Bibɔtiibi Gbɔnliliitiiku 8

Usuneennimpuee bɔti nín kúntì puee

1 Dalbee ní Eeliisee sòon̄ nì unimpu un biki u nìn fīkitèe^a ki bí-u yii: «Yīkì doo, sii nì a-dicaŋku kí nīn cá laakin ni yaa ŋūǹee kí kàl̄. Di sá yii ti-Dindaan bɔ́ntì kí cáań ŋkùm Isirayeel tiŋki pu. Án kaa ti làá yúntí ŋkùmee làá kíĺ ní kí ŋá abin aluli.» 2 Ní Unimpuee yíkì ki ŋá kii Unimbɔti bɔnaatiliu nín bí-u yii ú ŋá puee. U nì u-dicaŋku kɔkɔ nìn yíkì ní ki cūtìi kāl̀ Fiiliistii yab tiŋkin ki ŋá abin aluli. 3 Abin aluli boonee ní unimpuee nyánní Fiiliistii yab tiŋkin ki fātìi gítìń. U bāańee ní ki cūtìi ká ubɔti ní ki mēē-u yii ú fōō u-diiku nì u-kpaatanti kí tīī-u.

4 Ŋyunti gbantee, ubɔti nì Eeliisee tɔntɔnliu Geeyaasii di nìn bíi sòoǹ. Ubɔti nìn bí-u yii: «Māafì-mi atuŋkpaan ŋin kɔkɔ ní Eeliisee ŋáaǹee!» 5 Geeyaasii nìn bíi máafí ubɔti Eeliisee nín fīkitì utaŋkpiil ubɔ puee, kpalaayee unimpu un biki Eeliisee nìn fīkitèe dūu kɔ́ní ubɔti cee kí gbàam̀-u ú fōō u-diiku nì u-kpaatanti kí tīī-u. Niinee Geeyaasii téeń yii: «Ti-baa ubɔti, kpèè unimpu un jipɔɔn Eeliisee nìn fīkitèe nì u-jipɔɔnee sɔ̀!» 6 Ubɔti nìn bālifì unimpuee ní úǹ dū tibɔtee ki máafì-u. Niinee ní ubɔti dū unimpuee bɔti ki ŋá u-janjakpiliu ubɔ ŋaan ki lī yii: «M là yii bí fàtīí gíiǹ u-wanti kɔkɔ kí tīī-u, ní kí pà-u bi nín túń ditundi u-kpaatanti pu ki ká ipaati iŋyee kɔkɔ kí yòon̄ daliŋkin u yíkèe kí dāá sāā díǹ nee.»

Eeliisee nì Asayeel bɔti

7 Dalbee Eeliisee yíkì ki nín cá Damaasi tiŋkin. Ŋyunti gbantee Siirii bɔtiu Been-Adaadi būǹ. Ní bi tùkū-u yii: «Unimbɔti bɔnaatiliu dɔ́miń doo.» 8 Ní ubɔti bí Asayeel^b yii: «Nyàab̀ tiwampɔkaal kí cáá pɔ̄ Unimbɔti bɔnaatiliu Eeliisee kí kpáàa gbàam̀-u ú bàlifì ti-Dindaan kí kpèè yii m làá ká dicáaǹdaaa, maa làá ká.»

9 Ní Asayeel yíkì ki nín cá ki cūtìi ká Eeliisee. U nìn yōoǹ tiwammɔntiil tin bí Damaasi tiŋkinee ki túǹ igutaamu imuŋku ili kí cáá pɔ̄ Eeliisee. U bàn̄ ki síl̀ Eeliisee nimbiinee ní ki bí-u yii: «A-tɔntɔnliu Siirii bɔtiu Been-Adaadi di túnní-mi a-cee ḿ bàlifì-si yii u làá pɔ̄ɔkàaa, waa làá pɔ̄ɔkì.» 10 Ní Eeliisee kíí-u yii: «Cùú tùkù-u yii u làá pɔ̄ɔkì. Ama tiŋman puee ti-Dindaan lēē ki dàkā-mi yii u bàà làá kpú ní.»

11 Kpalaayee Unimbɔti bɔnaatiliu Eeliisee kíĺ ki bíi kpèé Asayeel címmm áli icoo dāa kpáàa cúú-u, ní Eeliisee kíĺ ki bíi sūǹ. 12 Ní Asayeel bālifì-u yii: «M-kpiliu, ba pu ní a bíi sūǹ ní?» Ní Eeliisee kíí yii: «M sūǹ kun puee m nyí inikpiti in a làá dāá ŋá Isirayeel yabee. A làá dāá tūū bi-timmu mun bi máń agun ki túee ŋŋmi, kí dāá làntī bi-naacimpɔmbiyaamu, ní kí dāá tāā tāā kí mátí bi-biyaamu ní kí dāá pùtī bi-nimpoobi bin sá bipɔdambee.» 13 Ní Asayeel bí yii: «Mana ní man a-tɔntɔnliu un bí kii kibɔgbaŋfii nee làá dāá ŋmā kí ŋá míǹ?» Ní Eeliisee kíí-u yii: «Ti-Dindaan lēē ki dàkā-mi yii a làá dāá kpántí Siirii bɔtiu^c.»

