Dinyeel 41

Faaroo damintiiti

1 Abin ali boonee ní Faaroo dámintì kudamintiiu kubɔ, yii u yú dimɔɔl din bi yíì Niilee^a caŋin. 2 U yú mimmee ní ki ká inasal iluli, i bí màlmal ki ŋān̄, ki nyánní dimɔɔlee poon ki yú digbándi ki ŋmóò timool. 3 Boonee ní nnagɔŋgɔmu ŋkpiimu mululi mun nyánní dimɔɔl gbantin ki páaǹní in béeyee boon ki dɔ́miń ki yú ki kɔ́ĺ-i dimɔɔgbandi. 4 Ní nnagɔŋgɔmu ŋkpiimuee dū inasal in bí màlmal ki ŋān̄ee ki nátì. Niinee ní Faaroo cúu fīntì.

5 Boonee ní Faaroo fātìi gèen̄ ní ki gíti tí dámintì yii idifin iluli in nyìm̀ ki ŋān̄ee túuń dikakabaantiil pu. 6 U kpēēyee ní ki ká ndifiŋkpiimu mululi mun ugbuŋkoon fáá mu fáaḿee nyáń ki kútì idifin in béeyee pu. 7 Ní ndifiŋkpiimu mun fáaḿee dū idifin in nyìm̀ ki ŋān̄ee ki nátì. Niinee ní Faaroo tí cúu fīntì ní ki ká yii an sá kudamintiiu.

8 Kutaa wúntèe ubɔti pɔbil bíil̀, ní u tú bi yíiń Eejipiti tiŋki poon bibɔɔbi nì biciŋfitiibi kɔkɔ. Bi bāańee ní ubɔti kàan̄ u nín dámintì puee ki tùkū-bi, ama bi-kansikin báà ubɔ kaa ŋúń ki lēē taapu ki tùkū-u^b. 9 Niinee ní bin bàtī ndaam ki tìì Faarooyee kpiliu bí ubɔti yii: «Ti-baa, diyìntil din m yīntèe, m làá bìitī di-pu díǹ. 10 Di sá dalbee, a nìn fōō timbi a-tɔntɔnliibi pu diŋuul ki cáá man nì bin pūul̀-si kpɔnɔbee kpiliu ki tɔ́ sarkan ujanjakpil un kpèé a-sarkadambee dumpu. 11 Man nì u nìn dámintì kunyabaantiiu poon ní báà ŋma nì u-damintiiku nì ku-taapu. 12 Ti nì ueebrunaacimpɔɔn ubɔ nìn bí sarkan niin, u sá ujanjakpil yumbuu. Úǹ ní ti nìn kàan̄ ti-damintiiti ki tùkū ní u lēē báà ŋma damintiiku taapu nín sá puee ki tùkū-u. 13 U nín tùkū-ti ti-damintiiti taapu puee, míǹ ní an jítì. A fātìi gíiǹ ditundi din m nìn pée tūǹee ki ŋúbiǹ-mi, ní ki yāntì bi lúntì bin pūul̀ a-kpɔnɔbee kpiliu ndɔ pu.»

Jooseefi lēē Faaroo damintiiti taapu

14 Niinee ní Faaroo tú bi yíiń Jooseefi. Ní bi nyántì-u kusarkadiin malaa, ní u kōol̀ ki kpántì u-wampeeŋkaati ní ki nín cá ubɔti nimbiin. 15 U bàn̄ Faaroo ceeyee ní Faaroo bí-u yii: «M dámintì kudamintiiu kubɔ ní báà ubɔ kaa ŋúń ki tùkū-mi ku-taapu. Ama m gbìl̄ yii bi yaa kàan̄ kudamintiiu ki tùkū-see, a ŋūǹ kí lēē ku-taapu.» 16 Ní Jooseefi kíí Faaroo yii: «An kaa sá man di ŋūǹ kí ŋá tiba, Unimbɔti di làá tùkù-si a-damintiiku taapu ní án sɔ̀ŋkì a-pɔbil.» 17 Ní Faaroo bí Jooseefi yii: «M dámintì yii m yú dimɔɔgbandi ní. 18 M yúee ní ki ká inasal iluli, i bí màlmal ki ŋān̄, ki nyánní dimɔɔlin ki dɔ́miń ki yú digbándi ki ŋmóò timool. 19 Boonee ní nnagɔŋgɔmu ŋkpiimu mululi páaǹní. Doooo nee, maa láá pée ká nnakpiimu míǹ Eejipiti tiŋki kɔkɔ poon ki ká. 20 Nnagɔŋgɔmu ŋkpiimuee bāań mimmee ní ki dū inasal in ŋān̄ ki bí màlmalee ki nátì. 21 Ní a yaa ká-iee, aa lì yii i náĺ tiba gba. I nín pée bí pu ŋgɔŋgɔmu ŋkpiimu puee, míǹ ní i gbíntìi bí. Ní m cúu fīntì. 22 Boonee ní m gíti dámintì yii didikakabaantiil di lòon̄ idifin iluli ní i nyìm̀ ki ŋān̄. 23 Ní ndifiŋkpiimu mululi mun ugbuŋkoon fáá mu fáaḿee mun nyáń ki kútì idifin ipeekaayee pu. 24 M yúee ní ndifiŋkpiimuee dū idifin in nyìm̀ ki ŋān̄ee ki nátì. M kàan̄ míǹ ki tùkū bibɔɔbi, ama bi-kansikin báà ubɔ kaa ŋúń ki béè taapu ki tùkū-mi!»

