Dinyeel 43

Jaakɔb kíí Beenjameen ń nóó u-mambi

1 Ŋkùm nìn mɔ̄tìi bíi pɔ́ɔkí Kanaan tiŋkin. 2 Bi nín jíń tijin tin bi dánní Eejipitee ki dóòyee, ní Jaakɔb bí u-jipɔmbi yii: «Ní gítímaan kí cùú dāń-ti tijin.» 3 Ní Juuda kíí-u yii: «Uninjee nìn baasii kpáafì-ti ní ki lī yii: <Ni yaa kaa cáań ni-naal, m gíti kpá kí fōō-ni.> 4 An puee a yaa kíí Beenjameen ń nóó-ti kí cùee, ti làá cùú dāń-si tijin. 5 Ama a yaa yíì yii tí taa kpáaǹ-uee, ti mun kaa làá cù, kun puee uninjee baasii tùkū ki cántì-ti ní yii: <Ni yaa kaa cáań ni-naal, m gíti kpá kí fōō-ni.>» 6 Ní Jaakɔb bí yii: «Nimbi di ŋá-mi míǹ. Ba pu ní ni bàà tùkū-u yii ni gíti cáá naal ubɔ ní?» 7 Ní bi kíí-u yii: «Uninjee di páb́-ti ki bālifì ti nì ti-dicaŋku poon bɔti yii: <Ni-baa báaa? Ni gíti cáá naal ubɔɔɔ?> Tin u bālifèe ní ti kíí-u. Taa ŋūǹ kí béé yii u làá lì yii tí cáań ti-naalaa!»

8 Ní Juuda bí-u yii: «M-baa, dū Beenjameen kí kpàan̄ man tí yīkì kí cùú cáań tijin tí jī kí ŋmátí. Tí taa nín̄ kā míǹ, timbi nì sii nì ti-biyaamu kɔkɔ ń dāá kpú ŋkùm. 9 Tin kɔkɔ yaa láa bāań u-puee, man fōō ki ŋá m-ba, á dāá bàlifì-mi. M yaa kaa gíiǹní-u ki ŋúbiǹ-see, ḿ nīn pée sá ukpiti a-cee kí nīn cá jaanjaan. 10 Ti yaa kaa bàà bíil̀ ŋyuntee, naŋkɔnampu ti bàà gítìmaan mili mili ki cáań tijin.» 11 Ní bi-baa kíí-bi yii: «Too, an nín sá yii míǹ ní tí pée ŋée, ni nín làá ŋá puee sɔ̀. Ní nyàab̀maan ti-tiŋki doo wammɔntiiti tiba kii talaalub nì ikpafi nì tisiil, nì asubil ŋin bi yíì piistaasi nì amandee kí cùnnì kí pɔ̄ uninja gbanti. 12 Ní ŋúb́ animbil mili pu kí fàtīí gíiǹ ŋin bi nìn dūu ŋá ni-kutukubinee kí tīī-bi. An yaa yíì, an nìn ŋá-bi inaatuu ní. 13 Ní yīkìmaan kí kpáaǹ ni-naal kí nīn gítí uninjee cee. 14 Unimbɔti Mpɔŋkɔdaan ń yàntī uninjee ń tin sɔ̄ ni-saai kí yàntī Beenjameen nì Simeeyɔn ń nóó-ni kí fàtīń. An yaa kíǹ mamee, m làá nīn pée kā kii maa pée màl̄ ki kée ní.»

