ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚ ২৬ ꠘꠝ꠆ꠛꠞ ꠍꠤꠙꠣꠞꠣ
ꠀꠟ-ꠄꠢꠥꠖꠣ
১
১ ꠀꠝꠤ ꠄꠢꠥꠖꠣ ꠔ ꠍꠣꠢꠣꠛꠤ ꠁꠀꠇꠥꠛꠞ ꠜꠣꠁ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠉꠥꠟꠣꠝ।
ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠦ ꠎꠦꠞꠣꠞꠦ ꠝꠢꠛ꠆ꠛꠔ ꠇꠞꠂꠘ,
ꠎꠦꠞꠣ ꠀꠟ꠆ꠟꠣꠁ ꠖꠣꠅꠔ ꠙꠣꠁꠍꠂꠘ,
ꠀꠞ ꠁꠍꠣ ꠀꠟ-ꠝꠍꠤꠄ ꠎꠦꠞꠣꠞ ꠢꠦꠚꠣꠎꠔ ꠇꠞꠂꠘ,
ꠅꠃ ꠍꠢꠤꠚꠣꠈꠣꠘ ꠀꠝꠤ ꠄꠞꠣꠞ ꠉꠦꠍꠦ ꠟꠦꠈꠞꠣꠝ।
২ ꠔꠥꠝꠞꠣꠞ ꠃꠙꠞꠦ ꠛꠦꠡ ꠇꠞꠤ ꠝꠦꠢꠦꠞꠛꠣꠘꠤ,
ꠡꠣꠘ꠆ꠔꠤ ꠀꠞ ꠝꠢꠛ꠆ꠛꠔ ꠎꠣꠞꠤ ꠞꠃꠇ।
ꠜꠘ꠆ꠒ ꠃꠡ꠆ꠔꠣꠖꠞ ꠛꠤꠞꠥꠖ꠆ꠖꠦ ꠁꠝꠣꠘꠤ ꠟꠣꠠꠣꠁ ꠌꠣꠟꠣꠅ
৩ ꠅ ꠝꠣꠄꠀꠞ ꠖꠥꠡ꠆ꠔ ꠅꠇꠟ,
ꠀꠝꠞꠣ ꠢꠇꠟꠦ ꠝꠤꠟꠤ ꠎꠦ ꠘꠣꠎꠣꠔꠞ ꠜꠣꠉꠤ ꠅꠁꠍꠤ,
ꠅꠃ ꠘꠣꠎꠣꠔꠞ ꠛꠦꠙꠣꠞꠦ ꠀꠝꠤ ꠈꠥꠛ ꠈꠤꠀꠟꠤ ꠅꠁꠀ ꠔꠥꠝꠞꠣꠞ ꠉꠦꠍꠦ ꠟꠦꠈꠔꠣꠝ ꠌꠣꠁꠍꠤ।
ꠄꠞꠝꠣꠎꠦ ꠛꠥꠎꠟꠣꠝ,
ꠀꠞꠅ ꠖꠞꠇꠣꠞ ꠀꠍꠦ ꠁꠝꠣꠘꠞ ꠟꠣꠉꠤ ꠟꠣꠠꠣꠁꠞ ꠛꠦꠙꠣꠞꠦ ꠟꠦꠈꠤꠀ ꠔꠥꠝꠞꠣꠞꠦ ꠃꠔꠡꠣꠢ ꠖꠦꠅꠀ।
ꠀꠟ꠆ꠟꠣꠄ ꠔꠣꠘ ꠙꠣꠇ ꠛꠘ꠆ꠖꠣ ꠅꠇꠟꠞꠦ ꠌꠤꠞꠇꠣꠟꠞ ꠟꠣꠉꠤ ꠎꠦ ꠁꠝꠣꠘꠤ ꠗꠘ ꠖꠤꠍꠂꠘ,
