ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚ ২৫ ꠘꠝ꠆ꠛꠞ ꠍꠤꠙꠣꠞꠣ
ꠔꠤꠍꠞꠣ ꠢꠣꠘ꠆ꠘꠣꠘ
ꠢꠎꠞꠔ ꠉꠃꠍꠞꠦ ꠍꠣꠟꠣꠝ ꠀꠞ ꠔꠣꠞꠤꠚ
১
১ ꠀꠟ꠆ꠟꠣꠁ ꠢꠇꠞ ꠈꠣꠔꠤꠞꠦ ꠀꠝꠤ ꠎꠣꠞꠦ ꠝꠢꠛ꠆ꠛꠔ ꠇꠞꠤ,
ꠀꠝꠣꠞ ꠝꠣꠄꠀꠞ ꠖꠥꠡ꠆ꠔ ꠉꠃꠍꠞ ꠉꠦꠍꠦ,
ꠀꠝꠤ ꠢꠃ ꠝꠥꠞꠛ꠆ꠛꠤꠄ ꠁꠔꠣ ꠟꠦꠈꠞꠣꠝ।
২ ꠅ ꠝꠣꠄꠀꠞ ꠖꠥꠡ꠆ꠔ,
ꠀꠝꠤ ꠖꠥꠀ ꠇꠞꠤꠀꠞ ꠔꠥꠝꠣꠞ ꠢꠇ꠆ꠇꠟꠔꠣ ꠎꠣꠘꠥ ꠡꠑꠤꠇ ꠜꠣꠛꠦ ꠌꠟꠦ,
ꠀꠞꠅ ꠌꠣꠁꠀꠞ ꠔꠥꠝꠣꠞ ꠖꠤꠟ ꠎꠦꠟꠣ ꠜꠣꠟꠣ ꠔꠥꠝꠣꠞ ꠡꠞꠤꠟ-ꠉꠔꠞꠅ ꠎꠣꠘꠥ ꠅꠟꠣ ꠜꠣꠟꠣ ꠕꠣꠇꠦ।
৩ ꠔꠥꠝꠣꠞ ꠅꠈꠣꠘ ꠕꠣꠇꠤ ꠇꠄꠎꠘ ꠝꠥꠝꠤꠘ ꠜꠣꠁ ꠀꠁꠀ ꠇꠁꠟꠣ,
ꠀꠟ꠆ꠟꠣꠁ ꠢꠇꠞ ꠛꠦꠙꠣꠞꠦ ꠔꠥꠝꠤ ꠛꠥꠟꠦ ꠝꠎꠛꠥꠔ ꠀꠍ,
ꠁꠈꠣꠘ ꠢꠥꠘꠤꠀ ꠀꠝꠤ ꠈꠥꠛ ꠈꠥꠡꠤ ꠅꠁꠍꠤ।
৪ ꠀꠝꠣꠞ ꠀꠅꠟꠣꠖ ꠅꠇꠟ ꠀꠟ꠆ꠟꠣꠁ ꠢꠇꠞ ꠙꠕꠦ ꠌꠟꠞꠣ ꠢꠥꠘꠤꠀ ꠈꠥꠡꠤ ꠟꠣꠉꠦꠞ,
ꠁꠈꠣꠘ ꠕꠣꠇꠤ ꠛꠠ ꠀꠞ ꠇꠥꠘꠥ ꠈꠥꠡꠤꠞ ꠈꠛꠞ ꠅꠄ ꠘꠤ?
৫ ꠅ ꠝꠣꠄꠀꠞ ꠖꠥꠡ꠆ꠔ,
ꠔꠥꠝꠣꠞ ꠅꠌꠤꠘꠣ ꠢꠃ ꠝꠥꠍꠣꠚꠤꠞ ꠜꠣꠁꠀꠂꠘꠞꠦ ꠎꠦꠟꠣ ꠈꠦꠎꠝꠔ ꠇꠞꠍ,
ꠁꠔꠣ ꠔ ꠈꠣꠐꠤ ꠝꠥꠝꠤꠘꠞ ꠇꠣꠝ।
৬ ꠔꠥꠝꠣꠞ ꠝꠣꠄꠀ-ꠝꠢꠛ꠆ꠛꠔꠞ ꠇꠕꠣ ꠔꠣꠞꠣ ꠎꠝꠣꠔꠞ ꠢꠥꠞꠥ-ꠛꠠ ꠢꠇꠟꠞ ꠍꠣꠝꠘꠦ ꠇꠁꠍꠦ।
ꠅꠈꠘ ꠀꠟ꠆ꠟꠣꠞ ꠈꠥꠡꠤ ꠝꠣꠚꠤꠇ ꠔꠣꠞꠣꠞꠦ ꠍꠢꠤ-ꠍꠣꠟꠣꠝꠔꠦ ꠙꠣꠑꠣꠘꠤꠞ ꠛꠦꠛꠡ꠆ꠔꠣ ꠇꠞꠤ ꠖꠦꠅ,
ꠔꠦ ꠀꠞꠅ ꠜꠣꠟꠣ ꠅꠁꠛ।
৭ ꠔꠣꠞꠣ ꠈꠣꠟꠤ ꠀꠟ-ꠝꠍꠤꠞ ꠔꠛꠟꠤꠉꠅ ꠛꠣꠞꠅꠁꠍꠂꠘ,
