৯
১ ꠛꠣꠖꠦ ꠙꠣꠌ ꠘꠝ꠆ꠛꠞ ꠚꠤꠞꠤꠡ꠆ꠔꠣꠄ ꠡꠤꠋꠉꠣ ꠚꠥꠇꠤꠟꠣ,
ꠔꠦꠃ ꠀꠝꠤ ꠖꠦꠈꠟꠣꠝ,
ꠀꠍꠝꠣꠘꠞ ꠄꠇꠐꠣ ꠔꠦꠞꠣ ꠛꠦꠢꠦꠡ꠆ꠔ ꠕꠣꠇꠤ ꠖꠥꠘꠤꠀꠔ ꠙꠠꠟ।
ꠅꠃ ꠔꠦꠞꠣꠞꠦ ꠢꠣꠛꠤꠀ ꠖꠥꠎꠈꠞ ꠌꠣꠛꠤ ꠖꠦꠅꠀ ꠅꠁꠟ।
২ ꠔꠦꠃ ꠢꠦ ꠢꠣꠛꠤꠀ ꠖꠥꠎꠈꠞ ꠖꠥꠀꠞ ꠈꠥꠟꠟ,
ꠛꠃꠔ ꠛꠠ ꠒꠝꠇꠣ ꠕꠣꠇꠤ ꠎꠦꠟꠣ ꠗꠥꠝꠣ ꠛꠣꠞꠅꠄ,
ꠁ ꠖꠥꠎꠈ ꠕꠣꠇꠤ ꠅꠟꠣ ꠗꠥꠝꠣ ꠛꠣꠞꠅꠁꠟ।
ꠅꠃ ꠖꠥꠎꠈꠤ ꠗꠥꠝꠣꠄ ꠀꠍꠝꠣꠘ ꠀꠞ ꠡꠥꠞꠥꠎ ꠀꠘ꠆ꠖꠣꠁꠞ ꠅꠁꠉꠦꠟ।
৩ ꠢꠃ ꠗꠥꠝꠣ ꠕꠣꠇꠤ ꠛꠃꠔ ꠙꠋꠉꠙꠣꠟ ꠛꠣꠞꠅꠁꠀ ꠖꠥꠘꠤꠀꠔ ꠀꠁꠟꠣ।
ꠁꠔꠣꠞꠦ ꠖꠥꠘꠤꠀꠞ ꠇꠣꠇꠠꠣ-ꠛꠤꠍꠣꠞ ꠟꠣꠈꠣꠘ ꠈꠦꠝꠔꠣ ꠖꠦꠅꠀ ꠅꠁꠟ।
৪ ꠔꠣꠞꠣꠞꠦ ꠢꠥꠇꠥꠝ ꠖꠦꠅꠀ ꠅꠁꠟ,
ꠔꠣꠞꠣ ꠎꠣꠘꠥ ꠖꠥꠘꠤꠀꠞ ꠇꠥꠘꠥ ꠊꠣꠡ-ꠙꠣꠔꠣ,
ꠉꠣꠍ-ꠙꠣꠟꠣ ꠛꠣ ꠢꠣꠉ-ꠔꠞꠇꠣꠞꠤꠞ ꠈꠦꠔꠤ ꠘꠣ ꠇꠞꠦ।
ꠈꠣꠟꠤ ꠎꠦꠔꠣ ꠝꠣꠘꠡꠞ ꠇꠙꠣꠟꠅ ꠀꠟ꠆ꠟꠣꠞ ꠡꠤꠟ-ꠌꠣꠙ꠆ꠙꠠ ꠝꠣꠞꠣ ꠘꠣꠁ,
ꠅꠔꠣꠞ ꠈꠦꠔꠤ ꠇꠞꠂꠘ।
৫ ꠁꠔꠣ ꠝꠣꠘꠡꠞꠦ ꠎꠣꠘꠦ ꠝꠣꠞꠣꠞ ꠇꠥꠘꠥ ꠈꠦꠝꠔꠣ ꠔꠣꠞꠣꠞꠦ ꠖꠦꠅꠀ ꠅꠁꠟ ꠘꠣ,
ꠅꠁꠟꠦ ꠙꠣꠌ ꠝꠣꠡ ꠙꠞ꠆ꠎꠘ꠆ꠔ ꠎꠣꠟꠣ-ꠎꠘꠔ꠆ꠞꠘꠣ ꠖꠤꠛꠣꠞ ꠈꠦꠝꠔꠣ ꠖꠦꠅꠀ ꠅꠁꠟ।
ꠇꠣꠇꠠꠣ-ꠛꠤꠍꠣꠄ ꠇꠥꠘꠥ ꠝꠣꠘꠡꠞꠦ ꠇꠣꠝꠠ ꠖꠤꠟꠦ ꠎꠦꠟꠣ ꠛꠤꠡ-ꠛꠦꠖꠘꠣ ꠅꠄ,
