Bibɔtiibi Gbɔnliliitiiku 9

Jeewuu kpántì Isirayeel bɔtiu

1 Dalbee ní Unimbɔti bɔnaatiliu Eeliisee yíiń bibɔnaatiliibi kitil kansikin unaacimpɔɔn ubɔ ní ki bí-u yii: «Bɔ́ntí a-ba kí yòon̄ circir kpam kpalba kí nīn cá Ramooti tiŋkin Galaadi tiŋkpaaŋkin. 2 A yaa bàn̄ niinee, á pɔ́ɔǹ a-ba kí ká Joosafaati jipɔɔn Jeewuu, Nimisii naantiu. Á yíiń-u ní kàkatī ni-ba kí wàatī u-nabiyaamu kí kɔ́ kudii kubɔn. 3 Kudiin niinee ní á yòon̄ ŋkpam kpalbee kí bàtī kí sìtī u-yil pu kí tùkù-u yii: <Ti-Dindaan nín sòon̄ puee sɔ̀. Nì ŋkpam min m bātì ki sītì a-yil pu nee, m kāaǹ-si Isirayeel beelin ubɔti dee!> A yaa ŋá míǹ ki dóòyee, ní á pìitī kudii kí sāǹní kí taa ti tàan̄.»

4 Eeliisee lī míǹ ki dóòyee ní kinaacimpɔmbikee nín cá Ramooti tiŋkin Galaadi tiŋkpaaŋkin. 5 Ŋyunti ŋun u bàn̄ee, Isirayeel janjakpilib bíi ŋáań dikpafil. Ní unaacimpɔɔnee bí yii: «Ukpil, m cáá tiba ki làá tùkù-si!» Ní Jeewuu bí yii: «Ti-kansikin ŋma ní a là kí sòoǹ nì ní?» Ní kinaacimpɔmbikee kíí yii: «Ukpil, sii ní an sá!»

6 Niinee Jeewuu yíkì ki nín kóò dicindin, ní kinaacimpɔmbikee bātì ŋkpam ki sītì u-yil pu ki lī yii: «Ti-Dindaan, Isirayeel Nimbɔtiu nín sòon̄ puee sèé: <Nì ŋkpam min m bātì ki sītì a-yil pu nee, m dū-si ki kāaǹ man ni-Dindaan nibul Isirayeel pu ubɔti. 7 Sii di làá kpɔ̀ a-kpiliu Akaab naantiibi. A yaa ŋá mimmee, a tɔ̀n̄ m-tɔntɔnliibi bibɔnaatiliibi nì bin kɔkɔ Jeesabeel kūūyee pɔntooŋyi dee. 8 Akaab dicaŋkun yab kɔkɔ máaǹ kí kpú ní. M làá nàan̄ u-dicaŋkun bin kɔkɔ bí ki sá bininjabee Isirayeel tiŋkin. Maa làá kíń uyumbuɔɔɔ, kaa làá kíń un tɔ́ u-bee mun. 9 M làá ŋá u-dicaŋku kii m nín ŋá Neebaati jipɔɔn Jeerooboowaam dicaŋku nì Ayiiya jipɔɔn Bayeesa puee ní^a. 10 An yaa kíǹ Jeesabeel úŋ̀wuee, baa làá síb́-u, di sá yii iboo di làá ŋmɔ́-u tisatin^b.>» U lī mimmee ní ki pīitì kudii ki sáǹ ki kátì.

11 Jeewuu nyánnée ní ki nín gítí ubɔti janjakpilib bin kíǹee cee ní bíǹ bālifì-u yii: «An mɔ̄ deeee? Uwaati gbanti nyàab̀ ba ní a-cee ní?» Ní u kíí-bi yii: «Nimbi ni-ba, ni pée nyí bibɔnaatiliibi nee nì tin bi sòoǹee.» 12 Ní bin kíǹee bí-u yii: «A mɔ́ntí, māafì-ti tin jítèe!» Ní u kíí-bi yii: «Too, u bí-mi yii: <Ti-Dindaan nín sòon̄ puee sɔ̀. Nì ŋkpam min m bātì ki sītì a-yil pu nee, m kāaǹ-si ubɔti Isirayeel beelin dee.>»

13 Bijanjakpilibee gbìl̄ mimmee ní báà ŋma ŋá malaa ki kpátì u-wanti tin u pēēyee ki bíl̀ dikɔl pu ki dū Jeewuu ki kāaǹ. Bi nìn búń ŋyin ní bi-kɔkɔ kíĺ ki kíǹ ki tátí yii: «Ubɔti Jeewuu ń ká mmaŋfafɔkɔn!»

