ꠚꠤꠞꠤꠡ꠆ꠔꠣ ꠀꠞ ꠢꠥꠞꠥ-ꠝꠥꠞꠥ ꠇꠤꠔꠣꠛ
১০
১ ꠛꠣꠖꠦ ꠀꠝꠤ ꠖꠦꠈꠟꠣꠝ,
ꠛꠦꠢꠦꠡ꠆ꠔ ꠕꠣꠇꠤ ꠈꠥꠛ ꠡꠇ꠆ꠔꠤꠀꠟꠣ ꠀꠞꠇ ꠎꠘ ꠚꠤꠞꠤꠡ꠆ꠔꠣ ꠟꠣꠝꠤꠀ ꠀꠁꠞꠣ।
ꠝꠦꠊꠞ ꠌꠣꠇꠣ ꠀꠍꠤꠟ ꠔꠣꠘ ꠟꠦꠛꠣꠍ,
ꠔꠣꠘ ꠝꠥꠈ ꠡꠥꠞꠥꠎꠞ ꠟꠣꠈꠣꠘ ꠌꠇꠌꠇꠣ,
ꠔꠣꠘ ꠙꠣꠅ ꠀꠍꠤꠟ ꠀꠉꠥꠘꠤꠞ ꠈꠥꠐꠤꠞ ꠟꠣꠈꠣꠘ।
ꠔꠣꠘ ꠝꠣꠕꠣꠞ ꠃꠙꠞꠦ ꠀꠍꠤꠟ ꠞꠋꠗꠦꠘꠥ।
২ ꠔꠣꠘ ꠀꠔꠅ ꠢꠥꠞꠥ-ꠝꠥꠞꠥ ꠄꠇꠈꠣꠘ ꠇꠤꠔꠣꠛ ꠈꠥꠟꠣ ꠀꠍꠤꠟ।
ꠔꠣꠘ ꠒꠣꠁꠘꠞ ꠙꠣꠅ ꠖꠞꠤꠀꠔ ꠀꠞ ꠛꠣꠃꠅꠞ ꠙꠣꠅ ꠎꠝꠤꠘꠞ ꠃꠙꠞꠦ ꠕꠁꠀ,
৩ ꠡꠤꠋꠢꠞ ꠟꠣꠈꠣꠘ ꠈꠥꠛ ꠎꠥꠞꠦ ꠉꠞ꠆ꠎꠤꠀ ꠃꠑꠤꠟꠣ।
ꠅꠃ ꠉꠞ꠆ꠎꠘꠞ ꠟꠉꠦ ꠟꠉꠦꠃ ꠑꠣꠐꠣ ꠙꠠꠣꠞ ꠝꠔ ꠡꠣꠔꠐꠣ ꠀꠅꠀꠎ ꠅꠁꠟ।
৪ ꠅꠃ ꠡꠣꠔꠅ ꠀꠅꠀꠎ ꠢꠥꠘꠤꠀ ꠀꠝꠤ ꠟꠦꠈꠣꠔ ꠟꠣꠉꠟꠣꠝ;
ꠄꠞꠝꠣꠎꠦ ꠛꠦꠢꠦꠡ꠆ꠔ ꠕꠣꠇꠤ ꠅꠃ ꠡꠛ꠆ꠖ ꠀꠁꠟ,
“ꠢꠥꠘꠅ,
ꠅꠃ ꠡꠣꠔꠅ ꠑꠣꠐꠣꠞꠤ ꠀꠅꠀꠎꠦ ꠎꠦꠔꠣ ꠇꠁꠍꠂꠘ,
ꠁꠔꠣ ꠛꠣꠔꠥꠘꠤ ꠞꠣꠈꠅ,
ꠟꠦꠈꠤꠅ ꠘꠣ।”
৫ ꠛꠣꠖꠦ ꠢꠃ ꠚꠤꠞꠤꠡ꠆ꠔꠣ,
ꠎꠦꠘꠞꠦ ꠀꠝꠤ ꠖꠞꠤꠀ ꠀꠞ ꠎꠝꠤꠘꠞ ꠃꠙꠞꠦ ꠃꠛꠣꠔ ꠖꠦꠈꠍꠟꠣꠝ,
ꠔꠣꠁꠘ ꠛꠦꠢꠦꠡ꠆ꠔꠞ ꠛꠣꠄ ꠘꠤꠎꠞ ꠒꠣꠁꠘ ꠀꠔ ꠔꠥꠟꠟꠣ।
৬ ꠔꠥꠟꠤꠀ ꠎꠦꠁꠘ ꠢꠞ-ꠢꠣꠝꠦꠡꠣ ꠌꠤꠞꠇꠣꠟ ꠎꠤꠘ꠆ꠖꠣ ꠀꠍꠂꠘ,
ꠎꠦꠁꠘ ꠀꠍꠝꠣꠘ,
ꠎꠝꠤꠘ,
ꠖꠞꠤꠀ ꠀꠞ ꠁꠔꠣꠞ ꠝꠣꠎꠞ ꠢꠇ꠆ꠇꠟꠔꠣ ꠙꠄꠖꠣ ꠇꠞꠍꠂꠘ,
ꠔꠣꠘ ꠘꠣꠝꠦ ꠇꠍꠝ ꠈꠣꠁꠀ ꠇꠁꠟꠣ,
“ꠀꠞ ꠔ ꠖꠦꠞꠤ ꠅꠁꠔ ꠘꠣꠄ।