ꠅꠃ ꠙꠋꠉꠙꠣꠟꠦ ꠇꠣꠝꠠꠣꠁꠟꠦꠅ ꠅꠟꠣ ꠅꠁꠛ।
৬ ꠢꠃ ꠡꠝꠄ ꠝꠣꠘꠡꠦ ꠝꠃꠔ ꠝꠣꠋꠉꠤꠛꠣ,
ꠔꠣ-ꠅ ꠝꠃꠔ ꠅꠁꠔ ꠘꠣꠄ।
ꠔꠣꠞꠣ ꠝꠞꠔꠣ ꠌꠣꠁꠛꠣ ꠅꠁꠟꠦ ꠝꠞꠘ ꠔꠣꠞꠣꠞ ꠉꠦꠍ ꠕꠣꠇꠤ ꠜꠣꠉꠤꠛ।
৭ ꠁ ꠙꠋꠉꠙꠣꠟ ꠅꠇꠟ ꠖꠦꠈꠔꠦ ꠎꠥꠖ꠆ꠖꠞ ꠟꠣꠉꠤ ꠎꠥꠁꠔ ꠇꠞꠣ ꠊꠥꠠꠣꠞ ꠟꠣꠈꠣꠘ।
ꠔꠣꠞꠣꠞ ꠝꠣꠕꠣꠔ ꠡꠥꠘꠣꠞ ꠔꠣꠎꠞ ꠟꠣꠈꠣꠘ ꠌꠤꠎ ꠀꠍꠤꠟ,
ꠀꠞ ꠝꠥꠈꠞ ꠉꠑꠘ ꠅꠁꠟ ꠝꠣꠘꠡꠞ ꠟꠣꠈꠣꠘ।
৮ ꠔꠣꠞꠣꠞ ꠌꠥꠟ ꠅꠁꠟ ꠛꠦꠐꠤꠘ꠆ꠔꠞ ꠌꠥꠟꠞ ꠟꠣꠈꠣꠘ ꠀꠞ ꠖꠣꠔ ꠅꠁꠟ ꠡꠤꠋꠢꠞ ꠖꠣꠔꠞ ꠟꠣꠈꠣꠘ।
৯ ꠔꠣꠞꠣꠞ ꠛꠥꠇꠥꠞ ꠝꠣꠎꠦ ꠀꠍꠤꠟ ꠟꠥꠀꠞ ꠙꠣꠔꠞ ꠟꠣꠈꠣꠘ ꠈꠡꠈꠡꠣ ꠍꠣꠟ।
ꠎꠥꠖ꠆ꠖꠞ ꠊꠥꠠꠣꠞ ꠉꠣꠠꠤ ꠐꠣꠘꠤꠀ ꠊꠥꠠꠣꠞ ꠙꠣꠟ ꠄꠇꠟꠉꠦ ꠉꠦꠟꠦ ꠎꠦꠟꠣ ꠀꠅꠀꠎ ꠅꠄ,
ꠔꠣꠞꠣꠞ ꠒꠣꠈꠘꠣꠞ ꠀꠅꠀꠎꠅ ꠀꠍꠤꠟ ꠅꠃ ꠟꠣꠈꠣꠘ।
১০ ꠔꠣꠞꠣꠞ ꠟꠦꠁꠘ꠆ꠎ ꠀꠞ ꠟꠦꠁꠘ꠆ꠎꠞ ꠝꠥꠈꠞ ꠛꠤꠡ-ꠖꠣꠔ ꠀꠍꠤꠟ ꠇꠣꠇꠠꠣ-ꠛꠤꠍꠣꠞ ꠟꠣꠈꠣꠘ।
ꠙꠣꠌ ꠝꠣꠡ ꠗꠞꠤ ꠝꠣꠘꠡꠞꠦ ꠇꠡ꠆ꠐ ꠖꠤꠛꠣꠞ ꠈꠦꠝꠔꠣ ꠁ ꠟꠦꠁꠘ꠆ꠎꠅ ꠀꠍꠦ।
১১ ꠢꠣꠛꠤꠀ ꠖꠥꠎꠈꠞ ꠚꠤꠞꠤꠡ꠆ꠔꠣ ꠀꠍꠟꠣ ꠅꠃ ꠙꠋꠉꠙꠣꠟꠞ ꠞꠣꠎꠣ।
ꠁꠛꠞꠣꠘꠤ ꠜꠣꠡꠣꠄ ꠁ ꠚꠤꠞꠤꠡ꠆ꠔꠣꠞ ꠘꠣꠝ ꠅꠁꠟ ꠀꠛꠣꠖ꠆ꠖꠘ,
