Iciin fìil̄ unil tikpitilin
2
1 M-biki, fōō tin ní m dàkà-see,kpāafì m-marab a-ni.
2 Kpòon̄ a-tafal kí pīlifì iciin,
kpòon̄ a-pɔbil kí gíiǹ dinyil watil pú.
3 Mèè dinyil dí tūtuǹ-si,
yíiń tibɔti taapu digbilindi dí jòoń-si.
4 Nyàab̀ an wanti kii animbilee,
nyàab̀-tì kii tigaajawan tin bí dibalineea.
5 Niinee a làá gbìl̄ unil ń nīn fàŋkí ti-Dindaanee taapu,
ní á ŋmā kí nīn nyí Unimbɔti.
6 Di sá yii ti-Dindaan di tìì iciin,
u-cee ní dinyil nì tibɔti taapu digbilindi nyēeńb.
7 Úǹ di tútúǹ deedeedambi,
ní ki wúǹ bibulcinnib pu kii digbampɔɔlee.
8 U tíkí bin nóó deedee saŋŋuee,
ki cí bin yú nì u deedeeyee.
9 A yaa pílifiǹ-mee, a làá béé yii
á nīn bí deedee, kí nīn cáá tibulcin ní kí nīn nóó ibaamɔn saŋŋuee
di sá nnaam sàmbiki.
10 Niinee ní iciin ń kɔ́ a-pɔbilin,
ní dinyil ń yàntī a-naŋki ń nīn bí mmɔnni.
11 Nlandɔkɔmɔnti làá nīn wúń a-pu,
ní dinyil ń nīn cí-si.
12 Tiwan gbanti làá tūtuǹ-si á taa ŋá tin kaa ŋān̄ee.
Tì làá fīī-si binib bin sòoǹ tinyimɔmbɔtee ŋaan.
13 Tì làá fīī-si binib bin féeń ibaamɔn saŋŋu
ki kíǹ ki nóó dibɔmbɔndi sàmbiyaamuee ŋaan.
14 An mɔ̄ǹ-bi bí nīn ŋáań tin kaa ŋān̄ee,
bi tūǹ atuŋkpiti ki fàal̀.
15 Bi-sàmbiyaamu gɔ́ĺ,
ní bi-saŋyi kaa tèen̄.
16 Mimmee a làá nyā ubɔ nimpuu ŋaan,
uninjamɔnnil un cáá nyɔɔmálmalee.
17 U yāntì u-taafaabɔɔn,
ní ki súntì dipoondi din u pōoǹ u-Nimbɔtiu nimbiinee puc.
18 U-bimbim cáǹ-u ŋkúmin,
ní u-ŋáaǹtam cáǹ-u ditaŋkpiilin.
19 Ubɔ kaa cūtì u-cee ki fātìi gítìń,
ki kíntì dimaŋfal saŋŋu.
20 An puee fōō binimɔntiibi bimbim,
dī deedeedambi tabɔbiliŋ.
21 Di sá yii deedeedambi di làá nīn kóò kitiŋ pu,
bibulcinnib di làá gbíntí ki-pu.
22 Binikpitib bíǹ làá nyā kitiŋ pu,
bi làá jà bin kaa bí deedeeyee kí nyāntí kitiŋ pu.