Disaŋkindi 12

Dilákatil jiŋaaliu

1 Ti-Dindaan bí Mooyiisi nì Aarɔn Eejipiti tiŋkin yii: 2 «Uŋmal un poon ni bí nee ń nīn sá-ni uŋmapeepeekaa iŋmal poon. U làá nīn sá-ni dibindi poon ŋmapeepeekaau ní. 3 Ní kpāfì Isirayeel samaau kɔkɔ kí sòoǹ nì bi yii: <Uŋmal nee poon iwiin saalaayee, kudicaŋu àá kunaakoou kamaa ń lēē dipibil àá diŋɔbil diba. 4 Kudicaŋu kubɔ nib yaa kaa náaǹ kí ŋmɔ́ kí dóó kuwaŋkuluuee kɔkɔ yaadalee, bí ká kudicaŋu kun pìlīǹ-bee yab bí sòoǹ kí gbìlīǹ tɔb kí béé bi-nib nyɔkɔm kí lēē kuwaŋkuluu kun bi làá ŋmā kí ŋmɔ́ kí dóó yaadalee. 5 Kuwaŋkuluu kun bi làá kpɔ̀ee máaǹ kí nīn sá uja ki cáá dibindi diba, ku-laaba ń taa nīn wɔ̀b̄. Án ŋūǹ kí nīn sá diŋɔbil àá dipibil. 6 Ní kpāafì kuwaŋkuluu gbanti áli uŋmal poon ŋwiin ŋubɔ kpá saalku dal. An joopɔŋkuee, Isirayeel samaau kɔkɔ ń kóoǹ kí kpāfì ní kudicaŋu kamaa ń kpɔ̀ ku-waŋkuluku. 7 Kudii kun kamaa poon ní ni kūū kuwaŋkuluu ki ŋmɔ́ee, ní dū fatiku kí ŋmìtī idɔ ili in pu punuu nákée nì ndɔ ŋun làl̄ punuu yilpuee. 8 Ní ŋɔ̄fì tinan gbanti, ní kunyeeuee, ní ŋmɔ́-tì nì kpɔnɔ un baa ŋá ŋkpɔnɔnyɔkɔee nì tifaal tin tūee. 9 Ní taa ŋmɔ́-tì tikaal, kí taa tɔ́kɔń-tì mun, ama ní ŋɔ̄fì-tì kí kpáaǹ diyil nì ayaka nì ina. 10 Ní taa ŋmɔ́-tì kí kíń fool. Tin yaa kíǹ kutaa wúntèe, ní dūú wà ŋŋmi. 11 Ni nín làá nīn bí min kí jī tijin gbantee sèé: ní gbìn̄ dambalab ni-cammu án cúú ni-wampeeŋkaati, kí táká ni-naatakaŋ, kí nīn ŋúb́ ni-kpandɔi ni-ŋaan, ní kí jī tijin gbanti malaa malaa. Dilákatil jiŋaaliu un ni làá jī kí tīī man ni-Dindaan tinyoolee dee.

12 «Kunyeeu gbantee, m làá dāá jītí Eejipiti tiŋkin kí kpɔ̀ Eejipiti tiŋki biseebiyaamu kɔkɔ, kí kíĺ binib kí dāá sāā tiwaŋkuti. M làá dāá dáaĺ Eejipiti yab waaŋi kɔkɔ tafal. Man di sá ni-Dindaan. 13 Ama adiin ŋin nimbi kóòyee, fatiku di làá nīn sá-ni diwundi. M yaa láa ká fatikuee ní ḿ lákatí ni-pu, ní nimbi ń ŋmátí ŋkúm tafadaaldi din m dūu tɔ́ Eejipiti yab puee^a.

14 «Ní dáań ŋwiin nee kí yóoń kí nīn téetí ŋu-pu, ŋú kpántí-ni jiŋaal ní nīn jīǹ ki tìì man ni-Dindaan tinyool. Jiŋaal gbanti ń kpántí-ni mara ní nīn jīǹ míǹ kí nīn pée cáa cá jaanjaan.»

Kpɔnɔb bin baa ŋá ŋkpɔnɔnyɔkɔee jiŋaaliu

15 Ní ŋmɔ́ kpɔnɔb bin kaa cáá ŋkpɔnɔnyɔkɔee iwiin iluli. Kí kíĺ ŋwimpeepeekaa dalee, bí taa ti ká ŋkpɔnɔnyɔkɔ ubɔ dumpu. Kí yòon̄ ŋwimpeepeekaa dal kí cáá sāā iwiin ilulee, un yaa ŋmɔ́ kpɔnɔ un bi ŋá ŋkpɔnɔnyɔkɔee, bí nyāntí-u Isirayeel nibul kansikin. 16 Ŋwimpeepeekaa dalee, ní kóoǹ kí kpāfì kí jāam̀-mi, ní ŋwinluluúti dal muee, ní tí kóoǹ kí kpāfì kí jāam̀-mi. Ní taa tɔ̄ ditundi diba ŋwiin gbanti, see tijin tin ni làá ŋá báà ŋma ń jēe baba.

