Diteetil Gbɔŋku 20

Kujaau marab

1 Ni yaa nyáń kí jáǹ ni-nannanliibi ní ki yaa ká yii bi-taamui nì bi-tɔrɔkub nì bi-janjakitil wīikí ki jítiǹ ni-yabee, ní taa fàŋkì. Di sá yii ti-Dindaan ni-Nimbɔtiu un nyántìń-ni Eejipiti tiŋkinee bí ni-cee. 2 Ni yaa láa bɔ́ntì kí nīn cée, usaraaŋakpil ń nyā kí sīĺ samaa nimbiin kí sòoǹ nì samaa kɔkɔ. 3 Ú dāá sòoǹ nì bi yii: «Isirayeel yab, pīlifìmaan. Díǹ nee, ni làá nyā kí jáǹ ni-nannanliibi. Ni-wunti ń taa yɔ̀tī. Ní taa fàŋkì-bi kí taa nyɔ̀ ŋkpatim bi-nimbiin. 4 Di sá yii ti-Dindaan ni-Nimbɔtiu di bí ni-cee ní ki làá jáǹ ni-nannanliibi, kí tīī-ni dijajil.»

5 Míǹ boonee ní bigbaŋŋmaliibi ń sòoǹ nì samaa kɔkɔ ní kí bàlifì yii: «Ubɔ bí ni-kansikin ki máń kudipɔŋ kaa láá kɔ́-kuɔɔɔ? Ubɔ yaa bée, udaan ń nīn gítí u-diikun. An yaa kaa sá míǹ, u ŋūǹ kí tin kpúń dikɔ̀ndin ní ubɔ fám ń dāá pɔ̀ntī u-diiku gbanti. 6 Ni-kansikin ubɔ kùn̄ fiinyi kpaabu kaa láá kītì bu-biliŋaaa? Ubɔ yaa bée, ú nīn gítí u-diikun. An yaa kaa sá míǹ, u ŋūǹ kí tin kpúń dikɔ̀ndin ní ubɔ fám ń dāá jī u-fiinyi kpaabu gbanti. 7 Ubɔ cáá bɔɔn kaa láá cáá-uaaa? Ubɔ yaa bée, ú gítí u-diikun. An yaa kaa sá míǹ, u ŋūǹ kí tin kpúń dikɔ̀ndin ní ubɔ fám ń dāá cáá u-bɔɔn gbanti.» 8 Ní bigbaŋŋmaliibee ń gíti bàlifì tin bí nee yii: «Ubɔ bí ki sá ufaantija u-mul kaa bōotí mmɔ́ɔnaaa? Udaan yaa bée, ú nīn gítí u-diikun, án nín làá ŋá pu ú taa yɔ̀tī u-nabiyaamu wuntee.» 9 Bigbaŋŋmaliibi yaa sòon̄ nì samaayee míǹ ki dóòyee ní bí lēē bijanjakpilib bin làá nīn līī samaa nyɔkɔpuee.

10 Ni yaa cūtì kí já nì kitiŋ kiba nibee, ní péé péé kí sòoǹ nì bi kí nyàab̀ ŋgbansɔŋfi ń nīn bí ni-kansikin. 11 Bi yaa gbìl̄ ki tīiǹ-ni ki yāntì ni kɔ́ bi-tiŋkinee, bí kpántí ni-yumbui kí nīn kíǹ ki tūǹ ditundi ki tìì-ni. 12 Ama bi yaa yíì kaa là ŋgbansɔŋfi ń nīn bí ni nì bi kansikin, ní ki yíkìi bíi jáà nì nee, ní màntīí tū bi-tiŋki kí jàkà-kì. 13 Ti-Dindaan ni-Nimbɔtiu yaa dū-bi ki ŋá ni-ŋaanee, ní kpɔ̀ bininjab kɔkɔ. 14 Ama binimpoobi nì mbiyaamu nì tiwaŋkuti nì tin kɔkɔ pée bí kitiŋ gbantinee, ní yòon̄. Ni-jajil wanti dee. Nimbi di yì kí jī tin kɔkɔ ti-Dindaan ni-Nimbɔtiu fōō ni-nannanliibi ŋaan ki dūu tīī-nee. 15 Míǹ ní ni máaǹ kí ŋá ntimu mun kɔkɔ dátiǹ-ni, kaa kútì ntimu mun sá ní fōō kí nīn kíǹ ki yèe.

16 Ama an yaa kíǹ anibul ŋin timmu ti-Dindaan ni-Nimbɔtiu làá dūú tīī-ni ní nīn kíǹ ki yèe poonee, ní kpɔ̀ tin kɔkɔ pée cáá kufoouee kí taa kíń tiba. 17 An puee ní dāá kpɔ̀ kí céetí Eeti yab nì Amɔɔr yab nì Kanaan yab nì Peeriisi yab nì Eefi yab nì Jeebusi yab kii ti-Dindaan ni-Nimbɔtiu nín kpáafì-ni puee. 18 An yaa kaa sá mimmee, ni làá fōō bi-waatootii tuuŋŋi ŋin sá ntimbiilee. Ni mun yaa ŋá mimmee, ni yīntiǹ ti-Dindaan ni-Nimbɔtiu dee.

19 Ni yaa láa bíi jáà nì kitiŋ kiba ní ki lùkū gíb́-kì, ní ki kpēē yii an sá ní kàl̄ niin kí yúntí ní kí nín ŋmā kí já kí fōō-kèe, ní taa yòon̄ ni-ceekub kí nīn gà isufi in sí niinee ki féeń, kun puee ni ŋūǹ kí ŋmɔ́ i-biliŋ. Ní taa pée gāā-i kí fá. Isufi in yú akpaannee kaa sá binib ní nīn bíi jáà nì i! 20 Ama ni ŋūǹ kí gàatì isufi in kaa lòoǹ abil ŋin bi ŋmóòyee kí dūú ŋá ni-jaaku tuuŋŋi kí nīn cí ŋyunti ŋun ní kitiŋ kin ni cūtì kí já kí fōōyee làá kɔ́ ni-ŋaanee.