Disaŋkindi 10

Nnaabuniniiti: inaakitoon

1 Ti-Dindaan bí Mooyiisi yii: «Cù Faaroo cee, di sá man di pɔ́ɔkì u nì u-kpambaliŋ pɔbiliŋ kí ŋmā kí nyāntí m-maamaacidaanti bi-kansikin bí ká. 2 Ní si mun ń ká kí dāá māafì a-biyaamu nì a-naantiibi m nín dátì Eejipiti yab tafal puee nì m nín ŋá maamaacidaanti tin bi-tiŋkinee. Min làá yàntī ní béé yii man di sá ni-Dindaanee dee.»

3 Mooyiisi nì Aarɔn cūtìi ká Faaroo ní ki bí-u yii: «Ti-Dindaan Eebru yab Nimbɔtiu nín lī puee sèé: <Kí tin sāā ŋyunti ŋulɔŋu ní a làá gbèen̄ a-pɔɔgbifiŋŋu kí sìntī a-ba taapu kí tīī-mi ní? Yàntī m-nibul ń nyā kí cùú jāam̀-mi. 4 A yaa yíì kaa yāntì m-nibul nyáńee, fool m làá fu tɔ̄ń inaakitoon a-tiŋki kɔkɔ pu. 5 I làá dāan̄ kí kpátí kí bìin̄ kitiŋ kɔkɔ pu bí taa ti wāl̀-kì. I làá dāá ŋmɔ́ ki céetí tin nìn kíǹ utaaja kaa bíil̀ee, nì isufi in bí tisatinee. 6 Inaakitoon làá dāan̄ kí gbí a-diiŋŋin nì a-kpambaliŋ kɔkɔ diiŋŋin nì Eejipiti yab kɔkɔ diiŋŋin. Doooo a-naanjab ki dāa dūu sāā a-baabi, bi nín kíĺ ki bí kitiŋ pu ki dāa dūu sāā díǹ nee, baa láá ká an bɔti juti ki ká.»

Mooyiisi lī mimmee ní ki nyáń Faaroo cee ki búntì. 7 Faaroo kpambaliŋ bí-u yii: «Kijapaai nee làá nīn pée cāabìń-ti mbusu ní. An puee yàntī binib nee ń nyā kí cùú jāam̀ bi-Dindaan bi-Nimbɔtiu. Aa ká yii an bíi nàantí ti-tiŋkaaa?» 8 Ní bi fātìi yíiń Mooyiisi nì Aarɔn Faaroo cee, ní u bí-bi yii: «Nín̄ cámaan! Ní cùú jāam̀ ni-Dindaan ni-Nimbɔtiu. Ama, bilab nì bilab di cá ní?» 9 Ní Mooyiisi kíí-u yii: «Ti nì ti-nipɔmbi nì ti-jaŋkpilib nì ti-nimpunaatiibi nì ti-jipɔmbi nì ti-bisalib nì ti-ŋoobui nì ti-piii nì ti-naai kɔkɔ di làá cù. Kun puee an sá ti-Dindaan jiŋaaliu ní ti làá cùú jī kí tīī-u tinyool.» 10 Ní Faaroo bí-bi yii: «Baaa! M yaa yāntì ni nì ni-nimpoobi nì ni-biyaamu búntèe, ni-Dindaanee lafun bí ni-cee! Ni cáá ilandɔkɔkpiti páaa! 11 M yíì kpataaa! Bininjab baba ń cùú jāam̀ ni-Dindaan, kun puee kun ni mēē-mee dee.» U lī mimmee ní bi jìn̄-bi Faaroo cee ki nyántì.

12 Ní ti-Dindaan bí Mooyiisi yii: «Tàntī a-ŋal Eejipiti tiŋki pu inaakitoon ń dāan̄ kitiŋ pu kí ŋmɔ́ kí céetí kitiŋ pu mooti kɔkɔ, nì tin kɔkɔ kíǹ utaaja kaa bíil̀ee.» 13 Mooyiisi tāntì u-ŋal Eejipiti tiŋki pu, ní ti-Dindaan yāntì kubuŋu kubɔ nyánní ŋwìiń nyalaŋki pú ki jítì kitiŋee pu ŋwiimpu nì kunyeeu kɔkɔ. Kutaa wúntèe ní kubuŋuee cáań inaakitoon. 14 Ní i dɔ́miń ki gbí kitiŋ kɔkɔ pu laaba kaa kíǹ. I nìn dɔ́miń ki wīikí tikpil tikpil, baa láá ká an naakitooŋyee wíiŋŋu míǹ dalba, kaa làá gíti ká míǹ mun dalba. 15 I kpátìi bīiǹ kitiŋ kɔkɔ pu bɔ̀mmm ní baa ti wāĺ-kì. Ní i ŋmɔ́ ki céetì kitiŋee pu mooti nì isufi in nìn kíǹ utaaja kaa bíil̀ee biliŋ. Kumɔsɔŋu kaa nìn kíǹ kitiŋ pu, míǹ ní kufaasɔŋ kaa nìn kíǹ busubu pu tisatin nì Eejipiti tiŋki kɔkɔ poon^a.