ꠅꠃ ꠁꠍꠣꠄꠁ ꠁꠝꠣꠘꠞ ꠙꠇ꠆ꠇꠦ ꠖꠤꠟꠦ-ꠎꠣꠘꠦ ꠟꠣꠠꠣꠁ ꠇꠞꠣ ꠔ ꠎꠞꠥꠞ।
৪ ꠁꠔꠣꠞ ꠎꠞꠥꠞ ꠅꠁꠍꠦ,
ꠇꠣꠞꠘ ꠎꠦꠔꠣ ꠝꠣꠘꠡꠦ ꠛꠦ-ꠖꠤꠘꠤ ꠇꠣꠝꠞ ꠡꠣꠎꠣ ꠙꠣꠁꠛꠣꠞ ꠇꠕꠣ ꠀꠉ ꠕꠣꠇꠤꠃ ꠟꠦꠈꠣ ꠀꠍꠤꠟ,
ꠔꠟꠦ ꠔꠟꠦ ꠅꠔꠣ ꠝꠣꠘꠥꠡ ꠀꠁꠀ ꠔꠥꠝꠞꠣꠞ ꠖꠟꠅ ꠢꠣꠝꠣꠁ ꠉꠦꠍꠦ।
ꠀꠝꠞꠣꠞ ꠀꠟ꠆ꠟꠣꠞ ꠞꠢꠝꠔꠞꠦ ꠔꠣꠞꠣꠞ ꠛꠖ ꠈꠣꠁꠡ ꠝꠤꠐꠣꠘꠤꠞ ꠀꠔꠤꠀꠞ ꠛꠣꠘꠣꠁꠍꠦ,
ꠀꠞ ꠀꠝꠞꠣꠞ ꠄꠇꠝꠣꠔ꠆ꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠃꠟꠐꠣ ꠌꠟꠦ।
৫ ꠔꠦ ꠅꠃ ꠛꠦꠙꠣꠞ ꠔ ꠔꠥꠝꠞꠣ ꠈꠥꠛ ꠜꠣꠟꠣ ꠇꠞꠤꠃ ꠎꠣꠘꠅ,
ꠔꠣ-ꠅ ꠀꠝꠤ ꠈꠣꠟꠤ ꠅꠈꠣꠘ ꠝꠘꠅ ꠇꠞꠣꠁ ꠖꠤꠞꠣꠝ,
ꠝꠤꠡꠞ ꠖꠦꠡ ꠕꠣꠇꠤ ꠛꠘꠤ ꠁꠍꠞꠣꠁꠟꠞꠦ ꠀꠎꠣꠖ ꠇꠞꠤꠀ ꠀꠘꠣꠞ ꠛꠣꠖꠦ,
ꠔꠣꠞꠣꠞ ꠝꠣꠎꠞ ꠎꠦꠔꠣꠄ ꠁꠝꠣꠘ ꠀꠘꠍꠤꠟ ꠘꠣ,
ꠝꠣꠟꠤꠇꠦ ꠔꠣꠞꠣꠞꠦ ꠛꠤꠘꠣꠡ ꠇꠞꠍꠟꠣ।
৬ ꠀꠞ ꠎꠦꠔꠣ ꠚꠤꠞꠤꠡ꠆ꠔꠣ ꠅꠇꠟꠦ ꠘꠤꠎꠞ ꠖꠣꠄ-ꠖꠣꠄꠁꠔ꠆ꠔ ꠀꠖꠣꠄ ꠘꠣ ꠇꠞꠤꠀ,
ꠘꠤꠎꠞ ꠀꠡꠘ ꠕꠣꠇꠤ ꠢꠞꠤ ꠉꠦꠍꠟꠣ,
ꠀꠟ꠆ꠟꠣꠄ ꠔꠣꠞꠣꠞꠦ ꠌꠤꠞꠇꠣꠟ ꠗꠞꠤ ꠡꠤꠇꠟꠖꠤ ꠛꠣꠘ꠆ꠖꠤꠀ ꠉꠁꠘ ꠀꠘ꠆ꠖꠣꠁꠞ ꠊꠞꠅ ꠞꠣꠈꠍꠂꠘ ꠢꠣꠡꠞꠞ ꠖꠤꠘꠞ ꠟꠣꠉꠤ।
