ꠉꠣꠁꠛꠤ ꠇꠤꠔꠣꠛ ꠀꠞ ꠝꠦꠠꠣꠞ ꠛꠣꠁꠌ꠆ꠌꠣ
৫
১ ꠅꠃ ꠔꠈ꠆ꠔꠞ ꠝꠣꠎꠦ ꠎꠦꠁꠘ ꠛꠅꠀꠔ ꠀꠍꠟꠣ,
ꠔꠣꠘ ꠒꠣꠁꠘꠞ ꠀꠔꠅ ꠀꠝꠤ ꠄꠇꠈꠣꠘ ꠇꠤꠔꠣꠛ ꠖꠦꠈꠟꠣꠝ।
ꠇꠤꠔꠣꠛꠞ ꠛꠣꠞꠦ-ꠜꠤꠔꠞꠦ ꠇꠥꠘ꠆ꠔꠣ ꠟꠦꠈꠣ ꠀꠍꠦ,
ꠁꠈꠣꠘ ꠡꠣꠔꠐꠣ ꠡꠤꠟ ꠖꠤꠀ ꠡꠤꠟ-ꠌꠣꠙ꠆ꠙꠠ ꠝꠣꠞꠣ।
২ ꠛꠣꠖꠦ ꠀꠝꠤ ꠖꠦꠈꠟꠣꠝ,
ꠈꠥꠛ ꠡꠇ꠆ꠔꠤꠀꠟꠣ ꠄꠇꠎꠘ ꠚꠤꠞꠤꠡ꠆ꠔꠣꠄ ꠎꠥꠞꠦ ꠎꠥꠞꠦ ꠇꠁꠞꠣ,
“ꠁꠟꠣ ꠎꠁꠉ꠆ꠉ ꠇꠦꠃ ꠀꠍꠂꠘ ꠘꠤ,
ꠎꠦꠁꠘ ꠅꠃ ꠡꠤꠟ-ꠌꠣꠙ꠆ꠙꠠ ꠜꠣꠋꠉꠤꠀ ꠇꠤꠔꠣꠛꠈꠣꠘ ꠈꠥꠟꠔꠣ ꠙꠣꠞꠛꠣ?”
৩ ꠅꠁꠟꠦ ꠀꠍꠝꠣꠘ-ꠎꠝꠤꠘ ꠛꠣ ꠙꠣꠔꠣꠟꠞ ꠝꠣꠎꠦ ꠁꠟꠣ ꠇꠦꠃ ꠝꠤꠟꠟ ꠘꠣ,
ꠎꠦꠁꠘ ꠁꠈꠣꠘ ꠈꠥꠟꠣ ꠛꠣ ꠄꠞ ꠜꠤꠔꠞ ꠖꠦꠈꠣꠞ ꠎꠁꠉ꠆ꠉ।
৪ ꠔꠦꠃ ꠀꠝꠤ ꠢꠣꠘ꠆ꠘꠣꠘꠞ ꠈꠥꠛ ꠇꠣꠘ꠆ꠖꠘ ꠀꠁꠟ,
ꠇꠣꠞꠘ ꠁ ꠇꠤꠔꠣꠛꠈꠣꠘ ꠈꠥꠟꠣꠞ ꠛꠣ ꠄꠞ ꠜꠤꠔꠞ ꠖꠦꠈꠣꠞ ꠎꠁꠉ꠆ꠉ ꠄꠇꠎꠘꠅ ꠙꠣꠅꠀ ꠉꠦꠟ ꠘꠣ।
৫ ꠛꠣꠖꠦ ꠢꠃ ꠝꠥꠞꠛ꠆ꠛꠤ ꠘꠦꠔꠣ ꠅꠇꠟꠞ ꠝꠣꠎꠞ ꠄꠇꠎꠘꠦ ꠀꠝꠣꠞꠦ ꠇꠁꠟꠣ,
“ꠅꠛꠣ,
ꠇꠣꠘ꠆ꠖꠤꠅ ꠘꠣ।
ꠢꠥꠘꠅ,
ꠎꠦꠁꠘ ꠄꠢꠥꠖꠣ ꠈꠣꠘ꠆ꠖꠣꠘꠞ ꠡꠤꠋꠢ,
ꠖꠣꠃꠖ ꠘꠛꠤꠞ ꠛꠋꠡꠗꠞ,
ꠔꠣꠁꠘ ꠎꠤꠔꠤꠍꠂꠘ।
ꠔꠣꠁꠘ ꠅꠃ ꠡꠣꠔꠅ ꠡꠤꠟ-ꠌꠣꠙ꠆ꠙꠠ ꠜꠣꠋꠉꠤꠀ ꠇꠤꠔꠣꠛꠈꠣꠘ ꠈꠥꠟꠔꠣ ꠙꠣꠞꠛꠣ।”
৬ ꠀꠝꠤ ꠀꠞꠅ ꠖꠦꠈꠟꠣꠝ,
ꠝꠥꠞꠛ꠆ꠛꠤ ꠘꠦꠔꠣ ꠅꠇꠟꠞ,
ꠌꠣꠁꠞꠅ ꠎꠣꠘꠖꠣꠞꠞ,
