ꠀꠟ꠆ꠟꠣꠞ ꠙꠛꠤꠔ꠆ꠞ ꠔꠈ꠆ꠔꠞ ꠖꠞꠡꠘ (৪:১-৫:১৪)
ꠀꠟ꠆ꠟꠣꠞ ꠔꠈ꠆ꠔꠞ ꠍꠣꠝꠘꠦ ꠄꠛꠣꠖꠔ
৪
১ ꠄꠞꠛꠣꠖꠦ ꠀꠝꠤ ꠖꠞꠡꠘ ꠖꠦꠈꠟꠣꠝ,
ꠛꠦꠢꠦꠡ꠆ꠔꠞ ꠄꠇꠈꠣꠘ ꠖꠥꠀꠞ ꠈꠥꠟꠣ ꠀꠍꠦ।
ꠀꠞ ꠀꠝꠤ ꠔꠣꠘ ꠉꠟꠣꠞ ꠀꠅꠀꠎ ꠢꠥꠘꠟꠣꠝ,
ꠡꠤꠋꠉꠣꠞ ꠀꠅꠀꠎꠞ ꠟꠣꠈꠣꠘ ꠎꠦꠁꠘ ꠀꠉꠦ ꠝꠣꠔꠤꠍꠟꠣ,
ꠔꠣꠁꠘ ꠀꠝꠣꠞꠦ ꠒꠣꠇ ꠖꠤꠟꠣ,
ꠇꠁꠟꠣ,
“ꠔꠥꠝꠤ ꠅꠘꠅ ꠃꠑꠤꠀ ꠀꠅ।
ꠀꠝꠤ ꠅꠈꠘ ꠔꠥꠝꠣꠞꠦ ꠖꠦꠈꠣꠁꠝꠥ,
ꠄꠞꠛꠣꠖꠦ ꠇꠤꠔꠣ ꠇꠤꠔꠣ ꠘꠤꠌ꠆ꠌꠤꠔ ꠊꠐꠤꠛ।”
২ ꠒꠣꠇ ꠢꠥꠘꠣꠞ ꠟꠉꠦ ꠟꠉꠦꠃ ꠀꠝꠤ ꠙꠣꠇ ꠞꠥꠢꠦ ꠇꠣꠝꠤꠟ ꠅꠁꠟꠣꠝ,
ꠀꠞ ꠖꠦꠈꠟꠣꠝ,
ꠛꠦꠢꠦꠡ꠆ꠔꠞ ꠝꠣꠎꠦ ꠄꠇꠈꠣꠘ ꠔꠈ꠆ꠔ ꠀꠍꠦ,
ꠅꠃ ꠔꠈ꠆ꠔꠞ ꠃꠙꠞꠦ ꠄꠇꠎꠘ ꠛꠅꠀꠔ ꠀꠍꠂꠘ।
৩ ꠄꠘ ꠍꠥꠞꠔ ꠅꠁꠟ,
ꠖꠣꠝꠤ ꠢꠤꠞꠣ ꠀꠞ ꠟꠣꠟ ꠝꠘꠤꠞ ꠟꠣꠈꠣꠘ।
ꠁ ꠔꠈ꠆ꠔꠞ ꠌꠣꠁꠞꠅ ꠉꠣꠟꠣꠛꠣꠄ ꠀꠍꠤꠟ ꠞꠋꠗꠦꠘꠥ,
ꠁꠔꠣ ꠖꠦꠈꠔꠦ ꠄꠇ꠆ꠇꠦꠞꠦ ꠇꠌꠥꠀ ꠙꠣꠘ꠆ꠘꠣ ꠝꠘꠤꠞ ꠟꠣꠈꠣꠘ।
৪ ꠅꠃ ꠔꠈ꠆ꠔꠞ ꠌꠣꠁꠞꠅ ꠇꠣꠘ꠆ꠖꠣꠛꠣꠄ ꠀꠞꠅ ꠌꠛ꠆ꠛꠤꠡꠈꠣꠘ ꠔꠈ꠆ꠔ ꠀꠍꠤꠟ,
ꠢꠃ ꠔꠈ꠆ꠔꠅ ꠛꠅꠀꠔ ꠀꠍꠟꠣ ꠌꠛ꠆ꠛꠤꠡꠎꠘ ꠝꠥꠞꠛ꠆ꠛꠤ ꠘꠦꠔꠣ।
