Dinyeel 42

Jaakɔb tú u-jipɔmbi bí cù Eejipiti kí dā tijin

1 Ŋyunti ŋun Jaakɔb gbìl̄ yii tijin bí Eejipitee, ní u bí u-jipɔmbi yii: «Ni kā ki kpèé tɔb míǹ an dāá kúntíǹ yii ba ní? 2 M gbìl̄ yii tijin bí Eejipiti. Míǹ puee cùmaan kí dāń kí cáań tí jī kí ŋmátí^a, kí taa kpú ŋkùm.» 3 Niinee ní Jooseefi mambi saalaayee yíkìi búntì Eejipiti kí cùú dāń tijin. 4 Ama Jaakɔb kaa nìn yāntì Jooseefi naal Beenjameen táá u-mambi ki cūtì, di sá u nìn fàŋkí yii án taa ŋée tiba ń tin ŋá-u. 5 Ní Jaakɔb jipɔmbi nì bijindaliibi biba mun dūu bàn̄ Eejipiti tiŋkin kí dā tijin, kun puee ŋkùm nìn pɔ̄ɔ̄ Kanaan tiŋkin.

Jooseefi sòon̄ nì u-mambi nì inimbinaakulim

6 Jooseefi di nìn sá gɔmina Eejipiti tiŋki poon. Úǹ di nìn yàntī bi nyáfíǹ kitiŋ gbanti kɔkɔ nib tijin. Jooseefi mambi bāańee ní ki gbāaǹ u-nimbiin. 7 Jooseefi ká u-mambee ki béè-bi, ama kaa yāntì bíǹ béè-u. U nìn sòon̄ nì bi nì inimbinaakulim ní ki bālifì-bi yii: «Ni nyánní la?» Ní bi kíí-u yii: «Ti nyánní Kanaan tiŋkin ní ki dɔ́miń kí dā tijin.»

8 Jooseefi nìn béè u-mambi ama ní bíǹ kaa nìn béè-u. 9 Niinee ní Jooseefi téetì u nín nìn dámintì u-mambi pu kudamintiiu kuŋyee^b ní ki bí-bi yii: «Ni sá bicɔŋkiliibi ní. Ni dɔ́miń kí cɔ̄ŋkì ti-tiŋki kí dáań kí cúú ki-wɔfii laŋki ní.» 10 Ní bi kíí-u yii: «Aayee, ukpil, timbi a-tɔntɔnliibi dɔ́miń kí dā tijin ní. 11 Timbi kɔkɔ sá unibaanti biyaamu ní, ki sá bibulcinnib. Timbi a-tɔntɔnliibi kaa sá bicɔŋkiliibi.» 12 Ní Jooseefi fātìi bí-bi yii: «An kaa sá ibaamɔn, ni dɔ́miń kí kpèè ti-tiŋki kí béé ki-wɔfii laŋki ní.» 13 Ní bi fātìi kíí-u yii: «Timbi a-tɔntɔnliibi sá binib saalaa nì bili ní, ubaatibaanti biyaamu, ní ki nyánní Kanaan tiŋkin. Ti-joolkaau bí ti-baa cee díǹ pu nee, ama ti-nabiki kiba wáŋkì.» 14 Ní Jooseefi bí-bi yii: «M nín pée lī puee, míǹ dee. Ni lafun sá bicɔŋkiliibi ní. 15 M nín làá ŋá pu kí béé yii ni-bɔti nee sá ibaamɔn àá an kaa sée di sá, nì Faaroo yindi puee, ni yaa kaa cáań ni-naal ujoolkaayee doo, ni kpá kí nyā kitiŋ nee poon. 16 Ní lēē ni-kansikin ubɔ kí tɔ̄ ú cùú cáań ni-naal, ní nimbi bin kíǹee ń nīn bí sarkan. Min ní m làá lafun béé yii ni-bɔti nee sá ibaamɔnaaa, an kaa sée dee. An yaa kaa sá ibaamɔnee, nì Faaroo yindi puee, ni sá bicɔŋkiliibi ní.»

17 Ní Jooseefi dū bi-kɔkɔ ki tɔ́ sarkan iwiin ita. 18 Ŋwintataati dalee ní u bí-bi yii: «Ní ŋámaan min m làá dàkà-ni nee kí ŋmátí, di sá yii Unimbɔti ní man fàŋkí. 19 Ni yaa lafun sá bibulcinnibee, ní yàntī ni-kansikin ubɔ ń gbíntí sarkan doo nee, bin kíǹee ń yòon̄ tijin kí cáá kpíiǹ ni-dicaŋŋi yab bí taa kpú ŋkùm. 20 Boonee ní cáań-mi ni-naal ujoolkaayee ní ḿ ŋmā kí béé yii ni-bɔti tin ni sòoǹ nee sá ibaamɔn, ní ní ŋmátí kí taa kpú.» Ní bi kíí ki ŋá míǹ. 21 Ní bi kíǹ ki sòoǹ nì tɔb yii: «Tiŋman, ikpiti in ti ŋá ti-nabikee pu ní ditafadaaldi din bí nee lítì ti-pu nee. Di sá ti nìn ká kunimbaau kun nìn bí u-pɔbil poon ŋyunti ŋun u nìn bí ki gbàam̄-ti yii tí pée sɔ̄ u-saayee, ama ní ti nìn yíì kaa pílifiǹ-u. Kɔŋkɔnnee an nimbaaku kubaantiiu di bāań ti mun nee.» 22 Ní Rubeen bí-bi yii: «Maa nìn pée tùkū-ni yii ní taa ŋá kibiki gbanti tikpitil ní ni yíì kaa pílifiǹ-maaa^c? Too u-fatikuu kpuulool di lítì ti-pu díǹ nee.» 23 Baa nìn nyí yii Jooseefi gbìl̀ tin bi sòoǹee, kun puee u yaa nìn sòoǹee, ubɔ di nìn nàatī-bi. 24 Ní Jooseefi yíkìi kākatì ki wāatì-bi ki cūtìi súń.

