M nyí yii ti-Dindaan sá ukpaan
135
1 Aleeluya, nyɔ̄ŋkìmaan ti-Dindaan!Nyɔ̄ŋkìmaan ti-Dindaan yindi,
nimbi ti-Dindaan tɔntɔnliibi, nyɔ̄ŋkìmaan-u,
2 nimbi bin bí ti-Dindaan diikun,
ki bí ti-Nimbɔtiu diiku cindinee.
3 Nyɔ̄ŋkìmaan ti-Dindaan, di sá yii u ŋān̄,
gāāmaan ilan kí nyɔ̄ŋkì u-yindi, di sá yii di mɔ̄.
4 Ti-Dindaan lēē Jaakɔb ú nīn sá u-yɔu,
u lēē Isirayeel ú nīn sá u-gaajawammɔntiiti.
5 Tiŋman, man nyí yii ti-Dindaan sá ukpaan,
timbi Dindaan jítiǹ inimbɔti kɔkɔ.
6 Ti-Dindaan ŋáań tin kɔkɔ u yaa lèe yilpu nì taapu,
tiŋkubin nì inyiŋfi taapu taapu.
7 U yàntī atagban ń nyānní kitiŋ gbeennyɔkɔ kí dāan̄,
u yàntī utaa ń ŋmɔ́ kí nì,
u nyāntí kubuŋu laakin u kpáafì-kuee.
8 Úǹ di kūū Eejipiti yab biseebiyaamu nninjabiyaamu
kí yòon̄ binib kí cáá sāā tiwaŋkutia.
9 Sii Eejipiti tiŋki poonee,
u nìn ŋá tidaandi nì maamaacib
ki dáaĺ Faaroo nì u-tɔntɔnliibi kɔkɔ tafalb.
10 Úǹ di nāaǹ atimbun kupaau,
ki kūū bibɔtiibi bin cáá mpɔnee:
11 bíǹ di sá Amɔɔr yab bɔtiu Siiwɔn,
nì Baasan tiŋki bɔtiu Ɔɔgic,
nì Kanaan yab bɔtiibi kɔkɔ.
12 Míǹ boonee ní u dū bi-timmu ki tīī difakal,
u dūu tīī u-nibul Isirayeel yab bí nīn yì.
13 Ti-Dindaan, a-yindi làá nīn pée bí ní ki cá jaanjaan.
Bi làá nīn pée téetí a-pu ní abin abin.
14 Di sá yii ti-Dindaan sòoǹ ki pɔ̀ u-nibul,
u sūǹ u-tɔntɔnliibi saai.
15 Animbil kúti nì sindaariya ní bi dūu mɔ́ɔ́
atimbun ŋin kíǹee waaŋi,
binib di dū bi-ŋalii ki mɔ́ɔ́-ŋi.
16 Ŋi cáá kinyɔkɔ, ní kaa sòoǹ.
Ŋi cáá animbil, ní kaa wāĺ.
17 Ŋi cáá atafal, ní kaa gbìl̀.
Báà kufoou kaa bí ŋi-nyɔmmun!
18 Bin mɔ́ɔ́-ŋee ń nīn bí kii ŋi nín bí puee,
ki kpáaǹ bin kɔkɔ máká ŋi-pueed.
19 Isirayeel yab, jāam̀maan ti-Dindaan.
Aarɔn naantiibi, jāam̀maan ti-Dindaan.
20 Leefii yab, jāam̀maan ti-Dindaan.
Nimbi bin fàŋkí ti-Dindaanee, jāam̀maan ti-Dindaan.
21 Jāam̀maan ti-Dindaan un kóò Jeerusaleem
Siiyɔn jool puee.
Aleeluya, nyɔ̄ŋkìmaan ti-Dindaan!