Alaŋkpan Gbɔŋku 6

Á taa yūĺ ubɔ boon ú jī dipɔndi

1 M-biki, tí lì yii a fáá ubɔ ŋaan ki pōoǹ kí pà a-juti pɔndi, 2 ní tin nyáń a-nyɔkɔnee dūu bóob́-si ki sàl̄-si kii kutaliŋŋuee. 3 M-biki, kii a nín kɔ́ a-juti ŋaanee, ŋá tin bí nee kí nyā u-bɔtin. Cù u-cee kí lítí u-nimbiin kí gbàam̀-u. 4 A yaa kaa ŋúń ki ŋá míǹ, á taa pée púkuń ní kaa nín gèen̄. 5 Fōō a-ba kí líí kii ucaŋkpalim nín ŋmátí ukpan ŋaan puee, àá kii unoon nín ŋmátí kí nyā kutaliŋŋun puee.

Taa nín̄ sá uwutijoodaan

6 Uwutijoodaan, cùú kpèè unaanyanti. Cùú kpèè u-bimbim kí kpántí uciŋfiti^a. 7 Unaanyanti kaa cáá un kpèé-u ní u tūǹ ditundee, kaa cáá un ŋmà ditundi din u túń ŋwiinee, kaa cáá ukpil un fōō-u ditundee. 8 Nì míǹ kɔkɔee, dipeel puee u kōontí tijin ní kí yóoń, u kpáafí tijikaal ŋyunti ŋun bi cēē tikpaajinee ní. 9 Uwutijoodaan, kí cáá sāā ŋyunti ŋulɔŋu ní a làá nīn pée dɔ̄ ki gèeǹ ní? Ŋyunti ŋulɔŋu ní a làá fìntī ŋgeem pu ní? 10 A là kí gèeǹ fiii, a là kí dáb́ fiii, a là kí dòon̄ fiii kí kpàl̄ iŋal. 11 A dɔ̄ mimmee ní disool ń cíliń a-pu kii unaayuuyee, ní falaa ń cúú-si kii bin fúkuĺ binibee.

Kun dɔ̄ ki cí unyimɔndaanee

12 Unikpiti sá un kaa bí tibanee, u yìiǹ ní ki mɔ́ntí inyimɔn. 13 U wàb̀ u-nimbil ki cáá u-taaŋi nì u-ŋambiyaamu ki dàkà tidaandi kí ŋmā kí mɔ̄ntì u-nyimɔŋyi. 14 Ikpiti diŋál di kā u-pɔbilin. U pée dàkafī tin kaa ŋān̄ee ŋma pu ní, ki jāantí binib. 15 An pu ní nnaabu làá jēetí u-pu dicilpu dicilpu. Dibɔbilin niin ní án làá nàan̄-u nnyɔkɔ kpá!

Tin ti-Dindaan kaa lèe

16 Tiwan tiluu ní ti-Dindaan pée ná, ní kululuútiiu ní u-nimbil kaa là kí ká: 17 Unil un dàkà u-bee,

unil un mɔ́ntí inyimɔnee,

unil un kù maanyiibabee,

18 unil un bɔ́ntí kí ŋá atuŋkpitee,

unil un yáb̀ kí ŋá tin kaa ŋān̄ee,

19 Unil un lèekī nnyimɔn seerauee.

Kuwanluluútiiu di sá unil un jāantí nnabiyaamuee.

Á nīn nyíǹ a-ba nì tilaakpaal

20 M-biki, nín̄ ŋúb́ tin a-baa kpáafì-see, taa fàtī a-boon kí tīī tin a-na dàkā-see. 21 Tí nīn pée kā a-pɔbilin, yàntī tí nīn sá tiléeŋkaal á dūú léeń a-neen. 22 Tì làá nīn kpòotī-si a-saŋkindi poon, ki làá nīn cí-si a-geem poon ní a yaa fīntèe í sāŋkì-si. 23 Di sá yii tibɔkpaafikaal sá kii fitilee ní, ní didàkal sá kii ŋwalifee, ní iwoon sá kii dimaŋfal saŋŋuee. 24 An wantee làá wúń a-pu kí nyāntí-si unimpu un saŋkindi kaa ŋān̄ee, nì ubɔ nimpuu nyɔɔmálmaluu ŋaan. 25 Taa nín̄ là an nimpuuee u-nyaaŋku pu, taa yàntī u-nimbikpeeŋu ń dáaĺ-si kí kɔ́ǹ u-taliŋkun. 26 Di sá yii a yaa mɔ̄nnì kinimpulaakpaayee, kalaa^b nimbiliŋ ní a làá dūú pà, ama a yaa mɔ̄nnì ubɔ nimpuuee, a-maŋfal kɔkɔ ní a dūú pà. 27 Ŋma dù ŋŋmi kí ŋá u-bɔkutilookun an kaa fōō? 28 Ŋma còom̄ amɔsiŋkoon pu u-taal kaa wùn̄? 29 Míǹ ní an sá ki tīī un di yaa mɔ̄nnì u-juti nimpuuee. Un di yaa gbēē-uee, see ú fōō ditafadaaldi. 30 Baa wòoǹ unaayuu un yùn̄ kí jī kí kpɔ̀ ŋkùm u-poonee. 31 Ama ní bi yaa cúú-uee, see ú téeǹ tin u yùn̄ee miluli pu, see ú kóoǹ tin kɔkɔ u cáá u-dumpuee kí dūú pà dipɔndi. 32 Uninja un di yaa ŋá tilaakpaal nì ubɔ nimpuuee kaa cáá diyil. Un di ŋáań mimmee bíiĺ u-ba ní. 33 U làá fōō tiweendi, bí kpèè-u fám ní u-cooi kpá kí kúntí jaanjaan. 34 Di sá yii ipoompoon làá yàntī unimpuee cal ń fōō mbum ní ŋwiin ŋun u làá dāá tɔ̀ ipɔntoonee, disaasɔl dāa kpá. 35 Tiba kaa bí bí tīī-u án sɔ̀ŋkì u-pɔbil. Báà a yaa tīī-u tiwampɔkaal tikpil, waa làá fōō.