16 Niin niin ní Faaroo tú bi yíiń Mooyiisi nì Aarɔn ní ki bí-bi yii: «M yīntiǹ ni-Dindaan ni-Nimbɔtiu ki yīntiǹ ni mun. 17 Ní gíti dū m-kpitii kí pɔ̄-mi min bí nee mun, kí mèè ni-Dindaan ni-Nimbɔtiu ú tí kàkatī ŋkúm tafadaaldi nee kí wàatī-mi.» 18 Mooyiisi nyáń Faaroo ceeyee ní ki mēē ti-Dindaan. 19 Ti-Dindaan nìn yāntì kubuŋkpaaŋŋu kubɔ nyánní ŋwìiń jeetilaŋki pú ki kpāā inaakitoon kɔkɔ ki cáa tɔ́ Tikati mɔɔl poon. Eejipiti tiŋki kɔkɔ poonee, baa nìn gíti kāntí unaakitoon báà ubambaanti. 20 Ama ti-Dindaan nìn pɔ́ɔkì Faaroo pɔbil, an yāntì waa nìn pú Isirayeel yab nsan bí nyā.

Nnaabuwawaati: Dibɔmbɔndi

21 Ti-Dindaan bí Mooyiisi yii: «Yòon̄ a-ŋal yilpu, dibɔmbɔndi ń dāá bìin̄ Eejipiti tiŋki pu, kí nīn gbìfì unil ń ŋmā kí gbēē-dì nì u-ŋal.» 22 Ní Mooyiisi yōoǹ u-ŋal yilpu, ní dibɔmbɔŋkpaandi diba dɔ́miń Eejipiti tiŋki kɔkɔ pu áli iwiin ita^b. 23 Iwiin ita gbanti poonee, Eejipiti yab báà ubɔ kaa nìn ŋúń ki wál̀ u-juti, kaa nìn ŋúń ki céefì u-taal ki nyáń. Ama ní laakin Isirayeel yab kóòyee wāĺ bɔ́mbɔŋ.

24 Ní Faaroo yíiń Mooyiisi ki bí-u yii: «Nín̄ cámaan! Cùú jāam̀maan ni-Dindaan. Ni ŋūǹ kí kpáaǹ ni-biyaamu. Ama ni-piii nì ni-ŋoobui nì ni-naai íǹ làá gbíntí doo.» 25 Ní Mooyiisi kíí-u yii: «Sii a-ba di làá tīī-ti tiwaŋkuti tin ti làá dūú ŋá mpèé saraau nì bisaraawɔkaabi kí tīī ti-Nimbɔtiueeee? 26 Ti làá kpáaǹ ti-waŋkuti, báà kubɔ kaa làá kíń. Di sá yii tiwaŋkuti gbanti kansikin ní ti làá tin lēē tin sá tí dūú ŋá saraabi kí tīī ti-Dindaan ti-Nimbɔtiuee. Taa láá nyí tin ní ti làá dūú ŋá saraabee, see ti yaa bàn̄ laakin ti cée.»

27 Ama ní ti-Dindaan mɔ̄tìi pɔ́ɔkì Faaroo pɔbil ní waa là kí pɔ̄ Isirayeel yab nsan bí nyā. 28 Ní Faaroo bí Mooyiisi yii: «Nyā m-cee doo! Á taa ti dāan̄ m-cee dalba dalba! Daliŋkin ní a yaa ti dɔ́miń ki yúl̀ m-nimbiinee, a làá kpú ní!» 29 Ní Mooyiisi kíí-u yii: «A nín lī puee, an ŋān̄! Maa làá ti dāan̄ kí yūĺ a-nimbiin!»