ꠄꠞꠣꠞ ꠟꠦꠛꠣꠍ ꠀꠍꠤꠟ ꠗꠟꠣ ꠌꠇꠌꠇꠣ ꠀꠞ ꠝꠣꠕꠣꠔ ꠀꠍꠤꠟ ꠡꠥꠘꠣꠞ ꠔꠣꠎ।
৫ ꠝꠣꠎꠈꠣꠘꠞ ꠔꠈ꠆ꠔ ꠕꠣꠇꠤ ꠝꠦꠊꠞ ꠎꠤꠟꠇꠣꠘꠤ,
ꠉꠥꠠ-ꠉꠥꠠꠤ ꠒꠣꠇ ꠀꠞ ꠛꠦꠎꠥꠁꠔꠣ ꠑꠣꠐꠣꠞꠤ ꠡꠛ꠆ꠖ ꠛꠣꠞꠅꠘꠤꠔ ꠀꠍꠤꠟ।
ꠄꠞ ꠍꠣꠝꠘꠦ ꠡꠣꠔꠐꠣ ꠝꠥꠡꠣꠟ ꠎꠣꠟꠣꠁꠟ ꠀꠍꠤꠟ,
ꠁ ꠝꠥꠡꠣꠟ ꠅꠁꠟ ꠀꠟ꠆ꠟꠣꠞ ꠡꠣꠔ ꠘꠝꠥꠘꠣꠞ ꠞꠥꠢꠥ।
৬ ꠔꠈ꠆ꠔꠞ ꠍꠣꠝꠘꠦ ꠚꠐꠤꠇꠞ ꠉꠟꠣꠡꠞ ꠟꠣꠈꠣꠘ ꠙꠞꠤꠡ꠆ꠇꠣꠞ ꠇꠣꠌꠞ ꠄꠇ ꠖꠞꠤꠀ ꠀꠍꠤꠟ।
ꠀꠞ ꠅꠃ ꠝꠣꠎꠞ ꠔꠈ꠆ꠔꠞ ꠌꠣꠁꠞꠅ ꠉꠣꠟꠣꠔ ꠌꠣꠁꠞꠎꠘ ꠎꠣꠘꠖꠣꠞ ꠀꠍꠤꠟ,
ꠄꠞꠣꠞ ꠍꠣꠝꠘꠦ-ꠙꠤꠍꠦ ꠖꠥꠁꠅꠛꠣꠄ ꠌꠃꠈ ꠅꠇꠟꠦ ꠜꠞꠣ।
৭ ꠙꠄꠟꠣ ꠎꠣꠘꠖꠣꠞꠐꠣ ꠖꠦꠈꠔꠦ ꠡꠤꠋꠢꠞ ꠟꠣꠈꠣꠘ,
ꠖꠥꠍꠞꠣꠐꠣ ꠛꠤꠍꠣꠟꠞ ꠟꠣꠈꠣꠘ,
ꠔꠤꠘ ꠘꠝ꠆ꠛꠞꠐꠣ ꠝꠣꠘꠡꠞ ꠟꠣꠈꠣꠘ ꠀꠞ ꠌꠣꠁꠞ ꠘꠝ꠆ꠛꠞꠐꠣ ꠃꠠꠣꠟ ꠖꠦꠅꠞꠣ ꠌꠤꠟꠞ ꠟꠣꠈꠣꠘ।
৮ ꠅꠃ ꠌꠣꠁꠞꠅ ꠎꠣꠘꠖꠣꠞꠞ ꠙꠞꠔꠦꠇꠞ ꠍꠄꠐꠣ ꠇꠞꠤ ꠒꠣꠈꠘꠣ ꠀꠍꠤꠟ,
ꠀꠞ ꠛꠣꠞꠦ-ꠜꠤꠔꠞꠦ ꠌꠣꠁꠞꠅꠛꠣꠄ ꠌꠃꠈ ꠀꠍꠤꠟ।
ꠔꠣꠞꠣ ꠖꠤꠘ-ꠞꠣꠁꠔ ꠢꠣꠝꠦꠡꠣ ꠅꠃ ꠎꠤꠇꠤꠞ ꠇꠞꠞꠣ,
“ꠇꠥꠖ꠆ꠖꠥꠍꠥꠘ,