Jaakɔb jipɔmbi gítì Kanaan tiŋkin

Boonee ní u fātìń bi-cee ki gíti sòon̄ nì bi ní ki lēē bi-kansikin Simeeyɔn, ki bóob́-u ŋŋmii bi-kɔkɔ nimbiin. 25 Ní Jooseefi pú kinyɔkɔ yii bí lēē tijin kí fúuń u-mambi kɔkɔ kutukubin an gbí, kí gíiǹ báà ŋma nimbiliŋ kí ŋá u-kutukuun, kí tīī-bi tijin tin bi làá nīn jīǹ nsannee. Ní bi ŋá míǹ ki tīī-bi. 26 Ní bi bóob́ bi-jinti ki túǹ bi-mammu ní ki yíkìi nín kùǹ.

27 Bi bàn̄ laaba kunyeeu mɔ́ bi làá dòon̄ee, bi-kansikin ubɔ gútì u-kutukuu kí lēē tijin kí tīī u-maŋkee, ki ká u-nimbiliŋ u-kutukuu nyɔkɔpu. 28 Ní u bí u-nabiyaamu yii: «Kpèèmaan, bi gíiǹ man nimbiliŋ ki ŋá m-kutukuun!» Niinee ní bi-kɔkɔ pɔbiliŋ máĺ, bi-wunti bíi jìkì ní bi kíǹ ki lì tɔb yii: «Ba ní Unimbɔti ŋá-ti mimmee?»

29 Bi bàn̄ bi-baa Jaakɔb cee Kanaan tiŋkinee ní ki máafì-u tin jítèe kɔkɔ. 30 Bi nìn lī yii: «Uninja un sá gɔmina Eejipiti tiŋkinee sòon̄ nì ti nì inimbinaakulim. U bí-ti yii ti dɔ́miń kí cɔ̄ŋkì Eejipiti tiŋki ní. 31 Ní ti kíí-u yii: <Timbi sá bibulcinnib ní, taa sá bicɔŋkiliibi. 32 Ti nìn sá binib saalaa nì bili ní ki pēē baa. Ama ti-nabiki kiba wáŋkì, ní ti-naal un jóol̀ dibiil puee bí mmɔŋki ti-baa cee Kanaan tiŋkin.> 33 Niinee ní kitiŋee kpiliu fātìi bí-ti yii: <Min ní ni làá ŋá ní ḿ béé yii ni sá bibulcinnibee di sá ní yàntī ni-nabiki kiba ń gbíntí m-cee doo, ní nimbi bin kíǹee ń yòon̄ tijin min nyɔkɔm làá bà ní tin kpíiǹ ni-dicaŋŋee kí nīn kùǹ. 34 Boonee ní cáań-mi ni-naal un jóol̀ dibiil puee, ní ḿ ŋmā kí béé yii naa sá bicɔŋkiliibi, ama ni sá bibulcinnib. Niinee ní ḿ dāá gíiǹ ni-nabiki kí tīī-ni, ní ní tɔ̄ ni-ba kitiŋ nee poon.>»

35 Bi nín bíi kpáatí tijin bi-kutukub poonee, ní bi-kɔkɔ ká bi-nimbiliŋ kā nlɔbiyaamun bi-kutukub poon. Bi nì bi-baa nín ká bi-nimbiliŋ nlɔbiyaamunee ní tifaandi kɔ́-bi. 36 Ní bi-baa Jaakɔb bí-bi yii: «Ni làá yàntī ḿ nīn kā kí taa ti nín̄ cáá mbiyaamuɔɔ! Jooseefi kaa ti bí, Simeeyɔn kaa ti bí, ní ni là kí fōō Beenjameen mun m-cee! Tikɔkɔ fātìi lítì man pu ní nee!» 37 Niinee ní Rubeen bí u-baa yii: «Dū-u kí ŋúbíǹ-mi, m làá gíiǹní-u kí tīī-si. M yaa kaa gíiǹní-u ki tīī-see, a ŋūǹ kí kpɔ̀ man bininjabiyaamu liitil.» 38 Ní Jaakɔb kíí yii: «M-biki kpá kí nóó-ni kí cù. U-maan kpíì an kíǹ úǹ baba ní. Ni yaa búntì ní tiba yaa tin ŋá-u nsannee, ni làá yàntī man nì m-yikpipinti nee, ḿ kpú nì kunimbaau.»