৭ ꠅꠃ ꠟꠣꠈꠣꠘ ꠢꠎꠞꠔ ꠟꠥꠔ ꠘꠛꠤꠞ ꠎꠝꠣꠘꠣꠞ ꠍꠣꠖꠥꠝ,
ꠀꠝꠥꠞꠣ ꠀꠞ ꠇꠣꠘ꠆ꠖꠣ-ꠇꠣꠍꠣꠞ ꠢꠇꠟ ꠐꠣꠃꠘꠞ ꠝꠣꠘꠡꠦ ꠅꠔꠣꠞ ꠟꠣꠈꠣꠘ ꠎꠤꠘꠣ ꠇꠞꠍꠤꠟ,
ꠈꠣꠟꠤ ꠎꠤꠘꠣ ꠘꠣꠄ,
ꠔꠣꠞꠣ ꠈꠥꠛ ꠈꠛꠤꠍꠤ ꠎꠤꠘꠣ ꠇꠞꠣꠄ ꠌꠤꠞꠇꠣꠟ ꠗꠞꠤ ꠖꠥꠎꠈꠅ ꠎꠟꠛ,
ꠁꠔꠣ ꠅꠁꠟ ꠄꠇꠐꠣ ꠘꠤꠡꠣꠘꠣ।
৮ ꠄꠞꠛꠣꠖꠦꠅ ꠅꠃ ꠜꠘ꠆ꠒ ꠃꠡ꠆ꠔꠣꠖ ꠅꠇꠟ,
ꠎꠦꠔꠣꠄ ꠛꠣꠎꠦ ꠈꠥꠀꠛ ꠖꠦꠈꠤ ꠖꠦꠈꠤ ꠔꠣꠟꠤꠝ ꠖꠦꠁꠘ,
ꠔꠣꠞꠣ ꠈꠛꠤꠍꠤ ꠇꠣꠝ ꠇꠞꠂꠘ,
ꠇꠥꠘꠥꠎꠣꠔ ꠡꠣꠡꠘ ꠝꠣꠘꠂꠘ ꠘꠣ,
ꠀꠞ ꠛꠣꠔꠥꠘꠤ ꠡꠞ꠆ꠖꠣꠞ ꠅꠇꠟꠞ ꠛꠖꠘꠣꠝ ꠉꠣꠁꠘ।
৯ ꠄꠝꠘꠇꠤ ꠀꠍꠝꠣꠘꠞ ꠡꠞ꠆ꠖꠣꠞ ꠚꠤꠞꠤꠡ꠆ꠔꠣ ꠝꠤꠇꠣꠁꠟꠦ ꠎꠦꠛꠟꠣ ꠢꠎꠞꠔ ꠝꠥꠍꠣꠞ ꠟꠣꠡ ꠟꠁꠀ ꠁꠛꠟꠤꠍꠞ ꠟꠉꠦ ꠔꠞ꠆ꠇꠣ-ꠔꠞ꠆ꠇꠤ ꠇꠞꠍꠟꠣ,
ꠅꠃ ꠡꠝꠄ ꠔꠣꠁꠘ ꠁꠛꠟꠤꠍ-ꠡꠄꠔꠣꠘꠞ ꠛꠖꠘꠣꠝ ꠉꠣꠁꠀ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣꠞ ꠡꠣꠅꠡ ꠇꠞꠟꠣ ꠘꠣ,
ꠛꠞꠋ ꠇꠁꠟꠣ,
“ꠝꠣꠟꠤꠇꠦ ꠎꠣꠘꠥ ꠔꠥꠝꠣꠞꠦ ꠛꠘ꠆ꠖ ꠇꠞꠂꠘ।”
১০ ꠅꠁꠟꠦ ꠅꠃ ꠜꠘ꠆ꠒ ꠃꠡ꠆ꠔꠣꠖ ꠅꠇꠟꠦ ꠎꠦꠔꠣ ꠛꠥꠎꠦ ꠘꠣ ꠅꠔꠣꠞ ꠛꠖꠘꠣꠝ ꠉꠣꠄ,
ꠀꠞ ꠎꠋꠟꠤ ꠎꠣꠘꠥꠀꠞꠞ ꠟꠣꠈꠣꠘ ꠘꠤꠎꠞ ꠀꠈꠟꠦ ꠘꠤꠎꠞ ꠡꠞꠛꠘꠣꠡ ꠊꠐꠣꠄ।
১১ ꠁꠔꠣ ꠔ ꠟꠣꠘ꠆ꠘꠔꠤ!