ꠇꠥꠖ꠆ꠖꠥꠍꠥꠘ,
ꠇꠥꠖ꠆ꠖꠥꠍꠥꠘ,
ꠞꠣꠛ꠆ꠛꠥ ꠁꠟꠣꠢꠥꠟ ꠇꠣꠖꠤꠞ,
ꠇꠣꠘꠣ ꠅꠀ-ꠢꠥꠀ ꠇꠣꠁꠘꠥꠍ ꠍꠣꠁꠀꠔꠤꠘ,
ꠙꠛꠤꠔ꠆ꠞ,
ꠙꠛꠤꠔ꠆ꠞ,
ꠙꠛꠤꠔ꠆ꠞ ꠝꠣꠛꠥꠖ ꠀꠟ꠆ꠟꠣ ꠡꠞꠛ-ꠡꠇ꠆ꠔꠤꠝꠣꠘ।
ꠎꠦꠁꠘ ꠀꠍꠟꠣ,
ꠎꠦꠁꠘ ꠀꠍꠂꠘ,
ꠀꠞ ꠎꠦꠁꠘ ꠢꠞ-ꠢꠣꠝꠦꠡꠣ ꠞꠁꠛꠣ।”
৯ ꠎꠦꠁꠘ ꠌꠤꠞꠇꠣꠟꠤꠘ ꠎꠤꠘ꠆ꠖꠣ,
ꠎꠦꠁꠘ ꠔꠈ꠆ꠔꠅ ꠛꠅꠀꠔ ꠀꠍꠂꠘ,
ꠅꠃ ꠎꠣꠘꠖꠣꠞ ꠅꠇꠟꠦ ꠎꠦꠛꠟꠣꠃ ꠔꠣꠘ ꠔꠣꠞꠤꠚ,
ꠡꠝ꠆ꠝꠣꠘ ꠀꠞ ꠡꠥꠇꠞꠤꠀ ꠎꠣꠘꠣꠁꠘ,
১০ ꠅꠃ ꠡꠝꠄ ꠎꠦꠁꠘ ꠔꠈ꠆ꠔꠅ ꠛꠅꠀꠔ ꠀꠍꠂꠘ,
ꠎꠦꠁꠘ ꠌꠤꠞꠇꠣꠟꠤꠘ ꠎꠤꠘ꠆ꠖꠣ,
ꠄꠘ ꠍꠣꠝꠘꠦ ꠢꠃ ꠌꠛ꠆ꠛꠤꠡꠎꠘ ꠝꠥꠞꠛ꠆ꠛꠤ ꠘꠦꠔꠣ ꠘꠔ ꠅꠁꠀ ꠍꠁꠎꠖꠣ ꠇꠞꠂꠘ।
ꠁ ꠘꠦꠔꠣ ꠅꠇꠟꠦ ꠎꠣꠞꠎꠤꠞ ꠝꠣꠕꠣꠞ ꠔꠣꠎ ꠡꠤꠋꠢꠣꠡꠘꠞ ꠍꠣꠝꠘꠦ ꠈꠥꠟꠤꠀ ꠕꠁꠀ ꠇꠂꠘ,
১১ “ꠅ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣ,
ꠔꠥꠝꠤ ꠔ ꠁꠎ꠆ꠎꠔ,
ꠔꠣꠞꠤꠚ ꠀꠞ ꠇꠥꠖꠞꠔꠤ ꠈꠦꠝꠔꠣꠞ ꠎꠁꠉ꠆ꠉ।
ꠔꠥꠝꠤꠃ ꠔ ꠢꠇꠟꠔꠣ ꠙꠄꠖꠣ ꠇꠞꠍ,
ꠔꠥꠝꠣꠞ ꠝꠞ꠆ꠎꠤꠄ ꠢꠇꠟꠔꠣ ꠙꠄꠖꠣ ꠅꠁꠍꠦ ꠀꠞ ꠐꠤꠇꠤꠀ ꠀꠍꠦ।”