25 Ní Jooseefi bí Faaroo yii: «Ti-baa, a-damintiitee liitil pée sá kudamintibaantiiu ní. Unimbɔti di là kí dàkà ubɔti tin u là kí ŋée. 26 Inasal iluli in ŋān̄ee, taapu di sá abin aluli, ní idifin in ŋān̄ee mun taapu sá abin aluli. Niin sá kudamintibaantiiu ní. 27 Nnagɔŋgɔmu ŋkpiimu mululi mun páaǹní ipeekaayee boonee, taapu di sá abin aluli mun. Ní ndifiŋkpiimu mululi mun ugbuŋkoon fáá mu fáaḿee taapu sá ŋkùm abin aluli. 28 Kii m nín bàà tùkū ubɔti puee, Unimbɔti di lēē min u là kí ŋée ki dàkā-u. 29 Tijin làá gbí Eejipiti tiŋki kɔkɔ poon abin aluli. 30 Boonee ŋkùm làá nyā abin aluli. Binib dāa súntí gba yii tijin nìn gbí Eejipiti tiŋkin, kun puee ŋkùmee làá dāá nàan̄ Eejipiti tiŋki ní. 31 Ŋkùm gbanti nín dāa pɔ̄ɔ̄ puee dāa yàntī binib kaa dāa gíti nyí yii digbíl diba nìn kɔ́ Eejipiti tiŋkin. 32 Ti-baa, a nín dámintì kudamintibaantiiu mili kɔkɔ nee dàkà yii Unimbɔti làá lafun ŋá min u bɔ́ntì kí ŋée, án kaa làá ti yúntí. 33 An puee, ti-baa Faaroo, á kpèè kí nyàab̀ unil un cáá dinyil nì iciinee kí dū-u kí kàan̄ tikpiti Eejipiti tiŋki pu. 34 Ti-baa, an ŋān̄ á kàan̄ bikpilib biba Eejipiti timmu poon, binib yaa kùn̄ tikpaajin digbíl biŋŋi alulee poonee, bí cúú yàkatī miŋmoo pu ní bikpilibee ń lēē diba pu kí dūú kpāafì cakalaabi poon. 35 Á yóoń mara yii Eejipiti tiŋki kamaa poonee, bí kóoǹ digbíl biŋŋi alulee jinti kɔkɔ kí kpāfì, kí dūú kpāafì ní tikɔkɔ ń nīn bí a-taapu. 36 An jintee ń nīn yú míǹ, ŋkùm biŋŋi alulee yaa láa bāańee, bí dāá dūú fīī kitiŋ pu nib ŋkùm ń taa láa kpɔ̀ kí céetí-bi.»