ꠁꠉꠥꠁꠘ ꠛꠣꠛꠣ ꠀꠖꠝꠞ ꠟꠣꠘ꠆ꠘꠔꠤ ꠙꠥꠔ ꠇꠣꠛꠤꠟꠞ ꠟꠣꠈꠣꠘ ꠛꠘꠍꠂꠘ।
ꠖꠥꠘꠤꠀꠛꠤ ꠟꠣꠜꠞ ꠀꠡꠣꠄ ꠔꠣꠞꠣ ꠢꠃ ꠜꠘ꠆ꠒ ꠘꠛꠤ ꠛꠣꠟꠣꠝꠞ ꠈꠣꠁꠡꠞ ꠀꠔꠅ ꠘꠤꠎꠞꠦ ꠡꠙꠤ ꠖꠤꠍꠦ।
ꠀꠞ ꠝꠥꠍꠣ ꠘꠛꠤꠞ ꠛꠣꠄ ꠛꠤꠉꠠꠤ ꠎꠣꠅꠞꠣ ꠢꠃ ꠘꠦꠔꠣ ꠇꠥꠞꠣꠢꠞ ꠟꠣꠈꠣꠘ ꠔꠣꠞꠣꠞ ꠛꠤꠘꠣꠡ ꠀꠍꠦ।
১২ ꠔꠦ ꠅꠃ ꠟꠣꠘ꠆ꠘꠔꠤ ꠅꠔꠣ ꠀꠁꠀ ꠎꠦꠛꠟꠣ ꠛꠦ-ꠡꠞꠝꠞ ꠟꠣꠈꠣꠘ ꠔꠥꠝꠞꠣꠞ ꠝꠦꠎꠛꠣꠘꠤ ꠈꠣꠄ,
ꠅꠃ ꠡꠝꠄ ꠁꠔꠣ ꠅꠁꠎꠣꠁꠘ ꠔꠥꠝꠞꠣꠞ ꠈꠣꠘꠤꠞ ꠕꠣꠟꠞ ꠝꠄꠟꠣ।
ꠔꠣꠞꠣ ꠈꠣꠟꠤ ꠘꠤꠎꠞ ꠡ꠆ꠛꠣꠞꠕꠞ ꠗꠣꠘ꠆ꠖꠣ ꠇꠞꠦ।
ꠔꠣꠞꠣ ꠅꠁꠟꠣ ꠀꠍꠝꠣꠘꠅ ꠃꠠꠞꠣ ꠢꠥꠖꠣ ꠝꠦꠊꠞ ꠌꠣꠇꠣ,
ꠛꠣ ꠛꠣꠉꠣꠘꠅ ꠖꠥꠁꠛꠣꠞ ꠝꠞꠣ-ꠢꠥꠇꠘꠣ ꠚꠟ ꠉꠣꠍ,
ꠎꠦꠉꠤꠄ ꠚꠟ ꠘꠣ ꠗꠞꠣꠄ,
ꠎꠠꠦ-ꠚꠠꠦ ꠢꠥꠞꠤꠀ ꠔꠥꠟꠤꠀ ꠚꠣꠟꠣꠁꠟ ꠅꠁꠍꠦ।
১৩ ꠀꠞ ꠔꠣꠞꠣ ꠅꠁꠟꠣ ꠔꠥꠚꠣꠘꠞ ꠇꠣꠟꠞ ꠖꠞꠤꠀꠞ ꠓꠦꠃꠞ ꠟꠣꠈꠣꠘ,
ꠖꠞꠤꠀꠞ ꠓꠦꠃꠄ ꠎꠦꠟꠣ ꠚꠦꠘꠣꠞꠦ ꠜꠣꠡꠣꠁꠀ ꠔꠥꠟꠦ,
ꠔꠣꠞꠣꠞ ꠛꠖ ꠇꠣꠝꠞ ꠡꠞꠝꠅ ꠅꠟꠣ ꠜꠣꠡꠤꠀ ꠃꠑꠦ।
ꠔꠣꠞꠣ ꠅꠁꠟꠣ,