Jeewuu bɔ́ntì kí kpɔ̀ Isirayeel bɔtiu Jooram

14 Joosafaati jipɔɔn Jeewuu, Nimisii naantiu bɔ́ntì kí kpɔ̀ Jooram. Ŋyunti gbantee úǹ nì Isirayeel yab kɔkɔ bí Ramooti tiŋki kin bí Galaadi tiŋkpaaŋkinee ki jáà nì Siirii bɔtiu Asayeel ú taa fōō-kì. 15 Ama bi nín bíi jáàyee ubɔti Jooram nìn fōō tiweendi. An pu ní u nìn fātìi gítìń Jisirayeel kí cáaǹ u-ba. Jeewuu nìn tùkū bijanjakpilibee yii: «Nimbi di sá bin bí m-jandi púee, an puee ubɔ ń taa nyā kitiŋ nee poon kí cù Jisirayeel kí dū tin jítì dooyee kí māafì.»

16 Niinee Jeewuu jɔ́m̀ u-janjatɔrɔkuu pu ki nín cá Jisirayeel. Jooram nìn dɔ̄ u-dooŋu pu ní Juuda bɔtiu Akasiyasi cūtì kí màntì u-pu. 17 Un nìn sí sintil Jisirayeel tiŋkinee nín ká Jeewuu nì dijanjakitil din nìn táá-uee dòońee ní u bí ubɔti yii: «M wāĺ dijanjakitil diba dòoń.» Ní ubɔti Jooram bí yii: «Nyàab̀ utanjakal ubɔ kí tɔ̄ ú cùú tūŋkì-bi kí bàlifì-bi yii bi dòoń nì ŋgbansɔŋfaaa?» 18 Ní utanjakalee nín cá kí tūŋkì-bi. U bàn̄-bee ní ki bí yii: «Ubɔti bí yii ḿ bàlifì-ni yii an mɔ̄ deeee?» Ní Jeewuu kíí yii: «Ŋgbansɔŋfi bɔti ká-si la? Páań m-boon!» Ní un sí sintilee bí yii: «Ntuunee bàn̄ bi-cee, ama ŋuaa ti gítìń.»

19 Ní ubɔti gíti lēē utanjakal uliliiti ki tú ní u mun bàn̄ bi-cee ki bí yii: «Ubɔti bí yii ḿ bàlifì-ni yii an mɔ̄ deeee?» Ní Jeewuu kíí yii: «Ŋgbansɔŋfi bɔti ká-si la? Páań m-boon!» 20 Ní un sí sintilee bí yii: «Ntuun nliliitee bàn̄ bi-cee, ama ŋuaa ti gítìń. Bi nín jàkāń puee m béè un ní an sée. An sá Nimisii naantiu Jeewuu, di sá yii u jàkāń kii uwaatee ní.»

21 Ní ubɔti Jooram yāntì bi kpàl̄ u-taamuu ní u jɔ́m̀ ki kāl̀, ní Juuda bɔtiu Akasiyasi mun jɔ́m̀ ki kāl̀ u-taamuu pu ní bi-liitil nín túŋkí Jeewuu, ní ki tin dūu tú-u ujiseeraayeelja Nabooti kpaatantin.

Isirayeel bɔtiu Jooram kúm

22 Ŋyunti ŋun ní Jooram nyáń Jeewuu puee ní u bālifì-u yii: «An mɔ̄ deeee, Jeewuu?» Ní Jeewuu kíí-u yii: «Mana ní a ŋūǹ kí bàlifì-mi míǹ? Sii a-ba nyí yii a-na Jeesabeel gbíntìi tòotī awaa ki ŋáań kukpaŋkpantiiu tuuŋŋi.» 23 Niinee Jooram fātìi lábitì u-ba ki bíi sáń, ní ki bí Akasiyasi yii: «Á nīn nyí nì a-ba Akasiyasi, bi nyáń ti-boon ní!»