৭ ꠅꠁꠟꠦ ꠡꠣꠔ ꠘꠝ꠆ꠛꠞ ꠚꠤꠞꠤꠡ꠆ꠔꠣꠄ ꠡꠤꠋꠉꠣ ꠚꠥꠇꠤꠛꠣꠞ ꠖꠤꠘ ꠀꠟ꠆ꠟꠣꠞ ꠛꠣꠔꠥꠘꠤ ꠟꠤꠟꠣ-ꠈꠦꠟꠣ ꠙꠥꠞꠣ ꠅꠁꠛ।
ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠉꠥꠟꠣꠝ,
ꠘꠛꠤ ꠅꠇꠟꠞ ꠉꠦꠍꠦ ꠎꠦꠟꠣ ꠛꠣꠔꠣꠁꠍꠟꠣ,
ꠅꠃꠟꠣꠃ ꠚꠟꠤꠛ।”
৮ ꠛꠦꠢꠦꠡ꠆ꠔ ꠕꠣꠇꠤ ꠀꠉꠦ ꠎꠦ ꠡꠛ꠆ꠖ ꠢꠥꠘꠍꠤꠟꠣꠝ,
ꠄꠁꠘ ꠢꠤꠞꠛꠣꠞ ꠀꠝꠣꠞꠦ ꠇꠁꠟꠣ,
“ꠢꠥꠘꠅ,
ꠖꠞꠤꠀ ꠀꠞ ꠎꠝꠤꠘꠞ ꠃꠙꠞꠦ ꠎꠦ ꠚꠤꠞꠤꠡ꠆ꠔꠣ ꠃꠛꠣꠔ ꠀꠍꠂꠘ,
ꠔꠣꠘ ꠉꠦꠍꠦ ꠎꠣꠅ,
ꠉꠤꠀ ꠔꠣꠘ ꠀꠔ ꠕꠣꠇꠤ ꠈꠥꠟꠣ ꠇꠤꠔꠣꠛꠈꠣꠘ ꠘꠦꠅ।”
৯ ꠔꠦꠃ ꠀꠝꠤ ꠄꠘ ꠉꠦꠍꠦ ꠉꠤꠀ ꠇꠁꠟꠣꠝ,
ꠅꠃ ꠢꠥꠞꠥ-ꠝꠥꠞꠥ ꠇꠤꠔꠣꠛꠈꠣꠘ ꠀꠝꠣꠞ ꠀꠔꠅ ꠖꠦꠅꠀꠞ ꠟꠣꠉꠤ।
ꠔꠣꠁꠘ ꠇꠁꠟꠣ,
“ꠀꠁꠌ꠆ꠍꠣ ꠘꠦꠅꠉꠤ,
ꠘꠤꠀ ꠈꠣꠁꠟꠣꠅ।
ꠁꠈꠣꠘꠦ ꠔꠥꠝꠣꠞ ꠙꠦꠐꠞꠦ ꠔꠤꠔ꠆ꠔꠣ ꠇꠞꠤꠟꠤꠛ,
ꠅꠁꠟꠦ ꠔꠥꠝꠣꠞ ꠝꠥꠈꠅ ꠝꠃ ꠟꠣꠈꠣꠘ ꠝꠤꠑꠣ ꠟꠣꠉꠛ।”
১০ ꠅꠃ ꠀꠝꠤ ꠢꠤ ꠚꠤꠞꠤꠡ꠆ꠔꠣꠞ ꠀꠔꠞ ꠢꠥꠞꠥ-ꠝꠥꠞꠥ ꠇꠤꠔꠣꠛꠈꠣꠘ ꠘꠤꠀ ꠈꠣꠁꠟꠤꠟꠣꠝ।
ꠈꠣꠁꠔꠦ ꠡꠝꠄ ꠢꠣꠍꠣꠃ ꠀꠝꠣꠞ ꠝꠥꠈꠅ ꠝꠃ ꠟꠣꠈꠣꠘ ꠝꠤꠑꠣ ꠟꠣꠉꠟ,
ꠀꠞ ꠉꠤꠟꠤꠀ ꠢꠣꠞꠟꠦ ꠀꠡ꠆ꠔꠣ ꠙꠦꠐ ꠔꠤꠔ꠆ꠔꠣ ꠅꠁꠉꠦꠟ।
১১ ꠛꠣꠖꠦ ꠀꠝꠣꠞꠦ ꠇꠅꠀ ꠅꠁꠟ,
“ꠔꠥꠝꠤ ꠛꠃꠔ ꠖꠦꠡ,
ꠛꠃꠔ ꠎꠣꠔꠤ,
ꠘꠣꠘꠣꠘ ꠛꠥꠟꠤꠄ ꠝꠣꠔꠞꠣ ꠝꠣꠘꠥꠡ,
ꠀꠞ ꠛꠣꠖꠡꠣꠞ ꠛꠦꠙꠣꠞꠦ ꠢꠤꠞꠛꠣꠞ ꠅꠢꠤ ꠎꠣꠘꠣꠁꠔꠦ ꠅꠁꠛ।”