Bibɔtiibi Gbɔnliliitiiku 10

Jeewuu kūū Akaab dicaŋkun yab kɔkɔ

1 Akaab nìn cáá naantiibi imuŋku ita nì saalaa kóò Samaarii tiŋkin. Jeewuu nìn ŋmàn̄ kugbɔŋu ki tú bí cáá tīī Samaarii tindaŋkpilib nì Jisirayeel janjakpilib nì bin nìn kpèé Akaab naantiibee kí tùkù-bi yii: 2 «Nimbi di kpèé ubɔti biyaamu, ki cáá tɔrɔkub nì itaamu nì tijanjawan, ní ki kóò kitiŋ kin poon bi máń digundi ki māntìi túee. Ŋyunti ŋun ni yaa fōō kugbɔŋu neeyee, 3 ní kpèè ubɔti jipɔmbi kansikin kí lēē un kítì ki máaǹ kí nīn sá ubɔtee kí dū-u kí kàan̄ tibɔtiil ú fōō u-baa yil. Ni yaa ŋá míǹ ki dóòyee, ní bɔ́ntí ni-ba kí já kí mɔ̄tì ni-kpiliu dicaŋku pu.»

4 Bi gbìl̄ mimmee ní ki fāŋkì tikpil ki kíǹ ki lì tɔb cee yii: «Bibɔtiibi bili kaa ŋúń ki síl̀ u-nimbiin, kin mana ní timbi nee làá ŋmā kí já nì u?» 5 Niinee ukpil un kpèé ubɔti cindee nì ujanjakpil un kpèé kitiŋ gbantee nì bitindaŋkpilib nì bin kpèé mbiyaamuee tú bí cùú tùkù Jeewuu yii: «Timbi sá a-tɔntɔnliibi ní. Kun a yaa pée bí yii tí ŋée, ti làá ŋá. Taa làá lēē báà ubɔ kí kàan̄ tibɔtiil. Míǹ puee ŋá min di ŋān̄ a-ceeyee.»

6 Ní Jeewuu fātìi ŋmàn̄ kugbɔŋu kuliliitiiu ki tùkū-bi yii: «Ni yaa bí m-jandi pú ní ki yaa làá pīlifì m-nyɔkɔee, ní lēēmaan ni-kpiliu Akaab jipɔmbi nì u-naantiibi kɔkɔ yiliŋ kí fu cáań-mi fool naŋkɔnampu Jisirayeel tiŋkin.» Ubɔti jipɔmbi nì u-naantiibi imuŋku ita nì saalaa gbantee nìn kā Samaarii nikpaambi cee ní bi kpèé-bi.

7 Bikpilibee nín fōō kugbɔŋuee ní bi cúú ubɔti jipɔmbi nì u-naantiibi imuŋku ita nì saalaayee kɔkɔ ki lāntì, ní ki dū bi-yiliŋ ki ŋá tikabitin ki tú bi cáa tīī Jeewuu Jisirayeel tiŋkin. 8 Ubɔ nìn dɔ́miń ki tùkū Jeewuu yii: «Bi cáań ubɔti jipɔmbi nì u-naantiibi yiliŋ.» Ní Jeewuu bí yii: «Dūmaan-ŋi kí bíĺ akpuku ali kitiŋ punyɔkɔki caŋin áli fool kutaafaau!» 9 Kutaa wúntèe ní Jeewuu nyáń ki síl̀ samaa nimbiin ki lī yii: «Nimbee, ni sá deedeedambi! Man di bɔ́ntì kí kpɔ̀ m-kpiliu ubɔti ní ki lafun kūū-u mun. Ama ŋma di kūū bin bí nee kɔkɔ? 10 Ní béémaan yii tin kɔkɔ ní ti-Dindaan nìn sòon̄ ki tɔ́ Akaab dicaŋku puee, báà dinyɔɔbundi kpá kí gbíntí fám! Ti-Dindaan nín dī u-bɔnaatiliu Eelii pu ki sòon̄ tin kɔkɔee, u ŋá míǹ^a.» 11 Niinee Jeewuu kūū bin kɔkɔ nìn kíǹ Akaab dicaŋkun ki bí dimaŋfalin ki kóò Jisirayeelee^b kɔkɔ. U nìn kūū ki kpáaǹ bikpilib bin kɔkɔ nìn pá u-boonee nì u-bɔɔbi nì u-tandambi. Waa nìn yāntì bi-kansikin ubɔ ŋmátì.

