Alaŋkpan Gbɔŋku 7

Kinimpulaakpaai kíil̀ unaacimpɔɔn

1 M-biki, taa súntí m-nyɔɔbuŋŋi pu, kpāafì m-marab tiŋan. 2 A yaa là kí nīn bí dimaŋfalinee, á nīn ŋúb́ m-marab nì tin m dàkā-see kii a nín ŋúb́ a-nimbibul puee. 3 Taa yàntī an wantee ń ŋmátí a-ŋaan, dū-tì kí ŋá a-pɔbilin. 4 Yàntī iciin ń nīn sá a-niisal, kí yàntī dinyil ń nīn sá a-bɔɔmɔnti. 5 Tì làá fīī-si ubɔ nimpuu ŋaan, uninjamɔnnil un cáá nyɔɔmálmalee ŋaan.

6 Dalba m nìn yú m-tɔkɔlau caŋin ní ki kpèé mmɔŋki. 7 M nìn ká binaacimpɔmbi bin kaa nyí tibee, ní bi-kansikinee m dáań ki ká ubɔ, úǹ kaa pée cáá nlandɔkɔ báà fiii. 8 U nìn bíi còom̄ didandi pu laakin uninjamɔnnil ubɔ kóòyee, ní u pāatì unimpuee dumpu saŋŋu. 9 An nìn sá kujoou ní, ŋyunti ŋun ní kunyeeu bíi móotí an bíi bɔ̀ntēe. 10 Niinee ní unimpuee nyánní ki túŋkì-u nsan, ki pēē kii kinimpulaakpaayee ki cáá biibii pɔbil. 11 U gbí kufuu kaa cáá icoo, ní u-mul kaa cōontí u-dumpu. 12 An yaa sá adan pueeee, an yaa sá laakin binib kpáfí ki wīikéeyeeee, u pée nyàab̀ un làá mɔ̀nnì-uee ní. 13 U tú unaacimpɔɔnee nsanee ní ki kpàl̄-u ní ki sòon̄ nì dilambil yii: 14 «M nìn pōoǹ Unimbɔti yii m làá ŋá ijaam saraau kí tīī-u, ní m ŋá saraa gbanti díǹ nee. 15 An pu ní m bàà nyáń kí nyàab̀-si ní ki dūu ká-si nee. 16 M dū satakpaambi nì Eejipiti tiŋkin satamɔntiibi ki páaǹ m-dooŋu pu. 17 M yāaǹ-ŋu nì miiri nì disaaweendi nì siinamoom talaalub. 18 Dāan̄ tí cùú dòon̄ kí jī mmɔn áli kutaa nì ku-wuntil. 19 Di sá yii m-cal kaa bí mmɔŋki, u búntì nsandandati ŋubɔ. 20 U gbéeǹ u-nimbifɔŋki animbil ní ki yōoǹ ki nín cá, waa làá fàtīí gítiń malaa.» 21 U kíil̀ unaacimpɔɔnee míǹ ní úǹ dāa kíí, u yōoǹ nyɔɔmálmal ní ki ŋúń-u. 22 Ní u kùl̄ ki páaǹ u-boon dicilpu niin kii unaa ní bi dàtī ki cáǹ kí kpɔ̀ee, a lì kii uwaati ní bi bóob́ ki cáǹ kí tɔ̄ ditafadaaldinee, 23 áli mpiin ń dāá sāā kí kɔ́ u-pɔɔl. Kii kinɔmbiki nín ŋàaǹ malaa malaa pu kí cáá ki-ba kí tɔ̄ kulaaŋŋun puee, waa nyí yii u-maŋfal ní u làá dūú pà tin u bíi ŋáańee pu.

24 Kɔŋkɔnnee, m-biyaamu, pīlifìmaan-mi ní kí kpòon̄ ni-tafal tiŋan kí pīlifì anyɔɔbun ŋin nyēē m-nyɔkɔnee. 25 Ní taa yàntī an nimpuu juti ń ŋmàtiǹ-ni. Ní taa nóó u-sàmbiyaamu kí wāŋkì. 26 U tīī binib tikpil tiweendi ní ki kūū-bi, u kūū ki kpáaǹ bipɔɔbi gba. 27 U-dumpu di sá nsan ŋun cá bitaŋkpiibi kɔŋkooŋŋunee, ŋu sìntī ditaŋkpiilin ní cáaa.