17 «Kpɔnɔb bin baa ŋá ŋkpɔnɔnyɔkɔee jiŋaaliu sá ní nīn jīǹ ki téetí ŋwiin ŋun m nìn nyántì m-nibul Eejipiti tiŋkinee ní. Ní nīn jīǹ jiŋaal gbanti kí nīn pée cáa cá jaanjaan. Án nīn sá-ni dibɔkpaal din kaa kpántée. 18 Kí yòon̄ uŋmapeekaa poon ŋwiin ŋubɔ kpá saalku dal kujoopɔŋ kí tin cáá sāā iwiin mmuŋku nì ŋubɔ dal kujoopɔŋuee, ní taa ŋmɔ́ kpɔnɔb bin bi ŋá ŋkpɔnɔnyɔkɔee. 19 Bí taa ká ubɔ dumpu ŋkpɔnɔnyɔkɔ kí cáá sāā iwiin iluli. An yaa sá unicaan àá Isirayeel yab ubɔ di yaa ŋmɔ́ kpɔnɔ un poon ŋkpɔnɔnyɔkɔ ŋmàl̄ee, bí nyāntí udaan Isirayeel nibul kansikin. 20 Ní taa pée jī tijin tin poon bi ŋá ŋkpɔnɔnyɔkɔee báà tiba. Báà laakin ní ni yaa pée bàn̄ ki kóòyee, ní taa ŋmɔ́ kpɔnɔb bin poon bi ŋá ŋkpɔnɔnyɔkɔee^b.»

Dilákatil jiŋaaliu jinti bɔ́ntitam

21 Ní Mooyiisi yíiń Isirayeel kpilib kɔkɔ ki kpáfì, ní ki bí-bi yii: «Kudicaŋu kamaa ń cùú nyàab̀ dipibil àá diŋɔbil kí kpɔ̀ kí jī Dilákatil jiŋaaliu. 22 Ní lēēmaan tifaapibiti tin bi yíì isɔpee bambiliŋ kí ŋá kibɔŋ kí dūu sēē kuwaŋkuluu kun ni kūū ki lēē fatiku ki ŋá disambil poonee. Ní dūú ŋmìtī idɔ ili in pu punuu cɔ́ee nì ndɔ ŋun làl̄ punuu yilpuee. Ni yaa ŋá mimmee, ubɔ ń taa ti nyā kí cáá sāā kutaafaau. 23 Ti-Dindaan làá jītí kí dáaĺ Eejipiti yab tafal. Ama u yaa ká fatiku mpunyɔmu puee, u làá jītí ní kaa làá yàntī ŋkúm tafadaaldi^c ń kɔ́ ni-ciŋŋin. 24 Án nīn sá dibɔkpaal din làá nīn bí ki cá jaanjaanee ki tīī ni nì ni-biyaamu. 25 Ni yaa láa bàn̄ ki kɔ́ kitiŋ kin ti-Dindaan pōoǹ kí tīī-nee poonee, ní dāá nīn ŋáań akoobil gbanti. 26 Ni-biyaamu yaa láa bālifì-ni yii akoobil gbanti taapu sá yii bee, 27 ní dāá kíí-bi yii: <An sá saraa un ti ŋáań ki tìì ti-Dindaan Dilákatil jiŋaaliu yuntiŋuee ní. Ŋyunti ŋun ti-naanjab nìn bí Eejipiti tiŋkinee, ti-Dindaan nìn kūū Eejipiti yab. Ama u nìn lákatì timbi diiŋŋi pu kaa yúl̀, ní ki wúń ti-dicaŋŋi pu.>»

Niinee ní Isirayeel yab tātìi gbāaǹ ki jáam̀ ti-Dindaan. 28 Míǹ boonee ní bi búntì ki cūtìi ŋá min ní ti-Dindaan tùkū Mooyiisi nì Aarɔn yii bí ŋée.

Nnaabujoolkaa: Eejipiti yab biseebiyaamu nninjabiyaamu kúm

29 Kunyataasiiuee ní ti-Dindaan kūū Eejipiti tiŋkin mbiseebiyaamu nninjabiyaamu kɔkɔ, ki kíliń Faaroo un kā dibeejal puee jipɔŋkpiliu ki tin cáa sāā usarkadaan un kā u-sarkadiikunee jipɔŋkpiliu nì tiwaŋkuti kɔkɔ bipeepeekaamu njamu. 30 Faaroo nì u-kpambaliŋ nì Eejipiti yab kɔkɔ yíkì kunyeeuee, dituweel fōō ki píĺ kitiŋ kɔkɔn dàii, kun puee dicindi diba nìn kpá unil kaa kpíì di-poon. 31 Kunyataasiiu gbantee ní Faaroo yíiń Mooyiisi nì Aarɔn ní ki bí-bi yii: «Yīkì kí nyāmaan m-tiŋkin, ni nì Isirayeel yab kɔkɔ! Cùú jāam̀maan ni-Dindaan kii ni nín bālifì puee! 32 Yòon̄ kí kpáam̀maan ni-waŋkuti kɔkɔ kii ni nín bālifì puee kí nīn cámaan. Ní mèèmaan kí bìin̄ m-pu.» 33 Eejipiti yab dākafì yii bi làá kpú kí dóó ní, an pu ní bi nìn jì Isirayeel yab bí nyā bi-tiŋkin malaa malaa. 34 An puee Isirayeel yab nìn yíkèe, bi nìn tú bukpɔnɔsaa bun kaa jɔ́m̀ee ní, ní ki dū kikabiki kin bi cáa nùkù bukpɔnɔsaayee ki póob́ abɔkutin ki dūu būkuǹ.

