Samiyeel Peepeekaa 10

1 Samiyeel nìn ŋúb́ kikpalbabiki ŋkpam kā poon, ní u bātì ki sītì Saayuul yil pu ki kpàl̄-u ní ki bí-u yii: «Ti-Dindaan u-ba di lēē-si á nīn sá u-nibul bɔtiu.» 2 A yaa yíkì m-cee doo díǹee, a làá tū binaacimpɔmbi bili Raseel kaakul caŋin Seelisaa, Beenjameen yab tiŋkin. Bi làá tùkù-si yii: «Bi ká imansal in a bíi nyàab̀ee. Kɔŋkɔnnee a-baa kaa ti dàkafī íǹ pu, ama nimbi bɔti di kíǹ ki páb́-u. U bíi bàlifī u-ba min ní u làá dī ní kí ká u-jipɔɔnee.» 3 A yaa nìkī a-saŋŋu ki cá ki tin bàn̄ busubu bun bi yíì Tabɔɔree, a làá ká bininjab bita niin, bi jɔ́ḿ Beeteel kí jāam̀ Unimbɔti. Ubɔ ŋúb́ aŋɔbil ata, uliliiti ŋúb́ kpɔnɔb bita ní utataati bàl̄ kuloou ndaam kā poon. 4 Bi làá jāam̀-si ní kí tīī-si kpɔnɔb bili. A làá fōō kpɔnɔb gbanti. 5 Míǹ boonee, a làá nìkī a-saŋŋu kí tin bà Giibeeya-Eelooyiim tiŋkin, laakin Fiiliistii yab yidambi kóòyee. A yaa tóob́ kí kɔ́ kitiŋinee, a làá tū Unimbɔti bɔnaatiliibi nsanni bi nyánní nsaraaŋapaan pu ki sìntīń. Biwambɔɔliibi līiń bi-nyɔkɔpu ki bɔ̀ɔ́ tibati nì ŋgaŋgamu ki búǹ awul ki bɔ̀ɔ́ saŋgu. A làá ká-bi bi fītì ní ki nàatī Unimbɔti bɔti. 6 Niinee ti-Dindaan Fam làá kɔ́ a-ni ní á fìtī kii án nín fītì bi mun puee, ní á kpántí unipɔɔn. 7 A yaa láa ká tidaandi nee jítì mimmee, á béé yii Unimbɔti bí a-cee tiŋman pu. Niinee tin yaa láa pée bāań á ŋée, ŋá míǹ. 8 Á lìntī kí sìntī Giilgaal. Boonee ma mun làá dāan̄ kí ká-si niin kí ŋá bisaraawɔkaabi nì mpèé saraabi. Á kàl̄ niin iwiin iluli kí cīití-mi. M yaa láa bāańee, m làá tùkù-si tin sá á ŋée.

9 Ŋyunti ŋun Saayuul yíkì Samiyeel ceeyee ní Unimbɔti cúú u-pɔbil ki kpántì. Tin kɔkɔ Samiyeel sòon̄ee, ŋwimbaanti gbanti ní an jítì míǹ. 10 Ŋyunti ŋun Saayuul nì u-tɔntɔnliuee bāań Giibeeyayee ní bi tú Unimbɔti bɔnaatiliibi dikitil. Unimbɔti Fam nìn dɔ́miń ki kɔ́ Saayuul ni, ní u fītì ki kútì dikitilee pu bi bíi nàatī Unimbɔti bɔti. 11 Bin kɔkɔ nìn pée nyí Saayuul dooooyee nín ká u bíi nàatī Unimbɔti bɔti kii Unimbɔti bɔnaatiliibi nín nàatī puee, ní bi bíi bàlifī tɔb yii: «Ba cáá Kiisi jipɔɔn ní? Saayuul mun kpántì Unimbɔti bɔnaatiliu níii?» 12 Ní kitiŋ gbantin niliu ubɔ bí yii: «Ŋma di baasii sá bi-kpiliu ní?» Niin ní dilìmbil nee nyánní yii: «Saayuul mun kpántì Unimbɔti bɔnaatiliu níii?»

