Bibɔtiibi Gbɔnliliitiiku 11

Atalii fōō dibeel Jeerusaleem

(Kpèè 2 Kroo 22.10-12)

1 Akasiyasi na Atalii nín ká yii u-jipɔɔn kpíìyee ní u lēē yii u làá kpɔ̀ kí céetí ubɔti naantiibi kɔkɔ. 2 Ama ubɔti Jooram bisal Yooseeba, Akasiyasi niisal nìn ŋúń ki yōoǹ Akasiyasi jipɔɔn Joowaasi u-mambi kansikin baa ŋúń ki kūū-u ní ki cáá kibikee nì ki-bilooliu ki bál̀ kunimbɔtidii didooŋkaaku kubɔn. Atalii kaa nìn béè, an puee baa nìn kūū kibiki gbanti. 3 Kibikee nì ki-bilooliu nìn bál̀ ti-Dindaan diikun niin áli abin aluu. Ŋyunti gbanti kɔkɔee, Atalii di nìn kā dibeel pu.

Bi kpántì ubɔti

(Kpèè 2 Kroo 23.1-21)

4 Dibinluluútiil poonee, ní Yooyadaa tú bi cūtìi yíiń Karii yab janjakpilib nì bijanjaliibi bin cīití dibeecindi nì ti-Dindaan diikuee. Bi bāańee ní u cáá-bi ki cūnnì ti-Dindaan Diikun ní u nì bi ŋá kinyɔkɔbaantii. U nìn yāntì bi pūtì ní u dū ubɔti jipɔɔnee ki dàkā-bi. 5 Boonee ní u tīī-bi mara nee yii: «Ni nín làá ŋá puee sɔ̀. Ŋwiŋŋuŋfikaa nee, ni-kitil diba làá tɔ̄ ditundi. Dikitipeekaal làá cīití dibeecindi kii di nín kpàà ŋáań puee, 6 ní dikitililiitiil ń nīn cí Suur punyɔkɔki ní ditataatiil ń nīn cí kipunyɔkɔ kin bí biciitiliibi boonee. Akiti ata gbanti làá nīn cīití dibeecindi ní ki fòol̄ tɔb. 7 Akiti ali ŋin kaa làá nīn bí ditundin ŋwiŋŋuŋfikaa dalee ń dāá dāan̄ ti-Dindaan Diikun kí nīn cí ubɔti. 8 Ní dāá màntīí tū ubɔti báà ŋma ń nīn ŋúb́ u-janjawanti u-ŋaan. Un yaa là kí ŋá mpɔn kí kɔ́née, ní kpɔ̀-u. Laakin kamaa ubɔti yaa cée, ní nīn bí u-cee.»

9 Bijanjakpilibee nìn ŋá kii usaraaŋakpil Yooyadaa nín bí yii bí ŋá puee. Báà ŋma nìn yōoǹ u-janjaliibi, bin tundi nìn kífí ŋwiŋŋuŋfikaa dalee nì bin tundi nìn kúntí ŋwiin gbanti dalee, ní bi nín cá usaraaŋakpil Yooyadaa cee. 10 Usaraaŋakpil nìn dū ubɔti Daafiidi kpaŋki nì u-gbampɔɔŋi ŋin nìn bí ti-Dindaan Diikunee ki tīī bijanjakpilib. 11 Bijanjaliibee nìn māntìi tú ubɔti ti-Dindaan Diiku nì nsaraafan nimbiin kí yòon̄ ŋgiil pú ki cáa sāā ŋgan pú. Bi nìn ŋúb́ tijanjawan ní ki lūtìi gíb́ ubɔti. 12 Niinee Yooyadaa nyántì Joowaasi, ki dū kibeefuulii ki cíkiǹ-u ní ki dū dipoondi taŋkpapilinti ki ŋúbiǹ-u. Boonee ní u bātì ŋkpam ki sītì u-yil pu ki kāaǹ-u tibɔtiil ní samaa kɔkɔ kpáafì abaal ki kíǹ ki tátí yii: «Ubɔti ń nīn cáá mmaŋfafɔkɔn!»

13 Atalii nín gbìl̄ samaa nì bijanjaliibi wooku puee ní u nín cá ti-Dindaan Diiku watil pú diniwulee cee. 14 U kpēēyee, ubɔtipɔɔn di tɔ́kɔ́ ti-Dindaan Diiku kɔl pu kii bi nín kpààa ŋáań puee, bijanjakpilib nì bikantámbunliibi sí ki kɔ́ĺ-u. Samaa kɔkɔ nìn bí mmɔnni ní bikantámbunliibi búǹ akantán. Niinee Atalii cúú tiwan tin u pēēyee ki dáaĺ ki cátì ní ki téeń yii: «Bi nyáń m-boon ní! Bi nyáń m-boon ní!»

15 Ní usaraaŋakpil Yooyadaa tīī bijanjakpilib bin nìn kpèé bijanjaliibi bin bí ti-Dindaan diikunee mara yii: «Nyāntímaan-u doo! Un di yaa páaǹ u-boonee, bí kpɔ̀-u!» Di sá yii usaraaŋakpil nìn lī yii: «Bí taa kpɔ̀-u ti-Dindaan Diikun doo.» 16 Bi nìn dáaĺ-u ki cūnnì kubɔtinaakoou watil pú, ní ŋyunti ŋun bi bàn̄ Itaamu punyɔkɔkee ní bi kūū-u niin.

17 Yooyadaa nìn ŋá mpèé ti-Dindaan nì ubɔti nì samaa kansikin bí nīn kíǹ ki sá ti-Dindaan nibul. U nìn yāntì ubɔti nì samaa mun ŋá mpèé. 18 Niinee ní samaa kɔkɔ nín cá diwaal Baal diikun ki gbáń ki wīī-ku. Bi nìn gbáń ki wīī Baal saraafaŋyi nì ataŋkpee ŋin nìn bí niin bi tòotēe. Bi nìn kūū Baal tandaaŋwu Matan ki bíl̀ isaraafan caŋin. Boonee ní usaraaŋakpil Yooyadaa lēē binib bí nīn cí ti-Dindaan Diiku.

19 Yooyadaa nìn kóoǹ bijanjakpilib nì Karii yab nì bijanjaliibi bin nìn sá biciitiliibee nì samaa kɔkɔ ní bi yōoǹ ubɔti ti-Dindaan Diikun, ki dūu dī biciitiliibi saŋŋu ki céeǹ-u ki cáa cūnnì ubɔti dumpu. Joowaasi nìn kāl̀ dibeejal pu, 20 ní samaa kɔkɔ kíĺ ki bíi fàal̀.

Bi nín kūū Atalii dibeecindin boonee ní kitiŋ kɔ́ ŋgbansɔŋfin. Atalii úŋ̀wuee, bi nìn dū kitàataajiki ní ki kūū-u dibeecindin.