Ilinguumiya
Yasuu'a teebiri beeti tafamiya
1
01 Tiyoofilus,
aniib ooktaab w'awwaliinaay kastooh Yasuu'a id'iyeet toonaawwa,
allamiyaneet toonaawwa dehook aktib.
02 Baruuh teebri reewiyaneeb ookiik Eeshuuk Itageegaayee waasaab iiktiyeeb ilinguumama sooya.
03 Yasuu'a lhamiya,
malya iyaayt har'ii,
tooyatii idhhaneet toona gwida salalaayee sooya.
Fadhig tamuun imb'i tiiktiit midda ilinguumamaayee dehaay lawiyaayt Uukwaasanaayt tehad'aayi dehaay hadiidiya.
04 Door gaal baruuh masi bareeyooh geeb tamee bak waseeya:
<<Algudusee baagiigaana.
Laakiin baabu waadiyaayaneeb oomiyaaw hagitna.
Beet toona suur sooyan hookna.
05 Yuhanna yamee imis hookna.
Laakiin shalik imb'eeyeeb baraakna Eeshuuk Itageegaayee ituumis tiyadna.>>
idi.
06 Aflaay Ilinguumama bariiyooh geeb iifiinihoob,
Yasuu'a raatiyaan,
<<W'ankwanaay,
oont'a baruuk Israa'iil tehad'aayi dehaay igir tindiya?>>
idiin.
07 Yasuu'a bareeyooh dehaay,
<<Baraak baliit taana ikatiineeb idaman tari timidda kanaantooh kitehariwna.
Laakiin ubaaba uubhaat tehad'aayeetiisooh d'iyaabu.
08 Laakiin Aashuuk Itageega kehookna y'eenihoob,
akrir timeerna.
Alguduseebwa,
kastooh Yahuudaaywa,
Saamiraaywa,
toobuuti agiya hadiitwa aree anii baadehi tikatiina.>>
idi.
09 Yasuu'a een ibhali idiit har'ii,
baraah shibbee akay ib'aluukiib gaalhoob hooy kwidhiya.
Bareeh shaawti ib'aluuk rhisaab kiiki.
10 Baruuh teebri reewee,
baraah iishbibna.
Gaalhoob malu da eera halaaka akway idaraagoohna ingadee rhiyaan.
11 Baraah <<Jaliili da,
naanhooy tooy tingadiina,
teebri tishabibna?
Uun Yasuu'a teebri beeti yakamiyaab uukna,
toon tehay'a haay giigee rhitaaneet haay it'igir indi.>>
idiin.
Matiyaas Yuudaasi mhiin daaya
12 Ilinguumama Oorba Saytuun ittiyoodiib ikanbuulii Algudus beeti y'agarna.
Uurba Saytuun gaal kiiloomitir Algudusee sangi.
13 Tumadiina iktimnihoob,
oogaw hooy iifiineeb beeti reewiyaan.
Beentooy iifiin aree:
Siimoon Bitruswa,
Yuhannaabwa,
Yaaguubwa,
Andriyaaswa,
Fiilibuswa,
Toomaaswa,
Bartuloomeeswa,
Mattaabwa,
Yaaguub Alfaa'iyooswa,
Siimoon w'ash'ara atoosmaabwa,
Yuudaas Yaaguubi w'oorwa iiktiin.
14 Baraah kassaah hiddaab siileeliin,
m'at gwaditwa Yasuu'iit tuundi Maryamwa geeb immararaayna,
isanaayaah han geeb iifiin.
15 Beenhoob sheebwa tagwuugw y'iin dehay Ukwaasana aamaniin gaal mhiin immararaayna.
Bitrus ingadaayt oodehay bhaliisamiya.
16-17 Baruuh <<Isanaayaan,
suur Aashuuk Itageega unabi Daawidi miidalaabii Yuudaasiib bhaliib isridna.
Aashuuk Itageega idiineet tuuna aree tiki.
Yuudaas hineeb gaalu geeboon aree shagaamiya.
Laakiin Yasuu'i abuuk yhariw oodehay mitiyaaya.
18 Yuudaas imhallaga toomaagti jillaay ittiyeewaayeeb haash haay idlib iyhi.
Malya baruuh ifiiree dhibiyaayt ukalawa ibtak,
imanaayaah kassaah whaashi kehii ifafna.
19 Beet toona imaasiw Alguduseeb uudehay,
been oomhiin Akaldama iisimna.
Araami bhaliiyeeb Akaldama,
<Booyi haash> miyaadu.
20 Tehabayaati kitaab <Ugawuuh harar ba'iikti!
Gaal han hooy biikwariyeeb ba'iikti!>
indi.
Masi aree <Tusurkinaayeeti mhiinooh weer ba'iikti.>
indi.
21 Aflaay W'ankwana Yasuu'a ibitkeen ikwiirihoob geeboon iifiin eendee ibakii gaal waasni.
22 Baruuh Yuhannaab hooy itoomaaseet tumiddaatii,
teebri beeti hoon yakamiyaneeb oomb'i ookiik waasamiini.
Uun baruuh ibakii Yasuu'iit tooyati yakti kehii baadehiib ikati.>>
idi.
23 Aflaay baraah malu da isimna,
Yuusif Baarsaabbaas <<Yuustuus>> atoosmaabwa Matiyaaswa isimna.
24 Malya baraah kassaah siileeliyaan,
<<W'ankwana!
Kassooh oodehayi gin'aayeeb teefeet toona tikteena.
Een eenda imalooyeeb baruuk waasaab tikatiyeeb rhisaa hoon.
25 Ulinguumama Yuudaasi mhiin akeetiit shagaamiini.
Yuudaas oomhiin w'astehaliiniyooh ibaayt hoon giigiya.>>
idiin.
26 Malya baraah gur'aat igidna.
Beet tugur'a Matiyaasii dehaay dhibta.
Shaawti baruuh ilinguumamaayeeb tamna malyaab iki.