ꠀꠞ ꠅꠃ ꠔꠈ꠆ꠔꠞ ꠝꠣꠎꠈꠣꠘꠅ ꠄꠇ ꠝꠦꠠꠣꠞ ꠛꠣꠁꠌ꠆ꠌꠣ ꠃꠛꠣꠁ ꠞꠁꠍꠦ।
ꠖꠦꠈꠔꠦ ꠝꠘꠅ ꠅꠁꠟ,
ꠁ ꠛꠣꠁꠌ꠆ꠌꠣꠞꠦ ꠎꠛꠅ ꠇꠞꠣ ꠅꠁꠍꠦ।
ꠁ ꠝꠦꠠꠣ-ꠛꠣꠁꠌ꠆ꠌꠣꠞ ꠡꠣꠔꠐꠣ ꠢꠤꠋ ꠀꠞ ꠡꠣꠔꠐꠣ ꠌꠃꠈ।
ꠀꠟ꠆ꠟꠣꠞ ꠎꠦ ꠡꠣꠔ ꠘꠝꠥꠘꠣꠞ ꠞꠥꠢꠥꠞꠦ ꠖꠥꠘꠤꠀꠞ ꠝꠣꠎꠦ ꠙꠣꠑꠣꠁꠟ ꠅꠄ,
ꠅꠃ ꠡꠣꠔꠅ ꠌꠃꠈ ꠅꠁꠟ ꠢꠃ ꠡꠣꠔꠅ ꠞꠥꠢꠥ।
৭ ꠛꠣꠖꠦ ꠅꠃ ꠝꠦꠠꠣꠞ ꠛꠣꠁꠌ꠆ꠌꠣ ꠀꠁꠀ,
ꠔꠈ꠆ꠔꠅ ꠎꠦꠁꠘ ꠛꠅꠀꠔ ꠀꠍꠟꠣ,
ꠄꠘ ꠒꠣꠁꠘ ꠀꠔ ꠕꠣꠇꠤ ꠅꠃ ꠇꠤꠔꠣꠛꠈꠣꠘ ꠘꠤꠟꠣ।
৮ ꠇꠤꠔꠣꠛ ꠘꠦꠅꠀꠞ ꠛꠣꠖꠦ ꠢꠃ ꠌꠣꠁꠞꠅ ꠎꠣꠘꠖꠣꠞꠦ ꠀꠞ ꠌꠛ꠆ꠛꠤꠡꠎꠘ ꠝꠥꠞꠛ꠆ꠛꠤ ꠘꠦꠔꠣꠄ ꠅꠃ ꠝꠦꠠꠣꠞ ꠛꠣꠁꠌ꠆ꠌꠣꠞꠦ ꠍꠁꠎꠖꠣ ꠇꠞꠟꠣ।
ꠄꠞꠣ ꠙꠞꠔꠦꠇꠞ ꠀꠔꠅ ꠄꠉꠥ ꠇꠞꠤ ꠡꠣꠞꠤꠘ꠆ꠖꠣ,
ꠀꠞ ꠀꠉꠞ-ꠈꠥꠡꠛꠄꠄ ꠜꠞꠣ ꠄꠉꠥ ꠡꠥꠘꠣꠞ ꠛꠣꠐꠤ ꠀꠍꠤꠟ।
ꠁ ꠀꠉꠞ-ꠈꠥꠡꠛꠄ ꠅꠁꠟ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠖꠥꠀ-ꠝꠥꠘꠣꠎꠣꠔ।
৯ ꠀꠞ ꠔꠣꠞꠣ ꠘꠄꠀ ꠅꠃ ꠉꠎꠟ ꠉꠣꠁꠟꠣ,
“ꠈꠣꠟꠤ ꠔꠥꠝꠤꠃ ꠡꠑꠤꠇ ꠎꠘ ꠅꠃ ꠇꠤꠔꠣꠛꠈꠣꠘ ꠘꠤꠛꠣꠞ,
ꠘꠤꠀ ꠄꠞ ꠡꠤꠟ-ꠌꠣꠙ꠆ꠙꠠ ꠈꠥꠟꠛꠣꠞ।
ꠔꠥꠝꠣꠞꠦ ꠔ ꠇꠣꠔꠟ ꠇꠞꠣ ꠅꠁꠍꠤꠟ।
ꠔꠥꠝꠤ ꠔꠥꠝꠣꠞ ꠟꠃ ꠖꠤꠀ ꠢꠇ꠆ꠇꠟ ꠈꠣꠘ꠆ꠖꠣꠘ ꠕꠣꠇꠤ,
ꠀꠟ꠆ꠟꠣꠞ ꠟꠣꠉꠤ ꠝꠣꠘꠥꠡ ꠈꠞꠤꠖ ꠇꠞꠍ।
ꠢꠇ꠆ꠇꠟ ꠎꠣꠔꠞ ꠛꠥꠟꠤꠄ ꠝꠣꠔꠞꠣ ꠝꠣꠘꠥꠡ,