14 Asayeel yíkì Eeliisee ceeyee ní ki nín gítí u-kpiliu cee. U bàn̄ee ní u-kpiliu bālifì-u yii: «Eeliisee tùkūń-si yii ba?» Ní u kíí yii: «U bí-mi yii a làá ŋmátí.» 15 Ama kutaa wúntèe ní Asayeel yōoǹ ŋŋaabu ki dūu ŋá nnyimin ní ki dūu bīiǹ ubɔti nimbiin waa ti ŋūǹ kí fòotī. Ubɔti kpíìyee ní Asayeel fōō u-yil ki kpántì ubɔti.

Juuda bɔtiu Jooram bɔti

(2 Kroo 21.2-20)

16 Akaab jipɔɔn Jooram nín kāl̀ Isirayeel beelin tibɔtiil dibiŋŋmooŋmootiil poonee, ní Joosafaati jipɔɔn Jooram kpántì Juuda beelin ubɔti. 17 U nìn cáá abin mmuŋku nì saalaa nì ali ní ki kpántì ubɔti, ní ki kāl̀ dibeel pu Jeerusaleem abin anii. 18 U nìn pée nóó Isirayeel bɔtiibi tabɔbiliŋ ní, a lì kii Akaab dicaŋkun yab nín nìn bí puee, di sá yii u nìn cáá Akaab bisal ubɔ ní. U nìn ŋá tin kaa nìn kítì ti-Dindaan nimbiinee. 19 Ama ti-Dindaan tɔntɔnliu Daafiidi puee, waa nìn là kí nàan̄ Juuda tiŋki, kun puee u nìn pōoǹ Daafiidi yii u-jipɔmbi làá nīn pée kā dibeel pu Jeerusaleem ní kí nīn cá jaanjaan^d.

20 Jooram beel yuntiŋu ní Eedoom yab yíkì kaa kíí bi-ba pu kí nīn gbíntìi bí Juuda yab taapu ní ki kāaǹ bi-ba nì bi-bɔtiu^e. 21 Jooram nìn yíkì ki nín cá Sayiir tiŋkin ki kpáaǹ u-janjatɔrɔkub kɔkɔ. Kunyeeuee ní u nì u-janjatɔrɔkub kpootiliibi jáń ki pɔ́ɔkiǹ Eedoom yab bin nìn māntìi tú-bee. Ama Juuda janjaliibi nìn sáǹ ki nín kóò bi-tantibin. 22 Kí yòon̄ yaadal wiiŋŋu ní Eedoom yab fōō bi-ba kaa ti bí Juuda yab taapu.

Ŋyunti gbanti mbaanti ní Liibiba yab mun kaa kíí bi-ba pu.

23 Jooram tuuŋŋi ŋin kíǹee nì tin kɔkɔ u ŋée ŋmàn̄ ki kā Juuda bɔtiibi tuuŋŋi gbɔŋkun. 24 Jooram kpíì ki cūtìi ŋàl̄ u-baabi ní bi síb́-u Daafiidi Tiŋkin. U-jipɔɔn Akasiyasi di fōō u-yil ki kpántì ubɔti.

Juuda bɔtiu Akasiyasi bɔti

(Kpèè 2 Kroo 22.1-6)

25 Akaab jipɔɔn Jooram nín kāl̀ Isirayeel tibɔtiil abin saalaa nì ali poonee ní Juuda bɔtiu Jooram jipɔɔn Akasiyasi kpántì Juuda beelin ubɔti. 26 Akasiyasi nìn cáá abin mmuŋku nì ali ní ki kpántì ubɔti. U nìn kāl̀ Jeerusaleem dibindi diba ní ki jíń dibeel. U-na di nìn sá Isirayeel bɔtiu Oomirii bisal ní bi yíì-u yii Atalii. 27 U nìn nóó Akaab dicaŋkun yab tabɔbiliŋ ní ki nìn ŋá tin kaa kítì ti-Dindaan nimbiinee kii Akaab dicaŋkun yabee, di sá yii u nìn sá Akaab dicaŋkun yab coo ní.

28 U nì Akaab jipɔɔn Jooram nìn cūtì ki jáń nì Siirii bɔtiu Asayeel Ramooti tiŋki kin bí Galaadi tiŋkpaaŋkinee ni. Ama kujaaunee ní Siirii yab tīī Jooram tiweendi. 29 Ní Jooram nín gítí Jisirayeel kí cáaǹ tiweendi tin u fōō Siirii yab cee Raama tiŋkin ŋyunti ŋun u nìn bíi jáà nì Siirii bɔtiu Asayeelee. U bí Jisirayeel niinee ní Juuda bɔti Akasiyasi, Jooram jipɔɔn cūtì kí màntì u-pu.