Krooniiki Gbɔnliliitiiku 11

1 Ŋyunti ŋun Rooboowaam bàn̄ Jeerusaleemee ní u kóoǹ Juuda nì Beenjameen naakɔtin janjaliibi bibaamɔmbi kutukub dilaataal nì imuŋku inaa ki kpáfì kí cùú já nì Isirayeel yab, án nín làá ŋá pu úǹ Rooboowaam ń fàtīí fōō dibeelee. 2 Ama ní ti-Dindaan bí u-bɔnaatiliu Seemaya yii: 3 «Tùkù Juuda bɔtiu Rooboowaam, Saloomɔn jipɔɔn nì Juuda nì Beenjameen naakɔti yab nì samaa un kɔkɔ pée kíǹee yii: 4 Ti-Dindaan nín sòon̄ puee sèé: <Naa máaǹ kí cùú já nì ni-nabiyaamu Isirayeel yab. Báà ŋma ń nīn gítí u-dumpu, di sá yii man di yāntì tin bíi jītí nee bāań.>» Niinee ní bi gbìl̄ ki tīī nì ti-Dindaan nyɔɔbundi ní ki yāntì kaa ti cūtìi jáń nì Jeerooboowaam.

Rooboowaam máń agun ki tú ntimu kupaau

5 Rooboowaam nìn kóò Jeerusaleem tiŋkin ní ki máń agun ki tú Juuda timmu. Ntimu gbanti di sá: 6 Beetileem nì Eetaam nì Teekoowa 7 nì Beeti-Suur nì Sookoo nì Adulaam 8 nì Gaati nì Mareeka nì Siifi 9 nì Adoorayiim nì Lakiisi nì Aseeka 10 nì Soora nì Ayalɔn nì Eebrɔn. Ntimu mun bi nìn máń agun ki tú gbantee nìn bí Juuda yab nì Beenjameen yab timmu poon ní. 11 An nìn sá agun ŋin pɔ̄ɔ̄ tiŋanee ní Rooboowaam nìn máń ki tú-mu. U nìn nyàab̄ gɔminab ki kāaǹ mu-pu, ní bi nìn kpáafí tijin nì ɔliifi kpam nì ndamam niin. 12 Agbampɔɔ nì ŋkpamu nìn bí ntimu gbanti kɔkɔ poon. Míǹ ní u nìn ŋá ní ki ŋúń ki jíń Juuda nì Beenjameen timmu pu dibeel.

Bisaraaŋaliibi nì Leefii yab páaǹ Rooboowaam boon.

13 Bisaraaŋaliibi nì Leefii yab nìn nyáń Isirayeel timmu kɔkɔn ki dɔ́miń ki páaǹ Rooboowaam boon. 14 Leefii yab nìn yíkìi fá bi-timmu nì bi-kpaatanti ki nín cá Juuda beelin nì Jeerusaleem. Di sá yii Jeerooboowaam nì u-jipɔmbi kaa nìn pú-bi nsan bí nīn gbíntìi sá ti-Dindaan saraaŋaliibi. 15 Jeerooboowaam nìn lēē úǹ u-ba saraaŋaliibi, ní bíǹ bí ŋgbantamu pu ki ŋáań saraabi ki tìì iŋɔjaa nì anabil ŋin u nìn máń ki síiǹee^a. 16 Isirayeel beel naakɔti kɔkɔnee, binib bin nìn nyàab̀ ti-Dindaan, Isirayeel Nimbɔtiu nì bi-pɔbil kɔkɔee nìn táá Leefii yab ki dɔ́miń Jeerusaleem tiŋkin. Bi nìn là kí nīn ŋáań saraabi ki tìì ti-Dindaan, bi-naanjab Nimbɔtiu. 17 Bíǹ nìn gíti kútì Juuda beel mpɔn ní ki nìn tútúǹ Saloomɔn jipɔɔn Rooboowaam abin ata. Di sá yii abin ata gbanti poonee, u nìn nóó Daafiidi nì Saloomɔn tabɔbiliŋ.

Rooboowaam dicaŋku

18 Rooboowaam nìn cáá Maalaati. U-baa di nìn sá Daafiidi jipɔɔn Yeereemooti ní u-na sá Eeliyaab bisal Abiyayiil, Jeesee naantiiu. 19 U nìn màl̄-u mbininjabiyaamu muta: Yeewusi nì Seemariya nì Sayam. 20 Boonee ní Rooboowaam cáá Abisaloom bisal Maaka. U nìn màl̄-u mbininjabiyaamu munaa: Abiiya nì Atayii nì Siisa nì Seeloomiiti^b. 21 Rooboowaam nìn néeń Abisaloom bisal Maaka ki jítiǹ u-nimpoobi nì u-bɔntiibi bin kɔkɔ kíǹee. Di sá yii u nìn cáá binimpoobi saalku nì bita ní ki cáá bibɔntiibi imuŋku ita, ní ki màl̄ mbininjabiyaamu mmuŋku nì munii nì nnimpubiyaamu imuŋku ita. 22 Rooboowaam nìn dū Maaka jipɔɔn Abiiya ní ki kāaǹ u-mambi nì u-naalib kɔkɔ pu ukpil, di sá u nìn là yii úǹ ń dāá kpántí ubɔti ní. 23 U nìn ŋá iciin ní ki yāntì u-jipɔmbi bin kíǹee kɔkɔ yàl̄ ki tin bíń Juuda nì Beenjameen timmu mun bi nìn máń agun ki túee poon. U nìn tīī-bi tijin tikpil ní ki nyàab̄ binimpoobi kupaau ki tīī-bi.