Bi kāaǹ Jooseefi tikpiti

37 Tibɔti tin Jooseefi sòon̄ee mɔ́ɔkiǹ Faaroo nì u-naacimbi kɔkɔ. 38 Ní Faaroo bí-bi yii: «Ti ŋūǹ ki gíti ká unil ubɔ u cáá Unimbɔti Fam ki bí kii kijapaai neeee?» 39 Ní ubɔti bí Jooseefi yii: «Sii ní Unimbɔti dàkā tin bí nee kɔkɔ, ŋma di gíti bí ki cáá iciin ki nyí ki jítiǹ sii! 40 Sii di kíǹ ki yì man samaau. A yaa lī puee, míǹ ní m-timbundi kɔkɔ nib làá pīlifiǹ-si kí ŋá^c. Man nín sá ubɔtee baba ní m jítiǹ-si.» 41 Ní Faaroo gíti bí Jooseefi yii: «M dū Eejipiti tiŋki kɔkɔ ki ŋá a-ŋaan.» 42 U lī mimmee ní ki fúutì u-bɔmbiki ki dūu fúuń Jooseefi ŋambiki ki pēeǹ-u dibɔkutimɔntiil ní ki léeǹ-u sindaariya léeŋkaati^d. 43 Ní Faaroo yāntì Jooseefi kɔ́ u-tɔrɔkuliliitiu poon, ní binib līī ki tátí yii: «Ní gbàam̄maan!» Míǹ ní Faaroo nìn kāaǹ Jooseefi ú nīn kpèé Eejipiti tiŋki kɔkɔ.

44 Ní Faaroo bí Jooseefi yii: «Man di sá Faaroo, Eejipiti bɔtikpaaŋwu. Ama sii yaa kaa pú kinyɔkɔee, báà unil kpá kí ŋá tiba nì tiba Eejipiti tiŋki kɔkɔ poon.» 45 Ní Faaroo páaǹ Jooseefi diyindi yii Safnati-Paneeya, ní ki dū Pootifeera un sá utandaan Ooni tiŋkinee bisal Asinaati ki tīī-u u cáá. Boonee, Jooseefi yìin̄ ki māntì Eejipiti tiŋki kɔkɔ poon. 46 Ŋyunti ŋun bi nìn nyántì Jooseefi sarkan ki cáá-u ki cūnnì Eejipiti bɔtiu Faaroo ceeyee, u nìn cáá abin mmuŋku nì saalaa ní.

U nyáń Faaroo ceeyee ní ki yìin̄ ki māntì Eejipiti tiŋki kɔkɔ. 47 Digbíl biŋŋi alulee poonee, tijin nìn lòon̄ tikpil. 48 Ní Jooseefi kūliŋkì digbíl biŋŋi alulee poon tijin tin kɔkɔ bí Eejipitee nì ti-nyɔkɔm ki yóoǹ Eejipiti timmun. Kitiŋ kamaa poonee, u nìn kóoǹ tijin tin bi cáń tisatinee ki kpáafì. 49 Jooseefi nìn kūliŋkì tijin tikpil tikpil ki kpáafì an wīikí kii tiŋku gbandi bul nín dɔ̄ puee. Baa nìn gíti bíi ŋmàntī-tì gba, kun puee an kaa nìn bí ŋkaan.

50 Kí wàatī ŋkùm biŋŋi alulee ń bàńee, Pootifeera un nìn sá utandaan Ooni tiŋkinee bisal Asinaati nìn màl̄ Jooseefi mbininjabiyaamu muli. 51 Ní Jooseefi pú kikpilii diyindi yii Manasee^e, di sá u nìn lī yii: «Unimbɔti yāntì m súntì m-gìńdi nì m-baa cindi kɔkɔ pu.» 52 Ní u pú kililiitii diyindi yii Eefiraayiim^f, di sá u nìn lī yii: «Unimbɔti pú-mi mmaal kitiŋ kin poon m jíń falaayee.»

53 Abin aluli ŋin poon digbíl kɔ́ Eejipiti tiŋkinee yuntiŋu sāā. 54 Ŋkùm biŋŋi aluli ŋin bɔti Jooseefi nìn sòon̄ee kíĺ ki bíi dòoń. Ŋkùm nìn jéetì ntimu kɔkɔn^g, ama tijin nìn bí Eejipiti tiŋki kɔkɔ poon. 55 Ŋyunti ŋun ní Eejipiti yab jinti dāa dóò ŋkùm nyáń kitiŋ puee ní bi kíǹ ki sūǹ Faaroo cee ki nyàab̀ tijin. Ní Faaroo bí-bi yii: «Ní cùú ká Jooseefi, u yaa lī puee ní ŋá míǹ.» 56 Ŋkùm nìn nyáń Eejipiti tiŋki kɔkɔ poon. Jooseefi nìn pīitì cakalaabi kɔkɔ ní ki nyáfiǹ Eejipiti yab tijin, di sá ŋkùm nìn mɔ̄tìi bíi pɔ́ɔkí ki cá Eejipiti tiŋki poon. 57 Ntimu kɔkɔ nib nìn dòoń Eejipiti ní ki dāā tijin Jooseefi cee, kun puee ŋkùm nìn pɔ̄ɔ̄ kitiŋ kɔkɔ pu.