Yoob i

Kugbɔŋu kun sòoǹ

Yoob

puee

Tibɔkilkaal

Kugbɔŋu kun sòoǹ Yoob puee kíĺ nì mmaam bɔti ní (Ayil 1 nì 2): Yoob nìn sá unil un pu baa kāntí tikpitil tibee, ní an nìn bútì-u mun. U yaa nìn síl̀ nì Unimbɔti deedeeyee, an kaa nìn sá tiba puɔɔɔ? Too waa ti pée cáá báà tiba: waa ti cáá u-gaajataaa, waa ti cáá mbiyaamuɔɔɔ, waa ti cáá ŋgbampɔn mun. Nì falaa gbanti poonee, u làá nīn gbíntìi yú nì Unimbɔti deedeeee?

Ama ŋma di sá Unimbɔti ní? Yoob yaa sá deedeedaan, kin ba pu ní nnaabu nee bāań-u? U-bɔɔbi bita bíi pɔ̄ɔntí kí yàntī ú béé yii falaa un u bíi jīǹee, an sá yii u ŋá ikpiti iba ní Unimbɔti bíi dátí u-tafal. Yoob bɔɔbi bita gbanti bɔti di jíń mpaan kugbɔŋu nee poon dijaŋkpaandi (Ayil 3–31). Bibɔɔtiibi bitee tùkū Yoob yii ikpiti di cāabìń falaa unil pu, ama Yoob kaa kíí míǹ. Úǹ ceeyee, tin kaa bí deedeeyee di bàń unil maŋfal pu. U bíi jáǹ Unimbɔti un u-bɔɔbi bíi mɔ́tée ki sòoǹ ki bùsī yii úǹ kaa ŋá tikpitil tiba.

Unipɔɔn ubɔ dɔ́miń ki kútì bi-pu: úǹ di sá Eeliiwuu (ayil 32–37). U mun sòon̄ ki kūū Yoob bɔti. Úǹ ceeyee, Unimbɔti dù falaa kí tɔ̄ unil pu kí kpāafì-u ní. Nì míǹ kɔkɔee, ubɔ kaa ŋūǹ kí bàlifì tin u ŋáańee taapu.

Kí kúntée ní Unimbɔti u-ba sòon̄ (38.1–42.6). Ama an bàà sá Unimbɔti ń kíí tibɔti tin Yoob bālifèe, úǹ di gíti bíi bàlifī-u tibɔti. Niinee ní Yoob nín béè yii u yīntì: u sòon̄ Unimbɔti pu kaa baasii nyí un ní Unimbɔti sée.

Mmaam ní bi dūu kúntì kugbɔŋu nee (42.7–17). Unimbɔti lī yii Yoob baba di pée sòon̄ u-pu min máaǹee. Yoob nín nìn fá tin kɔkɔee, u dū míǹ mili pu ní ki gíiǹ ki tīī-u.

Ŋma di baasii sá Unimbɔti ní? Kugbɔŋu nee poonee, ibɔbalfi gbanti pée bí ní ki cáa kátì. Ti-yuntii nee poonee, ibɔbalfi gbanti pée bí ní ki kpākantí tin binib nìn máká an píkée! Yoob gbɔŋku nee tùkù-ti un ní Unimbɔti kaa sée ní. Ku ŋūǹ kí tūtuǹ-ti ti nín dàkafī yii Unimbɔti sá uŋyee. Ku gíti bíi tùkù-ti tí taa dū Unimbɔti u-ba nì ti nín dàkafī u-pu miŋyee kí kpāfì. Kí kúntée, ilandɔkɔ in ti pée cáá Unimbɔti puee yaa kpītèe, ku tútúǹ-ti tí ŋmā kí bɔ́ntí mpaan kí ŋmā kí fōō tibɔmɔntiil wampɔnti tin sá maamaaci tundee.