Jeewuu kūū Juuda bɔtibiliŋ

(Kpèè 2 Kroo 22.8)

12 Boonee Jeewuu kíĺ nsan ki nín cá Samaarii. U bàn̄ laakin bi yíì yii Beeti-Eekeedi-Bipikpaabee, 13 ní ki tú Juuda bɔtiu Akasiyasi nabiyaamu. Ní u bālifì-bi yii: «Ni sá bilab ní?» Ní bi kíí yii: «Ti sá Akasiyasi nabiyaamu ní. Ti dɔ́miń kí jāam̀ ubɔti nimpuu Jeesabeel biyaamu nì bin kíǹ ki bí ubɔti dicaŋkunee ní.» 14 Ní Jeewuu téeń yii: «Ní cúúmaan-bi nì bi-nimbiliŋ!» Ní u-naacimbi cúú-bi nì bi-nimbiliŋ ki lāntì ní ki dū-bi ki tɔ́ Beeti-Eekeedi lɔkɔun. Binib gbanti nìn sá binib imuŋku ili nì bili ní. Bi-kansikin báà ubɔ kaa nìn ŋmátì.

Jeewuu tú Yoonadaab nsanni

15 U nyáń niin kí nīn cée ní ki dūu tú Reekaab^c jipɔɔn Yoonadaab, u mun nìn còom̄ ki túŋkí-u. Jeewuu jáam̀-uee ní ki bí-u yii: «A sí m-boon kii ma mun nín sí a-boon pueeee?» Ní Yoonadaab kíí yii: «Iiin!» Ní Jeewuu gíti bí-u yii: «An yaa sée, tīī-mi kuboou!» Ní Yoonadaab tīī-u kuboou. Niinee ní Jeewuu cúú u-ŋal ki cáá-u ki kɔ́ǹ u-cee tɔrɔkun, 16 ní ki bí-u yii: «Dāan̄ tí cù á kpèè man nín cáá ti-Dindaan pu difaŋgiil puee!» U lī mimmee ní ki yōoǹ-u u-tɔrɔkuu pu ki cáá-u ki búntì. 17 Bi bàn̄ Samaarii tiŋkinee ní Jeewuu kūū Akaab dicaŋkun yab bin kɔkɔ nìn kíǹ ki bí kitiŋin niinee. U nìn nāaǹ bi-kɔkɔ ki nóó nì ti-Dindaan nín nìn dī ubɔnaatil Eelii pu ki sòon̄ puee.

Jeewuu nāaǹ diwaal Baal tɔntɔnliibi kɔkɔ

18 Míǹ boonee ní Jeewuu kóoǹ samaa kɔkɔ ki kpáfì ní ki bí-bi yii: «Ubɔti Akaab tōotì diwaal Baal, man làá gíti tòotī-dì kí jītíǹ-u. 19 An puee ní yíiń Baal bɔnaatiliibi kɔkɔ nì bin kɔkɔ tòotī-dèe nì di-tandambi kɔkɔ bí kpāfì m-cee. Ubɔ ń taa kíń, di sá yii m làá ŋá saraakpaŋkpaan ní kí tīī diwaal Baal. Un yaa kaa dɔ́mińee, bi làá kpɔ̀-u ní.»

Jeewuu nìn bíi ŋmàtíǹ-bi kí ŋmā kí kpɔ̀ kí céetí bin nìn tòotī diwaal Baalee ní. 20 An pu ní u nìn bí yii bí kóoǹ kí kpāfì kí jāam̀ diwaal Baal. Bi nìn ŋmàn̄ tigbɔn 21 ki yākatì ki tīī Isirayeel beel kɔkɔn. Bin kɔkɔ nìn pée tòotī diwaal Baalee nìn dɔ́miń ní. Ubɔ kaa nìn kíǹ kaa dɔ́miń. Bi nìn kɔ́ diwaal Baal diikun ní an gbí. 22 Ní Jeewuu bí un kpèé diwaal wampeeŋkaatee yii: «Nyāntí tiwampeeŋkaal kí yàkatīí tīī bin kɔkɔ pée tòotī Baalee!» Ní úǹ nyántì tiwampeeŋkaal ki tīī-bi. 23 Jeewuu nì Reekaab jipɔɔn Yoonadaab nìn kɔ́ diwaal Baal diikun ní ki bí bin tòotī Baalee yii: «Ní kpèèmaan ni-kansikin tiŋan kí kpèè yii bin jáaḿ ti-Dindaanee yaa bí doo, di sá yii ti pée là bin tòotī Baalee ŋmaniŋma ní.»

