣꠞꠅ ꠎꠦꠔꠣ ꠎꠝꠣ ꠇꠞꠍꠤ,
ꠁꠔꠣꠞꠦ ꠢꠦꠚꠣꠎꠔꠦ ꠞꠣꠈꠣꠞ ꠈꠦꠝꠔꠣ ꠔꠣꠘ ꠀꠍꠦ,
ꠀꠟ-ꠝꠍꠤꠄ ꠖꠥꠍꠞꠣꠛꠣꠞ ꠔꠡꠞꠤꠚ ꠀꠘꠣꠞ ꠖꠤꠘ ꠙꠞ꠆ꠎꠘ꠆ꠔ ꠁꠔꠣ ꠞꠁꠛ।
১৩ ꠔꠦ ꠔꠥꠝꠤ ꠀꠝꠣꠞ ꠝꠥꠈ ꠕꠣꠇꠤ ꠎꠔ ꠔꠣꠟꠤꠝ ꠢꠥꠘꠍ,
ꠅꠃ ꠢꠇ ꠔꠣꠟꠤꠝꠞꠦ ꠎꠣꠘꠞ ꠇꠛꠎ ꠝꠘꠅ ꠇꠞꠤꠀ,
ꠀꠟ-ꠝꠍꠤꠞ ꠃꠙꠞꠞ ꠁꠝꠣꠘ ꠀꠞ ꠝꠢꠛ꠆ꠛꠔꠦ ꠗꠞꠤꠀ ꠞꠣꠈꠅ।
১৪ ꠀꠟ꠆ꠟꠣꠄ ꠎꠦ ꠍꠣꠝꠣꠘꠣ ꠢꠦꠚꠣꠎꠔꠦ ꠞꠣꠈꠣꠞ ꠟꠣꠉꠤ ꠔꠥꠝꠣꠞ ꠎꠤꠝ꠆ꠝꠣꠄ ꠖꠤꠍꠂꠘ,
ꠀꠝꠞꠣꠞ ꠖꠤꠟꠞ ꠝꠣꠎꠞ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠛꠟꠦ ꠔꠥꠝꠤ ꠁꠔꠣꠞ ꠢꠦꠚꠣꠎꠔ ꠇꠞꠅ।
১৫ ꠔꠥꠝꠤ ꠔ ꠎꠣꠘꠅ,
ꠔꠥꠞꠡ꠆ꠇꠞ ꠀꠍꠤꠀ ꠄꠟꠣꠇꠣꠞ ꠢꠇꠟ ꠝꠣꠘꠥꠡ ꠀꠝꠣꠞ ꠉꠦꠍ ꠕꠣꠇꠤ ꠀꠟꠉꠤ ꠉꠦꠍꠂꠘ,
ꠚꠥꠉꠤꠟꠣꠍ ꠀꠞ ꠢꠣꠝꠣꠉꠤꠘꠣꠍꠅ ꠔꠣꠞꠣꠞ ꠟꠉꠦ ꠉꠦꠍꠂꠘꠉꠤ।
১৬ ꠜꠣꠁ ꠀꠘꠤꠍꠞ ꠙꠞꠤꠛꠣꠞꠞ ꠃꠙꠞꠦ ꠝꠣꠟꠤꠇ ꠁꠍꠣꠄ ꠞꠢꠝ-ꠛꠞꠇꠔ ꠖꠦꠃꠇ꠆ꠇꠣ।
ꠄꠁꠘ ꠛꠃꠔ ꠛꠣꠞ ꠀꠝꠣꠞ ꠎꠣꠘꠅ ꠀꠞꠣꠝ ꠖꠤꠍꠂꠘ,
ꠀꠝꠤ ꠎꠦꠟꠅ ꠢꠣꠝꠣꠁꠟꠦꠅ ꠔꠣꠁꠘ ꠇꠥꠘꠥ ꠡꠞꠝ ꠝꠘꠅ ꠇꠞꠍꠂꠘ ꠘꠣ।
১৭ ꠔꠣꠁꠘ ꠅꠃ ꠞꠥꠝ ꠐꠣꠃꠘꠅ ꠀꠁꠀ ꠛꠃꠔ ꠔꠣꠟ꠆ꠟꠣꠡ ꠇꠞꠤ ꠀꠝꠣꠞꠦ ꠛꠣꠞ ꠇꠞꠍꠂꠘ।
১৮ ꠀꠝꠤ ꠁꠚꠤꠍ ꠐꠣꠃꠘꠅ ꠕꠣꠇꠔꠦ ꠔꠣꠁꠘ ꠇꠤꠟꠣ ꠀꠝꠣꠞ ꠈꠦꠎꠝꠔ ꠇꠞꠍꠟꠣ,
ꠁꠔꠣ ꠔ ꠔꠥꠝꠤ ꠜꠣꠟꠣꠝꠘ꠆ꠔꠦꠃ ꠎꠣꠘꠅ।
ꠝꠣꠟꠤꠇ ꠁꠍꠣꠄ ꠅꠟꠣ ꠇꠞꠃꠇ꠆ꠇꠣ,
ꠎꠣꠔꠦ ꠔꠣꠘ ꠔꠡꠞꠤꠚ ꠀꠘꠣꠞ ꠖꠤꠘ ꠄꠁꠘ ꠝꠦꠢꠦꠞꠛꠣꠘꠤ ꠙꠣꠁꠘ।