Ilan 8

Unimbɔti nyooti nì unil kpaanti

1 Daafiidi di ŋmàn̄ nlan nee ki tīī bilaŋgaaliibi kpiliu. Bi gà-ŋu ki bɔ̀ɔ́ Gaati yab beeku ní.

2 Ti-Dindaan, ti-Dindaan,

bi wāĺ a nín sá ukpaan miŋyee

duulinya kɔkɔ poon.

A-yindi cáá tinyool kitiŋ kɔkɔ pu.

3 A cáá campɔntib^a nì mbipɔmu nyɔŋkii

ní ki cáa jáà nì a-nannanliibi.

Bi-nyɔŋkii gbanti bí kii digundee ní

a cáa pìintí bin jáà nì see nyɔmmu.

4 M yaa kpēē kutagbɔŋu kun sii a-ba náańee,

uŋmal nì iŋmalbijaa in a dūu kāaǹ i-paaŋyi puee,

5 m bàlifī m-ba yii ba ní unil sá ní a dàkafī u-pu míǹ?

Nisaaleen sá ba ní aa mɔ̄ u-pu míǹ^b?

6 A náań-u ki yāntì sii baba^c di jítiǹ-u fiii,

ní ki dū tinyool nì jilma ki cíkiǹ-u kii kibeefuuliiyee.

7 A dū-u ki kāaǹ tin kɔkɔ a náańee pu dibeel,

a dū tikɔkɔ ki ŋá u-taaŋi taapu^d,

8 tiwaŋkuti, inaa nì ipii nì iŋoobu,

ki kpáaǹ gba ipeel,

9 nì inoon nì ijɔm

nì tin kɔkɔ pée bí nnyiminee.

10 Ti-Dindaan, ti-Dindaan,

duulinya kɔkɔnee,

bi wāĺ a nín sá ukpaan miŋyee ní!