ꠔꠞꠤꠇꠣꠞ ꠛꠣꠁꠞꠣ ꠝꠣꠘꠡꠞ ꠉꠦꠍ ꠕꠣꠇꠤ ꠇꠥꠘꠥ ꠡꠣꠁꠎ꠆ꠎ ꠟꠁꠍꠂꠘ ꠘꠣ।
৮ ꠄꠞꠟꠣꠉꠤ ꠅꠃ ꠟꠣꠈꠣꠘ ꠝꠣꠘꠡꠞꠦ ꠡꠣꠁꠎ꠆ꠎ ꠇꠞꠣ ꠎꠞꠥꠞ,
ꠎꠣꠔꠦ ꠢꠇ ꠇꠣꠝꠅ ꠀꠝꠞꠣꠅ ꠡꠞꠤꠇ ꠕꠣꠇꠤ।
ꠜꠘ꠆ꠒ ꠖꠤꠔ꠆ꠞꠤꠚꠞ ꠘꠦꠔꠣꠉꠤꠞꠤ ꠀꠞ ꠖꠤꠝꠤꠔ꠆ꠞꠤ ꠜꠣꠁꠞ ꠡꠥꠘꠣꠝ
৯ ꠀꠝꠤ ꠀꠉꠦ ꠎꠝꠣꠔꠞ ꠉꠦꠍꠦ ꠄꠇꠈꠣꠘ ꠌꠤꠑꠤ ꠟꠦꠈꠍꠟꠣꠝ,
ꠅꠁꠟꠦ ꠈꠛꠤꠍ ꠖꠤꠔ꠆ꠞꠤꠚꠦ ꠎꠝꠣꠔꠞ ꠘꠦꠔꠣꠉꠤꠞꠤ ꠇꠞꠔ ꠌꠣꠄ,
ꠄꠞꠟꠣꠉꠤ ꠢꠦ ꠀꠝꠞꠣꠞ ꠇꠕꠣ ꠢꠥꠘꠦ ꠘꠣ।
১০ ꠅꠈꠘ ꠢꠦ ꠎꠦꠔꠣ ꠇꠞꠦꠞ,
ꠀꠝꠤ ꠀꠁꠀ ꠢꠣꠞꠤ ꠁꠔꠣ ꠢꠇꠟꠞꠦ ꠎꠣꠘꠣꠁꠝꠥ।
ꠢꠦ ꠀꠝꠞꠣꠞꠦ ꠁꠋꠡꠣ ꠇꠞꠤꠀ ꠛꠃꠔ ꠝꠤꠍꠣ ꠛꠖꠘꠣꠝ ꠞꠐꠣꠁꠍꠦ।
ꠈꠣꠟꠤ ꠁꠈꠣꠘ ꠘꠣꠄ,
ꠝꠥꠝꠤꠘ ꠇꠥꠘꠥ ꠜꠣꠁꠞꠦ ꠢꠦ ꠝꠣꠘꠦꠞ ꠘꠣ,
ꠀꠞ ꠅꠁꠘ꠆ꠘ ꠎꠦꠞꠣ ꠝꠣꠘꠔ ꠌꠣꠄ,
ꠔꠣꠞꠣꠞꠦꠅ ꠛꠣꠗꠣ ꠖꠦꠞ,
ꠄꠝꠘꠇꠤ ꠎꠝꠣꠔ ꠕꠣꠇꠤ ꠛꠣꠞ ꠇꠞꠤ ꠖꠦꠞ।
১১ ꠅ ꠝꠣꠄꠀꠞ ꠖꠥꠡ꠆ꠔ,
ꠔꠥꠝꠤ ꠛꠖ ꠇꠣꠝꠞ ꠈꠞꠦꠖꠤ ꠘꠣ ꠖꠃꠠꠣꠁꠀ ꠛꠞꠋ ꠘꠦꠇ ꠇꠣꠝ ꠇꠞꠅ।
ꠎꠦ ꠝꠣꠘꠡꠦ ꠘꠦꠇ ꠇꠣꠝ ꠇꠞꠦ ꠢꠦ ꠅꠁꠟ ꠀꠟ꠆ꠟꠣꠞ ꠛꠘ꠆ꠖꠣ,
ꠀꠞ ꠎꠦꠉꠤꠄ ꠛꠖ ꠇꠣꠝ ꠇꠞꠦ,
ꠢꠦ ꠔ ꠀꠟ꠆ꠟꠣꠞ ꠖꠞꠡꠘ ꠙꠣꠁꠍꠦ ꠘꠣ।
১২ ꠎꠣꠘꠅ ꠘꠤ,
ꠢꠇꠟꠦꠃ ꠖꠤꠝꠤꠔ꠆ꠞꠤ ꠜꠣꠁꠞ ꠡꠥꠘꠣꠝ ꠉꠣꠁꠞꠣ,
ꠄꠝꠘꠇꠤ ꠡ꠆ꠛꠄꠅꠋ ꠀꠟ꠆ꠟꠣꠞ ꠢꠇꠦꠅ ꠄꠘ ꠔꠣꠞꠤꠚ ꠇꠞꠞꠣ।
ꠀꠝꠞꠣꠅ ꠄꠘ ꠔꠣꠞꠤꠚ ꠇꠞꠞꠣꠝ,
ꠀꠞ ꠔꠥꠝꠤ ꠔ ꠎꠣꠘꠅ ꠀꠝꠞꠣꠞ ꠝꠥꠈꠞ ꠇꠕꠣ ꠢꠣꠍꠣ।
ꠛꠤꠖꠣꠄꠁ ꠍꠣꠟꠣꠝ