Umusimbi va kitabu iki ye Maluko, ye mwene umusika wuli aatambulwaga Yohana Maluko (Malimo ga Vatume 12:12). Aali pwali umusika uYesu pe iikwibatwa mu mugunda Getisemane (14:51). Avasindikiidze avatume uPawulo nu Balanaba mu lugendo ulwa kutala ukudalika iMola iNofu, pambele aaheliye mu lugendo nu Balanaba (Malimo ga Vatume 13:1-13; 15:37-39). UMaluko amuniniilaga hiilo umutume uPetulo ye aali ámutangile ku wudzenge wa Loma (1 Petulo 5:13). Lwiwoneka ukutigila uMaluko aasimbile ikitabu iki ku wudzenge wa Loma ngita umwaka gwa makyumi mutanda ni gihaanu (65), ukuhuma pe iiholwa uYesu Kilisiti. UMaluko avasimbiye avafuuwa aviikalaga ku wudzenge wa Loma avaapumuswaga mu musika gwa wutemi wa mutwa mukomi ye aatambulwaga Nelo.

Mu mupingulo gwa kutala, uMaluko iikoolela uwulimila-vangi wa Yesu mu Galilaya (1:1–9:50). Uwugulume waakwe waali wa kuwoneesa ukutigila uYesu ye ani wugendela wa malimo na madzwi gaakwe. Iisaka avaanu vadzeelage ukutigila uYesu ye Mesiya (8:29). Mu mupingulo gwa kavili iikoolela ulugendo lwa Yesu ulwa kuhelela ku Yelusalemu ukufikila ukutovelelelwa pa kipindulihidzo nu kudzulubuka kwakwe (10:1–16:20).