35 Isirayeel yab nìn ŋá kii Mooyiisi nín nìn tùkū-bi puee. Bi nìn mēē Eejipiti yab sindaariya nì animbil wanti nì tiwampeeŋkaal.

36 Ti-Dindaan nìn yāntì Isirayeel yab ká diyimɔɔl Eejipiti yab cee, di sá bi nìn kíí ki tīī Isirayeel yab tin bi mēēyee. Míǹ ní Isirayeel yab nìn dī ki fúkúl̀ Eejipiti yab^d!

37 Isirayeel yab nìn yíkì Ramseesi tiŋkin ki búntì Sukooti tiŋkin. Bininjab nìn sá kii kutukub alaataa aluu nyɔkɔm ní ki còom̄ ataa pu. Baa nìn kàan̄ ki kpáaǹ mbiyaamu nì binimpoobi. 38 Biniyaŋyambi tikpil mun nìn nóó-bi ki búntì ní bi nìn cáá tipicaŋkpun nì tiŋɔcaŋkpun nì tinacaŋkpun tikpil. 39 Bi nìn dū bukpɔnɔsaa bun bi nìn cáań Eejipiti tiŋkinee ki ŋá kalaabi bin kaa cáá ŋkpɔnɔnyɔkɔee, di sá yii bi nín nìn jìn̄-bi Eejipiti tiŋkinee puee, baa nìn ŋúń ki kāl̀ ki cíitì bukpɔnɔsaayee ń jɔ̄m̀. Baa nìn ŋúń ki bɔ́ntì tijin tin bi làá nīn jīǹ ki còom̄ nsanee.

40 Isirayeel yab nìn kāl̀ Eejipiti tiŋkin abin alaataa anaa nì mmuŋku nì saalaa ní^e. 41 Ŋwiin ŋun ní an sāā abin alaataa anaa nì mmuŋku nì saalaa gúlgulee ní ti-Dindaan nibul nyáń Eejipiti tiŋkin ki nóó tɔb akiti akiti kii bijanjaliibee. 42 Ti-Dindaan nìn cíitì kunyeeu gbanti kɔkɔ ní ki nyántì Isirayeel yab Eejipiti tiŋkin. An puee, kí nīn cáa cá jaanjaanee, Isirayeel yab máaǹ kí nīn kàal̀ kunyeeu gbanti kí taa gèeǹ, di sá yii ti-Dindaan di yì kunyeeu gbanti.

Dilákatil jiŋaaliu marab

43 Ti-Dindaan bí Mooyiisi nì Aarɔn yii: «Kpèè, Dilákatil jiŋaaliu marab sèé:

<Unicaan báà ubɔ kaa cáá nsan kí jī jiŋaal gbanti jinti.

44 <Á gíí uyumbu un a dá nì animbilee dikpancandi kí wàatī ní ú nín jī jiŋaal gbanti jinti.

45 <Unicaan un kɔ́-see nì upaadaan kaa cáá nsan kí jī jiŋaalee jinti.

46 <Ní nīn kā adiinni ní kí ŋmɔ́ jiŋaalee nanti. Ubɔ ń taa kpáaǹ tinan kí nyā mmɔŋki.

<Ní taa wīī kuwaŋkuluuee kpabil báà diba^f.

47 <Isirayeel samaau kɔkɔ ń jī jiŋaal gbanti.

48 <Unicaan un kɔ́-nee yaa là kí jī Dilákatil jiŋaaliu kí tīī ti-Dindaan tinyoolee, ú gíí u-dicaŋku yab bininjab kɔkɔ akpancan. Niinee udaan ŋūǹ kí jī jiŋaal gbanti kii Isirayeel yab ntindambiyaamuee.

<Ama un kaa gíí dikpancandee ń taa jī jiŋaal gbanti.

49 «<Marab gbantee ń nīn sá ki tīī Isirayeel yab, kí nīn sá ki tīī binicambi bin kóò ni-tiŋkinee.>»

50 Isirayeel yab kɔkɔ nìn ŋá kii ti-Dindaan nín nìn tīī Mooyiisi nì Aarɔn mara yii bí ŋá puee.

51 Ŋwiin gbanti ní ti-Dindaan nyántì Isirayeel yab Eejipiti tiŋkin bi nóó tɔb akiti akiti kii bijanjaliibee.