Jooseefi sòon̄ nì u-mambi nliliitiim

15 Niinee ní bi bɔ́ntì tiwampɔkaal ní ki yōoǹ animbil mili pu, ki kpáaǹ Beenjameen ki nín cá Eejipiti ki tin bàn̄ ki kɔ́ ki yúl̀ Jooseefi nimbiin. 16 Ŋyunti ŋun Jooseefi ká Beenjameen nóoń-bee ní u bí u-tɔntɔŋkpiliu yii: «Cáá binib nee kí cùnnì m-dumpu kí kpɔ̀ kuwaŋkuluu kubɔ kí ŋá tijin, di sá yii man nì bi di làá jī ŋwiimpu nee.» 17 Ní uninjee cáá-bi ki cūnnì Jooseefi dumpu kii Jooseefi nín bí yii ú ŋá puee. 18 Ŋyunti ŋun bi bàn̄ ki làá kɔ́ Jooseefi dumpuee ní tifaandi kɔ́-bi, ní bi bíi lì yii: «Ti nín nìn péé péé ki dɔ́miń bi gíiǹ animbil ŋin ki ŋá ti-kutukubinee, an pu ní bi cáań-ti doo kí sàaǹ-ti án bà-ti, kí fōō ti-mammu ní kí dū-ti kí ŋá iyumbu.» 19 Bi làá kɔ́ee, ní ki sútì ki pìl̄ Jooseefi tɔntɔŋkpiliuee kipunyɔkɔpu ki sòon̄ nì u. 20 Bi nìn lī yii: «Ti gbāam̀-si, ukpil! Ti nìn pée dɔ́miń doo ki dá tijin. 21 Ti nìn fàtīi kùǹ ki bàn̄ laaba kunyeeu mɔ́ ti làá dòon̄ ki gútì ti-kutukubee, báà ŋma nimbiliŋ nì ŋi-nyɔkɔm kā u-kutukuun. An puee ti fātìi gíiǹní animbil gbanti. 22 Ti gíti ŋúbiń animbil aba mun kí dā tijin. Di sá taa nyí un di yaa nìn dū ti-nimbiliŋ ki gíiǹ ki ŋá ti-kutukubinee.» 23 Ní utɔntɔŋkpilee kíí-bi yii: «Yàntīmaan ni-pɔbiliŋ ń nīn sɔ̀m̀, ní taa fàŋkì tiba. An sá ni-Nimbɔtiu, ni-baa Nimbɔtiu di dū tigaajati ki ŋá ni-kutukubin. Ni-nimbiliŋee nìn kɔ́ m-ŋaan.»

U sòon̄ nì bi míǹ ki dóòyee ní ki cūtìi nyántìń Simeeyɔn ki tīī-bi. 24 Ní utɔntɔŋkpilee cáá-bi ki kɔ́ǹ Jooseefi dumpu, ki tīī-bi nnyim bi fíntì bi-taaŋi, ní ki tīī bi-mammu timool. 25 Ní bi bɔ́ntì tiwampɔkaal tin bi cáań kí pɔ̄ Jooseefee ki yóoǹ kí wàatī ú nín bàń kuwiŋkuluu, kun puee bi nìn gbìl̄ yii niin ní bi làá jī tijin. 26 Ŋyunti ŋun Jooseefi bāań mmɔŋkee, ní bi yōoǹní bi-wampɔkaati ki cūtì u-cee ki gbāaǹ u-nimbiin ní ki dūu tīī-u. 27 Ní Jooseefi jáam̀-bi ki bālifì bi-gbampɔŋŋu pu, ní ki bí-bi yii: «Ni-baa utikpil un bɔti ni nìn sòon̄ m-ceeyee pɔ̄ɔ̄ tiŋanaaa? U gbíntìi dáá bí dimaŋfalinaaa?» 28 Ní bi kíí-u yii: «Iiin, a-tɔntɔnliu ti-baa pée pɔ̄ɔ̄ ní. U dáá gbíntìi bí dimaŋfalin.» Bi lī mimmee ní ki fātìi tí gbāaǹ u-nimbiin. 29 Jooseefi yáatì ki ká Beenjameen, u-naal u nì un pēē dinabiilee ní ki bí yii: «Ni-naal ujoolkaa un bɔti ni nìn sòon̄ nì mee sɔ̀ɔɔ?» Ní ki gíti kútì ki lī yii: «Unaacimpɔɔn, Unimbɔti ń bìin̄ a-boon.»

30 Jooseefi nín ká u-naal mimmee, ní an kɔ́-u tikpil ní waa ti ŋūǹ kí cúú u-ba nnyinnyim ń taa nyā, ní u ŋá malaa ki kɔ́ u-diikun ki súń. 31 U súń ki dóò ki fíntì u-nimbiin ki nyánnée, ní ki cúú u-ba ní ki bí yii bí yóoń-bi tijin. 32 Ní bi gāntì Jooseefi sambil di-ba ní ki gāntì u-nabiyaamu bi-ba ní ki gāntì Eejipiti yab bin dɔ́miń kí jēe mun bi-ba. Di sá yii Eejipiti yab kaa nìn ŋūǹ bi nì Eebru yab ń kpāfìí jī disambibaantiilin. An nìn sá Eejipiti yab cee dikoobil ní. 33 Ní bi kāaǹ Jooseefi nabiyaamu u-nimbiin ki túĺ-u, bi kā ki dī tɔb ki nóó nì bi nín kpíǹ tɔb puee, ki kíĺ ujipɔŋkpil ki tin kátì un jóol̀ dibiil puee, ní bi kā ki kpèé tɔb, ní an ŋá-bi bitii. 34 Ní Jooseefi yāntì bi lēē tijin tin bi ŋá ki tɔ́kɔǹ u-nimbiinee ki yākatì-bi. Bi nín yākatì báà ŋma tijin miŋyee, u yāntì bi tīī Beenjameen míǹ miŋmoo pu ní. Ní bi nì Jooseefi jíń ki nyùn̄ ndaam ki bál̀ ní an nyāatì-bi.