50
01 Yuusif ubaabaay kehii dhibiya,
waawiya,
aree ubaaba f'iya.
02 Malya Yuusf ubaaba Israa'iil hannateeneet toona ikishiyaayeeh yhakiimiya sooya.
Aflaay yhakiimi han barooh hannatiyaan.
03 Uun whannati shanha fadhig tamuun yina iyhi.
Malya Imasri asarama tamuun yina Yaaguub waawisiyaan.
04 Malya tuwaawtiit yina ingadnihoob,
Yuusif Masreeb isuurkinaayee dehaay,
<<Ani araawookna akatiyeek,
oont'a baraak whad'a sooyaana.
05 Baabu dhhaniib akay halafoosiyaheeb,
Kan'aaniib eefeeb w'amariib anbiiseet toona hoosu yhariw.
Aflaay whad'a bagiigsiheeb,
baabu iibisi andi.
Malyaab tooy it'igir andi.>>
idi.
06 Far'uun han dehaay igwibi,
<<Kan'aan difaat baabook bisaa.
Tehalafooytook tikwikwaa.>>
idi.
07 Oont'a Yuusif ubaaba iibisee dehaay giigiya.
Far'uuniib idaabta kassaah imooraamna,
uudheeshwa,
Masreeb isuurkina han kassaah imooraamna.
08 Yuusif han isanaayeehwa kasseeh Yaaguubi indhiwaawwa haay giigiya.
Laakiin y'areehwa ureewoohwa Goosheeni haashiib y'ishna id'iin.
09 Masi gwidaat tanbilwa hatay oomanaawwa han Yuusfi geeb giigiyaan.
Iboosana winneet gwidaaba.
10 Baraah w'uurduni bhar ikit'ani har'ii Ataadiit tudangal iktimnihoob,
winneet waawiyaan.
Yuusif kassooh oodehay asaramaat yinaat ubaabaay jillaay waawisiya.
11 Ikan'aani Ataadi haashiib iifiin beet toona rhiyaanihoob,
<<Imasri winneet gadabaaba.>>
idiin.
Malya been whaash <<Masir gadabaatu>> iisimna.
Uun whaash W'uurduni bhar oodar ooraaw iifi.
12 Aflaay Yaaguubi ar ubaaba diyaab iiktiyeet toona id'iin.
13 Barooh Kan'aani haash haay ibeeniit Maakfeelaay w'amariib Maamari daraag ibisna.
Maakfeelaay w'amarwa tudir'aawwa miimashaayi mhiin iiktiyi jillaay Ibraahiim been Eefroon Whiitaayii dilba ahaabi.
14 Oobaasi har'ii Yuusifwa,
isanaawwa,
kassuuh uudehay uuraaw bariiyooh geeb giigaabwa Masir beeti y'agarna.
Yuusif isana imshabaab
15 Yaaguubiit tiyati har'ii,
Yoosfiib isana gal irawee dehaay,
<<Oont'a Yuusif beet hinin hooy nid'iyeet toomaag hoon itkwasiyeek kak niwari?>>
idiin.
16 Aflaay barooh diigwat dehaay ifdigna,
<<Baabuun ayaab baakaay bak sooya:
17 <Baraak winneet amaagna Yoosfiib tid'iina,
laakiin ibakii afoob hooy hariwna.>
idi hoon.
Oont'a hinin bariiyook nid'iyeet toomaag afoob hook nhariw.
Masi hinin han baabuuk y'ibdeeb Ukwaasana kishiyaayeesa.>>
idiin.
Yuusif tudiigwat imriyihoob,
winneet waawiya.
18 Malyaab Yoosfiib isana eeyaaniit suurii whaashi kehii dhibiyaaniit,
<<Hinin kishiyaayeeka.>>
idiin.
19 Yuusif bareeyooh dehaay,
<<Baarikwiina,
ani Ukwaasanaayt tutakwi akantiim han?
20 Baraakna aneeb maagnaayt deha niyaamtaana.
Laakiin Ukwaasana beet toomaag shiboot haay iikwin.
Oon amsi tikeet tudaayiinaay haay isehiriw,
gwida dehay haay ishidhhineet toona yhiriw.
21 Aflaay baarikwiina ani bareekwa y'areekwa amshabiib hookna.>>
idi.
Yoosif isana daayi bhali bhaliisamiyaat igin'a rayhiya.
Yoosfiit tooyat
22 Yuusif kasseeh ubaabaay dhiwaayi geeb Masreeb ikwiri.
Sheebwa tamin hawla ikwiriit iya.
23 Yuusif gwida hawla w'oorooh Afraayimiit tumhayaat dirriyaay rhiyaneeb ookiik ikwiri.
Baruuh han masi Maakir Manassaay w'oori ar han rhiya.
Yuusif een bareeh y'areetooh imshabaab.
24 Yuusif isanaayee dehaay,
<<Ani shaawti tooyat adwil,
laakiin Ukwaasana geebookna daayi indi.
Masree sifar'iit hookna whaash Ibraahiimwa,
Isehaagwa,
Yaaguubwa waadiyaayaab ikatiyeeb istuub hookna indi.>>
idi.
25 Malya Yoosif Y'israa'iili halafoosiya,
<<Ukwaasana sidik iishtam hookna indi.
Aflaay baraak ibakii aniit timiitat oon umhiinii yaksaana.>>
idi.
26 Shaawti Yuusif sheebwa tamin hawla Masreeb id'iit iya.
Ugarooyuuh hannatamiya,
Masreeb aree sanduukiib daasamiya.