ꠀꠞ ꠁꠃꠘꠣꠘꠤ ꠛꠣ ꠉ꠆ꠞꠤꠇ ꠜꠣꠡꠣꠄ ꠄꠞ ꠘꠣꠝ ꠅꠁꠟ ꠀꠙꠟ꠆ꠟꠤꠅꠘ,
ꠝꠣꠘꠤ ꠉꠎꠛꠤ ꠚꠤꠞꠤꠡ꠆ꠔꠣ।
১২ ꠙꠄꠟꠣ ꠉꠎꠛ ꠢꠞꠟ,
ꠅꠁꠟꠦ ꠢꠥꠘꠅ,
ꠀꠞꠅ ꠖꠥꠁꠐꠣ ꠉꠎꠛ ꠀꠁꠀ ꠀꠎꠦꠞ।
১৩ ꠛꠣꠖꠦ ꠍꠄ ꠘꠝ꠆ꠛꠞ ꠚꠤꠞꠤꠡ꠆ꠔꠣꠄ ꠔꠣꠘ ꠡꠤꠋꠉꠣ ꠚꠥꠇꠤꠟꠣ।
ꠔꠦꠃ ꠀꠟ꠆ꠟꠣꠞ ꠍꠣꠝꠘꠞ ꠀꠉꠞ ꠎꠣꠟꠣꠘꠤꠞ ꠡꠥꠘꠣꠞ ꠐꠦꠛꠥꠟꠞ ꠌꠣꠁꠞꠐꠣ ꠢꠤꠋꠉꠞ ꠉꠦꠍ ꠕꠣꠇꠤ ꠀꠝꠤ ꠄꠇꠎꠘꠞꠦ ꠅꠈꠣꠘ ꠇꠁꠔꠦ ꠢꠥꠘꠟꠣꠝ,
১৪ ꠄꠁꠘ ꠢꠃ ꠡꠤꠋꠉꠣ ꠀꠟꠣ ꠍꠄ ꠘꠝ꠆ꠛꠞ ꠚꠤꠞꠤꠡ꠆ꠔꠣꠞꠦ ꠇꠁꠟꠣ,
“ꠝꠢꠣ ꠉꠣꠋ ꠚꠥꠞꠣꠔꠞ ꠝꠣꠎꠦ ꠎꠦ ꠌꠣꠁꠞꠎꠘ ꠚꠤꠞꠤꠡ꠆ꠔꠣ ꠀꠐꠇ ꠀꠍꠂꠘ,
ꠔꠣꠞꠣꠞꠦ ꠈꠥꠟꠤꠀ ꠖꠦꠅ।”
১৫ ꠄꠞꠟꠣꠉꠤ ꠢꠃ ꠌꠣꠁꠞꠅ ꠚꠤꠞꠤꠡ꠆ꠔꠣꠞꠦ ꠍꠣꠠꠤ ꠖꠦꠅꠀ ꠅꠁꠟ।
ꠖꠥꠘꠤꠀꠞ ꠔꠤꠘ ꠛꠣꠐꠞ ꠄꠇ ꠛꠣꠐ ꠝꠣꠘꠡꠞꠦ ꠝꠣꠞꠣꠞ ꠟꠣꠉꠤ ꠅꠃ ꠚꠤꠞꠤꠡ꠆ꠔꠣ ꠅꠇꠟꠞꠦ ꠡꠑꠤꠇ ꠡꠝꠄ,
ꠡꠑꠤꠇ ꠖꠤꠘ,
ꠝꠣꠡ ꠀꠞ ꠛꠍꠞꠞ ꠟꠣꠉꠤ ꠎꠥꠁꠔ ꠇꠞꠤ ꠞꠣꠈꠣ ꠅꠁꠍꠤꠟ।
১৬ ꠛꠣꠖꠦ ꠀꠝꠤ ꠢꠥꠘꠟꠣꠝ,
ꠊꠥꠠꠣꠔ ꠌꠠꠤꠀ ꠎꠣꠅꠀ ꠅꠃ ꠍꠤꠙꠣꠁꠞ ꠙꠞꠤꠝꠣꠘ ꠀꠍꠤꠟ ꠛꠤꠡ ꠇꠥꠐꠤ।
১৭ ꠅꠃ ꠖꠞꠡꠘꠅ ꠀꠝꠤ ꠎꠔ ꠊꠥꠠꠣꠁꠘ ꠀꠞ ꠊꠥꠠ-ꠍꠅꠀꠞ ꠅꠇꠟ ꠖꠦꠈꠟꠣꠝ,
ꠁ ꠍꠅꠀꠞꠞꠦ ꠖꠦꠈꠔꠦ ꠅꠟꠣ ꠟꠣꠉꠟ,