24 Jeewuu nì Yoonadaab nìn nín kóò kí ŋá mpèé saraabi nì bisaraawɔkaabi. Kaa nyí kii Jeewuu ŋá mimmee ki nyàab̄ bijanjaliibi imuŋku inaa ki síiǹ mmɔŋki ki bí-bi yii: «M dū binib nee kɔkɔ ki ŋá ni-ŋaan, ama ubɔ yaa yāntì bi-kansikin ubɔ ŋmátèe, udaan làá dū úǹ u-ba maŋfal ní kí téeǹ un ŋmátèe yal pu.» 25 Ŋyunti ŋun Jeewuu ŋá saraabi ki dóòyee ní u bí bijanjaliibi nì bi-kpilib yii: «Ní kɔ́ kí kpɔ̀ binib nee! Ní taa yàntī ubɔbɔ ń ŋmátí.» Ní bi kɔ́ ki dū ntàataajimu ki kūū bi-kɔkɔ. Bi kūū-bi ki dóòyee ní ki nyántì-bi ki tɔ́ ki fá kitiŋ kpaanceetiŋu. Bi ŋá míǹ ki dóòyee ní ki nín gítiń diwaal Baal diikun, 26 ní ki nyántìń ditaŋkpal din nìn cɔ́ diwaal Baal diikun bi tòotēe ki tūū ŋŋmi. 27 Bi nín wùn̄ Baal taŋkpal míǹ ki dóòyee ní bi gbáń ki wīī di-diiku ki dūu ŋá kupɔɔndii. Ku bí ki dāa sāā díǹ.

Jeewuu kpántì Isirayeel bɔtiu

28 Jeewuu nín ŋá pu ní ki kúntì diwaal Baal Isirayeel beelinee dee. 29 Nì míǹ kɔkɔee, waa nìn kākatì u-ba ki wāatì ikpiti in ní Neebaati jipɔɔn Jeerooboowaam nìn yāntì Isirayeel yab ŋá ki cūtìi bíi jáaḿ sindaariya nabiliŋ ŋin bi nìn mɔ́ɔ́ an bí Beeteel nì Daanee^d.

30 Niinee ti-Dindaan bí Jeewuu yii: «A ŋá an ŋān̄, a ŋá tin fáatiǹ-mee. A ŋá Akaab dicaŋkun yab kii m nín là puee. An puee a-naantiibi làá kàl̄ Isirayeel tiŋki pu tibɔtiil kí cáá sāā anaantitɔntɔkɔ anaa pu.» 31 Ama nì míǹ kɔkɔee, Jeewuu kaa nìn ŋúb́ ti-Dindaan Isirayeel Nimbɔtiu marab nì u-pɔbil kɔkɔ, waa nìn kākatì u-ba ki wāatì ikpiti in Jeerooboowaam nìn yāntì Isirayeel yab ŋée.

32 Ŋyunti gbantee, ti-Dindaan nìn kíĺ ki bíi bàtī Isirayeel tiŋki pu. U nìn yāntì Siirii bɔtiu Asayeel jáń ki pɔ́ɔkiǹ Isirayeel yab bi-tiŋki kɔkɔ poon. 33 Siirii yab nìn jáń ki fōō kitiŋ kin bí Jɔɔdan ŋwìiń nyalaŋki púee nì Arooweer tiŋki kin bí Arinɔn buŋŋu ŋgan púee, an dàkà yii Galaadi nì Baasan timmu. Ntimu gbanti poon ní Rubeen nì Gaadi nì Manasee naakɔti yab nìn kóò.

34 Jeewuu tuuŋŋi ŋin kíǹee nì tin kɔkɔ u ŋée nì u-pɔ́ɔǹtam kɔkɔ ŋmàn̄ ki kā Isirayeel bɔtiibi tuuŋŋi gbɔŋkun. 35 Jeewuu kpíì ki cūtìi ŋàl̄ u-baabi ní bi síb́-u Samaarii tiŋkin. U-jipɔɔn Joowakaasi di fōō u-yil ki kpántì ubɔti. 36 Jeewuu nìn jíń dibeel Isirayeel tiŋki pu abin mmuŋku nì anii ní. Samaarii tiŋkin ní u nìn kóò.