Disaŋkindi 11

Bi sòon̄ nnaabujoolkaa pu

1 Ti-Dindaan bí Mooyiisi yii: «M làá tɔ̄ń nnaabujoolkaa Faaroo nì Eejipiti yab pu. Míǹ boonee ní ú dāá nín yàntī ní nyā. U làá dāá jà-ni ní nyā doo talku. 2 Míǹ puee á sòoǹ nì Isirayeel yab, bininjab nì binimpoobi, báà ŋma ń mèè u-kɔŋkɔnnaatɔ sindaariya nì animbil kúti wanti.» 3 Ti-Dindaan nìn yāntì Isirayeel yab ká diyimɔɔl Eejipiti yab cee. Míǹ ní Faaroo kpambaliŋ nì Eejipiti yab kɔkɔ nìn tɔ́ Mooyiisi u-ba tiŋan Eejipiti tiŋkin.

4 Mooyiisi nìn bí Faaroo yii: «Pīlifì, ti-Dindaan nín lī puee sèé: <M làá jītí Eejipiti tiŋki poon kunyataasiiu búmbum. 5 Eejipiti tiŋki biseebiyaamu nninjabiyaamu kɔkɔ làá kpú, kí kíĺ sii Faaroo un kā dibeejal pu nee jipɔŋkpiliu kí tin cáá sāā uyumbunimpu un nà idee jipɔŋkpiliu, nì tiwaŋkuti kɔkɔ bipeepeekaamu. 6 Ikuŋkuunti làá dāá nīn tùm̀ Eejipiti tiŋki kɔkɔ poon ní dàii. Doooo nee, baa láá pée gbìl̄ míǹ ki ká jaanjaan, ki kpá kí gíti ká míǹ mun jaanjaan. 7 Ama Isirayeel yab kansikinee, baa làá gbìl̄ kibɔkɔ gbóol̀ unil àá kuwaŋkuluu gba. Niinee ni làá béé yii man ni-Dindaan ŋá digàntil Isirayeel yab nì Eejipiti yab kansikin.> 8 Niin ní a-kpambaliŋ bin kā nee làá dāan̄ m-cee kí gbàan̄ m-nimbiin ní kí bí-mi yii: <Sii nì a-nibul, nín̄ cámaan.> Míǹ boonee ní ḿ búntí.» Nì diŋuul ní Mooyiisi nìn nyáń Faaroo cee.

9 Ní ti-Dindaan gíti bi Mooyiisi yii: «Faaroo yaa kaa bíi pílifíǹ-nee, an sá ḿ ŋmā kí bùtī m-maamaaci tuŋkpaaŋŋi u-tiŋki poon ní.» 10 Mooyiisi nì Aarɔn nìn ŋá maamaaci tuŋkpaaŋŋi kupaau Faaroo nimbiin, ama ní ti-Dindaan pɔ́ɔkì u-pɔbil, ní waa yāntì Isirayeel yab nyáń u-tiŋkin ki búntì.