Yoob 5

1 Fáá mbiil kí kpèè ubɔ yaa kíí-si.

U-tuuŋyi ŋulɔŋu ní a ŋūǹ kí sòoǹ nì ní?

2 Ugbaan ŋuul di kù-u,

kinaatuui poompooŋyi di yàntī u kúù.

3 Tiŋman, m lafun ká an bútì ugbaan,

ama maa tāaǹ ní ki tɔ́ u-kɔŋkooŋŋu mbusu yii:

4 «U-biyaamu ń taa ká dijòońdi!

Bí sòoǹ kí kpɔ̀ mu-bɔti kubɔsoondiin, ubɔ ń nīn kpá kí mɔ̄tì mu-pu!

5 Kun udaan cáńee, bin ŋkùm cááyee ń dūú jī!

Bí yòon̄ kí kpáàa búntí, min kamaa bi dū ikuŋkum ki bàkēe!

Bin nnyinnyoo cááyee ń gbáb́ kí bìin̄ u-gaajati pu.»

6 Di sá yii nnaabu kaa nyēeń kitiŋ,

míǹ ní falaa mun kaa ti cɔ́tiń kitiŋ.

7 Ama bi màl̄ unil digìńdi pu ní,

a lì kii iŋmiyatiyaal nín yíkí ki ŋàaǹ puee.

8 Man di yaa bàà sá siiyee, m bàà làá nyàab̀ Unimbɔti ní,

úǹ ŋaan ní m bàà làá dū m-bɔti kí ŋá.

9 U tūǹ atuŋkpaan ŋin nyóò unil kaa ŋūǹ kí gbìl̄ ŋi-taapuee ní.

U-maamaaci tuuŋŋi kaa cáá ŋkaan.

10 Úǹ di yàntī utaa nì kitiŋ pu,

ki yàntī nnyim nyēeń yilpu ki sɔ̀ŋkī tisati.

11 Úǹ di yòontí bin dɔ̄ kitiŋ ki fìlim̀ee yilpu,

ní ki yàntī bin kā dikpoolee kāntí mmɔn.

12 Úǹ di bíiĺ milimilidambi nín bɔ́ntì kí ŋá tiŋyee.

Waa yàntī an bútí-bi.

13 Úǹ di gīintí biciŋfitiibi ciiŋyi ki fàtīi cáa cútí-bi^a,

ní ki bíiĺ milimilidambi nín bɔ́ntì puee.

14 Bi gbéetí dibɔmbɔndi ŋwiimpu,

ní ki táfí kuwiŋkaŋu pu kii kunyeeuee.

15 Ama Unimbɔti fìil̄ unandaan ki nyāntí bi-nyɔmmun,

u fìil̄ ufalaadaan ki nyāntí ubaatandaan ŋaan.

16 Uwɔfi kíǹ ki cáá dimákal,

ama Unimbɔti pīiǹ binikpitib nyɔmmu.

17 Kpèè, unil un tafal Unimbɔti dátée bí mmɔnneeee!

Míǹ puee Yoob, taa kpèè

Unimbɔti Mpɔŋkɔdaan tafadaaldi fám^b.

18 Unimbɔti di tìì unil tiweendi,

úǹ di tí nyìitī u-buuŋŋu,

úǹ di kù unil ní kí tí cáaǹ-u mun^c.

19 U làá nyāntí-si agìń poon ŋfunyɔm miluu pu,

ní nluluútiimee, tikpitil tiba kaa làá ŋá-si.

20 Ŋkùm yuntiŋuee, u làá fīī-si kí nyāntí ŋkúm ŋaan,

ní kí fīī-si kí nyāntí kitàataajiki ŋaan kujaau yuntiŋu.

21 Unimbɔti làá wúń a-pu bikuŋfiliibi ń taa ŋá-si tiba,

nnaabu yuntiŋuee, aa làá fàŋkì tiba.

22 Nnaabu nì ŋkùm yuntiŋuee, a làá nīn bí ní ki lāā,

ní kaa làá fàŋkì ipeel mun.

23 Ataŋkpee kaa làá páb́-si a-saakun,

ní ipeel ń kpántí a-bɔɔbi.

24 Ŋgbansɔŋfi làá nīn bí a-dicaŋkun.

A làá dāá kpèè a-waŋkuti ní kí ká yii kubɔ kaa wáŋkì.

25 A làá dāá ká yii a-maaliŋu būtì.

A-naantiibi làá dāá nīn bí kii timool nín nyēē kitiŋ pu puee ní.

26 A làá dāá púĺ kí bà a-wiiŋyi ní kí nín kpú,

kii kudiceeu yuntiŋu bi nín cēē idi kí páań kukaatuŋu pu puee.

27 Kpèè, ti nín nyàab̄ ki dāa ká kuŋyee dee,

ní an lafun sá ibaamɔn.

Pīlifì tiŋan kí dūú kpāafì kí tīī a-ba.