Krooniiki Gbɔnliliitiiku 12

Eejipiti bɔtiu Siisaaki dɔ́miń ki jáń nì Juuda yab

(Kpèè 1 Bib 14.25-28)

1 Ŋyunti ŋun Rooboowaam cúú u-beel pɔŋŋu ki báaǹ inyaanee ní u fātì u-boon ki tīī ti-Dindaan marau, ní u-samaau kɔkɔ mun ŋá míǹ mbaantiim. 2 Rooboowaam nín kāl̀ dibeel dibiŋŋmooŋmootiil poonee ní Eejipiti bɔtiu Siisaaki dɔ́miń ki jáń nì Jeerusaleem, di sá yii baa nìn gíti yú nì ti-Dindaan deedee. 3 Siisaaki nìn cáá janjatɔrɔkub kutuku ubɔ nì alaataa ali nì bitanjakaliibi kutukub imuŋku ita. Bijanjaliibi bin nìn nyánní Eejipiti tiŋkin ki táá-u ki dɔ́mińee kaa nìn cáá ŋkaan: Liibii yab nìn bí, ní Sukii yab bí ní Eetiiyoopii yab bí. 4 U nìn jáń ki fōō Juuda timmu mun bi máń agun ki túee, ní ki nìkī ki dāa bāań áli Jeerusaleem. 5 Siisaaki nìn tóobiń ní Rooboowaam nì Juuda kpilib kóoǹ ki kpáfì Jeerusaleem. Unimbɔti bɔnaatiliu Seemaya nìn cūtìi ká-bi ní ki bí-bi yii: «Ti-Dindaan nín sòon̄ puee sɔ̀: <Ni dū man ni-Dindaan ki fá! Too, ma mun dū-ni ki ŋá Siisaaki ŋaan.>»

6 Isirayeel kpilibee nì ubɔti nìn lafun béè yii bi yīntì ní ki bí yii: «Ti-Dindaan cáá mbaamɔn.» 7 Ti-Dindaan nín ká bi sīntì bi-ba taapuee, ní u tùkū Seemaya yii: «Bi nín béè bi-yìntitamee puee, maa làá kpɔ̀ kí céetí-bi. Ama an kaa ti làá yúntí, m làá fīī-bi, di sá yii maa làá dī Siisaaki pu ní kí yàntī m-ŋuul ń jēetí Jeerusaleem pu. 8 Nì míǹ kɔkɔee, m làá yàntī bí kpántí u-tɔntɔnliibi. Niinee bi làá béé yii bi yaa sá man tɔntɔnliibi di sɔ́ɔɔ, bi yaa sá ntimu mubɔ bɔtiibi tɔntɔnliibi di sɔ́.»

9 Eejipiti bɔtiu Siisaaki nìn jáń nì Jeerusaleem yab. U nìn yōoǹ tigaajawan tin bí ti-Dindaan Diikun nì kubɔtinaakoounee. U nìn pée yōoǹ kɔkɔ ní, ki kpáaǹ agbampɔɔ ŋin Saloomɔn nìn dū sindaariya ki mɔ́ɔ́yee kɔkɔ^a. 10 Niinee ní ubɔti Rooboowaam dū tasa kúti ki mɔ́ɔ́ agbampɔɔ ki téeǹ ŋin bi yōoǹee yil pu, ní ki dū-ŋi ki ŋá bijanjaliibi bin cí ubɔti naakooku punyɔmmuee kpiliu ŋaan ú nīn kpèé. 11 Ubɔti yaa nìn pée yíkì ki kóò kunimbɔtidiinee, bijanjaliibi nìn yòontí agbampɔɔ gbanti ní ki līī, ní kí fàtīí gíiǹní-ŋi biciitiliibi diikun.

12 Rooboowaam nín nìn sīntì u-ba taapu puee, ti-Dindaan nìn páatì u-ŋuul u-pu kaa nāaǹ-u kɔkɔ. Kí kūtì muee, tiwammɔntiil nìn dáá bí Juuda tiŋkin.

Rooboowaam maŋfal wiiŋyi kúntitam

(1 Bib 14.21-24,29-31)

13 Ubɔti Rooboowaam nìn kāl̀ Jeerusaleem ki ká mpɔn ki jíń dibeel. U nìn cáá abin imuŋku ili nì dibindi diba ní ki kpántì ubɔti. U nìn jíń Jeerusaleem, kitiŋ kin ti-Dindaan nìn lēē Isirayeel naakɔti kɔkɔ kansikin bí nīn jáaḿ-uee pu dibeel abin saalku nì ali. U-na nìn sá uamɔnnimpu ní bi yíì-u yii Naama. 14 U nìn ŋá tin kaa kítì ti-Dindaan nimbiinee, di sá yii waa nìn dū u-pɔbil kɔkɔ ki nyàab̄ ti-Dindaan.

15 Rooboowaam tuuŋŋi ŋin kíǹee, kí yòon̄ tin u péé ki ŋée nì tin u ŋá ki lúŋkèe, ŋmàn̄ ki kā Unimbɔti bɔnaatiliu Seemaya gbɔŋkun nì Idoo un wāĺee^b gbɔŋkun. Kujaau nìn pée bí Rooboowaam nì Jeerooboowaam kansikin ní kaa gbèentí. 16 Rooboowaam kpíì ki cūtìi ŋàl̄ u-baabi ní bi síb́-u Daafiidi Tiŋkin. U-jipɔɔn Abiiya di nìn fōō u-yil ki kpántì ubɔti.