قْيَامِةْ يَسُوعْ مِنْ بِينْ المُوتَى:
(مَتَّى 28:1-8؛ لُوقَا 24:1-12؛ يُوحَنَّا 20:1-10)
16
1 وْبَعْدْ مَا وْفَى السِّبْتْ شْرَاتْ مَرْيَمْ المَجْدَلِيَّة وْمَرْيِمْ أُمْ يَعْقُوبْ وْسَالُومَة القْوَارِصْ بَاشْ يْجِيوْ وِيِدْهْنُوا بِيهَا الجُثَّة مْتَاعْ يَسُوعْ. 2 وْفِي النْهَارْ الأُوِّلْ مِالجِّمْعَة الأُخْرَى جَاوْ لِلقْبَرْ فِي الصْبَاحْ بِكْرِي وَقْتْ طْلُوعْ الشَّمْسْ. 3 وْكَانُوا يْقُولُوا لِبْعَضْهُمْ: «شْكُونْ بَاشْ يْبَعّْدِلْنَا الحَجْرَة مِالبَابْ مْتَاعْ القْبَرْ؟» 4 وْوَقْتِلِّي خَزْرُوا شَافُوا الِّي الحَجْرَة تْنَحَّاتْ رَغْمِلِّي هِيَ كَانِتْ كْبِيرَة بَرْشَة. 5 وْكِدَخْلُوا فِي وُسْطْ القْبَرْ شَافُوا فِي الجِيهَة اليْمِينْ وْلَدْ شَبَابْ قَاعِدْ وْلاَبِسْ جِبَّة بِيضَة يَاخِي خَافُوا. 6 آمَا هُوَ قَالِلْهُمْ: «مَا تِسْتَغْرْبُوشْ! إِنْتُومَا تْلَوّْجُوا عْلَى يَسُوعْ النَّاصْرِي الِّي تِصْلَبْ. هُوَ مُوشْ هْنَا، رَاهُو قَامْ، هَايْ البُقْعَة الِّي كَانْ مَحْطُوطْ فِيهَا. 7 آمَا إِمْشِيوْ وْقُولُوا لِتْلاَمِذْتُو وِلْبُطْرُسْ: "رَاهُو بَاشْ يِسْبِقْكُمْ لِلجَلِيلْ، وِالغَادِي بَاشْ تْشُوفُوهْ كِيمَا قَالِلْكُمْ."» 8 خَرْجُوا وْهَرْبُوا مِالقْبَرْ وْهُومَا مَرْعُوبِينْ وْمِتْعَجّْبِينْ بَرْشَة، وْمَا قَالُوا لْحَتَّى حَدْ عْلَى خَاطِرْهُمْ كَانُوا خَايْفِينْ.يَسُوعْ يُظْهُرْ لْمَرْيَمْ المَجْدَلِيَّة
(مَتَّى 28:9-10؛ يُوحَنَّا 20:11-18)
9 وْبَعْدْ مَا قَامْ يَسُوعْ مِالمُوتْ ظْهُرْ عْلَى الصْبَاحْ بِكْرِي لْمَرْيَمْ المَجْدَلِيَّة الِّي خَرِّجْ مِنْهَا سَبْعَة شْوَاطِنْ وِالشَّيْء هَاذَاكَا وْقَعْ فِي النْهَارْ الأُوِّلْ مِالجِّمْعَة الجْدِيدَة. 10 مْشَاتْ وْخَبّْرِتْ الِّي كَانُوا مْعَاهْ فِي الوَقْتْ الِّي هُومَا كَانُوا يْنَوّْحُوا وْيِبْكِيوْ. 11 وْهَاذُوكُمْ كِسَمْعُوا الِّي يَسُوعْ حَيْ وِلِّي مَرْيَمْ شَافِتُّو مَا صَدّْقُوشْ.
يَسُوعْ يُظْهُرْ لْزُوزْ تْلاَمْذَة
(لُوقَا 24:13-35)
12 وْبَعْدْ هَاذَا ظْهُرْ يَسُوعْ فِي مَنْظِرْ آخَرْ لْزُوزْ مِنْ تْلاَمِذْتُو وْهُومَا مَاشِينْ لِلقَرْيَة. 13 يَاخِي مْشَاوْ وْخَبّْرُوا البْقِيَّة، آمَا هُومَا زَادَا مَا صَدّْقُوهُمْشْ.
يَسُوعْ يَبْعِثْ تْلاَمِذْتُو
(مَتَّى 28:16-20؛ لُوقَا 24:36-49؛ يُوحَنَّا 20:19-23؛ أَعْمَالْ 1:6-8)
14 وِمْبَاعِدْ ظْهُرْ لِلحْدَاشِنْ تِلْمِيذْ، وَقْتِلِّي كَانُوا يَاكْلُوا عْلَى المِيدَة، وْلاَمْهُمْ عْلَى خَاطِرْهُمْ مَا امّْنُوشْ وِقْلُوبْهُمْ كَانِتْ كَاسْحَة، كِمَا صَدّْقُوشْ النَّاسْ الِّي شَافُوهْ بَعْدْ مَا قَامْ مِالمُوتْ. 15 وْقَالِلْهُمْ: «إِمْشِيوْ لِلعَالَمْ الكُلُّو وْبَشّْرُوا النَّاسْ الكُلْهُمْ بِالإِنْجِيلْ 16 الِّي يِمِّنْ وْيِتْعَمِّدْ بَاشْ يُخْلُصْ، آمَا الِّي مَا يِمِّنْشْ رَاهُو بَاشْ يِتْحْكَمْ عْلِيهْ. 17 وِلِّي يِمّْنُوا بَاشْ اتَّبِّعْهُمْ الأَمَارَاتْ هَاذِي: بَاشْ يْخَرّْجُوا الشْوَاطِنْ بْإِسْمِي وْبِشْ يِتْكَلّْمُوا بْلُغَاتْ جْدِيدَة عْلِيهُمْ 18 وْبِشْ يْشِدُّوا اللْفَاعِى بِيدِيهُمْ. وْإِذَا يُشْرْبُوا شَيْء يُقْتُلْ مَا يْضُرّْهُمْشْ بِالكُلْ، وِيْحُطُّوا يْدِيهُمْ عْلَى المُرْضَى وْهُومَا يَبْرَاوْ.»
طْلُوعْ الرَّبْ يَسُوعْ لِلسْمَاء
(لُوقَا 24:50-53؛ أَعْمَالْ 1:9-11)