Diteetil Gbɔŋku 21

Nnikpaakoon bɔti

1 Tí dūú ŋmàntī yii kitiŋ kin ní ti-Dindaan ni-Nimbɔtiu làá dūú tīī-nee poonee, ni ká dinikpil dɔ̄ kusaau kubɔn, ní naa nyí un di kūū-uee. 2 Ni-tindaŋkpilib nì ni-bɔsoonliibi ń cù kí ŋmàntī kí yòon̄ dinikpilee nín dɔ̄ laakiŋyee kí cáá cùnnì ntimu mun māntìi tú-dèe, 3 kí kpèè kitiŋ kin di pìlīǹ dinikpil gbantee. Niinee ní kitiŋ gbanti kpilib ń nyàab̀ kinasalii kin kaa láá kùn̄ tikpaal àá ki dáaĺ tɔrɔku ki kée, 4 ní kí cáá-kì kí cùnnì ditinjal din pu baa kùn̄aaa, kaa búĺ tiba muee, laakin mbun ŋun kaa fóotí jaanjaanee bée. Niinee ní bitindaŋkpilibee ń nyīī kí gíí kinasaliiyee sil kí tɔ̄ mbunee ni.

5 Ŋyunti gbantee Leefii yab bisaraaŋaliibee ń nyā kí yūĺ nyɔkɔpu. Di sá yii bíǹ ní ti-Dindaan ni-Nimbɔtiu lēē bí nīn tūǹ u-tundi ní kí nīn mèé-u ki bìintí binib pu. Bíǹ di máaǹ kí nīn sòoǹ kunikpɔŋkpɔkɔu nì ubɔ yaa fáá u-juti ki tīī-u tiweendee bɔti. 6 Niinee ní kitiŋ kin pìlīǹ dinikpilee kpilib ń fíntí bi-ŋalii kí sìtī dinasapɔmbil din sil bi nyīī ki gííyee pu, 7 ní kí lì yii: «An kaa sá timbi di kūū unil nee. Ti-nimbiliŋ kaa ká un kūū-uee mun. 8 Míǹ puee ti-Dindaan, dūú pɔ̄ a-nibul din ní a fīīyee, kí taa dū maanyiiba nee kúm kpuulool kí túń a-nibul Isirayeel yab pu». Niinee ní Unimbɔti ń fíntí nnikpaakoon gbanti kpitii.

9 Nimbee, ni máaǹ kí ŋá min fáatì ti-Dindaanee, ní kí nyā maanyiiba kúm kpuuloolin.

Usapɔɔn un bi cúuń dikɔ̀ndinee camɔndi

10 Ni yaa cūtì dikɔ̀ndi ní ti-Dindaan ni-Nimbɔtiu dū ni-nannanliibi ki ŋá ni-ŋaan ní ni jáń ki pɔ́ɔkiǹ-bi ki cúuń binib dikɔ̀ndin, 11 ní ni-kansikin ubɔ dáań ki ká yii bin ni cúuńee kansikin, usapɔɔnnyaan ubɔ bí ki kɔ́-u, ní u bàà là kí cáá-uee, 12 u ŋūǹ kí yòon̄-u kí cáá cùnnì u-dumpu. U yaa bàn̄ee ú yàntī unimpuee ń kòol̀ dibaakpandi, kí wéetí u-ŋaŋŋati, 13 ní kí lēē u-wampeeŋkaati tin u pēeń u-dumpuee kí bíĺ, ní kí nīn bí uninjee dumpu. Míǹ boonee ní ú dū uŋmamɔn kí sɔ̄ u-na nì u-baa pu. Unimpuee yaa ŋá míǹ ki dóòyee, udaan ŋūǹ kí dòon̄ nì u, ní kí dū-u kí kpántí u-nimpuu.

14 Ama boonee, udaan yaa ká yii unimpuee bɔti kaa ti mɔ̄ǹ-uee, ú yàntī-u ú búntí laakin u yaa lèe. Waa dāa ŋūǹ kí dū-u kí nyāfì, kaa dāa tí ŋūǹ kí dū-u kí kpántí u-yumbuu ŋyunti ŋun ní u cáá-u ki dóòyee.

Ujipɔŋkpil fakal bɔti

15 Uninja ubɔ di yaa bí ní ki cáá binimpoobi bili, ní ki néeń ubɔ ki jítiǹ un kíǹee, ní binimpoobee liitil yaa màl̄ mbininjabiyaamu ní an yaa ŋá yii unimpu un waa néeńee biki di sá kikpiliiyee, 16 an yaa láa bāań ú yàkatī u-gaajawanti kí tīī u-biyaamuee, waa máaǹ kí dū dijandi din sá ujipɔŋkpil jandee kí tīī u-nimpuu un u néeńee jipɔɔn kí yàntī un waa néeńee yɔu un di baasii sá ukpilee. 17 U máaǹ kí béé yii unimpu un waa néeńee jipɔɔn di lafun sá u-jipɔŋkpiliu tiŋman pu, ní kí dū u nín làá yàkatī u-jipɔmbi kɔkɔ u-gaajawanti puee mili pu kí tīī-u. Di sá yii kibiki gbanti di sá u-biseebiki kin dàkā u-ninjatee, ní ki máaǹ kí fōō kibipeepeekaai fakal.

Kibiki kin tafal pɔ̄ɔ̄yee bɔti

18 Ubɔ yaa cáá kibiki ní kì cáá ntafapɔn nì ŋyipɔn, kaa tɔ́ ki-baa nì ki-na, ní báà min kɔkɔ bi sòon̄ nì kì tibɔn nì timan ki dáaĺ ki-tafalee kaa fātìi tɔ́ee, 19 ki-baa nì ki-na ń cúú-kì kí cáá cùnnì bitindaŋkpilib bin kā bi-tiŋki punyɔkɔpuee cee. 20 Bí tùkù bitindaŋkpilibee yii: «Ti-jipɔɔn nee cáá ŋyipɔn nì ntafapɔn. Waa tɔ́-ti. Kun u pée ŋūǹee di sá binimpoobi dimɔnnil nì ndaam dinyɔl.» 21 Niinee ní kitiŋ gbanti yab bin sá bininjabee ń yāŋkì-kì ataŋkpee kí kpɔ̀. Ni máaǹ kí nyāntí ikpiti ni-kansikin. An yaa ŋá mimmee, Isirayeel yab kɔkɔ làá gbìl̄ tin jítèe ní kí fàŋkì.

Unil un bi lúntì ndɔ pu u kpíìyee bɔti

22 Ubɔ yaa yīntì ní u-yìntitam gbanti puee ni kūū-u ki dū u-wunti ki lúntì ndɔ puee, 23 ní taa yàntī kunyeeu ń mɔ́ dinikpilee ndɔ pu. Ní síb́-u ŋwiin ŋun ní ni kūū-uee, di sá yii un kamaa bi yaa lúntì ndɔ puee dátiń Unimbɔti busuu kitiŋ pu ní. Ní nīn nyí kí taa kɔ́ǹ kitiŋ kin ti-Dindaan ni-Nimbɔtiu làá dūú tīī-ni ní nīn kíǹ ki yèe tijɔkɔndi^a.