Eesiteer 9

Juuda yab tɔ̀n̄ bi-nannanliibi ipɔntoon

1 Uŋmal saalaa nì uliliiti poon, Adaar ŋmaliu iwiin saalaa nì ita dal, ŋwiin ŋun bi nìn yóoǹ yii bí kpɔ̀ kí céetí Juuda yabee dūu bāań. Juuda yab nannanliibi dākafì yii bíǹ di làá pɔ̄ɔkiǹ-bi ŋwiin gbanti, ama ní an cúu lábitì ní Juuda yab pɔ́ɔkiǹ bin kpēē ki sīŋkiǹ-bee. 2 Juuda yab nìn kpáfì ntimu mun poon bi bée ubɔti Asuweerusi tinjaŋŋi kɔkɔn ki cíitì bin kɔkɔ làá táká-bee. Ama báà ubɔ kaa nìn ŋúń ki yúl̀ bi-nimbiin, kun puee dinyoondi nìn cúú bi-nannanliibi kɔkɔ. 3 Atinjan kɔkɔ kàliŋkpilib nì abɔtibil nì gɔminab nì ubɔti tɔntɔŋkpilib kɔkɔee nìn yú Juuda yab boon ní, kun puee bi nìn fàŋkí Maardoosee ní yɔ́kɔ́ yɔkɔ. 4 Di sá Maardoosee nìn kā ŋkakaakpaan pu ní ubɔti beecindin, ní ki nìn nyáń diyindi kitiŋ jaaŋŋi kɔkɔn. Maardoosee yindi nìn mɔ̀tīi yíkí yilpu ní ki cá.

5 Juuda yab nìn dū ntàataajimu ki kūū ki nāaǹ bi-nannanliibi kɔkɔ. Bíǹ bin nìn kpèé ki sìŋkīǹ Juuda yabee, Juuda yab ŋá-bi bi nín là puee. 6 Juuda yab nìn kūū Suusi ditiŋyil poon bininjab alaataa aŋmoo. 7 Bi nìn kūū ki kpáaǹ Parsandata nì Daalifɔn nì Asipata 8 nì Poorata nì Adaliya nì Ardata 9 nì Parmasta nì Arisayi nì Ardayi nì Wayisata. 10 Ameedata jipɔɔn Amaani, Juuda yab pulincɔnti jipɔmbi saalaa gbantee, bi nìn kūū bi-kɔkɔ, ama baa nìn gbēē bin bi kūūyee wanti báà kubɔ.

11 Ŋwimbaanti gbanti ní bi tùkū ubɔti bininjab bin nyɔkɔm bi kūū Suusi ditiŋyilinee. 12 Ní ubɔti bí unimpubɔti Eesiteer yii: «Suusi ditiŋyil ní Juuda yab kūū bininjab alaataa aŋmoo ki kpáaǹ Amaani jipɔmbi saalaayee, mimmee m-tinjaŋŋi ŋin kíǹee poonee, bi ŋá mana? A yaa gíti là tiba ḿ ŋá kí tīī-si, bàlifì-mi m làá tīī-si kudɔŋu. Ba ní a là ní?» 13 Ní Eesiteer kíí yii: «Ti-baa ubɔti, a yaa bàà kíikée, á pɔ̄ kinyɔkɔ fool marauee ń nìkī díǹ Juuda yab bin bí Susee ń nìkī kujaau, ní kí dū Amaani jipɔmbi saalaayee kí lúntí ndɔ pu.» 14 Ní ubɔti pú kinyɔkɔ yii bí ŋá míǹ, ní bi báakì maree Suusi tiŋkin. Ní bi dū Amaani jipɔmbi saalaa bin bi kūūyee ki lúntì ndɔ pu. 15 Ní Juuda yab bin bí Suusee kpáfì Adaar ŋmaliu ŋwiin ŋubɔ kpá saalku dal Suusi tiŋkin, ní ki kūū bininjab alaataa ata. Ama baa nìn gbēē bin bi kūūyee wanti báà kubɔ.

16 Juuda yab bin nìn bí ubɔti tinjaŋŋi ŋin kíǹee poonee mun nìn kpáfì ki mɔ́tì bi-ba pu ní ki kūū bi-nannanliibi kutukub biŋmoo kpá imuŋku inaa, ki ŋūŋfì bi-pu, ama baa nìn gbēē bin bi kūūyee wanti báà kubɔ. 17 Uŋmal gbanti ŋwiin ŋubɔ kpá saalku dal ní bi gbēeǹ kaa ti bíi kù binib, ní bi dū ŋwiin gbanti ki kpántì jiŋaal nì dipɔɔpindi wiiŋŋu. 18 Ama Juuda yab bin nìn bí Suusi ki nìn kpáfì iwiin saalaa nì ita, nì ŋubɔ kpá saalku dal ki tɔ̀n̄ bi-nannanliibi pu ipɔntoonee nìn kāl̀ iwiin saalku dal ní ki ŋūŋfì. Bíǹ nìn dū ŋwiin gbanti ní ki kpántì jiŋaal nì dipɔɔpindi wiiŋŋu. 19 An pu ní Juuda yab bin nìn kóò ntiŋgbamu poonee nìn dū Adaar ŋmaliu ŋwiin ŋubɔ kpá saalku dal ki kpántì jiŋaal nì dipɔɔpindi wiiŋŋu, ki ŋáań tijin ki pūǹ tɔb.

