Samiyeel Peepeekaa 9

Saayuul nì imansal bɔti

1 Ŋyunti gbantee, Beenjameen tiŋkinee, uninja ubɔ nìn bí ki sá ubaatandaan bi yíì-u yii Kiisi. Bi nìn yíì u-baa yii Abiyeel ní ki yíì u-naanja yii Seeroor. Bi nìn yíì Seeroor baa yii Beekoorati ní ki yíì u-naanja yii Afiya. 2 U nìn cáá jipɔɔn ubɔ bi yíì-u yii Saayuul. U nìn ŋān̄ unaacimpɔɔn an kaa cáá bí lì. Isirayeel tiŋkinee, un nìn ŋān̄ ki bàn̄-uee kaa bí, ní u nìn fɔ̀kɔǹ bi-kɔkɔ.

3 Dalbee, Saayuul baa Kiisi mansalii wáŋkì, ní u bí u-jipɔɔn yii: «Yòon̄ utɔntɔnli ubɔ kí páań a-boon ní cùú nyàab̀ imansal.» 4 Saayuul nì utɔntɔnlee yìin̄ Eefiraayiim timmu mun bí ajoon puee, nì Salisaa timmun kaa ká-i. Boonee ki nín cá Saaliim timmun ki yìin̄ kaa ká-i, ní ki yìin̄ Beenjameen timmun kaa ká-i. 5 Bi bāań Suufi tiŋkinee ní Saayuul bí utɔntɔnlee yii: «Tí gítí mmɔŋki, an yaa sá fám m-baa làá súntí imansal pu kí nīn bíi yáliŋkí ti-pu.» 6 Ní utɔntɔnlee kíí-u yii: «Unimbɔti bɔnaatiliu ubɔ bí kitiŋ nee poon! U sá unil un pu bi nyée ní. Tin u yaa lēe, see á ká míǹ deedee. Tí cùú ká-u, an yaa yíì, u làá dàkà-ti dijandi din sá tí túĺ kí nīn nyàab̀ee.» 7 Ní Saayuul kíí-u yii: «Too, tí cù. Kin ba ní ti làá tin pɔ̄ Unimbɔti bɔnaatiliu gbanti? Di sá yii ti-kpɔnɔb dóò kulooun, ní taa ti cáá tiwampɔkaal tiba mun kí tin pɔ̄-u, tiba nì tiba kaa ti kíǹ ti-cee.» 8 Ní utɔntɔnlee bí yii: «Man cáá kijitɔŋwaai kiba m-cee doo. M làá dū-kì kí tīī Unimbɔti bɔnaatiliu ú dàkà-ti nsan ŋun sá tí túĺee.» 9 Njaminee Isirayeel yab yaa nìn cá Unimbɔti cee kí bàlifèe, bi nìn lì yii: «Dāam̄maan tí cù un wāĺee cee ní.» Di sá yii bi nìn yíì bin ti yíì díǹ Unimbɔti bɔnaatiliibi nee yii bin wāĺee ní. 10 Ní Saayuul bí u-tɔntɔnliuee yii: «A nín lī puee ŋān̄, tí nīn cá.»

Ní bi páaǹ tɔb pu ki búntì kitiŋ kin poon Unimbɔti bɔnaatiliuee kóòyee. 11 Bi bíi dàb̀ kí kɔ́ kitiŋinee ní ki tú bisapɔmbi cá ŋkpin, ní bi bālifì-bi yii: «Doo ní uninja un wāĺee báaa?» 12 Ní bisapɔmbee kíí-bi yii: «U bāań an kaa yúntì ní ni mun dūu bāań nee. Ama ní ŋá malaa, u dɔ́miń kitiŋin díǹ. Di sá yii u cáá saraa ubɔ ki làá ŋá kí tīī samaa díǹ nsaraaŋapaan pu. 13 Ni yaa pée kɔ́ kitiŋin kpalaayee, ni làá ká-u kí wàatī ú nīn nín jɔ́ḿ nsaraaŋapaan laŋki kí jī tijin. Di sá yii u yaa kaa bāań, samaa kaa máaǹ kí jī, kun puee úǹ di mèé kí bìin̄ saraa jinti pu ní bin bi yíińee ń nín jī. Míǹ puee nín̄ cámaan kɔŋkɔnnee, ni làá tin yìkin̄-u.»