ꠌꠣꠁꠞꠅꠛꠣꠄ ꠌꠇ꠆ꠇꠞ ꠖꠦꠅꠞꠣ ꠔꠦꠞꠣꠞ ꠟꠣꠈꠣꠘ, ꠁꠔꠣꠞ ꠢꠦꠡ ꠖꠡꠣ ꠅꠁꠟ ꠢꠞ-ꠢꠣꠝꠦꠡꠣꠇꠥꠞ ꠟꠣꠉꠤ ꠎꠝꠣ ꠞꠣꠈꠣ ꠉꠁꠘ ꠀꠘ꠆ꠖꠣꠁꠞ।
১৪ ꠛꠣꠛꠣ ꠀꠖꠝꠞ ꠈꠣꠘ꠆ꠖꠣꠘꠞ ꠡꠣꠔ ꠘꠝ꠆ꠛꠞ ꠎꠘ ꠢꠎꠞꠔ ꠁꠖ꠆ꠞꠤꠍꠦꠅ ꠅꠔꠣ ꠝꠣꠘꠡꠞ ꠛꠦꠙꠣꠞꠦ ꠇꠁꠀ ꠉꠦꠍꠂꠘ,
“ꠢꠥꠘꠅ,
ꠝꠣꠘꠡꠞ ꠛꠤꠌꠣꠞ ꠇꠞꠣꠞ ꠟꠣꠉꠤ,
ꠝꠣꠟꠤꠇ-ꠝꠃꠟꠣꠄ ꠔꠣꠘ ꠀꠎꠣꠞ ꠀꠎꠣꠞ ꠙꠛꠤꠔ꠆ꠞ ꠚꠤꠞꠤꠡ꠆ꠔꠣ ꠟꠁꠀ ꠀꠁꠞꠣ।
১৫ ꠎꠦꠔꠣꠄ ꠛꠦ-ꠖꠤꠘꠤ ꠇꠣꠝ ꠇꠞꠍꠂꠘ ꠀꠞ ꠔꠣꠘ ꠛꠤꠞꠥꠖ꠆ꠖꠦ ꠟꠣꠘ꠆ꠘꠔꠤ ꠝꠣꠔ ꠝꠣꠔꠤꠍꠂꠘ,
ꠅꠈꠘ ꠅꠃ ꠛꠦ-ꠖꠤꠘ ꠉꠥꠘꠣꠉꠣꠞ ꠅꠇꠟꠞ ꠙꠣꠅꠘꠣ ꠢꠤꠡꠣꠛꠦ ꠔꠣꠁꠘ ꠁꠔꠣꠞꠦ ꠙꠥꠞꠣꠙꠥꠞ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣꠔ ꠀꠁꠞꠣ।”
১৬ ꠁꠔꠣꠄ ꠔ ꠢꠣꠝꠦꠡꠣꠃ ꠘꠣ-ꠍꠛꠞꠤ ꠇꠞꠂꠘ,
ꠘꠤꠎꠞ ꠇꠙꠣꠟꠞꠦ ꠖꠥꠡꠁꠘ ꠀꠞ ꠔꠣꠞꠣꠞ ꠛꠖ ꠈꠣꠁꠡꠞ ꠛꠡꠦ ꠌꠟꠂꠘ।
ꠔꠣꠞꠣꠞ ꠢꠇꠟ ꠝꠣꠔꠅ ꠘꠤꠎꠞ ꠛꠠꠣꠁ-ꠛꠦꠐꠣꠉꠤꠞꠤ ꠖꠦꠈꠣꠁꠘ,
ꠡ꠆ꠛꠣꠞꠕ ꠢꠣꠍꠤꠟꠞ ꠟꠣꠉꠤ ꠝꠣꠘꠡꠞ ꠜꠎꠘꠣ ꠇꠞꠂꠘ।
ꠁꠝꠣꠘꠦ ꠛꠣꠌꠤꠀ ꠞꠅ
১৭ ꠅꠁꠟꠦ ꠅ ꠝꠣꠄꠀꠞ ꠖꠥꠡ꠆ꠔ ꠅꠇꠟ,
ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ,
ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠍꠣꠢꠣꠛꠤ ꠅꠇꠟꠦ ꠀꠉꠦ ꠎꠦꠔꠣ ꠛꠣꠔꠣꠁꠍꠂꠘ,
ꠁꠔꠣ ꠝꠘꠅ ꠞꠣꠈꠤꠅ।
১৮ ꠄꠞꠣ ꠔꠥꠝꠞꠣꠞꠦ ꠅꠃ ꠢꠥꠡꠤꠀꠞꠤ ꠖꠤꠔꠣ ꠘꠣ ꠘꠤ,
“ꠀꠈꠦꠞꠤ ꠎꠝꠣꠘꠣꠔ ꠙꠞꠦꠎꠉꠣꠞꠞꠦ ꠑꠣꠐ꠆ꠐꠣ-ꠝꠡꠇꠞꠣ ꠇꠞꠞꠣ ꠄꠇꠎꠣꠔ ꠝꠣꠘꠥꠡ ꠀꠁꠛꠣ,
ꠀꠁꠀ ꠔꠣꠞꠣꠞ ꠛꠦ-ꠖꠤꠘꠤ ꠛꠖ ꠈꠣꠁꠡ ꠝꠣꠚꠤꠇ ꠌꠟꠛꠣ।”
১৯ ꠖꠥꠘꠤꠀꠛꠤ ꠜꠣꠛꠞ ꠁꠔꠣ ꠝꠣꠘꠡꠦ ꠈꠣꠟꠤ ꠖꠟꠣꠖꠟꠤ ꠟꠣꠉꠣꠁꠘ,
ꠔꠣꠞꠣꠞ ꠜꠤꠔꠞꠦ ꠀꠟ꠆ꠟꠣꠁ ꠙꠣꠇ ꠞꠥꠢꠥ ꠘꠣꠁ।
২০ ꠔꠣ-ꠅ ꠝꠣꠄꠀꠞ ꠜꠣꠁꠀꠂꠘ,
ꠔꠥꠝꠞꠣꠞ ꠅꠃ ꠘꠤꠈꠥꠔ ꠙꠣꠇ-ꠙꠛꠤꠔ꠆ꠞ ꠁꠝꠣꠘꠞ ꠃꠙꠞꠦ ꠜꠞ ꠇꠞꠤꠀ ꠘꠤꠎꠞꠦ ꠉꠠꠤꠀ ꠔꠥꠟꠣꠔ ꠞꠅ,
ꠀꠞ ꠙꠣꠇ ꠞꠥꠢꠦ ꠇꠣꠝꠤꠟ ꠅꠁꠀ ꠝꠥꠘꠣꠎꠣꠔ ꠇꠞꠣꠔ ꠞꠅ।
২১ ꠀꠟ꠆ꠟꠣꠞ ꠝꠢꠛ꠆ꠛꠔꠞ ꠝꠣꠎꠦ ꠘꠤꠎꠞꠦ ꠛꠣꠘ꠆ꠖꠤꠀ ꠞꠣꠈꠅ,
ꠀꠞ ꠀꠈꠦꠞꠤ ꠎꠤꠘ꠆ꠖꠦꠉꠤ ꠙꠣꠁꠛꠣꠞ ꠀꠡꠣꠄ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠝꠦꠢꠦꠞꠛꠣꠘꠤꠞ ꠟꠣꠉꠤ ꠛꠣꠞ ꠌꠣꠅ।
