3 Neke aVafwalisayo wuli vamuhelelelage uYesu, ukuta vamugemye. Vakumuwuudzaga viitigilaga, “Mu milagililwe gyesu, lwikwidikwa umugoosi ukumugotola umudala vaakwe wiimila wa lukaani luluvedzaga?” 4 UYesu akuvahigaga iitigilaga, “Mwave musinaa mwimba mu Wusimbe uWiimike ukutigila, ukuhuma pa wutalilo wa wugavi ‘uNguluvi avagavile umugoosi nu mudala’?^a 5 UNguluvi iitigila, ‘Wiimila wa ulo, umugoosi ahadza akumuleka udaadiye nu ngʼina, neke akamiingʼane nu mudala vaakwe, avavili avo viivedza muvili gumwinga.’^b 6 Lwe lwene navo vasiivedza vavili kangi, viivedza muvili gumwinga. Lino kye ákamiingʼiise uNguluvi, umuunu atanage ukulekasa.” 7 AVafwalisayo avo vakumuwuudzaga viitigilaga, “Ngana idzo dza ndakyene, kye kiki uMose aalagiidze mu milagililwe ukutigila, umugoosi asimbage ihaate iya kumugotola umudala vaakwe nu kumuleka?” 8 UYesu akuvahigaga iitigilaga, “UMose aviidikiye ukutigila, muvagotolage avadala veenyo, pakuva inumbula dzeenyo ngʼiliitafu, neke kangi ukuhuma uwutalilo wa wugavi, uwo siwaali we wugulume wa Nguluvi. 9 Ndikuvalongela ukutigila, ye avedzaga ye akumugotola umudala vaakwe, pe asimwibiite mu wudumuli-noolane, neke amutoole mudala uyungi, iidumula uwutoolane. Kangi ye avedzaga ye akumutoola umudala umugotole, umugoosi uyo nave iivedza mudumuli-noolane.”^c

10 Neke avanyigendwa vaakwe vamulongelage vatigilage, “Ngana ndakyene luli ewo kwa mugoosi nu mudala, apo kiba uwukitatoola!” 11 UYesu akuvahigaga iitigilaga, “Si vaanu vonda aviikwidikila ilidzwi ilyo, nda haamu, vala veene ve avapeeliye uNguluvi uludali. 12 Pakuva avangi vasiitoola wiimila wa kuholwa vagumba. Avangi vasiitoola, pakuva avaanu vavasawuwe. Poovali na vangi avasiitoola wiimila wa kwitawulila ukuwulimila uwutwa wa kukyanya. Umuunu ye avedzaga ye akuliidikila ilidzwi ilyo, aliidikilage.”

13 Neke avaanu vamuleetelage uYesu avaana avadebe, ukuta avaviikile amawoko pa mituwe gyawo nu kuvalapangilila kwa Nguluvi. Avanyigendwa vaakwe vakuvakenyelaga avaanu avo. 14 Neke kangi uYesu avalongelage atigilage, “Muvaleke avaana avadebe vaadze ukwangu, mutane ukuvakaanidza, pakuva uwutwa wa kukyanya wa vaanu ngita avaana ava.” 15 UYesu akuvaviikilaga amawoko gaakwe pa mituwe gyawo, neke ahegage apo.

16 Umuunu yumwinga aaheliye kwa Yesu akumuwuudzaga iitigilaga, “Ve Muwulanidzaave! Ndilime lunofu luki, ukuta ndaanukile uwuumi uwa mbeepali?” 17 UYesu akumuhigaga iitigilaga, “Kye kiki ukuumbuudza ulukaani ulwa wunofu? UNguluvi mwene ye munofu! Neke kangi, ngana wiisaka ukwingila ku wuumi uwa mbeepali, wiidikage indagi dza Nguluvi.” 18 Umuunu uyo akumuwuudzaga iitigilaga, “Ndagi dziki?” Neke uYesu amuhigage atigilage, “ ‘Utanage ukukoma, utanage ukudumula uwutoolane, utanage ukuhiidza, utanage ukoolela uwudesi, 19 uvaginiyage udaado nu nyoko,’^d kangi ‘umwendage umuyago ngita kye ukwiyenda yuuve.’^e ” 20 Umuunu uyo iitigilaga, “Indagi dzonda idzo ndídziinatiye. Ndipila ndiikwangila kiinu kiki?” 21 UYesu akumulongelaga iitigilaga, “Ngana wiisaka ukuvedza mukwilifu, uhelelage ukagudze ifiinu fyonda fye uli nafyo, na magoobeli ge wiikwanukila ukavagavilage avahangala, apo wiivedza nu wumosi kukyanya. Neke waadze, uuniniilage.” 22 Umuunu uyo pe aapuliike idzo, iihegaga apo áhuguviye, pakuva aali ni maale ndzoloofu.

23 Neke uYesu avalongelage avanyigendwa vaakwe atigilage, “Ndakyene ndikuvalongela ndiitigila, lutalamu hiilo kwa mumosi ukwingila ku wutwa wa kukyanya. 24 Ndikuvalongela kangi ukutigila, lupeefu hiilo ingamila ukuhumiingʼasa pa kalyango ka singano, sindawuli umumosi ukwingila ku wutwa wa Nguluvi.” 25 Avanyigendwa vaakwe pe vaapuliike ulo, viidzumaga mbandu, vakumuwuudzaga viitigilaga, “Ye ani lino, ye iipokwa?” 26 UYesu akuvalolaga, iitigilaga, “Ku vaanu ulo lukuvalema, nda haamu, kwa Nguluvi amadzwi gonda gasikumulema.”

27 UPetulo akumulongelaga iitigilaga, “Lolage, uneefwe túfilekile fyonda, ukuta tukuniniile. Lino tuhadza twikwambulila kiki?” 28 UYesu akuvahigaga iitigilaga, “Ndakyene ndikuvalongela ndiitigila, mu musika ugwikwadza uNguluvi alaagava wupiya fyonda. UMuswamuve va Muunu aliikala pa kideego kyakwe kya ndolo.^f Na yuunye ye mukuuniniila lino, muliikala ndeeni mu fideego fya wutwa finyikyumi ni fivili (12), ukuta muvahige avaanu va fipelela finyikyumi ni fivili ifya Vaisilaheli. 29 Neke umuunu ye avedzaga ye álekile ikaaya, enewuli avamaamiye, enewuli avanungʼuve, enewuli udaadiye, enewuli ungʼina, enewuli avaana vaakwe, enewuli migunda wiimila wa neene, alaanukila fyoloofu hiilo ukulutila fye áfilekile. Kangi alaanukila uwuumi uwa mbeepali. 30 Avaanu voloofu avakwiwona ukutigila viivagila lino, valaavedza avasiivagila mu musika ugwikwadza. Kangi avakwiwona ukutigila vasiivagila lino, valaavedza aviivagila mu musika ugwikwadza.