ꠢꠇꠟ ꠖꠦꠡ ꠀꠞ ꠎꠣꠔꠤ ꠕꠣꠇꠤꠅ ꠈꠣꠟꠣꠍ ꠇꠞꠍ।
১০ ꠄꠞꠣꠞꠦ ꠟꠁꠀ ꠔꠥꠝꠤ ꠄꠇ ꠛꠣꠖꠡꠣꠁ ꠇꠣꠁꠝ ꠇꠞꠍ,
ꠀꠝꠞꠣꠞ ꠀꠟ꠆ꠟꠣꠞ ꠄꠛꠣꠖꠔꠤꠞ ꠟꠣꠉꠤ ꠁꠝꠣꠝ ꠛꠣꠘꠣꠁꠍ,
ꠄꠞꠣꠃ ꠀꠡ꠆ꠔꠣ ꠎꠉꠔꠅ ꠛꠣꠖꠡꠣꠁ ꠇꠞꠛꠣ।”
১১ ꠛꠣꠖꠦ ꠀꠝꠤ ꠌꠣꠁꠟꠣꠝ,
ꠀꠞ ꠢꠃ ꠔꠈ꠆ꠔ,
ꠌꠣꠁꠞꠅ ꠎꠣꠘꠖꠣꠞ ꠀꠞ ꠝꠥꠞꠛ꠆ꠛꠤ ꠘꠦꠔꠣ ꠅꠇꠟꠞ ꠌꠣꠁꠞꠅꠛꠣꠄ ꠛꠃꠔ ꠚꠤꠞꠤꠡ꠆ꠔꠣ ꠅꠇꠟꠞ ꠀꠅꠀꠎ ꠢꠥꠘꠟꠣꠝ।
ꠁꠘꠅ ꠢꠣꠎꠣꠞꠦ ꠢꠣꠎꠣꠞ,
ꠇꠥꠐꠤ ꠇꠥꠐꠤ ꠚꠤꠞꠤꠡ꠆ꠔꠣ ꠀꠍꠟꠣ।
১২ ꠄꠞꠣ ꠎꠥꠞꠦ ꠎꠥꠞꠦ ꠅꠃ ꠉꠎꠟ ꠇꠁꠟꠣ,
“ꠎꠦ ꠝꠦꠠꠣ-ꠛꠣꠁꠌ꠆ꠌꠣꠞꠦ ꠎꠛꠅ ꠇꠞꠣ ꠅꠁꠍꠤꠟ,
ꠄꠁꠘꠃ ꠈꠦꠝꠔꠣ,
ꠗꠘ-ꠖꠃꠟꠔ,
ꠀꠈꠟ,
ꠛꠟ-ꠡꠇ꠆ꠔꠤ,
ꠁꠎ꠆ꠎꠔ,
ꠉꠃꠞꠛ ꠀꠞ ꠔꠣꠞꠤꠚ ꠙꠣꠅꠀꠞ ꠎꠁꠉ꠆ꠉ।”
১৩ ꠄꠞꠛꠣꠖꠦ ꠀꠝꠤ ꠢꠥꠘꠟꠣꠝ,
ꠀꠍꠝꠣꠘꠅ,
ꠎꠝꠤꠘꠅ,
ꠙꠣꠔꠣꠟꠅ ꠀꠞ ꠖꠞꠤꠀꠞ ꠝꠣꠎꠦ ꠎꠔ ꠎꠣꠘꠖꠣꠞ ꠀꠍꠦ,
ꠛꠣ ꠁꠔꠣꠞ ꠜꠤꠔꠞꠦ ꠀꠞꠅ ꠎꠔꠔꠣ ꠀꠍꠦ,
ꠄꠞꠣ ꠢꠇ꠆ꠇꠟꠦ ꠅꠈꠣꠘ ꠇꠁꠞꠣ,
“ꠔꠈ꠆ꠔꠞ ꠝꠣꠎꠦ ꠎꠦꠁꠘ ꠛꠅꠀꠔ ꠀꠍꠂꠘ,
ꠔꠣꠁꠘ ꠀꠞ ꠅꠃ ꠝꠦꠠꠣ-ꠛꠣꠁꠌ꠆ꠌꠣꠞ,
ꠔꠣꠞꠤꠚ,
ꠁꠎ꠆ꠎꠔ,
ꠉꠃꠞꠛ ꠀꠞ ꠈꠦꠝꠔꠣ ꠢꠞ-ꠢꠣꠝꠦꠡꠣ ꠎꠣꠞꠤ ꠞꠃꠇ।”
১৪ ꠔꠦꠃ ꠢꠃ ꠌꠣꠁꠞꠅ ꠎꠣꠘꠖꠣꠞꠦ ꠇꠁꠟꠣ,
“ꠀꠝꠤꠘ।”
ꠀꠞ ꠢꠃ ꠝꠥꠞꠛ꠆ꠛꠤ ꠘꠦꠔꠣ ꠅꠇꠟ ꠘꠔ ꠅꠁꠀ ꠍꠁꠎꠖꠣ ꠇꠞꠟꠣ।