ꠄꠞꠣꠞ ꠛꠥꠇꠥꠞ ꠃꠙꠞꠞ ꠚꠃꠎꠤ ꠟꠦꠛꠣꠍ ꠀꠉꠥꠘꠤꠞ ꠟꠣꠈꠣꠘ ꠟꠣꠟ,
ꠀꠇꠣꠡꠞ ꠟꠣꠈꠣꠘ ꠟꠤꠟ ꠀꠞ ꠉꠘ꠆ꠖꠇꠞ ꠟꠣꠈꠣꠘ ꠅꠟꠖꠤꠀ।
ꠊꠥꠠꠣꠁꠘ꠆ꠔꠞ ꠇꠟ꠆ꠟꠣ ꠀꠍꠤꠟ ꠡꠤꠋꠢꠞ ꠇꠟ꠆ꠟꠣꠞ ꠟꠣꠈꠣꠘ,
ꠁꠔꠣꠞ ꠝꠥꠈꠅ ꠕꠣꠇꠤ ꠀꠉꠥꠁꠘ,
ꠗꠥꠝꠣ ꠀꠞ ꠉꠘ꠆ꠖꠇ ꠛꠣꠞꠅꠞ।
১৮ ꠄꠞꠣꠞ ꠝꠥꠈꠞ ꠅꠃ ꠀꠉꠥꠁꠘ,
ꠗꠥꠝꠣ ꠀꠞ ꠉꠘ꠆ꠖꠇꠞ ꠉꠎꠛꠖꠤ ꠔꠤꠘ ꠛꠣꠐꠞ ꠄꠇ ꠛꠣꠐ ꠝꠣꠘꠥꠡ ꠝꠣꠞꠣ ꠅꠁꠟ।
১৯ ꠁ ꠊꠥꠠꠣꠁꠘ꠆ꠔꠞ ꠟꠦꠁꠘ꠆ꠎ ꠀꠞ ꠝꠥꠈꠞ ꠝꠣꠎꠦꠃ ꠀꠍꠤꠟ ꠔꠣꠞꠣꠞ ꠛꠟ,
ꠁ ꠟꠦꠁꠘ꠆ꠎ ꠀꠍꠤꠟ ꠖꠥ-ꠝꠥꠈꠤ ꠢꠣꠚꠞ ꠟꠣꠈꠣꠘ।
ꠅꠃ ꠟꠦꠁꠘ꠆ꠎꠖꠤ ꠔꠣꠞꠣ ꠝꠣꠘꠡꠞ ꠈꠦꠔꠤ ꠇꠞꠦ।
২০ ꠅꠁꠟꠦ ꠅꠃ ꠉꠎꠛꠞ ꠛꠣꠖꠦꠅ ꠎꠦꠔꠣ ꠝꠣꠘꠥꠡ ꠎꠤꠔꠣ ꠞꠁꠟꠣ,
ꠔꠣꠞꠣ ꠘꠤꠎꠞ ꠀꠔꠞ ꠛꠣꠘꠣꠁꠟ ꠝꠥꠞ꠆ꠔꠤꠙꠥꠎꠣ ꠕꠣꠇꠤ ꠔꠃꠛꠣ ꠇꠞꠟ ꠘꠣ।
ꠔꠣꠞꠣ ꠘꠣꠘꠣꠘ ꠘꠝꠥꠘꠣꠞ ꠜꠥꠔꠞ ꠙꠥꠎꠣ,
ꠀꠞ ꠎꠦꠔꠣꠄ ꠖꠦꠈꠂꠘ ꠘꠣ,
ꠢꠥꠘꠂꠘ ꠘꠣ ꠛꠣ ꠀꠐꠣ-ꠌꠟꠣ ꠇꠞꠔꠣ ꠙꠣꠞꠂꠘ ꠘꠣ ꠅꠔꠣ ꠝꠥꠞ꠆ꠔꠤꠞ ꠙꠥꠎꠣ ꠇꠞꠣꠔ ꠞꠁꠟꠣ।
ꠡꠥꠘꠣ,
ꠞꠥꠙꠣ,
ꠙꠤꠔꠟ,
ꠙꠣꠔ꠆ꠔꠞ ꠀꠞ ꠟꠣꠇꠠꠤꠖꠤ ꠛꠣꠘꠣꠁꠟ ꠝꠥꠞ꠆ꠔꠤꠙꠥꠎꠣꠔ ꠞꠁꠟꠣ।
২১ ꠄꠞꠟꠉꠦ ꠈꠥꠘ-ꠈꠣꠞꠣꠙꠤ,
ꠎꠣꠖꠥ-ꠐꠥꠘꠣ,
ꠎꠤꠘꠣ ꠀꠞ ꠌꠥꠞꠤ ꠕꠣꠇꠤꠅ ꠔꠃꠛꠣ ꠇꠞꠟ ꠘꠣ।