Samiyeel nì Saayuul kpáfì

14 Ní bi nín jɔ́ḿ kitiŋin. Ŋyunti ŋun bi làá kɔ́ kitiŋinee, Samiyeel mun nyēē bi-nimbiin kí nīn cá nsaraaŋapaan pu dee.

15 Too, kutaa ń wúntí Saayuul ń bà Samiyeel ceeyee, ti-Dindaan tùkū Samiyeel yii: 16 «Fool ŋyunti nee deedeeyee, m làá fu yàntī Beenjameen naakookun niliu ubɔ ń dāan̄ a-cee. Á fu sìtī u-yil pu ŋkpam kí kàan̄-u m-nibul Isirayeel yab pu dibeel. U làá dāá fīī m-nibul Isirayeel yab Fiiliistii yab ŋaan. Di sá yii m ká m-nibul falaau ki gbìl̄ di-yaliŋkii.» 17 Ŋyunti ŋun Samiyeel ká Saayuul páaǹnée ní ti-Dindaan bí-u yii: «Kpèè uninja un bɔti m fu sòon̄ nì si yii u làá jī m-nibul pu dibeelee sèé.»

18 Saayuul sútì ki pìl̄ Samiyeel kitiŋ punyɔkɔki caŋin ki bālifì yii: «M gbāam̀-si, dàkà-mi laakin un wāĺee kóòyee.» 19 Ní Samiyeel kíí-u yii: «An sá man. Lìntī m-nyɔkɔpu tí jɔ̄m̀ nsaraaŋapaan laŋki. Ni làá jī man cee ní tijin díǹ, ní fool kutaafaauee ḿ fu tùkù-si tin kɔkɔ páb́-see, ní kí fu pɔ̄-si nsan á fàtī. 20 An yaa kíǹ imansal in wáŋkì an ŋá díǹ iwiin itee bɔtee, taa ti yāliŋkì, di sá yii bi fātìi ká-i. Ŋma di yì tigaajawan tin kɔkɔ bí Isirayeel tiŋkinee ní? An kaa sá sii nì a-baa dicaŋkuaaa?» 21 Ní Saayuul bí yii: «Man sá Beenjameen naakookun naa! Isirayeel naakɔti kɔkɔ poonee, kúǹ di sá kiwaai, ní Beenjameen naakookunee, man dicaŋku di kaa pée bí tiban! Kin ba pu ní a sòon̄ nì mi míǹ?»

22 Samiyeel cáá Saayuul nì utɔntɔnlee ki kɔ́ǹ kudii kun poon bi làá jī tijinee. U nìn kāaǹ-bi jilma paaŋyi binib bin u yíińee kansikin. Bi nìn sá binib mmuŋku nì saalaa nyɔkɔm ní. 23 Ní Samiyeel bí ujiŋŋal yii: «Cáań dinaŋkúndi din m bàà lēē ki tīī-si á yóońee.» 24 Ní u cūtìi cáań dinantaal nì dipugbindi ki yóoǹ Saayuul nimbiin, ní Samiyeel bí-u yii: «Dinaŋkúndi din m lēē ki yóoǹ-see dee. Sii di yì. Nín̄ ŋmóò. Dikpafil nee pu ní bi lēē-dì ki yóoǹ. Sii nì bin m yíińee ń kpāfì kí ŋmɔ́.» Ŋwiin gbantee Saayuul nì Samiyeel di nìn kpáfì ki jíń tijin. 25 Ní bi yíkìń nsaraaŋapaan laŋki ki sīntìń kitiŋin. Ní Samiyeel kāl̀ bi nín bɔ̀b̄ kudii yilpu puee u nì Saayuul gbáń mmaam.

26 Saayuul nì u-tɔntɔnliuee fīntì kutaafaau pɔ̀lpɔl. Kutaa wúntì ki dóòyee ní Samiyeel yíiń Saayuul kudii yilpu ki bí-u yii: «Yīkì ḿ nyāntí-si nsanni.» Ní bi yíkìi táá tɔb ki nín nyēē. 27 Bi nyáń kitiŋin ki dóòyee ní Samiyeel bí Saayuul yii: «Yàntī a-tɔntɔnliu ń lìntī nyɔkɔpu kí nīn cá.» Ní u-tɔntɔnliuee jítìi līntì ní Samiyeel bí Saayuul yii: «Sii yūĺ doo ḿ tùkù-si Unimbɔti nín lī puee.»