24 Niinee Jeewuu lēē mpiin ki páaǹ u-tɔbu pu ki dáaĺ ní an cūtìi cúú Jooram gbigbipati kansikin ki kɔ́ ki pūutì diŋuul ní ki tin nyáń ki lítì. Úǹ u-ba nìn nyáń u-tɔrɔkuu poon ki lítì. 25 Ní Jeewuu bí un bí u-cee ki tútúǹ-u bi yíì-u yii Bidikaaree yii: «Nyāntí-u tɔrɔkun kí dū-u kí tɔ̄ ujiseeraayeelja Nabooti kpaatantin. A yaa téetí ŋyunti ŋun ní man nì sii nìn kā tɔrɔkun dicilpu ki cēentí u-baa Akaabee, ti-Dindaan nìn sòon̄ tibɔti tiba ki tɔ́ u-pu^c. 26 Ti-Dindaan nìn bí-u yii: <Fool a nín fu kūū Nabooti nì u-jipɔmbee, man a-Dindaan, m fu ká kɔkɔ. Bukpaa bun poon a fu kūū-bee, bukpaa gbanti bubaantiiu poon ní m làá dáaĺ a-tafal, man ni-Dindaan di sòon̄ míǹ^d!> An puee nyāntí Jooram kí dū-u kí tɔ̄ bukpaayee poon, kii ti-Dindaan nín nìn sòon̄ puee.»

Juuda bɔtiu Akasiyasi kúm

(Kpèè 2 Kroo 22.7-9)

27 Juuda bɔtiu Akasiyasi nín ká mimmee, ní u cúú Beeti-Gan saŋŋu ki sáń ki cá, ama ní Jeewuu kùl̄ ki páaǹ u-boon. Jeewuu nìn tīī u-naacimbi mara yii bí kpɔ̀ u mun! Ŋyunti ŋun u kā u-tɔrɔkuun ki bíi dàb̀ Guur gbantaŋki kin kaa dátì nì Ibileeyamee ní bi yá u mun mpiin. Ama u nìn pɔ́ɔǹ ki sáǹ ki bàn̄ Meegiidoo tiŋkin ní ki kpíì niin. 28 U-tɔntɔnliibi nìn dū-u ki ŋá u-tɔrɔkuun ní ki cáá-u ki cūnnì Jeerusaleem, ní ki tin síb́-u u-baabi kaakulin, Daafiidi Tiŋkin. 29 Akaab jipɔɔn Jooram nín jíń dibeel abin saalaa nì diba poonee ní Akasiyasi kpántì ubɔti Juuda tiŋkin.

Jeesabeel kúm

30 Jeewuu nìn kíǹ fiii kí kɔ́ Jisirayeel tiŋkin ní Jeesabeel gbìl̄ tin jítèe kɔkɔ. Ní u nyàab̄ culoo ki bɔ̄ntì ní ki nyáantì u-ba ní ki cūtìi kíǹ ki ŋōō tɔkɔla pu. 31 Ŋyunti ŋun Jeewuu lákatì kitiŋ punyɔkɔki kí kɔ́ee ní Jeesabeel téeń yii: «Simrii, sii un kūū a-kpiliuee, an mɔ̄ deeee^e?» 32 Jeewuu wáaǹ ki kpēē tɔkɔla watil púee ní ki bí yii: «Ŋma bí m-jandi púee?» Niinee ubɔti cindin bifaabi bili kii bita ŋɔ̄ntìń tɔkɔlabin. 33 Ní u bí-bi yii: «Téeḿmaan-u kí lúkuń kitiŋ!» Ní bíǹ téeń-u ki lúkú kitiŋ. U lítèe ní u-fatikuu yāaǹ kitiŋ gundi nì itaamu pu, ní Jeewuu dū u-tɔrɔkuu ki tāā-u ki jítì.

34 Míǹ boonee ní Jeewuu nín cá dibeecindin ki jíń ki nyùn̄, ní ki bí u-naacimbi yii: «Ní bɔ́ntímaan unimpusoopu nee kí síb́-u, di sá yii u sá ubɔti bisal ní.» 35 Niinee bi nyáń kí síb́-u, ama kun bi pée kée di sá kuyikpabiku nì ataa nì iŋal. 36 Ní bi fātìi gítìń ki tùkū Jeewuu ní úǹ bí yii: «Ti-Dindaan nín nìn dī u-bɔnaatiliu Eelii, utiiseebeeja pu ki sòon̄ tiŋyee dee yii: <Iboo làá dāá ŋmɔ́ Jeesabeel wunti Jisirayeel satin^f, 37 ní u-wunti ń yàl̄ tisatin kii tinaabin tin bi bīil̀ kitiŋ tì yàntī tiwan lòoǹee, áli gba baa dāa gíti ŋūǹ kí lì yii: Jeesabeel sèé!>»