Krooniiki Gbɔnliliitiiku 25

Amasiyaawuu bɔtiiti bɔti

(Kpèè 2 Bib 14.1-7)

1 Amasiyaawuu nìn cáá abin mmuŋku nì aŋmoo ní ki kpántì ubɔti ní ki jíń dibeel abin mmuŋku nì awa Jeerusaleem tiŋkin. U-na nìn sá Jeerusaleem ní bi yíì-u yii Yoowadan. 2 U nìn ŋá tin fáatiǹ ti-Dindaanee, ama an kaa nìn sá nì dipɔbil diba.

3 Ŋyunti ŋun Amasiyaawuu beel kāl̀ tiŋan ki báaǹ inyaanee ní u kūū u-janjakpilib bin nìn kūū u-baa ubɔtee. 4 Ama waa nìn kūū bi-biyaamu, ki nóó nì an nín ŋmàn̄ Mooyiisi gbɔŋkun puee. Ti-Dindaan nìn tīī mara kugbɔŋu gbanti poon yii: «Baa máaǹ kí kpɔ̀ bibaatiibi, bi-biyaamu kpitii pu, kaa tí máaǹ kí kpɔ̀ mbiyaamu, mu-baabi kpitii pu. Un ŋá ikpitee, úǹ ní bí kpɔ̀^a.»

5 Amasiyaawuu nìn kóoǹ Juuda naakookun yab nì Beenjameen naakookun yab ki kpáfì ní ki lēē bin làá nīn sá bijanjaliibi kutuku kutuku kpilibee nì bin làá nīn sá dilaataal dilaataal kpilibee ki nóó nì bi-dicaŋŋi nín sá puee. Bi nín nìn kàan̄ bininjab bin cáá abin mmuŋku kí nīn cée, bi nìn ká binib kutukub alaataa ata. Binib gbanti kɔkɔ nìn bàn̄ kí cù kujaau, ní ki nìn ŋūǹ kí ŋúb́ ŋkpamu nì agbampɔɔ kí já. 6 Míǹ boonee ní u gíti dū animbil kúti tɔɔnib bita ki mēē Isirayeel beel poon bibaatandambi kutukub dilaataal. 7 Ama Unimbɔti bɔnaatiliu ubɔ nìn dɔ́miń ki tùkū-u yii: «Ti-baa ubɔti, taa yàntī Isirayeel janjaliibi ń táá-si kí cù kujaau, di sá yii ti-Dindaan kaa bí Isirayeel yab bin bi gíti yíì yii Eefiraayiim yab nee cee. 8 Báà bi yaa céeǹ-si, a làá pɔ́ɔǹ kí já nì a-pɔŋŋu kɔkɔ, ama Unimbɔti làá yàntī a-nannanliibi ń já kí pɔ̄ɔkiǹ-si. Tiŋman puee Unimbɔti baba di tìì unil dijajil àá kí yàntī bí já kí pɔ̄ɔkiǹ-u.» 9 Ní Amasiyaawuu bālifì Unimbɔti niliuee yii: «Kin animbil kúti tɔɔnib bita bin m dūu tīī Isirayeel janjaliibee làá kúntí nì yii ba?» Ní Unimbɔti bɔnaatiliuee kíí-u yii: «Ti-Dindaan làá tīī-si tin jítiǹ mimmee kpataaa pu!» 10 Niinee Amasiyaawuu yāntì bijanjaliibi bin nyánní Eefiraayiim beelinee nín gítí bi-tiŋkin. Bi nìn nín gítí, ama bi nìn gíí Juuda beelin yab pu diŋuul ŋkpitim pu.

11 Amasiyaawuu nìn ká kunyannyaau ní ki yōoǹ u-janjaliibi ki cūnnì Ŋyaam tantakalin^b. Niin ní bi jáń ki kūū Seeyiir yab binib kutukub saalaa. 12 Juuda yab nìn gíti cúú bijanjaliibi kutukub saalaa, ní ki cáá-bi ki jɔ́m̀ ditaŋkpakpaandi diba yilpu, ní ki téeń-bi niin ní bi nyáń ki lítì kitiŋ ki yāaǹ.

13 Isirayeel janjaliibi bin ní Amasiyaawuu nìn jìn̄ kaa yāntì bi táá-u ki cūtì kujaauee nìn nyáń Juuda timmu mun bí kí yòon̄ Samaarii kí cáá sāā Beeti-Oorɔŋyee yab pu. Bi nìn kūū binib kutukub bita ki yōoǹ tigaajawan tikpil.

