Alaŋkpan Gbɔŋku 8

Iciin fātìi tí bíi yíì binib

1 Iciin bí ki tátí ki yíì,

dinyil bí ki kūuntí ki yíì.

Naa gbìl̀aaa?

2 Ŋgbantamu mun bí didandi caŋinee,

isampuyakati ní iciin yú.

3 Kitiŋ punyɔkɔ caŋin,

laakin binib dìŋfī ki kóòyee,

iciin yú ki tátí mpɔn yii:

4 «Nimbi binib ní m yíì.

Nimbi binifoobi ní m lì.

5 Nimbi bin kaa nyí tibee,

ní bīfì kí nīn cáá nlandɔkɔmɔnti.

Nimbi bin sá bigbaambee,

bīfìmaan kí nīn cáá dinyil.

6 Ní pīlifìmaan, tibɔti tin páb́ee ní m làá sòoǹ,

deedee bɔti di làá nyānní m-nyɔkɔn.

7 Kun puee m-nyɔkɔ sòoǹ ibaamɔn ní,

m-nyɔkɔ ń sòoǹ tibɔkpitilee, m kòó.

8 Deedee bɔti ŋma ní man pée sòoǹ,

maa sòoǹ tinyimɔmbɔti àá biibii bɔti.

9 Tì sá ibaamɔn bɔti uciŋfiti cee,

ní ki sá deedee bɔti unyil cee.

10 Ní fōō tin man dàkèe kí yàntī animbil kúti,

kí fōō dinyil kí yàntī sindaariyamɔnti.

11 Man Iciin pɔ̄ɔ̄ kudaau ki jítiǹ abeedimbil kpataaa.

Tin ni bìǹ ki nyàab̀ee, tiba kaa bàn̄-mi.»

Iciin lēē i-ba ki dàkā

12 «Man di sá Iciin, m baasii wálifì ní.

M ŋáań tikɔkɔ nì nlandɔkɔ ní.

13 Kí fàŋkì ti-Dindaanee, a ná ikpiti dee.

Man ná dibadakal nì dilambil nì atuŋkpiti nì inyimɔn.

14 Man tundi di sá ḿ nīn sáŋkí binib kí nīn kpáafí-bi.

Man di baasii sá dinyil.

Man di yì mpɔn.

15 Man pu ní bibɔtiibi jīǹ dibeel,

ní biyidambi yōontí bimarabaamɔmbi.

16 Man pu ní bibɔtiibi ŋúb́ bi-timmu,

bi nì abɔtibil nì bibɔsoonliibi kɔkɔ.

17 Man néeń bin néeń-mee ní.

Bin yaa nyàab̀-mee kāntí-mi ní.

18 Man di tìì tigaajati nì tinyool,

nì tigaajawan tin yúntée nì dibútil.

19 Tiwan tin m pūǹee ŋān̄ ki jítiǹ sindaariyamɔmmɔnti,

tin m tììyee jítiǹ animbil kúti timɔntiil.

20 M còom̄ deedee saŋŋu pu ní,

ibaamɔn sàmbiyaamu pu ní m còom̄.

21 M tìì bin néeń-mee tigaajati,

ki gbēentí bi-dumpui tigaajawammɔntiil.

22 Ti-Dindaan péé péé ki náań-mi

ki wāatì ní ki nín náań tin kɔkɔ kíǹee.

23 M nìn pée bí doooo jaanjaan,

ki wāatì ní duulinya nín kíĺ kí nīn bí.

24 Bi nín màl̄-mee, tiŋkub kaa nìn bí,

inyimbul in jàkà nnyimee kaa nìn bí.

25 Kí wàatī ajoon ń nyā kí nīn bée,

kí wàatī ŋgbantamu ń nīn bée, man nìn pée bí ní.

26 Ti-Dindaan kaa nìn dá láá náań kitiŋ nì ipaan.

Waa nìn dá láá náań duulinya tampeepeekaam.

27 M nìn bí ŋyunti ŋun u nìn dū kutagbɔŋu ki báaǹee,

ŋyunti ŋun u nìn lūtì nloon ki māntìi tú tiŋkuee.

28 M nìn bí ŋyunti ŋun u nìn kpátì atagban ki bīiǹ kutaa puee,

nì ŋyunti ŋun tiŋku nyimbulii nìn tòoń nì mpɔnee.

29 U nìn yóoǹ tiŋku kikpaanyɔkɔ

kin nnyim kaa máaǹ kí gbí kí lákatée.

U nìn bíl̀ dinyeel din pu kitiŋ làá nīn tɔ́kɔ́ee.

30 Ŋyunti gbantee, m nìn bí u-cee kii utammakpilee.

Kutaa kamaayee m-bɔti nìn mɔ̄ǹ-u,

ní ŋyunti kamaa m nìn fàal̀ u-nimbiin.

31 M nìn fàal̀ kitiŋ kin u náańee pu,

ní an nìn mɔ̄ǹ-mi ḿ nīn bí binib kansikin.»

Unil un pílifí Iciin bɔtee bí mmɔnneeee!

32 «Kɔŋkɔnnee, m-biyaamu, pīlifìmaan-mi,

bin fōō m-saŋkiiyee bí mmɔnneeee!

33 Ní pīlifìmaan tibɔti tin m dàkà-nee kí kpántí biciŋfitiibi,

ní taa dū-tì kí fá.

34 Unil un pílifí m-bɔti,

ki pée bí m-punyɔkɔpu baabadal,

ki cí m-diiku punyɔkɔki nyɔkɔpuee bí mmɔnneeee!

35 Di sá yii un yaa ká-mee ká dimaŋfal,

ní ti-Dindaan dàkà udaan u-ŋanti.

36 Ama unil un yaa kaa ká-mee tìì u-ba ní tiweendi.

Bin kɔkɔ ná-mee néeń ŋkúm ní.»