Alaŋkpan Gbɔŋku 3

Kí nīn cáá iciin ki tɔ́ Unimbɔti

1 M-biki, taa súntí tin m dàkā-see, kpāafì m-marab a-pɔbilin. 2 M-saŋkii puee, a làá ká mmaŋfafɔkɔn ní kí jī nnaam a-maŋfal wiiŋyi poon. 3 Nín̄ pée ŋáań tiŋan, kí nīn nóó ibaamɔn saŋŋu. Dū tiwan gbanti kí léeń a-neen, dū-tì kí ŋmà a-pɔbilin. 4 Niinee Unimbɔti nì binib làá nīn néeń-si, ní kí nīn pàkà-si. 5 Nín̄ máká ti-Dindaan pu nì a-pɔbil kɔkɔ, kí taa nín̄ máká a-nyil pu. 6 Dū tin kɔkɔ a làá ŋée kí ŋá u-ŋaan, ní ú kpòotī-si a-sàmbiyaamu kɔkɔ poon. 7 Taa dàkafì yii a sá uciŋfiti, ama á nīn fàŋkí ti-Dindaan ní kí fàtī a-boon kí tīī ikpiti^a. 8 Án làá cáaǹ a-gbaŋweeŋyi ní kí tīī-si mpɔn. 9 Dū a-gaajawanti nì a-kpaajinti ticɔfikaal kí tīī ti-Dindaan tinyool. 10 Niinee tikpaajin làá gbí a-cakalaabi ní ndaam ń gbí a-lɔnti kí pùtifì. 11 M-biki, ti-Dindaan yaa bíi dátí a-tafalee, á taa dūú kpèè fám, u yaa bíi wòoǹ-see, an taa wà-si. 12 Di sá yii ti-Dindaan wòoǹ un u néeńee kii ubaati nín wòoǹ u-jipɔɔn un u lèe puee ní^b. 13 Unil un ká iciinee, unil un cáá dinyilee bí mmɔnneeee! 14 Di sá yii á nīn cáá iciinee jítiǹ á nīn cáá animbil. Ipaati in i tììyee jítiǹ sindaariya pu. 15 Iciin pɔ̄ɔ̄ kudaau ki jítiǹ abeedimbil, tin unil bìǹ ki nyàab̀ee tiba kaa bàn̄ iciin. 16 I tìì unil mmaŋfafɔkɔn, ki tìì tigaajati nì tinyool. 17 I-saŋyi mɔ̄, ní i-sàmbiyaamu poon cáá ŋgbansɔŋfi. 18 Iciin sá kii busubu bun tìì dimaŋfalee ní ki tīī unil un ŋúb́-iee, un cáá-iee bí mmɔnneeee^c. 19 Ti-Dindaan dū iciin ní ki náań kitiŋ, ní ki dū dinyil ki náań yilpu. 20 Nì u-nyil pu ní nnyim min bí kitiŋ taapuee tɔ́nní ki yāaǹ, ní atagban yàntī utaa nì^d.

Ti-Dindaan wúǹ uciŋfiti pu

21 M-biki, dū a-ba kí nákáǹ dinyil nì nlandɔkɔmɔnti, taa pée fàtī a-boon kí tīī tiwan tili gbanti jaanjaan. 22 Tì làá yàntī á ká dimaŋfamɔntiil nì tiŋan. 23 A làá còom̀ a-saŋŋu poon nì ŋgbansɔŋfi, ní a-taal kaa làá gbéetí tiba. 24 A yaa làá dòon̄ee, aa làá fàŋkì tiba, a làá gèeǹ ŋgeemmɔntiim a-dooŋu pu. 25 Aa làá fàŋkì atulim abaaa, binikpitib kaa làá dāan̄ kí táká-si. 26 Di sá yii ti-Dindaan di làá nīn wúń a-pu tiba ń taa ŋá-si, ní kí nīn bīī a-boon kutaliŋŋu kubɔ ń taa sàl̄-si.

Á nīn néeń a-juti

27 A yaa cáá ŋŋmamee, á taa yíí yii saa làá tūtuǹ unil un nyàab̀ ditutundee. 28 A yaa ŋūǹ kí tīī a-juti kun u mēē-see, á taa tùkù-u yii: «Nín̄ cá kí fu gítiń fool ḿ fu tīī-si.» 29 Sii nì a-bɔɔ yaa kóò ní u máká a-puee, á taa nyàab̀ nsàmbiyaamu kí ŋá-u tikpitil. 30 Á taa táká unil tibɔti fám ní já, udaan kaa ŋá-si tiba. 31 Taa nín̄ cáá bin ŋáań tipɔmbɔtee pu nnimbitaataam, kí taa nóó bi-tabɔbiliŋ. 32 Di sá yii ti-Dindaan ná ikpitidambi, ama ní ki néeń bin bí deedeeyee. 33 Ti-Dindaan tòó binikpitib dumpui mbusu, ama ní ki bìintí deedeedambi kɔŋkooŋyi pu. 34 U bèel̄ bin bèel̄-uee, ama ní ki ŋáań bin sìntīǹ bi-ba taapuee tiŋan^e. 35 Kun dɔ̄ ki cí biciŋfitiibee di sá tinyool, ama bigbaambee, icoo di dɔ̄ ki cí-bi.