২২ ꠔꠥꠝꠞꠣꠞ ꠝꠣꠎꠦ ꠎꠦꠞꠣꠞ ꠁꠝꠣꠘꠦ ꠟꠠꠣ-ꠌꠠꠣ ꠇꠞꠦ,
ꠔꠣꠞꠣꠞꠦ ꠖꠄꠀ ꠇꠞꠅ।
২৩ ꠀꠉꠥꠁꠘ ꠕꠣꠇꠤ ꠔꠥꠟꠤꠀ ꠀꠘꠤꠀ ꠝꠣꠘꠡꠞ ꠎꠣꠘ ꠛꠣꠌꠣꠅ।
ꠀꠞ ꠉꠥꠘꠣꠞ ꠛꠖ ꠈꠣꠁꠡꠞ ꠎꠣꠟꠣꠄ ꠎꠦꠔꠣꠞ ꠎꠤꠘ꠆ꠖꠦꠉꠤ ꠛꠞꠛꠣꠖ ꠅꠁꠉꠦꠍꠦ,
ꠁꠔꠣꠞ ꠚꠤꠘ꠆ꠘꠞ ꠘꠣꠙꠣꠇ ꠇꠣꠙꠠ ꠈꠣꠘꠞꠦꠅ ꠊꠤꠘ꠆ꠘꠣ ꠇꠞꠅ,
ꠀꠞ ꠘꠤꠎꠞꠦ ꠢꠦꠚꠣꠎꠔꠦ ꠞꠣꠈꠤꠀ ꠔꠣꠞꠣꠞꠦ ꠖꠄꠀ ꠇꠞꠅ।
ꠛꠤꠖꠣꠄꠁ ꠖꠥꠀ
২৪ ꠀꠞ ꠎꠦ ꠀꠟ꠆ꠟꠣꠄ ꠔꠥꠝꠞꠣꠞꠦ ꠃꠡ꠆ꠐꠣ ꠈꠣꠅꠀ ꠕꠣꠇꠤ ꠛꠣꠌꠣꠁꠘ,
ꠎꠦꠁꠘ ꠘꠤꠈꠥꠔ ꠢꠣꠟꠔꠦ ꠔꠥꠝꠞꠣꠞꠦ ꠈꠥꠡꠤ-ꠛꠣꠡꠤꠄ ꠔꠣꠘ ꠡꠣꠘ-ꠔꠎꠟ꠆ꠟꠤꠞ ꠍꠣꠝꠘꠦ ꠀꠎꠤꠞ ꠇꠞꠔꠣ ꠙꠣꠞꠂꠘ,
২৫ ꠢꠃ ꠄꠇꠝꠣꠔ꠆ꠞ ꠀꠟ꠆ꠟꠣ ꠎꠦꠁꠘ ꠀꠝꠞꠣꠞ ꠎꠣꠘ ꠛꠣꠌꠣꠁꠘ,
ꠔꠣꠘ ꠎꠣꠟꠣꠟ-ꠡꠣꠘ,
ꠝꠢꠤꠝꠣ,
ꠇꠥꠖꠞꠔꠤ ꠛꠟ-ꠡꠇ꠆ꠔꠤ ꠀꠞ ꠞꠣꠎ-ꠈꠦꠝꠔꠣ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠎꠣꠁꠞ ꠅꠃꠇ,
ꠢꠇ꠆ꠇꠟ ꠎꠥꠉꠞ ꠀꠉ ꠕꠣꠇꠤ ꠅꠈꠘ ꠙꠞ꠆ꠎꠘ꠆ꠔ ꠀꠞ ꠎꠥꠉꠦ ꠎꠥꠉꠦ ꠢꠞ-ꠢꠣꠝꠦꠡꠣꠃ ꠅꠟꠣ ꠅꠃꠇ।
ꠀꠝꠤꠘ॥