13 An cēetì Saayuul puee, ní u nín jɔ́ḿ nsaraaŋapaan pu. 14 Saayuul wee bālifì u nì u-tɔntɔnliu yii: «Ni cūtì la ní?» Ní Saayuul kíí-u yii: «Ti cūtìi nyàab̄ imansal ní. Ama taa ká-i ní ki nín cá Samiyeel cee.» 15 Ní u-wee bí-u yii: «Māafì-mi tin Samiyeel tùkū-nee.» 16 Ní Saayuul bí u-wee yii: «Tin u pée tùkū-tee di sá yii bi fātìi ká imansal.» Ama waa tùkū-u Samiyeel nín sòon̄ nì u dibeel bɔti tiŋyee.

Bi tɔ́ kasi ki lēē Saayuul ubɔti

17 Samiyeel yíiń Isirayeel yab ki kpáfì Miisipa ti-Dindaan nimbiin. 18 U bí-bi yii: «Ti-Dindaan Isirayeel yab Nimbɔtiu nín sòon̄ puee sèé: <Man di nyántìń-ni Eejipiti tiŋkin, ki fōō-ni Eejipiti yab nì abee ŋin yab nìn sàantí-nee ŋaan ki líì.> 19 Ama díǹ nee nimbi dū ni-Nimbɔtiu ki fá, úǹ un fìil̄-ni ki nyāntí nnaabu nì animbinaaman kɔkɔ poonee. Ni bí-u yii: <Á tīī-ti ubɔti.> Too, dāá yūĺmaan ti-Dindaan nimbiin kí nóó nì ni-naakɔti nì ni-maaliŋu nín sá puee.»

20 Samiyeel yāntì Isirayeel naakɔti kɔkɔ sútìń. Bi tɔ́ kasee ní án lēē Beenjameen naakooku. 21 Ní u cáań bin sá Beenjameen yabee ki síiǹ ki nóó nì bi nín pēē pēē mmaal puee, ní án lēē Matirii maaliŋun yab. Mmaal gbanti poonee ní án lēē Kiisi jipɔɔn Saayuul. Ní bi nyàab̄-u ki gīī kaa ká-u. 22 Ní bi gíti bālifì ti-Dindaan yii: «Uninja gbanti dɔ́miń doooo?» Ní ti-Dindaan bí yii: «U kɔ́ ki bál̀ tiwaŋkpiil kansikin.» 23 Ní bi cūtì ki nɔ̄kɔtìń-u tiwaŋkpiilee kansikin ní u cūtì ki yúl̀ samaa kansikin. U nìn fɔ̀kɔǹ bi-kɔkɔ. 24 Ní Samiyeel bí samaa kɔkɔ yii: «Kpèèmaan un ti-Dindaan lēēyee. U-juti kaa bí samaa kansikin.» Niinee báà ŋma bíi kpáafí ki tátí yii: «Ubɔti ń nīn cáá mmaŋfafɔkɔn!» 25 Míǹ boonee ní Samiyeel kàan̄ tin sá bí ŋá kí tīī ubɔtee samaa nimbiin^a, ní ki ŋmàn̄-tì ki ŋá kugbɔŋun ki cáa yóoǹ circir kɔŋkooŋŋun, ní ki pú Isirayeel yab nsan bí kpì bi-dumpui. 26 Ní Saayuul mun nín kùǹ u-dumpu Giibeeya. Unimbɔti nìn gbēē bibaatandambi biba pɔbiliŋ ní bíǹ nóó-u. 27 Ama bin kaa bí tibanee mun nìn lī yii: «Mana ní un bí nee ŋūǹ kí fīī-ti?» Bi nìn kpēē-u fám kaa cáań tiba ki jáam̀-u. Ama ní an kaa nìn ká Saayuul.