Krooniiki Gbɔnliliitiiku 26

Oosiyasi beel bɔti

(Kpèè 2 Bib 14.21-22, 15.1-3)

1 Amasiyaawuu jipɔɔn Oosiyasi^a nìn cáá abin saalku nì diba ní Juuda yab kɔkɔ dū-u ki kāaǹ dibeel u-baa yil pu. 2 U-baa nín kpíì ki cūtìi ŋàl̄ u-naanjabee, úǹ di fātìi fōō Eelaati tiŋki ki tīī Juuda yab ní ki fātìi máń-kì.

3 Oosiyasi nìn cáá abin saalku nì diba ní ki kpántì ubɔti. U nìn kāl̀ Jeerusaleem ki jíń dibeel abin imuŋku ili nì saalaa nì ali. U-na nìn sá Jeerusaleem ní bi yíì-u yii Yeekooliya. 4 U nìn ŋá tin fáatiǹ ti-Dindaanee, kii u-baa Amasiyaawuu nín nìn ŋá puee ní deedee.

Oosiyasi yúl̀ Unimbɔti deedee, ní ki dāa yīntiǹ-u

5 Ŋyunti ŋun Seekariyawuu un nìn dàkà-u ú nīn fàŋkí Unimbɔtee bí dimaŋfalinee, Oosiyasi nìn nyàab̀ Unimbɔti ní ki yú nì u deedee. Ŋyunti gbanti kɔkɔee, Unimbɔti nìn yāntì tikɔkɔ bútì-u.

6 Oosiyasi nìn cūtìi jáń nì Fiiliistii yab. U nìn gbáń ki wīī agun ŋin bi nìn máń ki tú Gaati nì Yabinee nì Asidoodi timmuee. Míǹ boonee ní u fātìi máń agun ki tú ntimu mun bí Asidoodi kpaanceetiiyee nì Fiiliistii yab tiŋki laakin kíǹee. 7 Unimbɔti nìn tútúǹ-u u jáń ki pɔ́ɔkiǹ Fiiliistii yab nì Bilaalibub bin kóò Guur-Baalee nì Meewun yab. 8 Meewun yab nìn pà lampoo ki tìì Oosiyasi.

Oosiyasi nìn ká mpɔn ní u-yindi gbītì ki tin bàn̄ áli Eejipiti tiŋkin. 9 Oosiyasi nìn máń Jeerusaleem sintil difɔkɔŋi Ŋfaŋfakam punyɔkɔki yilpu nì Ditantakal punyɔkɔki yilpu nì digundi faŋfakam yilpu. 10 U nìn gíti máń adifɔkɔ kuteeu pu ní ki gbìn̄ anyimbɔbil kupaau, di sá yii u nìn cáá tiwaŋkuti tikpil Seefeelaa nì kitimpiliŋ pu. U nìn cáá bikpaabi bí ajoon pu nì Kaarmeel ki kù u-satin nì u-fiinyi kpaaŋŋin, di sá yii u nìn néeń tikpaal bɔti.

11 Oosiyasi nìn cáá bijanjaliibi bin nìn ŋūǹ kí cù kujaau kí jée. Ubɔti janjakpilib kansikin un bi yíì Ananiyawuuyee di nìn kpēē bigbaŋŋmaliibi Yeeyiyeel nì Maaseeyawuu ní bi kàan̄-bi ki yākatì-bi akiti akiti. 12 Adican kpilib bin nìn kpèé bibaatandambi gbantee nìn nyáń binib kutukub bili nì alaataa aluu ní. 13 Bijanjaliibi bin bi nìn kpòotēe nìn nyáń binib kutukub alaataa ata nì biluli nì binib alaataa aŋmoo. Bi nìn cáá dipɔbil ní ki nìn sá bin bɔ́ntì kí já nì ubɔti nannanliibi kí mɔ̄tì u-puee. 14 Bi yaa nìn cá kujaau kamaayee, ubɔti nìn tìì-bi agbampɔɔ nì ŋkpamu nì njanjafuulimu nì ajanjabɔkuti nì itɔfi nì tijaataafun taŋkpeeŋi. 15 Biciŋfitiibi nìn náań maasiimbi biba Jeerusaleem ní ubɔti dū-bi ki páaǹ sintil difɔkɔŋi nì agun faŋfakam pu. Maasiimbee nìn ŋūǹ kí tɔ̄ ipiin nì ataŋkpakpaan. Binib tikpil nìn tútúǹ Oosiyasi tikpil. An puee u nìn ká mpɔn ki nyáń diyindi ní an gbītì ki bàn̄ ilaan kɔ. 16 Ama ŋyunti ŋun ní Oosiyasi ká mpɔn mimmee ní dilambil jítìi kɔ́ ki nāaǹ-u. Waa nìn gíti yú nì ti-Dindaan u-Nimbɔtiu deedee. Dalbee ní u jítìi kɔ́ ti-Dindaan Diikun kí tūū talaalutuukaa talaalu saraafaŋŋu pu. 17 Usaraaŋakpil Asariyawuu nì bisaraaŋaliibi imuŋku inaa bin cáá dipɔbilee nìn dī u-boon ki kɔ́. 18 Bi nìn pīiǹ ubɔti Oosiyasi nsan ní ki bí-u yii: «An kaa pú nsan, sii Oosiyasi ń tūū talaalu kí tīī ti-Dindaan. Aarɔn naantiibi bisaraaŋaliibi bin bi dūu sú ti-Dindaanee tundi dee^b. Nyā circir kɔŋkooŋŋu nee poon, di sá yii a yīntì. Á béé yii ti-Dindaan Unimbɔti nimbiinee, saraa nee kaa làá tīī-si tinyool.»

19 Oosiyasi nìn ŋúb́ u-ŋaan kisambiki kin poon bi tùutī talaaluee. U nìn gíí bisaraaŋaliibi pu diŋuul, dicilpu niinee dinyaŋgbandi tɔ́ u-yigbeel kunimbɔtidiin niin, nsaraafan caŋin, bi-saraaŋaliibi nimbiin. 20 Usaraaŋakpil Asariyawuu nì bisaraaŋaliibi bin kɔkɔ kíǹee kpēē-uee, dinyaŋgbandi di tɔ́ u-yigbeelee. Bi nìn ŋá malaa ki nyántì-u. Úǹ u-ba mun nìn pée ŋá malaa kí nyā, di sá yii u ká yii ti-Dindaan di nìn dáaĺ u-tafal.

Oosiyasi beel nín kúntì puee

(Kpèè 2 Bib 15.5-7)

21 Ubɔti Oosiyasi nìn kpántì unyaŋgbanti áli u-kúm dal. U-nyaŋgbandi gbanti puee, u nìn kóò kudii kubɔn laaba^c ní u-jipɔɔn Yootam un nìn sá bin kpèé dibeecindi kpiliuee kpòotī kitiŋ. 22 Unimbɔti bɔnaatiliu Yeesaya, Amɔtisi jipɔɔn nìn ŋmàn̄ u-tuuŋŋi ŋin kíǹee kí yòon̄ tipeekaal kí cáá sāā tiluŋkikaal. 23 Oosiyasi kpíì^d ki cūtìi ŋàl̄ u-baabi ní bi síb́-u ki kɔ́ĺ u-naanjab bibɔtiibi ceekun. Ama u nín nìn sá unyaŋgbantee puee, baa nìn síb́-u u-dicaŋku kaakulin. U-jipɔɔn Yootam di nìn fōō u-yil ki kpántì ubɔti.