Eesiraasi 3

Joosuwa nì Sooroobabeel fātìi bɔ́ntì dinimbɔtinool

1 Dibindi poon ŋmaluluútiu bāańee, Isirayeel yab bin kɔkɔ nìn gítìń ki kāl̀ bi-timmunee nìn kóoǹ ki cūtìi kpáfì kii unibaantee Jeerusaleem tiŋkin. 2 Niinee ní usaraaŋakpil Joosuwa, Yoosadaaki jipɔɔn nì u-nabiyaamu bisaraaŋaliibi nì Saltiyeel jipɔɔn Sooroobabeel nì u-dicaŋkun yab yíkìi kíĺ ki bíi māā Isirayeel yab Nimbɔtiu saraafaŋŋu kí ŋá bisaraawɔkaabi kii Unimbɔti niliu Mooyiisi nín yóoǹ mara yii bí nín ŋáań puee^a. 3 Nì min kɔkɔ bi nìn fàŋkí binib bin nìn bí niinee, bi nìn fātìi máń nsaraafan ŋu-paaŋkpikiŋu pu, ní ki kíǹ ki ŋáań kutaafaau nì kujoou saraabi ki tìì ti-Dindaan^b. 4 Míǹ boonee ní bi jíń tantib jiŋaaliu kii bi nín síiǹ mara bí nīn jīǹ-u puee, ní ki ŋáań kutaa kamaa saraabi bin nyɔkɔm bi máaǹ kí ŋée^c. 5 Boonee ní bi kíĺ ki bíi ŋáań baabadal saraabi nì saraabi bin bi ŋáań uŋmapɔɔn kamaayee, nì bin bi ŋáań ti-Dindaan jiŋaalib yuntiŋuee nì saraabi bin kɔkɔ binib nìn cāabìń ki tìì ti-Dindaanee^d. 6 Uŋmaluluúti wimpeekaaŋu dalee ní bi kíĺ ki bíi ŋáań bisaraawɔkaabi ki tìì ti-Dindaan, nì min kɔkɔ baa nìn dáá bíl̀ ti-Dindaan diiku kun bi làá mēe nyeelee.

7 Míǹ boonee ní bi tīī bin kpítí ataŋkpeeyee nì kapintab animbil, ní ki tīī Siidɔn yab nì Tiir yab tijin nì ndaam nì ŋkpam bí bóob́ seedir dɔi kí dūú tɔ̄ń tiŋkun doooo Leebanɔn tiŋkin án dāá nyā Jafaa tiŋkin^e. Peeriisi yab bɔtiu Siirusi di pú-bi kinyɔkɔ ní bi ŋúń ki ŋá míǹ. 8 Bi nín fātìi bāań Jeerusaleem laakin kunimbɔtidii nìn bée, dibinliliitiil ŋmaliliitiu poon ní Samiyeel jipɔɔn Sooroobabeel, nì Yoosadaaki jipɔɔn Joosuwa, nì bi-nabiyaamu mun kíǹee, an dàkà yii bisaraaŋaliibi nì Leefii yab nì bin kɔkɔ nìn nyánní kuyuŋu ki kūnnée, kíĺ ki bíi bɔ́ntí Leefii yab bin nìn cáá abin mmuŋku kí nīn cáa cée bí kpòotī kunimbɔtidii mātam tuuŋŋi. 9 Joosuwa nì u-jipɔmbi nì u-nabiyaamu, nì Kadimiyeel nì u-jipɔmbi nì u-nabiyaamu Juuda naakookun yab di nìn kpáfì dicilpu kí kpòotī bin kɔkɔ làá nīn bí kunimbɔtidii mātam tuuŋŋi poonee. Eeniyadaadi maaliŋun yab nì bi-jipɔmbi nì bi-nabiyaamu Leefii yab nìn kútì bi-pu.

10 Ŋyunti ŋun bidimaliibi nìn kíĺ ki bíi bīil̀ kunimbɔtidii nyeelee, bisaraaŋaliibi nìn yú ki pēē bi-saraaŋabɔkutiŋ ki ŋúb́ akantán, ní Leefii yab bin sá Asaafi maaliŋunee ŋúb́ cancakantib, ki nyɔ́ŋkí ti-Dindaan kii Isirayeel yab bɔtiu Daafiidi nín nìn yóoǹ mara pu bi ŋmàn̄ ki síiǹee^f. 11 Bi nìn gà ilan ki tìì tɔb ki nyɔ́ŋkí ti-Dindaan yii: «Tiŋman, u ŋān̄ ní u-neendi bí Isirayeel yab pu kí nīn cá jaanjaan.» Ní samaa kɔkɔ kūuntí mpɔn ki nyɔ́ŋkí ti-Dindaan, kun puee bi nìn kíĺ kunimbɔtidii nyeel ki bíi māā.

12 Bisaraaŋaliibi tikpil nì Leefii yab nì adican kpilib kansikin bin nìn púĺ ki ká dooooyee Nimbɔtidiiku nín nìn bí puee, nìn bíi sūǹ mpɔn bi nín ká bi bíi bīil̀ kupɔŋu nyeelee. Ama ní tikpil mun nìn bíi kūuntí mpɔn nì dipɔɔpindi. 13 An ŋá mimmee binib kaa nìn gíti ŋūǹ kí gàntī bin nìn bí ki kūuntí nì dipɔɔpindee nì bin nìn bí ki sūǹ mpɔnee, kun puee bi nìn kūuntí mpɔn mpɔn ní an gbìl̀ ndan.