Eesiteer i

Kugbɔŋu kun sòoǹ

Eesiteer

puee

Tibɔkilkaal

Eesiteer gbɔŋku máafí-ti Juuda yab nikitil nín nyáń ŋkúm min bi bàà làá nìn kpɔ̀ kí céetí-bee poon puee ní. Tibɔti gbanti jítì ŋyunti ŋun Asuweerusi nìn sá ubɔtee ní. U nìn jíń dibeel kí yòon̄ Indiya tiŋki kí tin cáá sāā Kusa tiŋki, an dàkà yii Eetiiyoopii nì Eejipiti nì Sudan tinjaŋŋi. Ŋyunti ŋun Peeriisi yab nìn dɔ́miń ki jáń ki fōō Babiloon tiŋkee, Juuda yab bin bi nìn cúú ki cūnnì kuyuŋu Babiloonee, adican tikpil kaa nìn fātìi gítì bi-tiŋkin. Tibɔti gbanti nìn jítì míǹ abin alaataa aŋmoo nì diba kpá imuŋku ili boon ní Yeesu Kriisitoo nín dɔ́miń duulinyan. Juuda yab gbanti nìn kāntí agìń binib bin kansikin bi nìn kóòyee cee, kun puee bi-marab nì bi-koobiliŋ nìn nyáń bi-ba nì bin kíǹee yab. Kugbɔŋu nee máafí-ti kudɔ̀ŋu kun nìn dōoǹ ubɔti Asuweerusi kàliŋkpiliu Amaani nì Juuda yab kàlinjau Maardoosee kansikinee. Eesiteer gbɔŋku nee dàkà-ti maamaaci bɔti tin nìn jítèe, min ní Maardoosee kpōotì Eesiteer u dāa kpántì Peeriisi yab nimpubɔtiu ki ŋúń ki nyántì u-nibul nnaabu poonee. An dàkà-ti yii bi nín bɔ́ntì kí dī min kí kúntí Juuda yabee dāa pée kúntì fám ní. Ŋwiin ŋun Juuda yab nannanliibi nìn yóoǹ yii bi làá kpɔ̀ kí céetí-bee, ŋwiin gbanti ní bi pɔ̄fì bi-nannanliibi. Ŋwiin gbanti di kpántì Juuda yab jiŋaaliu un bi yíì yii «Puuriim» bi jīǹ-u dipeel puee. Jiŋaal gbanti ní bi jīǹ ní kí nín jī Dilákatil jiŋaaliu un bi jīǹ ki téetí Unimbɔti nín lákatì Isirayeel yab pu kaa kūū bi-jipɔŋkpilibee.

Tibɔti tin páb́ kugbɔŋu nee poon Eesiteer dūu līntì nyɔkɔpuee di sá u-nibul Juuda yab bɔti nì ipɔntoon in bi tɔ̀n̄ bi-nannanliibee. An sá yii Juuda yab ń ká ubɔ ú yīkì kí mɔ̄tì bi-pu kí gbá kí kpìtī bi nín bóob́ min kí ŋá-bi kinicantiŋ poonee. Eesiteer gbɔŋku bɔti dàkà-ti yii ipɔntoon ditɔ̀l di cāabìń ipɔntoon tɔ̀tam min kaa kúntée. Tiba mun di sá yii ŋyunti ŋun bi ŋmàn̄ kugbɔŋu neeyee, Juuda yab nín kaa nìn pée gíti dàkafī kí fōō bi-ba kí nīn sá ditimbundi kí tɔ̄ bi-bee, u nìn là kí téetí-bi yii bi làá dāá ká dibatɔkpaandi.