Bi yóoǹ kí nīn kíǹ ki jīǹ Puuriim jiŋaaliu

20 Maardoosee nìn ŋmàn̄ tin kɔkɔ jítèe ki bíl̀. U nìn ŋmàn̄ tigbɔn ki tīī Juuda yab bin kɔkɔ bí ubɔti Asuweerusi tinjaŋŋi ŋin pìl̄ee nì ŋin dátèe kɔkɔn. 21 U nìn tùkū-bi yii dibintil kamaa, Adaar ŋmaliu ŋwiin ŋubɔ kpá saalku nì iwiin saalku dalee, bí nīn jīǹ jiŋaal gbanti. 22 Di sá yii iwiin gbanti poon ní Juuda yab fōō bi-ba ki ŋūŋfì bi-nannanliibi pu. Adaar ŋmaliu poon ní mpɔn nìn cúu lábitì ní kunimbaau kpántì dipɔɔpindi ní dikpool kpántì jiŋaal. Iwiin gbantin ní Juuda yab ŋáań tijin ki tìì tɔb ní ki pūǹ biwɔfib tiwan. 23 Ní Juuda yab fōō Maardoosee nyɔkɔ, ní ki dū jiŋaal un bi jíńee ki kpántì diyaajakoobil kí nīn kíǹ ki ŋáań míǹ.

24 Di sá Ameedata un sá Agaagi naakookunee jipɔɔn Amaani, Juuda yab nannanliu nìn bóob́ yii bí kúntí Juuda yab. U nìn tɔ́ Puur, an dàkà yii u tɔ́ kasi kí béé ŋwiin ŋun máaǹ bí kpɔ̀ kí kúntí-bee. 25 Ama Eesiteer nìn cūtì ki ká ubɔti tibɔti gbanti pu, ní ubɔti yāntì bi ŋmàn̄ kugbɔŋu yii ntoom tafadaaldi din Amaani bɔ́ntì Juuda yab puee ń fàtīí lítí u-pu, ní bi dū u nì u-jipɔmbi ki lúntì idɔ pu. 26 An pu ní bi nìn pú jiŋaal gbanti wiiŋyi yii Puuriim, kí dàkà yii bi nìn tɔ́ Puur ní ki lēē iwiin gbanti.

Maardoosee nín nìn ŋmàn̄ tibɔti tin kugbɔŋu poonee nì Juuda yab bi-ba nín nìn ká tiŋyee nì tin nìn jítì bi-puee, 27 ní bi dūu kpántì bi-yaajakoobil. Bíǹ nì bi-naantitɔntɔkɔŋ nì bin kɔkɔ làá dāá páanní bi-boonee làá nīn jīǹ jiŋaal gbanti dibintil kamaa iwiin ili gbanti poon, kii bi nín ŋmàn̄ ki yóoǹ yii bí nīn jīǹ-u puee. 28 Míǹ ní kudicaŋu kamaa nì atinjan kɔkɔ nì kitiŋ kamaa nib làá nīn téetí iwiin gbanti pu ki jīǹ jiŋaal kí nīn cáa cá. An puee Juuda yab ń taa gbèen̄ Puuriim jiŋaaliu nee jītam, kí taa súntí u-pu kí nīn pée cáa cá jaanjaan.

29 Unimpubɔti Eesiteer, Abiikayiil bisal nì ujuudaja Maardoosee ŋmàn̄ kugbɔnliliitiiu kí tīī kugbɔŋu kun bi nìn ŋmàn̄ Puuriim puee mpɔn. 30 Bi nìn ŋmàn̄ kugbɔŋuee ní ki dūu yākatì ubɔti Asuweerusi tinjaŋŋi dilaataal nì mmuŋku nì alulee poon. Bi nìn mēē ŋgbansɔŋfi nì dipɔɔpindi ki tīī Juuda yab kugbɔŋuee poon, 31 ní ki kpáafì-bi bí nīn jīǹ Puuriim jiŋaaliu iwiin gbanti. Án nīn sá-bi dinyɔɔboobil nì itiminsi wiiŋyi, kii Maardoosee ujuudaja nì unimpubɔti Eesiteer nín yóoǹ yii bíǹ bi-ba nì bi-naantitɔntɔkɔŋ ń nīn ŋáań puee. 32 Ní bi dū Eesiteer nín yóoǹ mara un Puuriim puee bɔti ki ŋmàn̄ ki ŋá kugbɔŋun.