Isirayeel bɔtiu Joowaasi jáń ki pɔ́ɔkiǹ Amasiyaawuu

(Kpèè 2 Bib 14.8-14)

14 Amasiyaawuu nín jáń ki pɔ́ɔkiǹ Eedoom yab ki fàtīi gítińee ní ki yōoǹní Eedoom yab waaŋi ki dūu ŋá úǹ u-ba waaŋi. U nìn gbāaǹ ŋi-taapu ki jáam̀-ŋi ní ki tūutì talaalub ki tīī-ŋi. 15 Niinee ní ti-Dindaan gíí u-pu diŋuul ní ki dū u-bɔnaatiliu ubɔ ki tú u-cee. Ubɔnaatilee nìn bālifì-u yii: «Ba pu ní a bí ki jáaḿ awaa ŋin kaa ŋúń ki fīī ŋi-nib a-ŋaanee?» 16 U dáá bíi sòoǹ u-nyɔkɔ kaa láá ŋmíl̀ ní ubɔti kíí-u yii: «Ti lēē-si á nīn sá ubɔti saŋkiliuaaa? A yaa kaa là bí gbá-see, á ŋmīĺ niin.» Ní Unimbɔti bɔnaatiliuee ŋmíl̀, ama ní ki lī yii: «M nyí yii Unimbɔti lēē kí nàan̄-si, kun puee a ŋá tin bí nee kaa pílifì m-saŋkii.»

17 Míǹ boonee ní Amasiyaawuu fōō u-saŋkiliibi cee tin u máaǹ kí ŋée ní ki tú binib bí cùú tùkù Isirayeel bɔtiu Joowaasi un gíti sá Joowakaasi jipɔɔn nì Jeewuu naantiiuee yii: «Dāan̄, man nì si tí já!» 18 Ní Isirayeel bɔtiu Joowaasi tú bí cùú tùkù Juuda bɔtiu Amasiyaawuu yii: «Bukuŋkumbu subiki kiba di nìn bí Leebanɔn jool pu. Dalbee ní kì cūtìi ká seedir subu ní ki bí-bu yii: <Dū a-bisal kí tīī m-jipɔɔn ú cáá!> Ama upeel ubɔ nyánní Leebanɔn joolee puee ní ki tāā ki mátì bukuŋkumbuee. 19 Tiŋman a jáń ki pɔ́ɔkiǹ Eedoom yabee ní an yòontí-si. Nín̄ kā a-dumpu soooo kí nīn fàal̀ a-jajil gbanti pu. Ba pu ní a là kí kíĺ kujaau kun poon ní bi làá já kí pɔ̄ɔkiǹ sii nì Juuda janjaliibee?»

20 Ama Amasiyaawuu kaa nìn pílifiǹ-u. Di sá yii Unimbɔti nín nìn lēē míǹ kí nàan̄ Amasiyaawuu nì u-janjakitil, kun puee bi nìn jáam̀ Eedoom yab waaŋi. 21 Niinee Isirayeel bɔtiu Joowaasi yíkìń kujaau pu ki bāań ki dūu sìkī nì Juuda bɔtiu Amasiyaawuu Beeti-Seemeesi tiŋkin, Juuda tiŋki kiban. 22 Isirayeel yab nìn jáń ki pɔ́ɔkiǹ Juuda yab, ní bíǹ sáǹ ki nín kùǹ. 23 Isirayeel bɔtiu nìn cúú Juuda bɔtiu, Joosiyaasi jipɔɔn, Yoowakasi naantiiu Amasiyaawuu kuyuŋu Beeti-Seemeesi tiŋkin. U nìn gíiǹ-u Jeerusaleem tiŋkin. U nìn gbáń ki wīī digundi an wāā kii meetab alaataa ali kí yòon̄ Eefiraayiim punyɔkɔki kí cáá sāā Ŋfaŋfakam punyɔkɔki. 24 U nìn yōoǹ sindaariya nì animbil nì tiwan tin kɔkɔ nìn bí ti-Dindaan Diikun Oobeedi-Eedoom kpèéyee, nì tigaajawan tin kɔkɔ nìn bí dibeecindinee. U nìn cúú binib biba mun ki kpáàa búntì Samaarii tiŋkin.

Amasiyaawuu beel nín kúntì puee

(Kpèè 2 Bib 14.15-20)

25 Isirayeel bɔtiu Joowaasi, Joowakaasi jipɔɔn nín kpíì boonee, Juuda bɔtiu Amasiyaawuu, Joowaasi jipɔɔn gíti ŋá abin saalku ní ki nín kpíì. 26 Amasiyaawuu tuuŋŋi ŋin kíǹee, apeekaa kí cáá sāā aluŋkikaa, ŋmàn̄ ki kā Juuda bɔtiibi nì Isirayeel bɔtiibi tuuŋŋi gbɔŋkun. 27 Kí yòon̄ ŋyunti ŋun ní Amasiyaawuu fātì u-boon ki tīī ti-Dindaanee, ní bi bɔ́ntì u-pu kí kpɔ̀-u Jeerusaleem ní u sáǹ ki nín cá Lakiisi^c. Bi nìn tú binib jìn̄ u-boon ki tin kūuń-u niin. 28 Boonee ní bi dū-u ki ŋá tɔrɔku un itaamu dátée ki gíiǹní Jeerusaleem, ní bi dū-u ki síb́ u-baabi kaakulin, Daafiidi Tiŋkin.